Proverbio 3:5, 6—“Agka Manmamatalek ed Dilin Pakatalos Mo”

“Manmatalek ka ed si Jehova diad interon pusom, tan agka mandedepende ed dilin pakatalos mo. Diad amin a dalan mo et sikatoy nonoten mo, tan gawaen ton maptek iray basbas mo.”—Proverbio 3:5, 6, Balon Mundo a Patalos.

“Manmatalek ka ed KATAWAN diad intiron pusom. Ag ka manmamatalek ed dilin pakatalus mo. Diad amin a gawaen mo nunot mo lawas so KATAWAN, et iwanwan to kad maptek a dalan.”—Probirbio 3:5, 6, Maung a Balita.

Say labay ya ibaga na Proverbio 3:5, 6

Kaukolan tayoy onkerew na panangigiya ed si Jehovaa a Dios imbes ya mandepende tayo ed sarili tayo no manggagawa tayo na importante iran desisyon.

“Manmatalek ka ed si Jehova diad interon pusom.” Ipapanengneng tayon mantitiwala tayo ed Dios no aaligen tayoy paraan to diad saray gagawaen tayo. Nepeg ya buo so tiwala tayo ed Dios pian nibaga tayon mantitiwala tayo ed interon puso tayo. Diad Biblia, kaslakan ya say puso et ontutukoy ed inkatoo tayo, kaibad satan so emosyon, saray mamapakiwas ed sikatayo, saray iisipen, tan saray ugali tayo. Kanian no talagan mantitiwala tayo ed Dios diad interon puso tayo, dapat agti labat ibabase ed liknaan tayo iray desisyon tayo. Labay tayoy mantiwala ed Dios ta kombinsido tayo ya amta na Amalsa no antoy sankaabigan parad sikatayo.​—Roma 12:1.

“Agka mandedepende ed dilin pakatalos mo.” Kaukolan tayoy manmatalek ed Dios ta aliwan perpekto so panag-isip tayo, kanian agtayo nayarin mandepende ed satan. No mandepende tayo labat diad sarili tayo odino diad liknaan tayo, ompan makagawa tayo laingen na desisyon ya singa duga ed gapo balet makapuy manayay resulta to. (Proverbio 14:12; Jeremias 17:9) Mas atagey so karunongan na Dios nen say karunongan tayo. (Isaias 55:8, 9) Kanian no manpaigiya tayo ed kanonotan to, seguradon maong so pansumpalan tayo.​—Salmo 1:1-3; Proverbio 2:6-9; 16:20.

“Diad amin a dalan mo et sikatoy nonoten mo.” Kaukolan tayon amtaen no antoy kanonotan na Dios diad amin ya parte na bilay tayo tan ed amin ya importantin desisyon ya gawaen tayo. Nagawaan tayo itan no ipikasi tayon igiya to tayo tan no unoren tayo iray ibabaga to ed Salita to, say Biblia.​—Salmo 25:4; 2 Timoteo 3:16, 17.

“Gawaen ton maptek iray basbas mo.” Gagawaen na Dios ya maptek so dalan tayo panamegley na pangibabangat tod sikatayo ya manbilay base ed saray matunong ya estandarte to. (Proverbio 11:5) Kanian naiwasan tayo ray arum ya problema tan magmaliw ya mas maliket so bilay tayo.​—Salmo 19:7, 8; Isaias 48:17, 18.

Say konteksto na Proverbio 3:5, 6

Nabasa ed libro na Biblia ya Proverbio iray importantin prinsipyo pian magmaliw ya maliket so bilay tayo tan pian napaliket tayoy Dios. Say inkisulat na unonan siameran kapitulo et singa bilin na ama ed inar-aro ton anak. Idadanet na kapitulo 3 iray balibalin epekto ed saramay papablien tan iyaaplika da so karunongan na Amalsa.—Proverbio 3:13-26.