Saray Reperensya Parad Workbook ed Aral
© 2024 Watch Tower Bible and Tract Society of Pennsylvania
SETYEMBRE 2-8
KAYAMANAN ED SALITA NA DIOS SALMO 79-81
Arom so Maglorian Ngaran nen Jehova
Say Dondon—“Sankaabigan a Regalo” ya Nanlapud Ama
5 Panon tayon nipanengneng ya aaroen tayoy ngaran nen Jehova? Panamegley na kondukta tayo. Iilaloan nen Jehova ya magmaliw tayon masanto. (Basaen so 1 Pedro 1:15, 16.) Labay ton ibaga et si Jehova labat so dayewen tan unoren tayo diad interon puso. Anggan sano napapasegsegang tayo, gawaen tayoy anggaay nayarian tayon unoren iray matunong ya prinsipyo tan ganggan to. Panamegley na maabig iran gawa, papasindagen tayoy liwawa tayo kanian niglogloria tayoy ngaran nen Jehova. (Mat. 5:14-16) Bilang masanton totoo, papaneknekan tayod kabibilay tayo ya duga tan matunong iray ganggan nen Jehova tan palso iray akusasyon nen Satanas. No nalingo tayo, ipanengneng tayoy tuan panagbabawi tan paliisan tayo ray kagagawa ya agmamagalang ed si Jehova.—Sal. 79:9.
ijwbv 3 ¶4-5
Roma 10:13—“Ontawag ed Ngaray Katawan”
Diad Biblia, say labay ya ibaga na “ontawag ed ngaran nen Jehova” et aglabat basta antam so ngaran na Dios tan uusaren mo itan ed panagdayew. (Salmo 116:12-14) Kaibad satan so pantiwala ed Dios tan sikato labat so kerewan moy tulong.—Salmo 20:7; 99:6.
Importante so ngaran na Dios ed si Jesu-Kristo. Oniay imbaga to ed gapo na samay imbangat ton pangaligan ya pikakasi: “Ama mi a walad tawen, napasanto komon so ngaran mo.” (Mateo 6:9) Impanengneng met nen Jesus ya kaukolan tayon kabaten, unoren, tan aroen si Jehova pian nawalaan tayoy bilay ya anggapoy anggaan.—Juan 17:3, 6, 26.
Saray Espiritual a Kayamanan
mwbr24.09—it-2 111
Jose
Nagmaliw ya Importante so Ngaran nen Jose. Lapud importante so posisyon nen Jose diad saray ananak nen Jacob, duga labat ya no maminsan et uusaren so ngaran to pian tukoyen so amin ya tribu na Israel (Sal 80:1) odino saramay nagmaliw ya kabiangan na amianen na panarian. (Sal 78:67; Am 5:6, 15; 6:6) Binitla met ed saray propesiya na Biblia so ngaran to. Diad pasingawey ya anengneng nen Ezequiel, doble so apag ya atawir nen Jose (Eze 47:13), say sakey ed saray puerta na syudad ya “Wadman Si Jehova” et parad si Jose (Eze 48:32, 35), tan diad samay propesiya ya pankasakey na totoo nen Jehova, si Jose so pangulo ed sakey ya parte na bansa tan si Juda so pangulo ed samay sakey. (Eze 37:15-26) Impropesiya nen Obadias ya kaiba so “sankaabungan nen Jose” ed paneral ed “sankaabungan nen Esau” (Ob 18), tan impropesiya nen Zacarias ya iliktar nen Jehova so “sankaabungan nen Jose.” (Zac 10:6) Imbes ya say Efraim, si Jose so abitla ya sakey ed saray tribu ya espiritual ya Israel.—Apo 7:8.
SETYEMBRE 9-15
KAYAMANAN ED SALITA NA DIOS SALMO 82-84
Pablim Iray Nagagawaan Mo Parad si Jehova
No Anto Iray Naaralan Tayo ed Saray Manok
Saray manaayam ed Jerusalem et pamilyar ed sakey a siwit ya tatawagen a mangalimpana, ya manggagaway ubong to ed silong na atep. Arum et manuubong ed templo nen Solomon. Nayarin diad templo so panuubongan da ta parad sikara et ligtas ira ditan tan nayari dan pabalegen iray sibong da ya anggapoy peligro.
Say nankompos ed Salmo 84—sakey ed saray ananak nen Kora, ya manlilingkor ed templo ya sakey simba kada anem bulan—et naimano to iratan ya ubong ed templo. Labay ton aligen iray mangalimpana ya say permanentin abung da et say abung nen Jehova, kanian imbaga to: “Talagan makapasagyat so alay abig a tabernakulom, O Jehova na saray armada! Pirpirawaten ko, on, makapkapuy ak la ed pampipilalek ko a makakar ed saray sular na templo nen Jehova . . . Anggan say siwit et makakalmo na ayaman ditan tan say mangalimpana et makakaromog na ubong to, a dia et aasikasoen to ray sibong to diad asingger ed alay abig ya altar mo, O Jehova na saray armada, say Arik tan say Dios ko!” (Salmo 84:1-3) Kasin ontan met so pampirawat tan apresasyon tayo, pati saray anak tayo, ed regular ya piulop ed totoo na Dios diad saray pantitipon da?—Salmo 26:8, 12.
Gawaen a Makatunongan Iray Iilaloan Mo Pian Magayaga Ka
Lapud itatatken odino ikakapuy na bunigas et nalimitaan la so panaglingkor tayo ed si Jehova. No sakey kan ateng, nayarin ipasen mon daiset so napipinabangan mo’d personal a panag-aral odino ed saray miting lapud nauupot lay oras mo ed panangasikaso ed angkelag niran anak mo. Anggaman ontan, agta no maminsan et agmo la laingen nanengneng iray posiblin nagawaan mo no say piimanom et saray limitasyon mo?
