Magmaliw a Maaligwas​—Ombulaslas

SANEN inmunan naaralan mon iyaplika iray prinsipyo na Biblia, say nigalet iran kiling na panagnonot, panagsalita, tan ugali so nankalkalnan anguman. Dakel ed saya so agawa sakbay a sika so nampalista ed Teokratikon Eskuelaan Parad Ministeryo. Natan et nayarin sika so inmaligwas ya angga ed punton indedikam lay bilay mo ed si Jehova. Kasin kabaliksan na satan a nayarian mo lay ontundan manpaaligwas? Andin balot. Say inkabautismoan mo so gapoan lambengat.

Si babangatan a Timoteo so manlilingkor la bilang Kristianon matatken sanen imbaga nen Pablo ed sikato a “morekdeken” to so simbawan niiter ed sikato tan ed saray pribilehyo na serbisyon nimatalek ed sikato​—a “pampelengan” to irayan bengatla​—pian say “ibubulaslas [to] so nayarin nipatnag ed amin a totoo.” (1 Tim. 4:12-15, NW) Balanglan kagapogapom ni lambengat a tumboken so dalan na katuaan odino walaan ka la na dakel ya eksperiensya ed Kristianon panagbilay, nepeg a sika so interesadon ombulaslas.

Pikakabat tan Kapasimbalo

Diad Efeso 3:14-19 unong ed New World Translation, nabasa tayo ya impikasi nen apostol Pablo a saray kapananisiaan to so “nagnap a makatebek ed nonot . . . diad kaawang tan karukey tan kaatagey tan kaaralem” na katuaan. Nisengeg ed satan, inter nen Jesus so langkap a lalaki pian manbangat, mametek, tan mamabiskeg ed kongregasyon. Say maparanay a panagdalepdep ed apuyanan a Salita na Dios, tekep na panangiwanwan na saray eksperiensyadon managbangat, so makatulong ed sikatayon “ombaleg” ed espiritual.​—Efe. 4:11-15.

Laktipen na ontan ya ibabaleg so pagmaliw a ‘napasimbalo ed espiritu na kalakal.’ Lalanoren na saya so pangiletneg na mabiskeg a kiling na kanonotan a mitunosan ed kanonotan na Dios tan si Kristo. Kakaukolanen na satan so mantultuloy a kipaarap ed panagnonot da, ta pian ‘ikawes to so too a balo.’ (Efe. 4:23, 24) Sano aralen moray Ebanghelyo, kasin sarayan salaysay na bilay nen Kristo so moriaen mo bilang pangaligan a tumboken mo? Kasin panggunaetan mon amtaen iray espesipikon ugali ya impanengneng nen Jesus insan panggunaetan mon aligen iraya ed dilin bilay mo?​—1 Ped. 2:21.

Saray topikon saglawien mo ed pitotongtong so nayarin pakapatnagan na kalaknab na ibubulaslas mo. Saraman so angisulong la ed balon personalidad so agnigalet ed panagsalitan aliwan-matua, maabuso, mabanday, odino negatibo. Imbes, say panagsalita ra so ‘maabig ed kapabiskegan . . . pian mangiter na gayaga ed saray ondengel.’ (Efe. 4:25, 26, 29, 31; 5:3, 4; Jud. 16) Saray komento tan balikas da ed pribada tan diad saray miting ed kongregasyon so mangipatnag a say katuaan so mamapasimbalo ed bilay da.

No sika so agla ‘nipaligpalig dia tan diman na nitektekkiab na antokaman a dagem na bangat,’ saya met so ebidensya na ibubulaslas. (Efe. 4:14) Alimbawa, panon so ikiwas mo sano ipaarap na mundo ed sika so dakel iran balon ideya, pakurang, odino saray klase na panligliwaan? Kasin natukso kan mangisuawi na panaon manlapud saray espiritual ya obligasyon ta pian nagegemtan iratan a bengatla? Say panggawa na ontan so seryoson mangamper ed espiritual ya ibubulaslas. Agaylan mas makabat so panganamot ed panaon para ed espiritual iran gegemtan!​—Efe. 5:15, 16.

