Saray Reperensya Parad Workbook ed Aral
© 2024 Watch Tower Bible and Tract Society of Pennsylvania
MAYO 6-12
KAYAMANAN ED SALITA NA DIOS SALMO 36-37
“Agka Onsyosyodot Lapud Saray Mauges a Totoo”
Antoy Naandi No Onsabi Lay Panarian na Dios?
4 Antoy epektod sikatayo na gagawaen na mauges a totoo? Kayarin imbaga nen apostol Pablo ya diad sayan panaon et “onsabi iray mapeligro tan mair-irap a panaon,” sikatoy pinuyanan ya mangisulat: “Saray mauges a totoo tan saray impostor et magmaliw a lalon mauges.” (2 Tim. 3:1-5, 13) Kasin naiimanom ya nagagawa la itan ya propesiya? Dakel ed sikatayoy abiktima la na mauges ya totoo, singa saray bayolentin siga, saray masibeg ya terorista, tan saray andiay panangasin kriminal. Arum ed sikara et kabkabat lan mauges; saray arum balet et agda ipahalata, kunwari et matunong ira. Anggano agtayo asali so abiktima na ontan iran totoo, apektado ti nin siansia ed kagagawa da. Natatakot tayo no nababalitaan tayo ray graben krimen ya gagawaen da. Nabibigla tayod anggapoy panangasin pamapatey dad ugugaw, maedad, tan arum nin agda nidepensay sarili da. Say gagawaen na saratan ya mauges a totoo et singa agnagawaan na too, noagta inaayep tan dinedemonyo. (Sant. 3:15) Makapalikliket ta liligliwaen itayo nen Jehova panamegley na maong a balita ya walad Salita to.
Bebendisyonan nen Jehova Iramay Mameperdona
10 Sikatayo lanlamang so kaskasian no agtayo mamerdona. Labay nen Jehova ya ekalen tayod puso tayo so sakit na linawa pian nainawaan tayo. (Basaen so Efeso 4:31, 32.) Bibilinen to tayo ya ‘tundaan tayo lay manpasnok tan paliisan tayoy onsanok.’ (Sal. 37:8) Parad pankaabigan tayo lanlamang itan ya bilin. Ta no agtayo itan gawaen, ag-ondeen so nonot tayo tan naapektoan met lay laman tayo. (Pro. 14:30) No maneem-em kay sakit na linawa, say antam et makakabawi ka ed samay toon babarongan mo, pero diad tua et andi. Singa ka oniinum na samal ya say iisipen mon ompatey et sikato. Kanian anggapoy maabig ya resulta no manem-em kay sakit na linawa. Tandaan mo ya parad pankamaongan mo lanlamang no mamerdona ka. (Pro. 11:17) Ondeen so nonot tan pusom, tan agka ontabang ed panaglingkor mod si Jehova.
‘Manliga Kayo ed si Jehova’
20 Insan, “saray mauyamo tawiren da naani dalin.” (Salmo 37:11a) Balet siopa irayan “mauyamo”? Say salitan nipatalos a “mauyamo” so nanlapud pinagkalamot a salitan mankabaliksay “pairapen, ipaabeba, pabaingan.” On, “saray mauyamo” et saramay mapaabeban manaalagar ed si Jehova a mangipetek ed amin ya ag-inkahustisya a ginawa ed sikara. “Manliket ira a dili ed inkadaakan na kareenan.” (Salmo 37:11b) Anggan natan et makaromog itayo na daakan a kareenan ed espiritual a paraiso a nisiglaot ed tuan Kristianon kongregasyon.
Saray Espiritual a Kayamanan
mwbr24.05—it-2 445
Palandey
Mapekder, permanente, odino atagtagey. Saray palandey et ipapasen ya mabiskeg tan permanente. (Isa 54:10; Hab 3:6; ikompara so Sal 46:2.) Kanian sanen inkompara na salmista so inkatunong na Dios ed singa saray “palandey na Dios” (Sal 36:6 paimanod leksab) nayarin say labay ton ibaga et say inkatunong nen Jehova et mapekder. Odino lapud ataragey iray palandey, nayarin say idadanet na satan et mas atagtagey so inkatunong na Dios kompara ed inkatunong na too. (Ikompara so Isa 55:8, 9.) Nipaakar ed samay pangibales na komapiton yaong na sanok na Dios, oniay ibabaga na Apocalipsis 16:20: “Agla naromog iray palandey.” Ipapanengneng na satan ya anggan saray bengatlan atagtagey ya singa saray palandey et agmakatakas ed pangiyibung na sanok na Dios.—Ikompara so Jer 4:23-26.
MAGMALIW YA EPEKTIBO ED MINISTERYO
ijwbv 45
Say labay ya ibaga na Salmo 37:4
Papasesegen na salmista iray mandadayew ed Dios ya panliketan day mikaaro ed Sikato. No ontan so gawaen da, makasegurado iran iter nen Jehova a iray kerew tan labay da.
“Manliket kan maong ed si Jehova.” Sarayan salita et nayari met ya ipatalos ya “panliketan so panlilingkor ed KATAWAN,” odino “panliketan iray insipan ed sika na KATAWAN.” Labay ton ibaga, ‘magmaliw tayon maliket’ no panlingkoran tayo so tuan Dios. (Salmo 37:4) Akin et nibaga tayon ontan?
Saramay mandadayew ed si Jehova et aaligen day panagnonot to ya nabasa ed Biblia. Agda labat kakabaten so Dios, amta da met ya no sikatoy unoren da, parad pankaabigan da lanlamang. Bilang resulta, malinis so konsiensia ra tan naiwasan day makagaway lingo tan makapuy iran desisyon. Singa bilang, ag-ira makakaliknay pasnok odino inggit no nanenengneng dan maasensoy bilay na saray maagum o matilan totoo. (Salmo 37:1, 7-9) Maliket ira ta amta dan magano lan ekalen na Dios so amin ya ag-inkahustisya tan bendisyonan To iray matoor tan manggagaway kamaongan. (Salmo 37:34) Malikeliket met ira ta amta dan napapaimis tan aabobonan ira na Ama dad tawen.—Salmo 5:12; Proverbio 27:11.
“Iter tod sika iray pirawat na pusom.” Sarayan salita et nayari met ya ipatalos ya “ebatan to iray pikakasim” odino “iter toy labalabay mo.” Agto labay ya ibagan iter nen Jehova so anggan anto lad tan ya kerew tayo. Si Jehova et singa sakey ya maaron ateng ya amta to so sankaabigan parad ananak to. Kanian dapat ya saray kerew tan paraan na kabibilay tayo et base ed estandarte tan panlabayan to. (Proverbio 28:9; Santiago 4:3; 1 Juan 5:14) Ta no ontan, makapantiwala tayon dengelen itayo na “Dumerengel na pikakasi.”—Salmo 65:2; Mateo 21:22.