Nilibon taon lay apalabas, pipilaleken na sakey a Levita so bengatlan agto nagawaan. Sikatoy apribilehyoan a manlingkor ed templo a duay simba kada taon. Anggaman ontan, alay abig so pankaliktan ton makapanayam la lawas diad asingger ed altar. (Sal. 84:1-3) Antoy akatulong ed sayan matoor a laki a mankontento? Amoria ton anggan say sakey agew ed saray saban na templo et balbaleg lan pribilehyo. (Sal. 84:4, 5, 10) Mipadpara ed satan, imbes ya akasentroy imano tayo ed saray limitasyon tayo, maong no salien a nonoten iray posiblin nagawaan tayo tan apresyaen iratan.
Mabmabli Ka ed Pakanengneng nen Aman Jehova!
12 No walay aanosan mon sakit, makapanmatalek ka ya amta nen Jehova no antoy dadalanen mo. Mikasi ka ed sikato ya tulongan to kan nawalaan na dugan panmoria ed situasyon mo. Insan anap mod Biblia iray makaligliwan salita ya impaisulat nen Jehova. Tandaan mo ray teksto ya pakabasaan no panon kamabli ed si Jehova iray lingkor to. No ontan so gawaen mo, naliknam ya maomaong si Jehova ed amin ya matoor a manlilingkor ed sikato.—Sal. 84:11.
Saray Espiritual a Kayamanan
mwbr24.09—it-1 816
Ugaw ya Ulilad Ama
Main-inomay ya nibaliwala iray ulila tan anggapoy kalaban-laban, kanian inusar nen Jehova so tawag ya “ugaw ya ulilad ama” nen indeskribe to no panon kabiskeg so inkatunong na Israel odino nen napapaulyan da itan. No mabiskeg so espiritualidad na nasyon, naaasikaso iray ugaw ya ulilad ama, pero no napipikewet so inkahustisya ed bansa, seguradon napaulyanan iray ugaw ya ulilad ama, tan pakanengnengan itan ya aliwliway situasyon na bansa. (Sal 82:3; 94:6; Isa 1:17, 23; Jer 7:5-7; 22:3; Eze 22:7; Zac 7:9-11; Mal 3:5) Kabusol nen Jehova iray mamapairap ed saray ugaw ya ulilad ama. (De 27:19; Isa 10:1, 2) Imbaga nen Jehova ya sikato so Manangiyagel (Pro 23:10, 11), Ontutulong ed sikara (Sal 10:14), tan Ama ra (Sal 68:5.) Ipapatnag toy inkahustisya parad sikara (De 10:17, 18), ipapanengneng toy panangasi (Os 14:3), iikdan to ray pakainawaan da (Sal 146:9), tan ililiktar to ra.—Jer 49:11.
Say sakey ya pakapatnagan na tuan inkakristiano et say pangasikaso ed saramay naandian na asawa odino atateng. Oniay insulat nen disipulon Santiago parad saray Kristiano: “Say paraan na panagdayew a malinis tan aliwan marutak ed pakanengneng na Dios tan Ama tayo et saya: say pangasikaso ed saray maniirap ya ulila tan balo, tan say pansiansia na sakey ya andian na mantsa ed mundo.”—San 1:27.
SETYEMBRE 16-22
KAYAMANAN ED SALITA NA DIOS SALMO 85-87
Makatulong so Pikakasi Pian Makapan-anos Tayo
Kasin Iyaaninag Moy Gloria nen Jehova?
10 Pian niyaninag tayoy gloria na Dios, kaukolan tayo met so ‘mantultuloy a manpikasi.’ (Roma 12:12) Nepeg tayon ipikasid si Jehova ya tulongan to itayon manlingkor ed sikato diad paraan a makapaliket ed sikato. Mikasi itayo parad masanton espiritu to, parad mas mabiskeg ya pananisia, parad pakpel ya labanay tukso, tan parad karunongan pian ‘dugay pangusar tayod salita na katuaan.’ (2 Tim. 2:15; Mat. 6:13; Luc. 11:13; 17:5) Singa sakey ya ugaw ya matalek ed ama to, kaukolan tayoy manmatalek ed Ama tayod tawen, si Jehova. No ipikasi tayon mas napaaligwas tayoy panaglingkor tayo, nailaloan tayoy tulong to. Agtayo komon iisipen ya disturbo labat ed si Jehova iray pikakasi tayo! Imbes, anamoten tayoy manpikasi pian idayew si Jehova, misalamat, paigiya lalo la no nasusubok, tan kerewey tulong to pian nigloria tayoy masanton ngaran to diad panaglingkor tayo.—Sal. 86:12; Sant. 1:5-7.
Panon ya Eebatan nen Jehova Iray Pikakasi Tayo?
17 Basaen so Salmo 86:6, 7. Segurado si David ya dedengelen tan eebatan nen Jehova iray pikakasi to. Komon ta ontan met kabiskeg so tiwalam ed si Jehova! Anengneng tayo ed saray alimbawa ed sayan artikulo ya sarag itayon ikdan nen Jehova na karunongan tan biskeg pian makapan-anos tayo. Sarag ton pakilosen ya ontulong ed sikatayo iray agagi tan anggan saray agto lingkor.
18 Tua, say ebat nen Jehova ed saray pikakasi tayo et aliwan lanang ya samay labay tayo, pero segurado tayo ya ebatan to iratan. Iter to no antoy kailangan tayo tan no kapigan tayo itan kailangan. Kanian agka komon onsasawa ya manpikasi, tan mantiwala ka ya dedengelen ka nen Jehova. Tandaan mo ya diad sayan kaunoran iran agew, agto kan balot paulyanan. Tan diad balon mundo, makapantiwala ka ya iter toy “pirawat na balang mabilay a bengatla.”—Sal. 145:16.
