Saray Reperensya Parad Workbook ed Aral
© 2024 Watch Tower Bible and Tract Society of Pennsylvania
MARSO 3-9
KAYAMANAN ED SALITA NA DIOS | PROVERBIO 3
Manmatalek Ka ed si Jehova
ijwbv artikulo 14 ¶4-5
Proverbio 3:5, 6—“Agka Manmamatalek ed Dilin Pakatalos Mo”
“Manmatalek ka ed si Jehova diad interon pusom.” Ipapanengneng tayon mantitiwala tayo ed Dios no aaligen tayoy paraan to diad saray gagawaen tayo. Nepeg ya buo so tiwala tayo ed Dios pian nibaga tayon mantitiwala tayo ed interon puso tayo. Diad Biblia, kaslakan ya say puso et ontutukoy ed inkatoo tayo, kaibad satan so emosyon, saray mamapakiwas ed sikatayo, saray iisipen, tan saray ugali tayo. Kanian no talagan mantitiwala tayo ed Dios diad interon puso tayo, dapat agti labat ibabase ed liknaan tayo iray desisyon tayo. Labay tayoy mantiwala ed Dios ta kombinsido tayo ya amta na Amalsa no antoy sankaabigan parad sikatayo.—Roma 12:1.
“Agka mandedepende ed dilin pakatalos mo.” Kaukolan tayoy manmatalek ed Dios ta aliwan perpekto so panag-isip tayo, kanian agtayo nayarin mandepende ed satan. No mandepende tayo labat diad sarili tayo odino diad liknaan tayo, ompan makagawa tayo laingen na desisyon ya singa duga ed gapo balet makapuy manayay resulta to. (Proverbio 14:12; Jeremias 17:9) Mas atagey so karunongan na Dios nen say karunongan tayo. (Isaias 55:8, 9) Kanian no manpaigiya tayo ed kanonotan to, seguradon maong so pansumpalan tayo.—Salmo 1:1-3; Proverbio 2:6-9; 16:20.
ijwbv artikulo 14 ¶6-7
Proverbio 3:5, 6—“Agka Manmamatalek ed Dilin Pakatalos Mo”
“Diad amin a dalan mo et sikatoy nonoten mo.” Kaukolan tayon amtaen no antoy kanonotan na Dios diad amin ya parte na bilay tayo tan ed amin ya importantin desisyon ya gawaen tayo. Nagawaan tayo itan no ipikasi tayon igiya to tayo tan no unoren tayo iray ibabaga to ed Salita to, say Biblia.—Salmo 25:4; 2 Timoteo 3:16, 17.
“Gawaen ton maptek iray basbas mo.” Gagawaen na Dios ya maptek so dalan tayo panamegley na pangibabangat tod sikatayo ya manbilay base ed saray matunong ya estandarte to. (Proverbio 11:5) Kanian naiwasan tayo ray arum ya problema tan magmaliw ya mas maliket so bilay tayo.—Salmo 19:7, 8; Isaias 48:17, 18.
Magmaliw a Maaligwas—Ombulaslas
Lapud nidudunget itayo ed nanduruman sirkumstansya ed bilay, nayarin natukso so sakey a toon manrason: ‘Nidunget ak la ed onian situasyon nensaman. Amtak la so gawaen ko.’ Kasin saya so kurang na kakabatan? Mamapasakbay so Uliran 3:7: “Agka komon makabat dia ed saray dili a matam.” Say eksperiensya so peteg a mamalaknab ed panmoria tayo ed saray katuaan a konsideraen sano aarapen tayoray situasyon ed bilay. Balet no sikatayo so onaaligwas ed espiritual, say eksperiensya tayo so nepeg met ya ompaslep ed kanonotan tan kapusoan tayo a nakaukolan tayo so bendisyon nen Jehova ta pian ontalona. Sirin, say ibubulaslas tayo so napatnagan, aliwan diad inkamatalek tayo ed panangarap ed saray situasyon, noagta diad inkamabulos tayon ompapeg ed si Jehova para ed panangiwanwan ed bilay tayo. Napatnagan itan diad pagmaliw tayon matalek ya anggapo so nagawa no agto iyabuloy tan diad panamasiansia tayo ed matalek tan malugor a relasyon tayo ed mangatatawen ya Ama tayo.
Saray Espiritual a Kayamanan
w93 12/15 12 ¶6
Manmatalek ed si Jehova!