MAYO 13-19
KAYAMANAN ED SALITA NA DIOS SALMO 38-39
Ikbanan Mo Lay Liknaan ya Sobran Pakakakonsiensia
“Onnengneng a Diretso” ed Arapen
12 Basaen so 1 Juan 3:19, 20. Normal labat ya no maminsan et nakonsiensia itayo. Singa bilang, say arum et nakokonsiensia lapud saray ginawa ra antis dan naamtaan so katuaan. Wala ra met so nakokonsiensia lapud akagawa ray kasalanan nen bautismado la ra. (Roma 3:23) Siempre, labay tayon gawaen no antoy duga. Balet ibabaga na Biblia ya ‘amin tayo et nalilingo.’ (Sant. 3:2; Roma 7:21-23) Aliwliway liknaan no nakokonsiensia tayo, balet diad tua et walay pankaabigan to met itan. Akin ey? On ta no nakokonsiensia itayo, diman tayo natalosan ya walay kaukolan tayon umanen ed sarili tayo tan mas desidido tayo ya agla uliten so lingo tayo.—Heb. 12:12, 13.
13 Balet makapuy so epekto na sobran pakakakonsiensia—aya may nalikna na sakey no tuloytuloy ni ya nakokonsiensia anggano nagbabawi la tan mapatnag met ya pinerdona la nen Jehova. (Sal. 31:10; 38:3, 4) Akin et nibaga tayon makapuy so epekto to? Imanoen so imbaga na sakey a sister ya agaylay pakakakonsiensia to lapud saray kasalanan ya agawaan to nensaman. Imbaga to: “Inisip ko ya ayos labat anggano agko pasyaen so manlingkor ed si Jehova ta agak met lanlamang makaliktar.” Wala ray agagi tayo ya ontan so nalilikna ra. Importante ya agtayo manpapadaeg ed satan ya liknaan. Ta diad tua, manliket si Satanas no agtayo naperdonay sarili tayo tan ontunda tayo lan manlingkor, anta pinerdona itayo la nen Jehova!—Ikompara so 2 Corinto 2:5-7, 11.
Panon Tayon Gawaen a Makana Iray Agew Tayo ed si Jehova?
SARAY agew tayo so singa dagdaiset tan mapmaples ya onlalabas. Minolimoli nen salmista David so kinatikey na bilay kanian apakiwas a manpikasi: “Jehova, gawa moak a makapikabat na kasumpalan ko, tan say sukat na saray agew ko no anto kasi, ipaantam ed siak no panon so inkalupo’ko. Nia, sika ginawam so saray agew ko a singa sankalapar na lima, tan say taon ko a singa anggapo so nengneng to ed arapan mo.” Say kapagaan nen David et say pambilay a napaliket so Dios, diad panagsalita tan diad saray kiwas to. Diad impangibesngaw to ed panagmatalek ed Dios, inkuanto: “Say ilalok wala ed sika.” (Salmo 39:4, 5, 7) Dinmengel si Jehova. Talagan inusisa toray kimey nen David kanian tinumangan to unong ed saratan.
Mainomay so pagmaliw ya okupado ed kada minuto na sanagew tan kigalet ed bilay a mapmaples tan amayamay a kimey. Nayarin pansengegan iya na pirmin kapagaan tayo, nagkalalo la ta dakel so nagawaan tan naeksperiensya tayo balet daiset so panaon tayon manggawa’d satan. Kasin say kapagaan tayo et singa ed samay si David—say pambilay tayon naabobonan na Dios? Pian makaseguro, iimanoen tan uusisaen a maong nen Jehova so balang sakey ed sikatayo. Manga 3,600 taon lay apalabas et binidbir nen Job a toon walaan na takot ed Dios, ya inimano nen Jehova iray dalan to tan inusisa Ton amin iray kimey to. Madanet ya intepet nen Job: “Sano ondalaw, anto so yebat ko ed sikato?” (Job 31:4-6, 14) Posibli a nagawaan tayon makana iray agew tayo ed Dios diad pangiyuna ed espiritual, itulok ed saray ganggan to, tan pangusar a makabat ed panaon tayo. Imanoen tayon maong irayan bengatla.
Apigeren tan Pabiskeg Mo Lamet so Relasyon Mod si Jehova
Lanang kan mitongtong ed si Jehova. Ompan no maminsan et ngalngali agmo labay so manpikasi ta nakokonsiensia ka. Natatalosan itan nen Aman Jehova. (Roma 8:26) Pero labay to ya ‘seetan mo so manpikasi.’ Ibagam ed si Jehova ya labay mon gawaen so anggaay nayarian mo pian ompawil so maapit ya relasyon mod sikato. (Roma 12:12) Oniay nanonotan nen Andrej: “Talagan nakokonsiensia tan nababaingan ak ya maong. Pero kayarik ya manpikasi, onlelemew so liknaan ko tan ondedeen met lay nonot ko.” No agmo amta no antoy ipikasim, makatulong no basaen mo imay pikakasi nen Arin David ya akarekord ed Salmo 51 tan 65.
Saray Espiritual a Kayamanan
Ipanengneng Mo ya Napantiwalaan Ka
16 Kontrol ed sarili. No labay tayon pantiwalaan itayo na arum, dapat kontrolen tayoy dila tayo, lalo la no natutukso tayon ibaga ed arum iray agda nepeg ya naamtaan. (Basaen so Proverbio 10:19.) Nasubok so kontrol tayod sarili diad panguusar tayoy social media. No agtayo manalwar, ompan walay nai-post, nai-send o nai-comment tayo ya kompidensyal manaya. No naamtaan la itan na arum, agmo la nababawi. Ompan ipasa da met itan kanian posiblin manresulta itan ed problema. Importante met ya kontrolen tayoy dila tayo no piliten itayo na saray onsusumpa ya mangibaga na saray impormasyon ya mangipeligro ed bilay na agagi tayo. Posiblin nagawa iya ed saray lugar ya ibabawal na gobierno so kimey tayo. Ompan imbestigaan o tepet-tepetan itayo na saray pulis ta labay dan naamtaan no iner so kawalaan na saray agagi tayo. Diad ontan ya situasyon tan ed arum ni, iyaplika tayo imay prinsipyo na Biblia ya “balungosan” o alwaran tayoy sangi tayo. (Sal. 39:1) Importante ya napantiwalaan itayo na amin—saray kapamilya, kakaaro, agagi, tan anggan saray aliwan Tasi. Pian pantiwalaan da tayo, dapat walay kontrol tayod sarili tayo.
MAYO 20-26
KAYAMANAN ED SALITA NA DIOS
Akin et Ontulong Ka ed Arum?
Maliket Iray Totoon Maiter
16 Say tuan maiter ya too et agmanaalagar na kasalat. Ontan so walad nonot nen Jesus sanen imbangat to: “No mangiparaan kay ponsia, imbitaan mo iray pobri, lupoy, piley, bulag; tan naliketan ka, lapud ag-ira makabales ed sika.” (Luc. 14:13, 14) “Say mabunlok a too et nabendisyonan,” so imbaga na sakey pinuyanan a managsulat. Onia ni imbaga na sakey: “Maliket so siopaman a mangipapatnag na konsiderasyon ed samay pakaskasi.” (Pro. 22:9; Sal. 41:1) On, nepeg ya mangiter tayo lapud naliketan tayo no ontulong tayod arum.
