LEKSION 13
No Panon ya Nababalaw so Dios Lapud Saray Palson Relihyon
No say Dios et aro, akin et dakdakel so gagawaen ya mauges na saray relihyon ya mangibabagan irerepresenta day Dios? Simpli labat so ebat, sikaray palso odino peken relihyon. Nababalaw so Dios lapud saray ibabangat tan gagawaen da. Panon ey? Anto kasi nalilikna na Dios ed satan? Tan antoy gawaen to?
1. Panon ya nababalaw so Dios lapud ibabangat na saray palson relihyon?
“Say katuaan na Dios et insalat” na saray palson relihyon ed “katilaan.” (Roma 1:25) Singa bilang, ag-ibabangat na dakel ya relihyon ed saray kamembro da so ngaran na Dios. Balet, ibabaga na Biblia ya kailangan ya usaren so ngaran na Dios. (Roma 10:13, 14) Ibabaga na arum ya lider na relihyon ya no walay aliwliwan nagawa, panlabayan kuno itan na Dios. Balet, aliwan tua ’tan. Agbalot manggawa so Dios na mauges. (Basaen so Santiago 1:13.) Makapaermen, lapud saray tilan ibabangat na saray relihyon, inmarawi so liknaan na totoo ed Dios.
2. Panon ya nababalaw so Dios lapud gagawaen na saray palson relihyon?
Ag-aaligen na saray palson relihyon so maaron panagtrato nen Jehova ed saray totoo. Ibabaga na Biblia ya “saray kasalanan [na palson relihyon] et atipon ya anggad tawen.” (Apocalipsis 18:5) Diad dakel lan taon, akibabali iray relihyon ed politika. Sinuportaan da ray guerra, tan sikaray nampapatey odino inabuloyan day pamatey ed dakel ya totoo. Wala ray lider na relihyon ya magarbo so panagbilay da, tan pipiliten da ray kamembro ra ya gastosan da ra. Pakanengnengan iratan ya agda kabat so Dios, kanian anggapoy karapatan da ya sikatoy irepresenta.—Basaen so 1 Juan 4:8.
3. Anto so nalilikna na Dios ed saray palson relihyon?
Kasin makakapasnok ka ed gagawaen na saray palson relihyon? Si Jehova ey, anto kasi nalilikna to? Inar-aro to ray totoo, balet kabusol to iray lider na relihyon ya aliway ibabangat tan panagtrato da ed saray kamembro da. Impromisa to ya naderal iray palson relihyon, tan “aglan balot naromog.” (Apocalipsis 18:21) Magano lan deralen na Dios so amin ya palson relihyon.—Apocalipsis 18:8.
DAKEL NI NAARALAN MO
Amtaen no anto ni ray iisipen tan nalilikna na Dios ed saray palson relihyon, tan amtaen met no anto ni ray arum ya ginawa da. Naaralan met no akin ya dapat et ag-itan manpatunda ed sika ya kabaten si Jehova.
4. Aliwan amin ya relihyon et aawaten na Dios
Panisiaan na dakel ya saray relihyon et singa nanduruman dalan ya pareparehon ompugta ed Dios. Balet, tua kasi itan? Basaen so Mateo 7:13, 14, insan ebatan iya:
Antoy ibabaga na Biblia tungkol ed dalan ya ompugta ed bilay?
I-play so VIDEO, insan ebatan iya.
Kasin ibabaga na Biblia ya dakdakel so relihyon ya aawaten na Dios?
5. Ag-ipapanengneng na saray palson relihyon so panangaro na Dios
Nababalaw so Dios lapud nanduruman gagawaen na saray relihyon. Say sakey ya graben ginawa da et nen akibabali ra ed saray guerra. Bilang alimbawa, i-play so VIDEO. Insan ebatan iraya.
Antoy ginawa na dakel ya simbaan nen World War II?
Antoy nibagam ed ginawa da?
Basaen so Juan 13:34, 35 tan 17:16. Insan ebatan iraya:
Anto kasi nalilikna nen Jehova no mibabali ed guerra iray relihyon?
Walay eebatan na saray palson relihyon ed dakel ya mauges ya nagagawa. Anto ray napapansin mon gagawaen na saray relihyon ya agda nipapanengneng so panangaro na Dios?
Ag-inalig tan ag-impanengneng na saray palson relihyon so panangaro na Dios
6. Labay na Dios ya tulongan iray totoo ya makapaway ed palson relihyon
Basaen so Apocalipsis 18:4,a insan ebatan iya:
Antoy nibagam natan ta naamtaan mon labay na Dios ya iligtas iray totoo ya aloko o atilaan na palson relihyon?
7. Itultuloy mon kabaten so tuan Dios
Kasin nadismaya ka lad Dios lapud gagawaen na saray palson relihyon? Imadyin mo pay sakey ya anak ya agto labay ya dengelen iray bilin nen tatay to. Linmayas so anak tan nagmaliw ya mauges so kabibilay to. Aglabay na ama so gagawaen na anak to. Duga kasi ya tetelen so ama ed mauges ya panagbilay na anak to?
Duga kasin tetelen si Jehova tan itundam lan kabaten lapud gagawaen na saray palson relihyon?
IBABAGA NA ARUM: “Agak interesado ed Dios ta say panlalapuan na dakel ya problema, say relihyon.”
Ontan met so iisipen mo?
Akin et agtayo dapat idamay si Jehova ed gagawaen na saray palson relihyon?
SUMARYO
Nababalaw so Dios lapud saray tilan ibabangat tan mauges ya kagagawa na saray palson relihyon. Deralen na Dios iray palson relihyon.
Rebyu
Antoy nibagam ed saray ibabangat tan gagawaen na saray palson relihyon?
Antoy nalilikna nen Jehova ed saray palson relihyon?
Antoy gawaen na Dios ed saray palson relihyon?
DISKOBRIEN
Aralen so duaran gagawaen na maslak ya relihyon ya aglabay na Dios.
“Parepareho Kasi so Amin ya Relihyon? Awaten Iran Amin Kasi na Dios?” (Artikulo ed website)
Akin et labay nen Jehova ya mandayew tayod sikato kaibay arum?
“Kasin Kaukolan Tayoy Magmaliw a Kabiangan na Sakey ya Relihyon?” (Artikulo ed website)
Naguguloan tan naaaburido so sakey ya pari ed relihyon to. Pero agsinmuko, inaral toy katuaan nipaakar ed Dios.
“No Akin ya Inmekal so Sakey a Pari ed Relihyon To” (Onliing!, Abril–Hunyo 2015)
Diad dakel ya taon, ibabaga na saray relihyon so katilaan nipaakar ed Dios, kanian manisia iray totoo ya maruksa so Dios tan anggapoy malasakit to. Amtaen so ibabaga na Biblia ed saratan ya taloran katilaan.
“Saray Katilaan Nipaakar ed Dios” (Say Panag-bantayan, Enero–Pebrero 2014)
a Pian naamtaan no akin ya imbaga na libron Apocalipsis ya saray palson relihyon et singa biin natatawag ya Makapanyarin Babilonia, nengnengen so Kaaruman ya Impormasyon 1.