Saray Espiritual a Kayamanan
mwbr24.09—it-1 1058 ¶5
Puso
Manlingkor Diad “Interon Puso.” Pian normal ya onggana so literal ya puso dapat buo itan, pero say piguratibon puso et nayarin naapag. Impikasi nen David ya: “Iyapasakey mo pay pusok ya ontakot ed ngaran mo,” ipapanengneng na satan ya say puso na too et nayarin naapag no nipaakar ed saray papablien tan tatakotan to. (Sal 86:11) Say ontan ya too et “naapag so puso” to—labay ton ibaga et malainem-em so panagdayew to ed Dios. (Sal 119:113; Apo 3:16) Nayari met ya doble so puso na sakey ya too (diad literal et walaan na sakey ya puso tan sakey ya puso) ta sasalien day manlingkor ed duaran katawan, odino mapalikdo dan ibabaga so sakey ya bengatla anta duma balet so iisipen da. (1Aw 12:33; Sal 12:2, paimanod leksab) Kabusol nen Jesus so ontan ya pansimpisimpitan ya singa walay doblin puso ra.—Mat 15:7, 8.
SETYEMBRE 23-29
KAYAMANAN ED SALITA NA DIOS SALMO 88-89
Anggapo Lay Makapipara ed Pananguley nen Jehova
Suportaan so Inkasoberano nen Jehova!
5 Wala ni sakey a rason no akin ya nibagan si Jehova so manepeg a Soberano. Ipapatnag toy perpekton hustisya ed panguusar toy autoridad to. Imbaga to: “Siak si Jehova, say mangipapatnag na matoor a panangaro, inkahustisya, tan inkatunong diad dalin, ta panliketan ko irayan bengatla.” (Jer. 9:24) Agto onnenengneng ed antokaman ya ley a ginawa na agperpekton totoo pian magmaliw a basiyan ed no antoy patas tan duga. Imbes, sikato so angiletneg na estandarte to no antoy duga, tan base ed mismon perpekton hustisya to et sikatoy angiter ed totoo na akasulat iran ganggan. ‘Say inkatunong tan hustisya so pundasyon na trono to,’ kanian makapanmatalek tayo ya matunong so amin a ganggan, prinsipyo, tan desisyon to. (Sal. 89:14; 119:128) Balet si Satanas et agto sarag a pawalaen so hustisya ed interon mundo anggano inyakusa ton aliway paraan na pananguley nen Jehova.
Suportaan so Inkasoberano nen Jehova!
10 Say pananguley nen Jehova et aliwan maruksa odino is-istrikto. Saray sakop to et agnapepegetan tan maliket. (2 Cor. 3:17) Oniay imbaga nen David: “Say katagyan tan karlangan et walad arapan [na Dios]; say biskeg tan liket et walad ayaman to.” (1 Awa. 16:7, 27) Onia met so insulat na salmistan si Etan: “Maliket iramay totoon mangidadayew ed sika diad magayagan boses. Sikaray manaakar a nasisinagay liwawa na lupam, O Jehova. Naynay iran manliliket lapud ngaran mo, tan nipaatagey ira lapud inkatunong mo.”—Sal. 89:15, 16.
11 No lanang tayon dalepdepen so kamaongan nen Jehova, lalo tayon nakombinse ya sankaabigan so uley to. Nalikna tayoy alikna na salmista: “Say sakey agew ed saray sular na templom et magmaong ni nen say sanlibon agew ed arum a pasen!” (Sal. 84:10) Lapud si Jehova et maar-aron Dios ya Amalsa ed sikatayo, amta toy nakaukolan tayo pian magmaliw tayon maliket, tan mabulos ton iiter iratan ya pankaukolan tayo. Amin ya ipapagawa tod sikatayo et parad pankaabigan tayo tan manresultad baleg a liket, anggano kaukolan tayoy mansakripisyo pian nagawaan iratan.—Basaen so Isaias 48:17.
Paeleten so Pananisiam ed Panarian na Dios
14 Nengnengen tayoy insipan nen Jehova ed si Arin David panamegley na Davidikon sipanan. (Basaen so 2 Samuel 7:12, 16.) Akisipanan si Jehova ed si David legan na panaari tod Jerusalem—insipan nen Jehova ed sikato ya manlapud poli to so Mesias. (Luc. 1:30-33) Impaamta sirin nen Jehova so mas espisipikon detalye no iner so panlapuan na ilalak tan imbaga to ya sayan ilalak nen David so “akankanepegan” ed trono na Mesianikon Panarian. (Eze. 21:25-27) Panamegley nen Jesus, say uley nen David et ‘niletneg a malet ya anggad angga.’ On, say ilalak nen David et “mansiansia ya anggad angga; say trono to et mansiansia a singa say agew.” (Sal. 89:34-37, NW) Matalek tayo sirin ya say panuley na Mesias et agbalot magmaliw ya mauges, tan say bendisyon na uley to et andi-anggaan!
Saray Espiritual a Kayamanan
“Sika Lambengat so Matoor”
4 Say “katooran” unong a nausar ed Hebreon Kasulatan et kaabigan a simamaaron onsiglaot ed sakey a bengatla tan ag-onsian anggad nasumpal so gagala to ed satan a bengatla. Nagkalalo ni so sasaglawien na satan nen say inkanapanmatalkan. Tua iya lapud say sakey a too so nayarin magmaliw a napanmatalkan lapud ipapasen to labat itan ya obligasyon. Diad pidumaan, say katooran so nilamut ed aro. Insan, sakey ni, say salitan “napanmatalkan” so nayarin iyaplika ed anggapoy bilay iran bengatla. Alimbawa, tinawag na salmista so bulan a “napanmatalkan a tasi ed tawen” lapud nilabilabin kiwawala to. (Salmo 89:37, NW) Balet say bulan so agnadeskribe bilang matoor. Akin? Lapud say katooran et sakey a balikas na aro—bengatlan agnipatnag na andiay bilay iran bengatla.