17 Sanen inaon nen Pablo iray salita nen Jesus ya “mas makapaliket so mangiter nen say mangawat,” agto labat tutukoyen so pangiter na materyal iran bengatla noagta tutukoyen to met so pangiter na panamaseseg, panangigiya, tan tulong ed saray mankaukolan. (Gawa 20:31-35) Diad salita tan gawa, imbangat itayo nen apostol Pablo ya iter no antoy walad sikatayo—say panaon, biskeg, atension, tan panangaro tayo.
18 Naobserbaan met na saray researcher ed social science ya maliket iray totoon maiter. Unong ed sakey ya artikulo, “imbaga na totoo ya nagmaliw iran mas maliket kayari ran nanggaway kamaongan ed arum.” Ibabaga met na saray researcher ya importante so itulong ed arum pian nawalaan na “tuan gagala tan kabaliksan” so bilay “lapud pepeneken na satan iray manunan pankaukolan na too.” Kanian maslak et irerekomenda na saray eksperto so pamboluntaryo ed panlingkor ed totoo ta makatulong itan ed bunigas na laman da tan magmaliw iran maliket. Agla iya pankelawan na saray totoo ya aawaten day Biblia bilang Salita na maaron nandesinyo ed too, si Jehova.—2 Tim. 3:16, 17.
Asikasoen Ka nen Jehova
7 Anggaman ontan, nailaloan tayo ya no mansasakit itayo et ligliwaen tan suportaan itayo na Dios, ya singa ginawa tod saray lingkor to nensaman. Insulat nen Arin David: “Maliket so siopaman a mangipapatnag na konsiderasyon ed samay pakaskasi; sikatoy iliktar nen Jehova diad agew na kairapan. Sikatoy bantayan nen Jehova tan pansiansiaen ton mabilay.” (Sal. 41:1, 2, NW) Siempre, aglabay ya ibaga nen David ya agbalot ompatey so siopaman ya mangipatnag na konsiderasyon ed saray pakaskasi. Imbes, sikatoy matalek ya tulongan na Dios so ontan a too. Panon? Imbaga nen David: “Sikatoy asikasoen nen Jehova legan a walad dukolan a mansasakit; salatan moy dukolan to legay pansasakit to.” (Sal. 41:3, NW) On, amta nen Jehova so irap ya dadalanen na saray lingkor ton mansasakit tan agto lingwanan so katooran da. Ikdan to ra na pakpel tan karunongan. Sakey ni, denisinyo nen Jehova so laman tayo ya walay abilidad ton onabig lanlamang no mansakit tayo.
Aligen so Inkamaabagey nen Jehova
17 Anggano maong so epekto ed sika no maabagey ka, nepeg ya aliwan satan so manunan rason no akin ya labay moy magmaliw ya maabagey. Nepeg ya say manunan rason et labay mon aligen tan igloria so Lapuan na aro tan panangabagey, si Jehova a Dios. (Pro. 14:31) Sikatoy perpekton alimbawa ed sikatayo. Kanian komon ta gawaen tayoy amin ya nayarian tayo ya aligen so Dios diad pangipanengneng tayoy panangabagey. Diad ontan et onelet so aroan tayo ran sanaagi tan nawalaan tayoy maong ya relasyon ed kaparan too.—Gal. 6:10; 1 Juan 4:16.
Saray Espiritual a Kayamanan
mwbr24.05—it-2 16
Jehova
Say interon salaysay na Biblia et ontetelek ed kiyalangon na soberanya nen Jehova, tan idadanet na satan so manunan gagala nen Jehova ya Dios: say pamasanto ed mismon ngaran to. Kaibad satan ya pamasanto so panlinis ed ngaran na Dios ed amin ya pakabalawan. Balet aliwan satan labat, kailangan met ya igalang na amin ya matalinon pinalsa diad tawen tan dalin iyan sagradon ngaran. Labay ton ibaga, bidbiren da tan respetoen da so inkasoberano nen Jehova, gawaen da itan ya agnapipilitan tan maliket dan panlingkoran tan gawaen so linawa to lapud inaro da. Ontan ya ontan so ginawa nen David ed samay pikakasi to ed si Jehova ya walad Salmo 40:5-10, talagan pinasanto to so ngaran nen Jehova. (Imanoen ya inyaplika na apostol iray kabiangan na sayan salmo ed si Jesus diad Heb. 10:5-10.)
MAYO 27–HUNYO 2
KAYAMANAN ED SALITA NA DIOS SALMO 42-44
Manpaigiya ed Panangibangat nen Jehova
Saray Pabitar ed Komaduan Libro na Salmo
42:4, 5, 11; 43:3-5. No lapud pigaran agnapaliisan a rason et temporaryon niarawi itayo manlapud Kristianon kongregasyon, saray gayaga ed apalabas ya impilimog tayo so mamabiskeg ed sikatayo. Anggaman diad primero et mamaermen a tuloy itan ed sikatayo, ipanonot met na satan ed sikatayo a say Dios so pinagkasalimbengan tayo tan kaukolan tayo so manilalo ed sikato parad pakainawaan.
Gawaen a Mas Makapaliket tan Makagunggona so Panagaral
1 MANPIKASI: Say unonan kundang et say pampikasi. (Sal. 42:8) Akin? Nepeg tayon ipasen a say panagaral na Salitay Dios et kabiangan na panagdayew tayo. Kanian, kaukolan tayon kerewen ed si Jehova ya nawalaan tayoy akaparaan a nonot tan ikdan to itayoy masanton espiritu to. (Luc. 11:13) Oniay inkuan nen Barbara, ya abayag lan misionera: “Lanang ak ya manpipikasi antis ak a manbasa odino manaral na Biblia. Kayari to et naliknak a kaibak si Jehova tan sikatoy naliliketan ed gagawaen ko.” Say pampikasi antis a manaral et mangilukas ed nonot tan puso tayo pian sigpot ya awaten so daakan ya espiritual a tagano ya nitarya ed sikatayo.
“Agkomon Onlaylay Iray Limam”
11 Napapabiskeg tayo met ed saray panangibangat nen Jehova diad saray aral, asemblea, kombension, tan saray teokratikon eskuelaan. Makatulong iratan ya panangipasal pian napakiwas itayo, pian manggawa tayoy goal ed espiritual, tan pian nagawaan tayoy ray responsabilidad tayo ed kongregasyon. (Sal. 119:32) Kasin aabuloyan mon napabiskeg ka na saratan ya panangibangat nen Jehova?