Si Jehova a Dios a mismo so manunaan ed panangipanengneng na maaron-kaabigan tan katuaan. Sasalitaen na Salmo 25:10, “amin a daladalan nen Jehova sikara so panangasi tan katuaan.” Diad pangalig ed si Jehova, pablien tayo irayan kalidad tan say mananalimbeng a pakayari ra, ya ikdan tayo na importansya a singa ed panamabli tayo ed sakey a kuentas ya andian na kapara tan inyukit ya agnabura ed kapusoan tayo.
MARSO 10-16
KAYAMANAN ED SALITA NA DIOS | PROVERBIO 4
“Alwaran Moy Pusom”
Panon Mon Naalwaran so Pusom?
4 Diad Proverbio 4:23, inusar so salitan ‘puso’ pian tukoyen so ‘peteg ya inkatoo.’ (Basaen so Salmo 51:6 tan paimanod leksab.) Labay ton ibaga, say “puso” et ontutukoy ed kanonotan, liknaan, motibo, tan pilalek tayo. Ontutukoy itan ed no anton talagay walad loob tayo, aliwan no antoy nanenengneng ed sikatayo.
Panon Mon Naalwaran so Pusom?
10 Pian naalwaran so puso tayo, nepeg tayon amtaen no anto ray peligro tan onkiwas tayon tampol pian protektaan so sarili tayo. Ipapanonot na satan ed sikatayo so gagawaen na sakey ya managbantay nensaman. Diad panaon nen Arin Solomon, saray managbantay et akaalagey ed padir na syudad tan mangiiter iray pasakbay no walay onsasabin peligro. Sayan alimbawa et makatulong pian natalosan tayo no antoy nepeg tayon gawaen pian agnaimpluensyaan nen Satanas so kanonotan tayo.
11 Nensaman, saray managbantay ya walad padir tan saray bantay na puerta et mantutulongan pian naprotektaan so syudad. (2 Sam. 18:24-26) Seseguroen da ya akasara iray puerta no walay nitan lan kalaban. (Neh. 7:1-3) Say nipasal ed Biblia ya konsiensia tayo et singa managbantay ya mangiiter ed sikatayo na pasakbay no sasalien nen Satanas ya looban so puso tayo—diad arum ya salita, no sasalien ton impluensyaan so kanonotan, liknaan, motibo, odino pilalek tayo. Kada no pasakbayan itayo na konsiensia tayo, nepeg tayon dengelen itan tan isara tayo so puerta, a singa panangibaga.
Panon Mon Naalwaran so Pusom?
14 Pian naalwaran tayoy puso tayo, agtayo labat itan isasara pian agmakaloob iray mauges ya impluensya noagta lukasan tayo met itan pian makaloob iray maong ya impluensya. Isipen pa lamet imay ilustrasyon nipaakar ed apadiran ya syudad. Saray puerta na syudad et isasara na bantay na puerta pian agmakaloob iray kalaban, balet wala ray panaon ya lulukasan to iray puerta pian niloob iray naakan tan arum nin suplay. No agbalot lukasan iray puerta, naerasan iray manaayam ed syudad. Mipadpara, kaukolan ya regular tayon lukasan so puso tayo pian makaloob so kanonotan na Dios.
Pansiansiaey Sigpot-puson Panaglingkor ed si Jehova
Oniay impanonot nen Arin David ed si Solomon: “Ana’ko, kabaten moy Dios nen amam tan manlingkor kad sikato a maliket tan sigpot-puso, ta uusisaen nen Jehova so amin a kapusoan, tan natetebek toy amin a kanonotan tan motibo na sakey.” (1 Awa. 28:9, NW) On, si Jehova so Manangusisa na amin a puso, kaibay puso tayo. (Uli. 17:3; 21:2) Tan say nausisa tod puso tayo et walaan na baleg ya epektod relasyon tayod sikato tan ed arapen tayo. Kanian maabig sirin no tumboken tayoy simbawa nen David ya gawaey anggaay nayarian tayon sigpot-puso a panlingkoray Jehova.
Saray Espiritual a Kayamanan
Kasin Maan-anos Kan Manaalagar ed si Jehova?
4 Onia met so ibabaga na Proverbio 4:18: “Say basbas na matunong et singa liwawa na kabuasan ya onliliwawa lan onliliwawa anggad kagkaagewan la.” Amta tayo ya sayan teksto et idedeskribe toy kalkalnan pangipapaamta nen Jehova ed sikatayo na gagala to. Pero onaplika met iyan bersikulo ed iyaligwas ed espiritual na sakey a Kristiano. Kalkalna itan ya nagawa tan kaukolay panaon. No say sakey et makulin man-personal study tan iyaplika to ray bilin na Biblia tan instruksion na organisasyon nen Jehova, sandaraiset ton naalig iray kualidad nen Kristo tan lalo ton nakabat si Jehova. Walay ilustrasyon nen Jesus tungkol ed saya.