5 Diad Makasulatan a pantalos, say katooran et pakapatnagan na panangaro. Ipapabitar na mismon pakapatnagan ed satan a walay siglaotan ed baetan na toon mangipapanengneng tan pangipapanengnengan na satan a kalidad. Say ontan a katooran et tuloytuloy. Aliwa itan a singa saray daluyon ed dayat ya ibubunlayon na manguman-uman a dagem. Diad kasunian, say katooran, odino matoor ya aro, so walaan na kaligenan tan biskeg a mamatalona ed sankairapan iran babeng.
SETYEMBRE 30–OKTUBRE 6
KAYAMANAN ED SALITA NA DIOS SALMO 90-91
Manmatalek Kad si Jehova Pian Ondukey so Bilay Mo
Panaanap na Pamparukey na Bilay
Aliwan amin ya scientist et manisia ya ondukey so average ya karukey na bilay lapud saray panagtambal ya pangontra ed itatatken. Tua ya naaruman so dukey na bilay na totoo manlapu la nen 19th century. Balet, say rason na satan et mas mapalinis la ray totoo, maalwar la rad saray makaalis ya sakit, tan wala la ray antibiotic tan bakuna. Kanian iisipen na arum ya geneticist ya onia labat lan talagay karukey na bilay na too.
Manga 3,500 taon lay apalabas, oniay imbaga na sakey a nansulat ed Biblia ya si Moises: “Say karukey na bilay mi et 70 taon, odino 80 taon no say sakey et makmaksil. Balet napno iratan na gonigon tan ermen; maganggano iratan ya onlabas, insan naandi kami la.” (Salmo 90:10) Anggano mansasagpot so too ya parukeyen so bilay to, say karukey na bilay na too et siansia nin ag-onarawi ed samay imbaga nen Moises.
Balet wala ray pinalsa a singa say ambalangan sea urchin odino sakey a klase na malimpek a lukan ya makapambilay na masulok a 200 taon, tan saray kiew a singa say giant sequoia et makapambilay na nilibon taon. No ikompara tayoy karukey na bilay tayo ed saratan ya pinalsa, ompan nitepet tayo, ‘Talaga kasin 70 o 80 taon labat so bilay tayo?’
wp19.1 5, kahon
Antoy Ngaran na Dios?
Ontan so tepet na dakel a totoo. Ompan sika met. Nayarin oniay iisipen mo: No walay nanggawa ed uniberso tan ed amin ya bengatla, kasin wala met so nanggawa ed Dios?
Manisia so dakel ya scientist ya say pisikal ya uniberso et walay gapoan to. Mipara itan ed ibabaga na unonan bersikulo na Biblia: “Diad gapo et pinalsa na Dios so tawen tan say dalin.”—Genesis 1:1.
Say pisikal ya uniberso et aglinmesan bukor; imposiblin niwala itan manlapud anggapo. Agnayari ya walay niwala manlapud anggapo. No anggapoy akauna antis ya ginmapo so uniberso, anggapo natan so uniberso. Anggaman singa mairap iyan talosan, kaukolan ya wala lay sakey ya akauna tan biig ed pisikal ya uniberso ya mamawala ed uniberso. Anggapoy arum ya amawala ed satan noagta si Jehova a Dios, sakey ya espiritun persona ya marunong tan anggapoy anggaan na pakapanyari to.—Juan 4:24.
Oniay ibabaga na Biblia nipaakar ed Dios: “Antis a niyanak iray palandey odino antis mo nin pinawala so dalin tan say mundo, manlapud andi-anggaan ya anggad andi-anggaan, sika so Dios.” (Salmo 90:2) Kanian, sipor lan walay Dios. Insan “diad gapo,” ginawa to so pisikal ya uniberso.—Apocalipsis 4:11.
Taloen na Panangaro so Takot
16 Amta nen Satanas ya inaro tayoy bilay tayo. Pero ibabaga to ya gawaen tayo kunon amin pian labat naisalba tayoy bilay tayo anggano naderal so relasyon tayod si Jehova. (Job 2:4, 5) Dakel la balet ya lingkor nen Jehova so nampatunay ya aliwan tua itan. Pero lapud walay pakayari nen Satanas ya mamatey tan amta to ya antakot tayoy ompatey, uusaren to itan ya takot pian agtayo la unoren si Jehova. (Heb. 2:14, 15) Uusaren to met iray alipores to pian taktakoten iray lingkor nen Jehova ya pateyen da ra no agda ikbanan so katooran da. No maminsan, samboten nen Satanas ya tuksoen itayon ibaliwala iray prinsipyo nen Jehova no nipepeligro lay bilay tayo lapud graben sakit o antokaman ya emergency. Diad onia ran situasyon, ompan piliten itayo na saray doktor o kapamilya tayon aliwan Tasi pian manpasaksak itayo na dala. Ompan wala met so mankombinsi ed sikatayo ya salien tayoy sakey ya klase na therapy o panagpatambal ya kontra ed prinsipyo na Biblia.