12 Tinulongan nen Jehova iray Israelita pian natalo da ray Amalekita tan saray Etiope, tan pinabiskeg toy Nehemias tan saray kakaiba to pian nasumpal day pangaapiger dad padir. Seguradon pabiskegen itayo met na Dios pian nasarag tayo ray isusumpa, panagbalaw, tan kapagaan, diad ontan et nituloy tayoy panagpulong a kimey. (1 Ped. 5:10) Agtayo iilaloan ya manggaway milagro si Jehova parad sikatayo. Imbes, kaukolan tayon gawaen so responsabilidad tayo. Kaiba ed satan so inagew-agew ya panagbasa na Biblia, panagparaan tan iyatendi ed saray sinimban aral, pamakan tayod nonot tan puso tayo panamegley na personal a panagaral tan panagdayew na pamilya, tan lanang ya pampikasi ed si Jehova. Agtayo aabuloyan iray arum ya kimey tan aktibidad ya mangamper ed saray uusaren nen Jehova pian pabiskegen tan pasesegen itayo. No nalikas mon onlalaylay lay limam diad anggan dinan ed saraya, patulongan kad si Jehova. Insan mo obserbaan no panon kan pabiskegen na espiritu to, ‘ya mangiiter ed sika na panlabay tan pakayarin onkiwas.’ (Fil. 2:13) Anto balet so gawaen mo pian napabiskeg moy lima na arum?
Saray Espiritual a Kayamanan
mwbr24.05—it-1 1242
Jakal
Diad kasulatan, aminpigan inusar iray ason jakal diad simbolikon paraan. Pian ideskribe so pakaskasin kipapasen nen Job, imbaga to ya sikatoy nagmaliw ya “agi na saray ason jakal.” (Job 30:29) Nipaakar ed makapabaing ya impakatalo na totoo na Dios, say salmista, ya nayarin say tutukoyen to et say lugar ya agawa so panlalaban tan wadman iray nantitipon ya ason jakal ya mamangan ed saray apatey (ikompara so Sal 68:23), et oniay maer-ermen ya imbaga to: “Sikami impatalom diad ayaman na saray ason jakal.” (Sal 44:19) Lapud sinakop na Babilonia so Jerusalem nen 607 B.C.E. walay agawan graben eras, ya lapud satan et marukruksa so impantrato na saray kainaan ed mismon ananak da. Kanian impandumaan nen Jeremias so inkaruksa na ‘baley to’ ed saray ason jakal ya papasusoen da ray oken da.—Tag 4:3, 10.
HUNYO 3-9
KAYAMANAN ED SALITA NA DIOS SALMO 45-47
Kansion Tungkol ed Bansal na Ari
Manliket ed Pankasal na Kordero!
8 Basaen so Salmo 45:13, 14a. Talagan makapadinayew so itsura na nobyad bansal to. Diad Apocalipsis 21:2, say nobya et nikomparad sakey a syudad, say Balon Jerusalem, tan sikatoy “kinawesan a marakep parad piasawaan to.” Walad sayan syudad ed tawen so “gloria na Dios” tan masmasnag, “singa say sankamablian a bato, singa baton jaspe a maliwliwawan singa kristal.” (Apo. 21:10, 11) Balibali so impaneskribe na libro na Apocalipsis ed kasnagan na Balon Jerusalem. (Apo. 21:18-21) Kanian talagan makapadinayew so itsura na nobya! Duga met labat itan ta say bansal et nagawad tawen.
9 Inyakar so nobya ed Nobyo to—say Mesianikon Ari. Abayag to lan ipaparaan so nobya to, a “lilinisan tan uurasan toy danum na salita na Dios.” Say nobya et “masanto tan andian na pakabalawan.” (Efe. 5:26, 27) Nepeg met ya marakep so kawes na nobya parad sayan okasyon. Tan talagan marakep! ‘Say kawes to et walaan na balitok,’ tan sikatoy ‘niyakar ed ari tan akakawes na ginansilyo.’ Diad pikasal tod Kordero, say nobya et “naabuloyan a mangisulong na masileng, malinis, tan pinon lienzo, ta say kabaliksan na pinon lienzo et saray matunong a gawa na saray masanto.”—Apo. 19:8.
Apocalipsis—Say Epekto To ed Bilay Mo ed Arapen
10 Antoy gawaen nen Jehova no atakien la na Gog na Magog iray lingkor to? Imbaga to: “Ondalang so baleg a sanok ko.” (Eze. 38:18, 21-23) Nabasa ed Apocalipsis kapitulo 19 no antoy ontumbok ya nagawa. Ibaki nen Jehova si Jesus pian protektaan iray lingkor To tan deralen iray kalaban. Kaiba nen Jesus ya milaban “iray armada ed tawen”—saray matoor ya anghel tan say 144,000. (Apo. 17:14; 19:11-15) Antoy resulta na sayan guerra? Naderal so amin ya organisasyon tan totoo ya onkokontra ed si Jehova!—Basaen so Apocalipsis 19:19-21.
11 Imadyin mo pay nalikna na saray makaliktar ya lingkor na Dios diad dalin no aderal lan amin iray kalaban na Dios. Seguradon malikeliket ira! Diad tawen et oneyag ira ed liket no naderal la so Makapanyarin Babilonia. Pero wala ni tatalaranan dan mas makapaliket. (Apo. 19:1-3) Diad tua, sakey itan ed saray sankaimportantian a nagawa ya abitla ed Apocalipsis—say “kasal na Kordero”!—Apo. 19:6-9.
12 Kapigan nagawa iyan kasal? Wala lad tawen so amin ya kabiangan na 144,000 antis ya mismo na Armagedon. Pero aliwa nin saman so pankasal na Kordero. (Basaen so Apocalipsis 21:1, 2) Nagawa so kasal na Kordero kayari na Armagedon, no aderal lan amin so kakabusol na Dios.—Sal. 45:3, 4, 13-17.
mwbr24.05—it-2 1169
Guerra
Kayari na sayan guerra, magmaliw lan mareen so interon dalin diad loob na sanlibon taon. Sayan salmo ya mangibabagan “papatundaen [nen Jehova] ray guerra diad interon dalin. Puputeren to ray pana tan dederalen to ray gayang; popoolan to ray kariton a parad guerra,” so walaan na unonan kasumpalan sanen ginawa nen Jehova ya mareen so dalin na Israel diad impaneral to ed saray armas na saray kalaban. Kayarin taloen na Kristo iray kalaban diad guerra na Armagedon, sigpot lan panliketan diad interon dalin so kareenan. (Sal 46:8-10) Saray nawalaan na bilay ya anggapoy anggaan et saramay “pitpiten da ray espada ra pian gawaen a tarem na lukoy tan saray gayang da et gawaen dan palot” tan ‘agmet la ra manaral a miguerra.’ “Ta sinalita iyan mismo nen Jehova na saray armada.”—Isa 2:4; Miq 4:3, 4.
Saray Espiritual a Kayamanan
Antoy Naandi No Onsabi Lay Panarian na Dios?