MARSO 17-23
KAYAMANAN ED SALITA NA DIOS | PROVERBIO 5
Arawian so Seksual ya Imoralidad
Makapansiansia Kan Malinis ed Sayan Imoral a Mundo
Diad sayan proverbio et say matungangan too so nililitrato bilang “sankaili a bii”—sakey a paabang. Saray salitan pangiingganyo to ed biktimaen to et niyaliling ed masamsamit a dilo tan ed malamolamoy nen say larak ya olibo. Agta maslak a pananagyat ed seksual ya imoralidad so onggagapo ed onian dalan? Alimbawa, konsideraen pay eksperiensia na magangganan 27-años a sekretaryan manngaran na Amy. Oniay inyistorya to: “Walay katrabahoan kon laki a naynay to ak a piimano tan lanang to ak a daydayewen. Marakep no sikay piimano. Balet ta amtak a say pilalek to ed siak et lapud sekso labat. Agak nampaluko ed saray panaayat to.” Saray maatit a salita na mangaayat a laki odino bii so gendagendat a balibali no agtayo nabidbir iray peteg a motibo ra. Lapud saya et kaukolan tayon agamilen so abilidad tayon mannonot.
Makapansiansia Kan Malinis ed Sayan Imoral a Mundo
Saray resulta na imoralidad et singa kapait na ahenho tan singa kamakdem na duaran-tarem a kampilan—makapaot-ot tan makapatey. Say pakakakonsiensia, agkaliktan a panlukon, odino makaalis a sakit lapud pisekso so mabetbet iran ampait a resulta na ontan a kondukta. Tan isipen pa so agaylan sakit a liknaan na asawa na agmatoor ya indibidual. Say maminsan labat ya agpanmatoor so sengegan lay aralem iran sugat a mansiansia legay bilay. On, makapasakit so imoralidad.
Makapansiansia Kan Malinis ed Sayan Imoral a Mundo
Kaukolan tayon arawian so impluensia na imoral a totoo. Akin a paimpluensiaan itayo ed saray dalan da diad italineng ed mabanday a musika, pambantay na mauges a panligliwaan, odino diad pangiwalwal tayoy inkasikatayo ed pornograpikon materyal? (Uliran 6:27; 1 Corinto 15:33; Efeso 5:3-5) Tan agaylan kakulangkulangan no sagyatey imano ra diad pangingganyo odino diad pagmaliw ya agmasimpit ed panangawes tan panag-ayos!—1 Timoteo 4:8; 1 Pedro 3:3, 4.
Saray Espiritual a Kayamanan
Makapansiansia Kan Malinis ed Sayan Imoral a Mundo
Idadanet sirin nen Solomon so makapuy a pansumpalan na panggaway imoralidad. Manulop so pikalugoran tan kaekal na dignidad, odino dilin-respeto. Agta talagan mabanday so pagmaliw a manamenek lambengat ed dili tayon imoral a kagletan odino ed arum? Agta pakapatnagay kakulangan na dilin-respeto so pisekso ed agtayo asawa?
MARSO 24-30
KAYAMANAN ED SALITA NA DIOS | PROVERBIO 6
Antoy Naaralan Tayo ed Saray Gilata?
mwbr25.03—it-1 115 ¶1-2
Gilata
‘Nisipor so Karunongan Da.’ Say ‘karunongan’ na saray gilata et aliwan lapud matalinon panag-isip noagta resulta itan na nisipor lan reaksion ya inter na Amalsa ed sikara. Ibabaga na Biblia ya say gilata et “ipaparaan toy naakan to no tiagew, tan mantitipon na abasto to no panag-ani.” (Pro 6:8) Sakey ed saray klase na gilata ya maslak ya nanengneng ed Palestina et say harvester ant, odino agricultural ant (Messor semirufus). Dakdakel so titiponen ton ilik no panaon na spring tan tiagew, insan atan so kakanen to ed saray panaon ya mairap so makalmoy naakan, singa diad panaon na winter. Kaslakan et nanengneng iyan klase na gilata diad asingger ed saray panag-ilikan ta dakel ditay ilik tan bukebukel. No nabasa ed uran iray akayatol ya bukel, ipaagew iratan na harvester ant pian namaga. Walay parte na bukel ya ketketen to pian ag-itan ontubo legan ya akayatol. Mainomay ya naalmo so ubong na sarayan gilata lapud saray basbas ya lanang dan dadalanan pati saray ubak na bukel ya natitilak da diad lolooban na ubong da.