17 Natatalosan nen Jehova ya agtayo labay so ompatey, pero ipapaseguro tod sikatayo ya “anggan say patey . . . et agbalot makapangisian ed sikatayo ed panangaro [to].” (Basaen so Roma 8:37-39.) Agbalot lingwanan nen Jehova iray inatey lan kakaaro to. Diad tua, ibabaga na Biblia ya diad nonot to et mabilay iran amin. (Luc. 20:37, 38) Ontan lay panangaro tod sikara kanian labalabay to la ran bilayen. (Job 14:15) Balbaleg ingen so imbayar to pian “nawalaan [itayo] na bilay ya andi-anggaan.” (Juan 3:16) On, tandaan tayo ya inar-aro itayo nen Jehova tan mabmabli tayo ed pakanengneng to. Kanian imbes ya agka manmatoor ed si Jehova no mansakit ka na grabe o walad peligro so bilay mo, ipikasim ed sikato ya ikdan to kay karunongan, biskeg, tan deen na nonot pian nasarag mo itan ya situasyon. Ontan ya ontan so ginawa nen Sister Valerie tan say asawa to.—Sal. 41:3.
Saray Espiritual a Kayamanan
Kasin Walay Anghel dela Guardiam?
Ag-ibabangat na Biblia ya kada too et walay anghel dela guardia to. Tua ya aminsan et oniay imbaga nen Jesus: “Agyon balot leleglemewen so sakey ed sarayan angkekelag [saray disipulo nen Kristo], ta ibagak ed sikayo a saray anghel da ed tawen et naynay a walad arapan nen Amak a walad tawen.” (Mateo 18:10) Pero aglabay ya ibaga nen Jesus ya walay anghel dela guardia na kada too, noagta ipapaamta to labat ya walay malasakit na saray anghel ed saray disipulo to. Kanian saray tuan Kristiano et agda ipapalaran so bilay da, ya isipen dan protektaan ira na saray anghel na Dios.
Kasin labay ya ibaga na satan ya agtutulongan na saray anghel iray totoo? Andi. (Salmo 91:11) Wala ray talagan kombinsido ya angibaki so Dios na anghel pian protektaan tan igiya ira. Si Kenneth ya abitla nen niman et manisia ed satan. Nayarin duga so iisipen to. Mabetbet ya napapatunayan na saray Tasi nen Jehova ya tutulongan ira na saray anghel no manpupulong ira. Balet, lapud agtayo nanengneng iray anghel, agtayo nibaga no anto ray espisipikon paraan ya uusaren ira na Dios pian tulongan iray totoo. Pero, aliwa met ya mauges no pisalamatan tayoy Dios ya Makapanyarin-amin ed anggan anton tulong tan suporta ya iiter to.—Colosas 3:15; Santiago 1:17, 18.
OKTUBRE 7-13
KAYAMANAN ED SALITA NA DIOS SALMO 92-95
Sankaabigan Lay Panlingkor ed si Jehova!
Sikayo Ran Kabataan, Kasin Akapokus Kayo ed Saray Goal Yod Espiritual?
5 Say manunan rason no akin ya importantin walaan tayo na saray goal ed espiritual et lapud labay tayon ipanengneng so pisasalamat ed panangaro nen Jehova tan ed amin ya ginawa to parad sikatayo. Oniay imbaga na salmista: “Maabig so pisalamat ed sika, O Jehova . . . Ta paliliketen mo ak lapud saray gagawaen mo, O Jehova; oneeyag ak ed liket lapud saray kimey na limam.” (Sal. 92:1, 4) Bilang sakey ya kabataan, nonot moy amin ya inter nen Jehova ed sika—say bilay mo, say pananisiam, say Biblia, say kongregasyon, tan say balibalin ilalom diad arapen. No iprayuridad mo ray espiritual a bengatla, ipapanengneng mon misasalamat kad Dios ed saratan ya bendisyon, tan lapud satan et onapit ka ed sikato.
Siopay Mangiimpluensya ed Panagnonot Mo?
8 Singa sakey ya maong ya ateng, labay nen Jehova ya nawalaan na sankaabigan ya bilay iray ananak to anggad posible. (Isa. 48:17, 18) Kanian sikatoy angitarya na saray prinsipyo ed moral tan no panon tayon tratoen so arum. No nipaakar ed saratan ya bengatla, papasesegen to itayo ya aligen so paraan na panagnonot to tan tumboken iray estandarte to. Aliwa iyan panameget, imbes, ontulong iya pian onaligwas tan onlaknab so abilidad tayon mannonot. (Sal. 92:5; Pro. 2:1-5; Isa. 55:9) Ontulong met iya pian makapanggawa tayoy desisyon ya manresulta ed liket, legan tayon onaaligwas bilang indibidual. (Sal. 1:2, 3) On, talagan makagunggona tan makapaliket so pangalig ed kanonotan nen Jehova!
Mabmabli Ka ed Pakanengneng nen Aman Jehova!
18 Anggano matatken tayo la, ipapaseguro nen Jehova ya mausar tayo nin siansia ed sikato. (Sal. 92:12-15) Imbangat nen Jesus ya anggano iisipen tayon limitado odino melmelag lay nagagawaan tayo, mabmabli ed si Jehova so amin ya pansasagpot tayo parad sikato. (Luc. 21:2-4) Kanian gawam no antoy sarag mon gawaen. Singa bilang, sarag mon ipaamta so nipaakar ed si Jehova, ipikasi iray agagi, tan pasesegen so arum ya mansiansian matoor. Say rason no akin ya ipapasen ka nen Jehova ya kakimeyan to et aliwan lapud saray nagagawaan mo, noagta lapud mabulos ya panguunor mo ed sikato.—1 Cor. 3:5-9.
Saray Espiritual a Kayamanan
“O Agaylan Kaaralem na Kakabatan . . . na Dios!”