9 Antoy onsalat ed saray mapalikdon organisasyon? Kayari Armagedon, wala ni kasi organisasyon diad dalin? Oniay ibabaga na Biblia: “Walay balon tawen tan balon dalin ya aalagaren tayo unong ed sipan to, tan diad saraya et manayam so inkatunong.” (2 Ped. 3:13) Anggapo lay daan ya tawen tan dalin, saray mapalikdon gobierno tan saray manpapasakop ed sikara. Antoy onsalat ed saratan? Say labay ya ibaga na “balon tawen tan balon dalin” et walay balon gobierno tan balon sakop na satan. Say Panarian ya uleyan nen Jesu-Kristo so perpekton mangipatnag ed personalidad nen Jehova, say Dios na uksoy. (1 Cor. 14:33) Kanian say “balon dalin” et organisado. Wala ray kualipikadon lalaki ya mangasikaso. (Sal. 45:16) Sikaray idaulo nen Kristo tan saray 144,000 ya kaiba ton manuley. Imadyin mo pay panaon sano amin ya mapalikdon organisasyon et nasalatan na saksakey, nankakasakey, tan matunong ya organisasyon!
MAGMALIW YA EPEKTIBO ED MINISTERYO
ijwbv 26
Say labay ya ibaga na Salmo 46:10
Papasesegen na Dios so amin ya totoo ya mandayew irad sikato tan bidbiren da so kanepegan ton manuley diad interon dalin. Sankapatnagan so pakayari tan autoridad na Dios, tan siopaman a malabay ya manbilay ya anggapoy anggaan et kaukolan ton bidbiren itan.—Apocalipsis 4:11.
“Suko ki la tan amtaen yo a siak so Dios.” Diad arum iran bersion na Biblia, impatalos so unonan parte na sayan balikas ya “deen ka.” Kanian aliway pakatalos na dakel ya totoo ed satan, iisipen da ya kaukolan so pagmaliw ya marespeto odino ideen no walad simbaan. Balet diad samay Hebreon balikas ya impatalos bilang “suko ki la tan amtaen yo a siak so Dios” et bibilinen nen Jehova a a Dios iray totoo ed amin ya nasyon, tan papasesegen to ran itunda da lay ikontra ed sikato tan bidbiren da ya sikato labat so makanepegan ya dayewen.
Naromog tayo so miparan panamilin diad Salmo. Ditan et impromisa na Dios ya deralen to iray onkokontra ed sikato. Balet saramay bibidbiren day autoridad na Dios et mandedepende ed sikato pian naikdan iray panangigiya, biskeg, tan karunongan. ‘Papasalimbengan ira ed Sikato’ kanian maliket tan maligen so liknaan da, lalo la diad mair-irap ya panaon.—Salmo 2:9-12.
“Nitandoro ak ed limog na saray nasyon; nitandoro ak diad dalin.” Nensaman, nitandoro si Jehova a Dios nen inusar to so baleg a pakayari to pian protektaan iray totoo to. (Exodo 15:1-3) Diad arapen, nitandoro lamet so Dios diad mas malaknab ya paraan sano manpasakop la ed autoridad to so amin ya totood dalin tan mandayew irad sikato.—Salmo 86:9, 10; Isaias 2:11.
Antoy Ibabaga na Biblia ed Homoseksualidad?
Wala ray mangibabaga ya susuportaan na Biblia so pambusol ed saray homoseksual, tan saramay manguunor ed ganggan na Biblia et panatiko. Ibabaga da ya ‘say Biblia et insulat nen panaon ya saray totoo et kulang na pakatalos. Natan et aawaten tayo la so amin a totoo antokaman so lahi, bansa, tan seksualidad ya labay da.’ Parad sikara, say pambusol ed homoseksualidad et mipara ed pambusol ed saray totoon dumay lahi da. Duga kasi itan? Andi. Akin ey?
Lapud walay pandumaan na pambusol ed homoseksual a kagagawa tan pambusol ed homoseksual ya too. Ibabaga na Biblia ya nepeg ya respetoen na saray Kristiano so amin a klase na totoo. (1 Pedro 2:17) Balet aglabay ya ibaga na satan a nepeg ya awaten na saray Kristiano so amin lan kagagawa.
Singa onia ’tan ay: Parad sika et makapuy ed laman so panagsigarilyo tan kabkabusol mo ni ingen. Panon to no walay katrabahom ya mansisigarilyo? Kasin nibaga ya kulang kay pakatalos ta parad sika et makapuy so panagsigarilyo balet parad sikato et andi? Kasin labay ya ibaga na satan ya bubusolen moy katrabahom? No piliten to ka ya awaten so panagsigarilyo, agta sikato so kulang na pakatalos tan panatiko?
Uunoren na saray Tasi nen Jehova iray ganggan ed Biblia. Agda labay iray kagagawa ya isesebel na Biblia. Balet agda babalawen o bubusolen iray totoo ya say kagagawa ra et duma ed sikara.
HUNYO 10-16
KAYAMANAN ED SALITA NA DIOS SALMO 48-50
Atateng—Pabiskeg Yoy Tiwala na Pamilya Yo ed Organisasyon nen Jehova
Makapaliket so Mandayew ed si Jehova!
11 Dadayewen tayo si Jehova kada no aaralen tayoy Salita to tan ibabangat tayoy ananak tayo tungkol ed sikato. No agew na Sabaton, agmankikimey iray Israelita kanian pagkakataon da iman pian pabiskegen so espiritualidad da. (Exo. 31:16, 17) Ibabangat na saray matoor ya Israelita iray ananak da tungkol ed si Jehova tan iistoryaen day amin ya kamaongan tod sikara. Ontan met so nepeg tayon gawaen natan. Dapat walay eskedyul tayon basaen tan aralen so Biblia. Tandaan tayo ya parte itan na panagdayew tayo. Kaukolan itan pian mas nakabkabat tayoy Jehova tan mas onasingger so liknaan tayod sikato. (Sal. 73:28) Tan no walay eskedyul tayo met ya manaral bilang pamilya, tutulongan tayo so ontumbok iran henerasyon—saray ananak tayo—ya nakaaro da met si Aman Jehova.—Basaen so Salmo 48:13.
Walay Sengegan na Panggayaga Yo
“Manakar kayo ed abay na Sion, ya onliber kayo ed abay to: bilang yo so saray ilang to: Tandaan yo a maong so saray kuta to. Imanoen yo so palpalasyo to; pian nayarian yo a tongtongen ed mantumbok a kailalakan.” (Sal. 48:12, 13) Pinaseseg na salmista iray Israelita a nengnengen dan maong so Jerusalem. Kasin naiimadyin yo iray makapalikliket ya naeksperiensya na saray Israelitan pamilya diad impanbiahe ra ed masanton syudad parad tinaon iran piesta tan anengneng da so marakdakep a templo ditan? Seguradon apakiwas iran ‘itongtong itan ed mantumbok a kailalakan.’
Nonoten pa so reyna na Sheba, a nen primero et agni manisia ed saray narerengelan to nipaakar ed alay abig a pananguley tan malaknab a kakabatan nen Solomon. Antoy akakombinse ed sikato kanian anisiaan to iray nadngel to? Inkuan to: “Agko sinisia so saray salita ra, anga ed inyakar ko dia, tan saray dili a matak . . . anengneng da.” (2 Awa. 9:6) On, saray nanenengneng na ‘dilin mata’ tayo et mangapektan maong ed sikatayo.