Saray Balibalin Kualidad Da. No obserbaan tayoy gilata, mas kombinsido tayo ed sayan bilin: “La ka ed gilata, sika a mangiras; obserbaan mo ray gagawaen to tan magmaliw kan marunong.” (Pro 6:6) Aliwa labat ya say panagtipon day naakan so makapabilib noagta pati say inkakuli tan determinasyon da. Kaslakan et mangaawit odino mangigagayugoy ira na saray bengatlan doble so belat to nen say sikara, odino mas ambelat ni. Gagawaen day anggaay nayarian da pian nasumpal day gagawaen da tan ag-ira onsusuko anggano napelag ira, nakarunyas, odino ontulin-tulin ira ed atagey ya pasen. Sankaimano so pantutulongan da, pansiasiansiaen dan malinlinis so ubong da, tan walay malasakit da ed kapara dan komikimey. No maminsan, tutulongan da ray asakitan odino naksawan ya gilata pian makapawil ed ubong da.
mwbr25.03—w00 9/15 26 ¶3-4
Alwaran Moy Ngaran Mo
Agta dapat makuli tayo met ya singa saray gilata? No makuli tayo tan gagawaen tayoy anggaay nayarian tayo pian napaaligwas so kimey tayo, balanglan walay makakaimano ed sikatayo odino anggapo, sikatayo lanlamang so minabang ed satan. On, diad eskuelaan, diad pantratrabahoan tayo, tan legan tayon mibibiang ed saray espiritual ya kimey, kaukolan tayon iter so sankaabigan tayo. Nagugunggonaan iray gilata lapud inkakuli da. Ontan met, labay na Dios ya ‘manliket tayo ed amin ya kimey ya pansasagpotan tayo.’ (Eclesiastes 3:13, 22; 5:18) No makuli tayon mankimey, malinis so konsiensia tayo tan nalikna tayoy inkakontento.—Eclesiastes 5:12.
Angusar si Solomon na duaran tepet pian panonotan so sakey ya toon mangiras: “Anggad kapigan ka ondukol ditan, sika a mangiras? Kapigan ka onliing?” Inalig na ari so panagsalita na mangiras, kuan to: “Diad daiset ya ugip, diad daiset a lirep, diad daiset a pantalikepkep pian manpainawa, onsabid sika so kairapan a singa tulisan, tan say pankaukolan mo a singa armadon too.” (Proverbio 6:9-11) Legan ya akarukol so mangiras, mapmaples ya onsabi ed sikato so kairapan ya singa sakey ya tulisan tan onataki ed sikato so kakulangan ya singa armadon too. Napanon tampol na dika tan sabit so uma na toon mangiras. (Proverbio 24:30, 31) Mapmaples met ya nalugi so negosyo to. Panon kasi kabayag ya anosan na sakey ya amo so empleyado ton mangiras? Tan kasin maong so pansumpalan na sakey ya estudyanten mangiras ya manaral?
Saray Espiritual a Kayamanan
ijwbq artikulo 114 ¶2
Kasin Walay “Pitoran Kasalanan a Makapatey”?
Agta binitla na Biblia so ‘pitoran bengatla ya kadimla nen Jehova’?
On. Oniay nabasad Uliran 6:16 diad Say Biblia: “Wala so anem a bengatla a kagula nen Jehova; on, pitora so saray kadimla to.” Balet agto labay ya ibagan amin a kasalanan et abitla la ed tinmumbok iran bersikulo diad Uliran 6:17-19. Imbes, manuna labat iratan, ya sakop da lay amin ya klase na kasalanan, kaiba la ray diad nonot, salita, tan gawa.
MARSO 31–ABRIL 6
KAYAMANAN ED SALITA NA DIOS | PROVERBIO 7
Paliisan Iray Makapatukson Situasyon
“Unoren Mo so Saray Ganggan Ko et Manbilay Ka”
Say bintana a tinandagan nen Solomon so walaay hamba—mapatnag et singa sakey a bastidor a walaan na saray liston tan anganko et maartin naukitan. Diad pansirunget et ombibilunget la iray lansangan. Anengneng to so sakey a kalangweran a laki a nagkalautlan mainomay a natukso. Lapud andiay pakatebek, odino kakabatan, sikatoy andian na pakatalos. Maseguron amta to no anton klasen lugar so nilooban to tan no antoy pansumpalan to diman. Say kalangweran so inmasingger ed ‘suyok na bii,’ a paarap la iman ed abung na bii. Siopa ta iyan bii? Anto tay getma to?