No panoy pidedeneng mo ed arum a totoo so nayarin pakapatnagan met na espiritual ya ibubulaslas. Kasin naaralan mo so magmaliw a “matamoy ed panangabagey, bulos a mamerdona” ed saray agagim?​—Efe. 4:32, NW.

Say aligwas mo diad panggagawa ed saray bengatla unong ed paraan nen Jehova so nepeg a napatnagan dia ed loob na kongregasyon tan dia ed loob na ayaman. Nepeg a satan met so mapatnag diad eskuelaan, diad mapubliko iran pasen, tan diad pantratrabahoan mo. (Efe. 5:21–​6:9) No diad saratan ya amin a sirkumstansya et ipapanengneng mo so maridios iran kalidad ed nagnap a sukat, diad ontan say ibubulaslas mon mismo so ompatnag.

Usar Mo so Langkap Mo

Inmatalek nen Jehova ed balang sakey ed sikatayo iray kalidad tan talento. Sikatayo so iilaloan ton mangusar ed saraya nisesengeg ed arum pian diad ontan et nibalikas to so agkanepegan a panangasi to diad panamegley tayo. Nipaakar ed saya insulat nen apostol Pedro: “Sakey tan sakey unong na agamoran to a pamalangkap ipagamor to met ed saray arum ta ontan so maong a panangimatalkan na daakan a grasya na Dios.” (1 Ped. 4:10) Panon mon aasikasoen so kipapasen mon angimatalekan?

Intultuloy nen Pedro: “No wala so mansalita, mansalita komon unong ed saray puyan na Dios.” (1 Ped. 4:11) Sayan bersikulo so mangidadanet ed responsabilidad a mansalita diad nagnap a pitunosan ed Salita na Dios, ta pian nigloria so Dios. Say paraan na panggawa ed ontan a panagsalita so nepeg met a mangigloria ed si Jehova. Say nitaryan panagpasal ed panamegley na Teokratikon Eskuelaan Parad Ministeryo so ontulong ed sikan mangusar ed langkap mo diad ontan a paraan​—a nigloria so Dios diad paraan na pananulong mo ed arum. Lapud satan a gagalam, panon mon sukaten so aligwas mo ed eskuelaan?

Imbes ya isipen so nipaakar ed karakel na punton akobrian mo ed porma na pakakonsehoan na paliwawa odino diad nengneng na saray asainmin a niiter ed sika, morekdeken so kalaknab lay impamaaligwas na sayan panagpasal ed kalidad na bagat na panangidayew mo. Sikatayo so ipaparaan na eskuelaan a magmaliw a lalon epektibo ed lawak na ministeryo. Kanian tepetan mo so inkasika: ‘Peteg kasin ipaparaan ko so ibagak ed lawak na kimeyan? Kasin naaralan kon ipanengneng so personal ya interes ed saraman so pupulongan ko? Kasin iyuuksoy ko so pamawil diad pangitilak ko na tepet ed saray totoo pian pantongtongan ed ontumbok? No mangiyaaral ak na Biblia ed sakey, kasin pankikimeyan ko so onaligwas bilang sakey a managbangat a manabi ed puso?’

Agmomoriaen so aligwas bilang pamaakaran lambengat na saray pribilehyo na serbisyo a nipabtang ed sika. Say ibubulaslas mo so nanengneng, aliwan diad asainmin, noagta diad panggagawam ed satan. No naikdan ka na asainmin a manasaglawi ed panagbangat, tepetan mo so inkasika: ‘Kasin peteg ya uusaren ko so arte na panagbangat? Kasin inusar ko so materyal diad paraan ya akaimpluensya ed kabibilay na saraman so akarengel ed satan?’