Panon yon natulongan iray ananak yo a nanengneng so makapadinayew ya organisasyon nen Jehova ed ‘dilin mata’ ra? No walay sangan opisina na saray Tasi nen Jehova ya asingger ed panaayaman yo, panggunaetan yoy ombisita. Singa bilang, si Mandy tan Bethany et binmaleg ed lugar ya manga 1,500 a kilometro so kaarawi to ed Bethel diad bansa ra. Balet, implano na atateng day mabetbet a pan-tour ed saray pasilidad na Bethel, lalo la nen ombabaleg ni labat iray ananak da. “Nen agkami ni akakar ed Bethel, say amta mi et masyadon seryoso ditan tan para labat ed saray matatatken,” so kuan da. “Balet ta walaray akabat mi ditan a kalangweran ya makulikulin mankikimey parad si Jehova tan panliliketan da itan! Anengneng mi ya say organisasyon nen Jehova et malaklaknab manaya, tan kada ibisita mi ed Bethel mas lalon napapabiskeg so espiritualidad mi.” Diad impakanengneng dan maong ed organisasyon na Dios, apakiwas si Mandy tan Bethany ya manpayunir, tan naimbitaan ni ra ingen ya temporaryon manboluntir ed Bethel.
Manugali Kayo Bilang Mibabaley na Panarian!
5 Aralen so history. Say sakey a manaaplay parad citizenship ed sakey a bansa et kaukolan a walay amta to nipaakar ed history na gobierno na bansan laen to. Ontan met, lapud labay tayoy magmaliw a mibabaley na Panarian, kaukolan tayon aralen so amin a nayarian tayo nipaakar ed Panarian na Dios. Nepeg tayon aligen iray anak nen Kora a nanlingkor ed Israel nensaman. Inad-aro day Jerusalem tan say pasen a panagdayewan, tan labalabay dan itongtong so history na satan a syudad, aliwan lapud marakdakep itan noagta lapud satan so “syudad na balbaleg ya Ari,” si Jehova. Diad satan a pasen nibabangat iray totoo nipaakar ed Ganggan nen Jehova tan ditan met ira mandadayew ed sikato. Saray totoon uuleyan na Ari na Jerusalem so pangipapanengnengan nen Jehova na maaron-kaabigan to. (Basaen so Salmo 48:1, 2, 9, 12, 13.) Singa sikara, kasin labalabay mon aralen tan istoryaen so history na organisasyon nen Jehova diad dalin? No kapigan ondarakel so nanaaralan mod organisasyon nen Jehova tan no panon ton susuportaan so totoo to, mas magmaliw a tua ed sika so Panarian to. Saya so mamakiwas ed sikan ipulong so maong a balita na Panarian.—Jer. 9:24; Luc. 4:43.
Saray Espiritual a Kayamanan
mwbr24.05—it-2 805
Kayamanan
Bilang mayaman a nasyon, panliliketan na saray Israelita so mangan tan oninum (1Ar 4:20; Ec 5:18, 19), tan lapud kayamanan da, aprotektaan ira manlapud saray problema na kairapan. (Pro 10:15; Ec 7:12) Balet anggano mitunosan itan ed gagala nen Jehova ya panliketan na saray Israelita so sagpot da (ikompara so Pro 6:6-11; 20:13; 24:33, 34), sineguro to ya napasakbayan ira ed peligro ya nayarin sikatoy nalingwanan da bilang lapuan na kayamanan da, tan nayarin manmatalek la ra ed saray kayamanan da. (De 8:7-17; Sal 49:6-9; Pro 11:4; 18:10, 11; Jer 9:23, 24) Pinasakbayan ira ya saray kayamanan et temporaryo labat (Pro 23:4, 5), tan ag-iratan nayarin iter ed Dios bilang panondon pian ibulos so sakey manlapud ipapatey (Sal 49:6, 7), tan ag-iratan naawit na sakey no sikatoy ompatey (Sal 49:16, 17; Ec 5:15). Impanengneng ed sikara ya no sobray panamabli da ed saray kayamanan, manresulta itan ed panagsaol tan pakaandi na panangabobon nen Jehova. (Pro 28:20; ikompara so Jer 5:26-28; 17:9-11.) Pinaseseg met ira ya ‘igalang day Jehova diad panamegley na mablin kaykayarian da.’—Pro 3:9.
HUNYO 17-23
KAYAMANAN ED SALITA NA DIOS SALMO 51-53
No Panon Mon Naiwasan so Panggaway Seryoson Kasalanan
Panon Mon Naalwaran so Pusom?
4 Diad Proverbio 4:23, inusar so salitan ‘puso’ pian tukoyen so ‘peteg ya inkatoo.’ (Basaen so Salmo 51:6 tan paimanod leksab.) Labay ton ibaga, say “puso” et ontutukoy ed kanonotan, liknaan, motibo, tan pilalek tayo. Ontutukoy itan ed no anton talagay walad loob tayo, aliwan no antoy nanenengneng ed sikatayo.
5 Pian natalosan tayo ya importante no anton talagay walad loob tayo odino say peteg ya inkatoo tayo, ikompara tayo itan ed kondisyon na laman tayo. Unona, pian mansiansian maksil so laman tayo, nepeg ya masustansia iray kakanen tayo, tan regular tayon man-ehersisyo. Mipadpara, pian mansiansian mabiskeg so espiritualidad tayo, nepeg ya mangan tayoy masustansian espiritual ya naakan tan regular tayon ipanengneng so pananisia tayo ed si Jehova. Nipanengneng tayo itan no iyaplika tayoy nanaaralan tayo tan itongtong tayod arum so pananisia tayo. (Roma 10:8-10; Sant. 2:26) Komadua, no say pangibasiyan tayo labat et say itsura tayo, ompan isipen tayon maksil so laman tayo balet diad tua et wala la manayay sakit tayo ed puso. Mipadpara, no say pangibasiyan tayo labat et say teokratikon rotina tayo, ompan isipen tayo ya mabiskeg so pananisia tayo, balet ompan wala la manayay ontutubon mauges iran pilalek ed puso tayo. (1 Cor. 10:12; Sant. 1:14, 15) Tandaan, labay nen Satanas ya impluensyaan to tayo pian naalig tayoy panagnonot to. Panon ton gagawaen itan? Tan panon tayon naprotektaan so sarili tayo?
Sarag Tayoy Mansiansian Malinis ed Moral
5 No naynay tayon manpipikasi, tulongan itayo nen Jehova pian nalabanan iray mauges a kanonotan. Ikdan to tayoy masanton espiritu to pian mas determinado tayon mansiansian malinis ed moral tan labanan so imoral ya panagnonot. Ibaga tayod si Jehova ya sikatoy labalabay tayon paliketen diad saray dadalepdepen na puso tayo. (Sal. 19:14) Kasin ipipikasi tayon usisaen nen Jehova so puso tayo pian nanengneng to no wala ra ditan so makapuy a pilalek odino motibo ya manresultad pankasalanan tayo? (Sal. 139:23, 24) Kasin regular tayon ipipikasi ya tulongan to itayon mansiansian matoor no wala ray tukso?—Mat. 6:13.