18 Imanoen no panon so impangibalikas nen apostol Pablo ed nikadkaduman kakabatan nen Jehova: “O say kaaralman na kayamanan na kakabatan tan pakaamta na Dios! Agaylan agnausisa a kanonotan to, tan agnatebek ira a dalan to!” (Roma 11:33) Diad impangigapo ed bersikulo ed balikas ya “O,” impatnag nen Pablo so mabiskeg a liknaan—diad sayan kipapasen et pirmin pankelaw. Say pinili ton Griegon salita parad “kaaralman” et maapit a misiglaotan ed salitan “kalinsurong.” Kanian, ipapaimano na saray salita to so mabitar a retrato ed nonot. Sano molimolien tayo so kakabatan nen Jehova, singa itayo onuusdong ed anggapoy sampot ya abot tan araldalem a pasen, a maawa-awang ya agbalot narandan so kalaknab to, ya agla detalyadon nadeskribe tan nigawaan na mapa. (Salmo 92:5) Agta magmaliw itayon mapaabeba ed pannonot ed satan?
OKTUBRE 14-20
KAYAMANAN ED SALITA NA DIOS SALMO 96-99
“Iyabawag so Maong a Balita”!
mwbr24.09—w11 3/1 6 ¶1-2
Anto so Maong ya Balita?
Kaukolan ya ipulong na saray Kristiano so “maong a balita” na panarian, nagawaan da itan no ibaga dad arum so nipaakar ed satan, tan no ipaliwawa da ya say panarian et sakey ya gobierno ya manuley ed inkatunong diad interon dalin ed arapen. Balet say “maong a balita” et inusar ed nanduruman paraan diad Biblia. Singa bilang, abitla so “maong a balita nipaakar ed panangiliktar” (Salmo 96:2); “maong a balita na Dios” (Roma 15:16); tan “maong a balita nipaakar ed si Jesu-Kristo.”—Marcos 1:1.
Diad simplin panangibaga, kaiba ed maong a balita so amin ya katuaan ya imbaga nen Jesus tan amin ya insulat na saray disipulo to. Antis ya onlad tawen si Jesus, imbaga tod saray disipulo to: “Onla kayo sirin tan ibangat yo iray totoo ed amin a nasyon pian magmaliw iran disipulok, a bautismoan yo ra ed ngaran na Ama tan ed ngaran na Anak tan ed ngaran na masanton espiritu, ya ibangat yo ran mangunor ed amin ya ingganggan kod sikayo.” (Mateo 28:19, 20) Kanian say kimey na saray tuan Kristiano et aliwa labat ya basta ipaamta ed arum so maong a balita na panarian, noagta kaukolan da met so manggawa na disipulo.
mwbr24.09—w12 9/1 16 ¶1
Antoy Nagawa Diad Agew na Panangukom?
Singa nanengneng ed litrato, iisipen na dakel ya totoo ya diad Agew na Panangukom, binilyon kuno ya kamarerwa so onarap ed trono na Dios pian ukomen base ed ginawa dad apalabas, no kasin manbilay irad tawen odino pairapen ed impierno. Pero, ipapanengneng na Biblia ya say gagala na Agew na Panangukom et pian iligtas iray totoo ed ag-inkahustisya. (Salmo 96:13) Si Jesus so tinuro na Dios ya magmaliw ya Ukom pian ipawil so hustisya ed katooan.—Basaen so Isaias 11:1-5; Gawa 17:31.
Kareenan ed Sanlibon Taon tan ed Andi-Angga!
18 Balet, anguman itan sanen inimpluensyaan nen Satanas so totoo a manrebelde ed inkasoberano nen Jehova. Ingen nanlapu la nen 1914, onkikiwas lay Mesianikon Panarian pian ipawil itan ya pankakasakey. (Efe. 1:9, 10) Legan na Sanlibon Taon ya Uley, saray makapadinayew a bengatlan “agnanengneng” et nagawa la. Insan onsabi “anggaan,” say panampot na Sanlibon Taon ya Uley nen Kristo. Antoy onsublay a nagawa? Anggaman niiter ed si Jesus so “amin a pakauley ed tawen tan diad dalin,” agto sinamsam so posisyon nen Jehova. Mapaabeba ton ‘iyawat so panarian diad Dios tan Ama to.’ Usaren toy espisyal a posisyon tan autoridad to “diad kigloriaan na Dios.”—Mat. 28:18; Fil. 2:9-11.
19 Diad satan et magmaliw lan perpekto so amin a sakop na Panarian. Tumboken day ehemplo tan inkamapaabeba nen Jesus tan mabulos dan bidbiren so inkasoberano nen Jehova. Walay pankanawnawa dan ipanengneng a labay day pauleyan ed si Jehova no nalampasan day unor a subok. (Apo. 20:7-10) Kayari na satan, amin a nanrebelde—too tan espiritu—et sigpot lan naderal. Talagan makapalikliket itan a panaon! Say interon pamilya nen Jehova et malikeliket a mangidayew ed sikato, a magmaliw ya “alenleneg a Manuley ed amin.”—Basaen so Salmo 99:1-3.
Saray Espiritual a Kayamanan
mwbr24.09—it-2 994
Kansion
Say “balon kansion” et aglabat nabasa ed saray Salmo noagta nabasa met itan ed saray sulat nen Isaias tan apostol Juan. (Sal 33:3; 40:3; 96:1; 98:1; 144:9; 149:1; Isa 42:10; Apo 5:9; 14:3) No aralen tayo so konteksto na kaslakan ya pakabasaan na balikas ya “balon kansion,” nanengneng tayo ya kakansionen itan ta walay balon pananguman ed paraan na panguusar nen Jehova ed inkasoberano to diad interon uniberso. Singa samay malikeliket ya impangiyabawag diad Salmo 96:10: “Si Jehova et nagmaliw ya Ari.” Say tema na sayan “balon kansion” et saray balon pananguman lapud linmaknab so pananguley nen Jehova tan no antoy epekto na saratan ed tawen tan dalin.—Sal 96:11-13; 98:9; Isa 42:10, 13.