Say bilin ya usaren moy langkap mo so mangilalanor na ikiwas. Kasin manbubulon kan mikimey ed arum ed lawak na ministeryo? Kasin aanapen moray pankanawnawa pian ontulong ed saray balon membro na kongregasyon yo, walad kalangweran, odino agmakayari? Kasin manboboluntaryo kan manlinis ed Kingdom Hall odino ontulong ed nanduruman dalan diad saray kombension tan asamblea? Kasin makapan-auxiliary payunir ka a panapanaon? Kasin nayarian mo so makapan-regular payunir odino ontulong ed sakey a kongregasyon a walaay babaleg a pankaukolan? No sakey kan agin laki, kasin dadampoten mo iray Makasulatan a kualipikasyon para ed saray ministeryal a lingkor tan mamatatken? Say inkamabulos mon ontulong tan mangawat ed responsabilidad so sakey a tanda na ibubulaslas.​—Sal. 110:3.

Say Betang na Eksperiensya

No liknaen mon limitadoy pakasarag mo lapud kakulangan na eksperiensya ed Kristianon panagbilay, manpakpel ka. Nayarian na Salita na Dios a gawaen ‘a makabat so andi amta.’ (Sal. 19:7; 119:130; Uli. 1:1-4) Say pangiyaplika ed simbawa na Biblia so mangiyabuloy ed sikatayon nagunggonaan manlapud ayadyarin kakabatan nen Jehova, a satan so mamabli nen say dinanman ya aral ya agamoran panamegley na eksperiensya lambengat. Ingen, legan a sikatayo so ombubulaslas diad serbisyo tayo ed si Jehova, nagamoran tayo so makanakanan eksperiensya. Panon tayon nausar itan ed pankaabiganan?

Lapud nidudunget itayo ed nanduruman sirkumstansya ed bilay, nayarin natukso so sakey a toon manrason: ‘Nidunget ak la ed onian situasyon nensaman. Amtak la so gawaen ko.’ Kasin saya so kurang na kakabatan? Mamapasakbay so Uliran 3:7: “Agka komon makabat dia ed saray dili a matam.” Say eksperiensya so pegteg a mamalaknab ed panmoria tayo ed saray katuaan a konsideraen sano aarapen tayoray situasyon ed bilay. Balet no sikatayo so onaaligwas ed espiritual, say eksperiensya tayo so nepeg met ya ompaslep ed kanonotan tan kapusoan tayo a nakaukolan tayo so bendisyon nen Jehova ta pian ontalona. Sirin, say ibubulaslas tayo so napatnagan, aliwan diad inkamatalek tayo ed panangarap ed saray situasyon, noagta diad inkamabulos tayon ompapeg ed si Jehova para ed panangiwanwan ed bilay tayo. Napatnagan itan diad pagmaliw tayon matalek ya anggapo so nagawa no agto iyabuloy tan diad panamasiansia tayo ed matalek tan malugor a relasyon tayo ed mangatatawen ya Ama tayo.

Mantultuloy ya Ontundas

Si apostol Pablo, anggaman matakken la ed espiritual ya alanaan a Kristiano, so amidbir a kaukolan to so mantultuloy ya “ontundas” pian narapat to so kalat ed bilay. (Fil. 3:13-16, NW) Kasin ontan met so panmoriam?

Diad anton kalaknab so inaligwasan mo la? Sukat moy ibubulaslas mo nipaakar ed no panon inkagnap so impangisulong mo ed balon personalidad, no panon so sigpot a pampapasakop mo ed inkasoberano nen Jehova, tan no panon so inkakulim diad panguusar ed saray langkap mo ed kigalangan nen Jehova. Legan a sika so minanabang ed edukasyon na Teokratikon Eskuelaan Parad Ministeryo, saray kalidad a nipabitar ed Salita na Dios so nepeg a mantultuloy ya ompatnag diad paraan na panagsalita tan panagbangat mo. Iyapasakey mo irayan aspekto na ibubulaslas mo. On, panliketan iratan, tan say ibubulaslas mo so napatnagan komon a tampol.