6 Ompan say impamabaleg odino saray datin kagagawa tayo so rason no akin ya wala ray makapuy ya pilalek tayo. Anggaman ontan, tulongan itayo nen Jehova ya manguman pian nagawaan tayoy linawa to. Singa bilang, nen akikalugoran si Arin David ed si Batseba, sikatoy nagbabawi tan nampikasi ed si Jehova: “Gawam pan malinis so pusok, . . . tan ikdan mo ak na sakey a balo tan mapekder ya espiritu.” (Sal. 51:10, 12, NW) Lapud agtayo perpekto, nayarin say labalabay tayon gawaen et makapuy, balet sarag itayon tulongan nen Jehova pian mas mabiskeg so pilalek tayon gawaen so duga. Anggano linmamut lad puso tayo iray makapuy ya pilalek, sarag itayon igiya nen Jehova pian naunor tayo ray ganggan to tan niyaplika iratan. Tulongan to itayon nakontrol so agperpekton kanonotan tayo.—Sal. 119:133.
Saray Espiritual a Kayamanan
mwbr24.05—it-1 644
Doeg
Sakey ya Edomita ya manlilingkor bilang pangulo na saray managpastol nen Arin Saul, sakey ya responsablin betang na panangidaulo. (1Sa 21:7; 22:9) Ompapaway ya sakey ya proselita si Doeg. Lapud “nansiansia ed arapan nen Jehova” diad Nob, posible ya lapud sakey ya samba, agmalinis, odino nayarin akating, anengneng nen Doeg ya inikdan na Atagey a Saserdoten si Ahimelec si David na abasto tan inter to so espada nen Goliat. Ag-abayag, nen imbaga nen Saul ed saray lingkor to ya nankokomplot iran amin sumpad sikato, impaamta ton amin no antoy anengneng to diad Nob. Kayarin impatawag so atagey ya saserdote tan arum nin saserdote diad Nob tan tinepetan si Ahimelec, ingganggan nen Saul iray bumabatik ya pateyen iray saserdote. Nen agda labay, ingganggan nen Saul si Doeg tan tampol ton pinatey so amin ya 85 ya saserdote. Kayari na sayan mauges ya agawa, pinatey met nen Doeg so amin ya manaayam ed Nob, ugaw may matatken pati saray ayayep da.—1Sa 22:6-20.
Singa nanengneng ed superskripsion na Salmo 52, oniay insulat nen David tungkol ed si Doeg: “Say dilam a makdem a singa labahas,et manggegetmay makapasakit tan mamapalikdo. Mas inarom so kaugsan nen say kamaongan, say panagtila nen say pansalita na duga. Labalabay moy amin a salitan makapasakit, O dila a mapalikdo.”—Sal 52:2-4.
HUNYO 24-30
KAYAMANAN ED SALITA NA DIOS SALMO 54-56
Kaibam so Dios
Magmaliw a Makabat—Takotan so Dios!
10 Diad aminsan ya inkagawa, si David so nanamot ed kawalaan nen Akis, say ari ed Filisteon syudad na Gat, say binalegan nen Goliat. (1 Samuel 21:10-15) Saray lingkor na ari so angondena ed si David bilang kabusol na bansa ra. Panon so inkiwas nen David ed ontan a mapeligron kipapasen? Sikato so masimoon a nampikasi ed si Jehova. (Salmo 56:1-4, 11-13) Anggaman kinaukolan to so mankuankuanan a naatapis pian makatakas, amta nen David a si Jehova so talagan angiliktar ed sikato diad impanumang To ed saray sagpot to. Say interon-puson impanmatalek nen David ed si Jehova tan say kompiyansa to ed Sikato so pakapatnagan a si David so talagan walaay takot ed Dios.—Salmo 34:4-6, 9-11.
11 Singa si David, nipatnag tayo met so takot ed Dios diad panmatalek ed sipan ton tulongan to itayon manalona ed saray problema tayo. “Ipiam ed Jehova so dalan mo; manmatalek ka met ed sikato: et sikato igawa to,” so kuan nen David. (Salmo 37:5) Ag-itan mankabaliksan ya ipalima tayo labat ed si Jehova iray problema tayo insan anggapo lay gawaen tayo, ya ilaloan tayo lan sikatoy manolbar ed problema tayo. Si David so aglambengat kinmerew na tulong ed Dios panamegley na pikakasi insan impalima to lan amin. Inusar to so abilidad to ed pisikal tan say pakasarag ton manisip ya inter nen Jehova ed sikato pian nasolbar toy problema to. Ingen, amta nen David ya ag-onaligwas so sagpot labat na too. Kanian nepeg ya ontan itayo met. No ginawa tayo lay anggaay nayarian tayo, nepeg tayon imatalek la ed si Jehova so arum niran bengatla. Diad tua et mabetbet ya anggapoy nagawaan tayo noag say manmatalek ed si Jehova. Diad ontan a kipapasen so pakapangipatnag tayon mismo na takot ed Dios. Naligliwa itayo ed impapuso iran balikas nen David: “Say pikakaaro ed Jehova wala ed saray ontakot ed sikato.”—Salmo 25:14.
Anggapo so ‘Makapangisian ed Sikatayo ed Aro na Dios’
9 Papablien met nen Jehova so panagsungdo tayo. (Mateo 24:13) Tandaan, labay nen Satanas ya ibeneg mo si Jehova. Diad kada agew a mansiasiansia kan matoor ed si Jehova et sakey lamet ya agew ya akatulong ka pian naebatan iray kantiaw nen Satanas. (Proverbio 27:11) No maminsan et aliwan mainomay so panagsungdo. Saray problema ed bunigas, kairapan ed pinansyal, detdet ed emosyon, tan arum niran babeng so manggawa ed kada onlabas ya agew a makapasubok. Say kiguntang na saray iilaloan so nayarin makapadismaya met. (Proverbio 13:12) Say pansungdo anggaman ed saratan ya angat so nagkalalon mabli ed si Jehova. Satan so rason no akin a kinerew nen Arin David ed si Jehova a tiponen to iray lua to diad ‘botelya,’ ya inyarum to a tekep na talek: “Anggapo ta’ra ed librom?” (Salmo 56:8) On, papablien tan tatandaan nen Jehova so amin a lua tan kairapan a susungdoan tayo legan a manmamatoor itayo ed sikato. Saratan met so mabli ed imaton to.