OKTUBRE 21-27
KAYAMANAN ED SALITA NA DIOS SALMO 100-102
Pablim so Matoor a Panangaro nen Jehova ed Sika
Manparaan Ka La Parad Bautismom
18 Say panangarom ed si Jehova so sankarakepan ya liknaan tan sankabiskegan ya puersa ya manpakilos ed sika. (Basaen so Proverbio 3:3-6.) No inar-arom si Jehova, agka ontundan manlingkor ed sikato anggano nantatabonan lay problema. Diad Biblia, mabetbet tayon nababasa so matoor ya panangaro nen Jehova ed saray lingkor to. Atan imay klase na panangaro ya ag-oniikban tan agto ka sukoan. (Sal. 100:5) Ginawa nen Jehova so too ya sarag tayon aligen so ugali to. (Gen. 1:26) Anto sirin so gawaen mo pian nipanengneng mo met itan ya klase na panangaro?
19 Iyugalim so misalamat ed si Jehova. (1 Tes. 5:18) Kada agew, isip mo, ‘Antoy ginawa nen Jehova natan parad siak pian nipalikna ton inar-aro to ak?’ Espisipikom ya bitlaen iratan no manpikasi ka tan pisalamatan moy Aman Jehova. Singa si apostol Pablo, isip mon lanang ya amin ya kamaongan nen Jehova ed sika et gagawaen to lapud inar-aro to ka. (Basaen so Galacia 2:20.) Tan tepetan moy sarilim, ‘Panon ko met kasin nipanengneng ya inar-arok si Jehova?’ No inar-arom si Jehova, nalabanan mo ray tukso tan nasarag moy anggan anton subok. Atan so manpakilos ed sika ya iyunam ed bilay mo so pandayew ed sikato. Agka sirin ompapayag ya onlabas so sanagew ya agmo naipanengneng so panangarom ed Amam.
“Mantultuloy Kayon Manlikas tan Manbantay!”
10 Pian agnaderal so espiritualidad tayo, iwasan tayoy mi-flirt, alabas ya panag-inum tan panangan, tan ansakit ya panagsalita. Agtayo manbabantay na pornograpiya, saray palabas ya puros laban tan pateyan, tan arum nin andi-kakanaan ya bengatla. (Sal. 101:3) Tandaan tayo ya siber-siber so Diablo tan mantatalaran no kapigan to tayo napatitan ya manggaway mauges. (1 Ped. 5:8) No agtayo manalwar, ompan agtayo naliklikas ya ontutubo la manaya ed isip tan puso tayo so inggit, ag-inkamatua, agum, pambusol, inkalastog, tan sakit na linawa. (Gal. 5:19-21) Diad unaan, ompan isipen tayo ya agmet iratan panlapuan na problema. Balet no agtayo iratan bagoten ya tampol, singa iratan makasamal ya tanaman ya no linmamot lan maong et sengegan na ipatey tayo ed espiritual.—Sant. 1:14, 15.
Kasin Dengelen Mo Iray Malinew a Pasakbay nen Jehova?
7 Antoy gawaen tayo pian napaliisan tayo ray palson managbangat? Agtayo ran balot papalooben ed saray ayaman tayo nisay ibano ira. Agtayo met babasaen iray literatura da, agtayo babantayan iray palabas dad TV, agtayo nenengnengen iray Web site da odino mankomento ed saray isusulat da ditan. Akin et ontan lay determinasyon tayon paliisan ira? Lapud aro. Inaro tayo si Jehova, say “Dios na katuaan,” kanian agtayo interesado ed saray palson bangat ya mikontraan ed katuaan ya walad Salita to. (Sal. 31:5; Juan 17:17) Inaro tayo met so organisasyon ya uusaren nen Jehova pian ibangat itayo na katuaan—a singa say ngaran ya Jehova tan say kabaliksan na satan, say gagala na Dios parad dalin, say kipapasen na saray inaatey, tan say ilalon kioli ed bilay. Kasin nanonotan mo ni liket mo sanen unaan mon naaralan iraya tan say arum nin katuaan? Agmo sirin aabuloyan ya lapud saray palson managbangat et taynan mo so organisasyon ya angibangat ed sika na sarayan katuaan.—Juan 6:66-69.
8 Anggan antoy ibaga na saray palson managbangat, agtayo ra dedengelen! Akin et onla kad nakatan ya bobon anta nadismaya ka labat? Determinado itayo sirin ya mansiansian matoor ed si Jehova tan ed organisasyon to ya abayag lan mangiiter ed sikatayo na daakan ya danum na katuaan manlapud Salitay Dios.—Isa. 55:1-3; Mat. 24:45-47.
Saray Espiritual a Kayamanan
mwbr24.09—it-2 596
Pelikano
No naknaksel la so pelikano, ontikyab itan ed lugar ya bukor to labat insan to iselek so ulo to ed takeb to kanian singa maer-ermen so itsura to tan ag-itan onggala-galaw kanian singa amputin bato so itsura to no nengnengen ed arawi. Pigay oras ya ontan so itsura to, kanian bagay so maer-ermen ya itsura to ed samay impanukoy na salmista ed paneermen to nen insulat ton: “Singa ak pelikano diad saray agpanaayaman a pasen.” (Sal 102:6) Samay abitla dia ya “agpanaayaman a pasen” et ag-ontutukoy ed desierto noagta ed saray lugar ya arawi ed panaayaman na totoo, nayarin singa diad alog. Wala ray panaon ya manaayam ni ray pelikano ed kaalogan diad bandad norte na lawak na Jordan.