“Unoren Mo so Saray Ganggan Ko et Manbilay Ka”
Saray bibil na sayan bii so maamuyot. Sipapakpel tan mataletalek ton imbalikas iray salita to. Amin ya ibaga to so inas-asigta pian naingganyo so kalangweran. Diad impangibaga ton angiyapay na saray bagat a pandurungoan ed saman a mismon agew tan nambayar na saray sipan to, ipapasagilig ton sikatoy ag-onkukulang ed espiritual. Saray bagat a pandurungoan ed templo diad Jerusalem et laktipen toy karne, arina, larak, tan alak. (Levitico 19:5, 6; 22:21; Numeros 15:8-10) Lapud say mangisaklang tan say pamilya to so makapibiang ed sarayan bagat a pandurungoan, ipapalikas ton dakel so naakan tan nainum ed abung to. Mapatpatnag so nagawa: Say malangwer a laki so makapanliket diman. Say bii so pinmaway ed abung to pian sikatoy anapen to. Agaylan makapatenyeg—no naatitan so sakey. “Peteg a walay aanapen to,” so kuan na sakey ya iskolar na Biblia, “balet talaga ta’n aanapen to iyan nikabkabiig a polano? Say makulangkulang lambengat—nayarin sayan too—so manisia ed sikato.”
Kayari ton pinagmaliw so inkasikato a makapaayat diad panangawes to, diad maatit iran salita to, diad lakap to, tan diad taway na saray bibil to, inusar met na mangaayat a bii so pakaangob. Inkuanto: “Imbilkag ko so dukolan ko a pati saray tandakan ya inalong, pati saray gulisan ya abe-abel ya inaramey na Ehipto. Binalingitan ko so dukolan ko ed mirra, saray aloe, tan kanela.” (Uliran 7:16, 17) Marakerakep so impangitarya to ed dukolan to diad saray makolor a lienzon nanlapud Ehipto, tan pinabalingitan to itan na saray pinilin mirra, saray aloe, tan kanela.
“Gala, mantuyaw ita ed aro angga ed kabuasan,” intuloy ton inkuan, “manligliwa ita ed saray aro.” Say imbitasyon et aliwa lambengat a mangan iran dua. Say isisipan to et panliketay piakdol ed sikato. Parad sayan kalangweran a laki et saman a pananagyat et pakasalian tan makapalikliket! Bilang pangayat ni et, inkuan to: “Ta say laki andi ed abung; linma ed andukey a kurang: Sikato angitarok na sansupot a kuarta ed sikato; onsabi ed abung no tulaw.” (Uliran 7:18-20) Impaseguro to ed laki a bulobulos ira ta say masiken to so linman nambiahe lapud negosyo tan mabayag ni so isabi to. Agaylan maabilidar iyan bii ed panamalikdo ed sayan kalangweran a laki! “Ed dakel a makaanlay a bitla to sikato so patuloken [“tangguyoren,” NW] to; ed panagkoltit na saray bibil to sikato so napilitan to.” (Uliran 7:21) Say sakey so kaukolan a singa si Jose ta pian naresistian to iyan pananangguyor. (Genesis 39:9, 12) Kasin mipara iyan kalangweran a laki ed kualidad?
“Unoren Mo so Saray Ganggan Ko et Manbilay Ka”
Parad kalangweran et talagan mairap itan a resistian. Diad impangibaliwala to la ed pakatebek to, sikatoy tinumbok to a ‘singa sakey a baka ya onla ed panagpartian.’ No panon a say akagolonggolong a too et agto napaliisay kadusa to, ontan met lay inkaplag na sayan kalangweran ed kasalanan. Agto anengneng so kapeligroan anggad say “pana [et] talosen to so altey to,” salanti, anggad sikatoy nasugatan a pansengegay ipatey to. Say patey et nayarin pisikal lapud ipapaarap to so inkasikato ed makapatey iran sakit a makaalis lapud pisekso. Say sugat so pansengegan met na ipapatey ed espiritual; “nipaakar ed [mismon] bilay to.” Say inkatoo tan say bilay to so apektado lan tuloy, tan sikatoy seryoson akapankasalanan ed Dios. Diad ontan et inapura toy ipatey to, a singa sakey a manok ya apatitan!