Taloen na Panangaro so Takot
16 Amta nen Satanas ya inaro tayoy bilay tayo. Pero ibabaga to ya gawaen tayo kunon amin pian labat naisalba tayoy bilay tayo anggano naderal so relasyon tayod si Jehova. (Job 2:4, 5) Dakel la balet ya lingkor nen Jehova so nampatunay ya aliwan tua itan. Pero lapud walay pakayari nen Satanas ya mamatey tan amta to ya antakot tayoy ompatey, uusaren to itan ya takot pian agtayo la unoren si Jehova. (Heb. 2:14, 15) Uusaren to met iray alipores to pian taktakoten iray lingkor nen Jehova ya pateyen da ra no agda ikbanan so katooran da. No maminsan, samboten nen Satanas ya tuksoen itayon ibaliwala iray prinsipyo nen Jehova no nipepeligro lay bilay tayo lapud graben sakit o antokaman ya emergency. Diad onia ran situasyon, ompan piliten itayo na saray doktor o kapamilya tayon aliwan Tasi pian manpasaksak itayo na dala. Ompan wala met so mankombinsi ed sikatayo ya salien tayoy sakey ya klase na therapy o panagpatambal ya kontra ed prinsipyo na Biblia.
17 Natatalosan nen Jehova ya agtayo labay so ompatey, pero ipapaseguro tod sikatayo ya “anggan say patey . . . et agbalot makapangisian ed sikatayo ed panangaro [to].” (Basaen so Roma 8:37-39.) Agbalot lingwanan nen Jehova iray inatey lan kakaaro to. Diad tua, ibabaga na Biblia ya diad nonot to et mabilay iran amin. (Luc. 20:37, 38) Ontan lay panangaro tod sikara kanian labalabay to la ran bilayen. (Job 14:15) Balbaleg ingen so imbayar to pian “nawalaan [itayo] na bilay ya andi-anggaan.” (Juan 3:16) On, tandaan tayo ya inar-aro itayo nen Jehova tan mabmabli tayo ed pakanengneng to. Kanian imbes ya agka manmatoor ed si Jehova no mansakit ka na grabe o walad peligro so bilay mo, ipikasim ed sikato ya ikdan to kay karunongan, biskeg, tan deen na nonot pian nasarag mo itan ya situasyon. Ontan ya ontan so ginawa nen Sister Valerie tan say asawa to.—Sal. 41:3.
Saray Espiritual a Kayamanan
mwbr24.05—it-1 857-858
Pangamta ed Arapen
Diad samay impantraidor nen Judas Iscariote, asumpal so propesiya tan ipapanengneng na satan ya amta nen Jehova tan na Anak to no antoy nagawa ed arapen. (Sal 41:9; 55:12, 13; 109:8; Gaw 1:16-20) Balet aglabay ya ibaga na satan ya patiuna lan implano na Dios ya magmaliw ya traidor si Judas. Tua, wala ray propesiya ya nipasakbay la ya say mantraidor ed si Jesus et say maapit ya kaaro to, pero anggapoy ibabaga na saratan no siopan kaaro to so manggawa ed satan. Ontan met, ipapanengneng na saray prinsipyo na Biblia ya imposiblin patiuna lan implano na Dios so gawaen nen Judas. Say imbaga na apostol ya estandarte na Dios et: “Agmo bengatbengat ya itatapew so limam ed anggan siopa; agka met mibibiang ed saray kasalanan na arum; pansiansiam a malinis so sarilim.” (1Ti 5:22; ikompara so 3:6.) Bilang patunay ya maalalwar ya maong so impanpili nen Jesus ed 12 apostol to, sikatoy sanlabin nampikasi ed Ama to antis ya mandesisyon. (Luc 6:12-16) No patiuna lan implano na Dios so pantraidor nen Judas, onkontra itan ed panangigiya na Dios. Ta no ibase tayo ed estandarte to, singa la akibiang ed saray kasalanan na samay nantraidor no ontan so gawaen to.
Kanian diad samay panaon sanen apili si Judas bilang apostol, anggapo nid puso to so pakapatnagan ya magmaliw ya traidor. Inabuloyan to ya ‘ontubo so makasamal a lamot’ tan sikatoy adutakan lapud satan. Kanian nen inmarawi ed Dios tan agto inawat so panangigiya to, noagta say panangigiya na Diablo, nagmaliw ya matakew tan managpalikdo. (Heb 12:14, 15; Jn 13:2; Gaw 1:24, 25; San 1:14, 15) Kanian nen asabi lay espisipikon panaon na inyarawi to ed Dios, nabasa la nen Jesus no antoy walad puso nen Judas kanian nipasakbay to lay pantraidor nen Judas.—Jn 13:10, 11.
MAGMALIW YA EPEKTIBO ED MINISTERYO
“Say Panangaro na Kristo so Mamapakiwas” ed Sikatayo
12 Diad samay labi antis na impatey nen Jesus, oniay imbaga tod saray disipulo to: “Diad mundo et manirap kayo, balet manpakpel kayo! Tinalok so mundo.” (Basaen so Juan 16:32, 33.) Akin et makmakpel ya inmarap si Jesus ed saramay mamubusol ed sikato tan akapanmatoor anggad impatey to? Lapud buo so tiwala tod si Jehova. Amta to ya nasubok met iray papatumbok to kanian impikasi tod si Jehova ya bantayan to ra. (Juan 17:11) Akin et makapabiskeg na liknaan ya babantayan itayo nen Jehova? On ta mas mabiskeg si Jehova nen saray mamubusol ed sikatayo. (1 Juan 4:4) Nanenengneng toy amin ya nagagawa. Kanian no mantiwala tayod sikato, agtayo ontakot ed too tan makapanpakpel tayo.
13 Nengnengen tayoy alimbawa nen Jose ya taga Arimatea. Baleg so respeto ed sikato na saray Judio ta membro na Sanhedrin (say korte suprema na saray Judio). Insulat nen apostol Juan ya si Jose et “sakey a disipulo nen Jesus, balet ta agto imbaga iya ed arum lapud takot tod saray Judio.” (Juan 19:38) Legan na ministeryo nen Jesus diad dalin, kulang ni so pakpel nen Jose. Tua, inawat to so mensahe na Panarian. Pero agto labay ya naamtaan na arum ya sikatoy manisia ed si Jesus. Seguro, natatakot ya ompan manguman so pakanengneng ed sikato na saray kabaleyan to. Antokaman so rason, ibabaga na Biblia ya nen inatey lay Jesus, nampakpel a siansia si Jose tan “linmad si Pilato tan kinerew toy bangkay nen Jesus.” (Mar. 15:42, 43) Agla natatakot si Jose ya ipaamta ed arum ya sikatoy disipulo nen Jesus!
14 Kasin maka-relate kad si Jose ya taga Arimatea, ta no maminsan et natatakot kad too? Kasin diad eskuelaan o trabaho et nababaingan mon ipaamta ya sakey kan Tasi nen Jehova? Kasin manaalangan kan magmaliw ya publisher o manpa-baptize ta natatakot ka ed ibaga na arum? Agka komon manpapatalo ed takot ed too. Manpatulong kad si Jehova. Ipikasim ed sikato ya ikdan to kay pakpel pian nagawaan moy panlabayan to tan no antoy duga. No nanengneng mo ya eebatan nen Jehova iray pikakasim, ombiskeg so liknaan mo tan makapanpakpel ka.—Isa. 41:10, 13.