OKTUBRE 28–NOBYEMBRE 3
KAYAMANAN ED SALITA NA DIOS SALMO 103-104
“Sankanonot Ton Dabok Itayo”
Aligen si Jehova—Magmaliw ya Makatunongan
5 Makatunongan si Jehova lapud mapaabeba tan walay malasakit to. Makapabilib so inkamapaabeba to nen asingger to lan deralen iray mauges ya totoo diad Sodoma. Angibaki si Jehova na saray anghel ya manligtas ed si Lot tan ed pamilya to. Say instruksion nen Jehova et diad kapalandeyan so batikan da. Pero natatakot kunoy Lot ya onla diman, kanian akikasi ya dia lad baley na Zoar so batikan da. Diad tua balet, kaiba itan ed saray deralen nen Jehova. Kasin nampasnokan nen Jehova si Lot ta mitatawalan ni? Andi. Pinagbigyan toy kerew nen Lot, tan agto dineral so Zoar. (Gen. 19:18-22) Kalabas na nilasus ya taon, impanengneng met nen Jehova so malasakit ed saray taga Ninive. Imbaki toy Jonas pian ipasabi so mensahe ya deralen To ra tan say syudad da lapud mauges ira. Pero nen nagbabawi iray taga Ninive, akasian ira nen Jehova tan agto la intuloy so panderal tod sikara.—Jon. 3:1, 10; 4:10, 11.
Alig Moy Samson—Mantiwala Kad si Jehova
16 Anggano alingo si Samson ed desisyon to tan inani toy resulta, ginawa to nin siansia so panlabayan nen Jehova. Kanian no makagawa tayo met na lingo ya lapud satan et kaukolan tayoy panangipetek o naekal tayod pribilehyo, agtayo komon ontatabang ed panlilingkor tayo ed si Jehova. Tandaan ya ag-itayo sukoan nen Aman Jehova. (Sal 103:8-10) Anggano akagawa tayoy lingo, posible ya usaren itayo nin siansia nen Jehova ya singa ginawa to ed si Samson.
17 Imanoen so eksperiensya na kabataan ya brother, si Michael. Sikatoy maseseg ya payunir tan ministeryal a lingkor. Makapaermen balet ta akagaway lingo kanian nakal ed pribilehyo. Oniay imbaga to: “Mangapoy-apoy so seseg ko ed saman, pero aminpinsan ya asebseban nen akagawa ak na lingo. Amtak ya agto ak met itakwil nen Aman Jehova, pero naisip ko ya imposible lan ompawil ni may maap-apit ya relasyon kod sikato tan ompan agto ak lan balot usaren ed kongregasyon ya singa dati.”
18 Maong labat ta agsinmuko si Michael. Kuan to: “Ginawak so anggaay nayarian ko pian naapiger koy relasyon ko ed si Jehova. Lanang ak ya manpipikasi, manaaral, tan mandadalepdep.” Diad inlabas na panaon, awalaan lamet si Michael na pribilehyo ed kongregasyon. Akapawil ya payunir tan natan et elder la. Oniay intuloy to: “Amay suporta tan panamaseseg na saray agagi—lalo lad saray elder—aman so akatulong pian na-realize ko ya inar-aro ak nin siansia nen Jehova. Malinis la natan so konsiensiak. Apatunayan kon mismo ya peperdonaen nen Jehova iramay talagan magbabawi.” Makapantiwala tayo met ya no akagawa tayoy lingo, usaren itayo nin siansia nen Jehova. Tan bendisyonan to tayo basta pansagpotan tayon ipetek iray lingo tayo tan tuloytuloy tayon manmatalek ed sikato.—Sal. 86:5; Pro. 28:13.
Nagawaan Mo Iray Goal Mo ed Espiritual!
2 No walay goal mo ed espiritual ya agmo ni nagagawaan, agka komon nadidismaya. No nanengneng nen Jehova ya mani-effort ka, nalikna to ya inar-arom tan labay mon iter so ‘the best’ mo ed sikato. Ta diad tua, anggano simpli so goal mo, kailangan moy mansakripisyo tan ikdan itan na oras. Papablien iratan nen Jehova. Pero siempre, amta to iray limitasyon mo tan agto kerewen ed sika so agmo sarag ya iter. (Sal. 103:14; Miq. 6:8) Kanian no maniisip kay goal, seguradom ya realistic odino amay nasarag mo. No akaisip ka la, anto balet so makatulong pian nagawaan moy goal mo? Pantongtongan tayo iray pigaran praktikal ya suggestion.
Saray Espiritual a Kayamanan
Pakapanyari a Mamalsa—“Say Nanggawa ed Tawen tan Dalin”
18 Anto so naaralan tayo manlapud impangusar nen Jehova ed pakapanyari ton mamalsa? Pankelkelawan tayo so panduruma na palsa. Inkelyaw na sakey a salmista: “O Jehova, agayla so kinaraklan na saray gawam! . . . Say dalin napno na kaykayamanan mo.” (Salmo 104:24) Agaylan tua itan! Akadiskobre la iray biologo na masulok lan sakey milyon a klase na mabilay iran bengatla ed dalin; ingen, nanduruma iray opinyon nipaakar ed no kasin wala ni anggad karakel na 10 milyon, 30 milyon, odino onsulok ni a kaukolan a diskobrien. Nayarin naimano na sakey a toon managdibuho (artist) a no maminsan et walay geter na abilidad ton mannonot. Diad pidumaan, say kimey nen Jehova—say pakapanyari ton mangimbento tan mamalsa na balo tan nanduruma iran bengatla—so mapatnag ya andiay-geter.