Saray Espiritual a Kayamanan
“Unoren Mo so Saray Ganggan Ko et Manbilay Ka”
“Ibedber mo ra [saray pananontonan ko] ed saray tamurom [“gamet,” NW],” intuloy nen Solomon, “isulat mo ra ed tapew na tapi na pusom.” (Uliran 7:3) No panon a saray gamet et sankanengneng na mata tayo tan makana iratan ed pakasumpal na saray gagala tayo, saray leksion a naaralan manlapud Makasulatan a panamabaleg odino manlapud impakagamor na pikakabat ed Biblia so lawas onkanan panonot tan giya ed amin a gawaen tayo. Nepeg tayon ipaslep iratan a pananontonan ed kapusoan tayo, a pagmaliwen iratan a kabiangay inkatoo tayo.
ABRIL 7-13
KAYAMANAN ED SALITA NA DIOS | PROVERBIO 8
Dengelen so Karunongan nen Jesus
“Inarok so Ama”
7 Diad bersikulo 22, et inkuan na kakabatan: “Si Jehova kinayarian [“pinalsa,” Maung a Balita] to ak dia ed gapo na dalan to, arapen na saray gawa to nen inmuna.” Napatnagan a mas nen say kakabatan so nadedeskribe dia, lapud satan a kalidad et agbalot “pinalsa.” Anggapoy gapoan na satan lapud si Jehova et lawas lan wala tan lawas makabat. (Salmo 90:2) Balet, say Anak na Dios et “panguloan ed amin a pinalsa.” Sikatoy pinawala odino pinalsa; sikatoy sankaunaan ed amin a ginawa nen Jehova. (Colosas 1:15) Unong a deneskribe ed Uliran, say Anak so apalsa la antis nin ginawa so dalin tan katawenan. Tan bilang Salita, a Representantin Managsalita na Dios a mismo, sikatoy nagnap a pakapatnagan na kakabatan nen Jehova.—Juan 1:1.
“Inarok so Ama”
8 Antoy gagawaen na Anak legan na samay andukerukey a panaon antis ton linma diad dalin? Inkuan na bersikulo 30 a sikatoy kaiba na Dios bilang “uloen a komikimey.” Antoy labay ya ibaga na satan? Ipapaliwawa na Colosas 1:16: “Dia ed sikato apalesa so amin a bengatla, dia ed katawenan tan tapew na dalin . . . Amin a bengatla apalsa ed panamegley to tan nipaakar ed sikato.” Kanian, inusar na Manamalsa a si Jehova so Anak to, say Uloen a Komikimey, pian palsaen so arum niran pinalsa, salanti, saray espiritun pinalsa ed tawen, say maawaawang ya uniberso, say dalin, saray makapadinayew a nanduruman tantanaman tan ayayep, ontan met ed say obra maestra ed amin a palsa ed dalin: say katooan. Diad arum ya aspekto, nayari tayon iyaliling iyan impantulongan na Sanama ed sakey ya arkitekto a mikikimeyan ed sakey a managkontrata ya eksperto ed panagpaalagey na saray alay dakep a desinyo na arkitekto. Sano pandinayewan tayo so antokaman ya aspekto na palsa, diad tua et nidadayew tayo so Sankamaongan ya Arkitekto. (Salmo 19:1) Balet, nayarin nanonotan tayo met so maliket tan abayag ya impantulongan na Manamalsa tan say “uloen a komikimey” to.
9 Sano maniban mankimey so duaran ag-ayadyarin too, no maminsan et ag-ira makapantunosan. Aliwan ontan si Jehova tan say Anak to! Andukerukey lan panaon a mikikimeyan so Anak ed Ama to, tan sikatoy “malikeliket lawas ed arap to.” (Uliran 8:30) On, labalabay ton nakaulop so Ama to, tan ontan met nen Jehova. Kanian, natural labat a lalon nagmaliw a kaulibay na Anak so Ama to, a naaral ton aligen iray kalidad To. Kanian, agla pankelawan no akin ya ontan lay elet na aroan dan Sanama! Manepeg labat a nibagan satan la so sankabayagan tan sankaeletan a bedber na aroan ed interon uniberso.
Apresyaen si Jesus—Say Mas Matalonggaring a David tan Solomon
14 Saksakey so toon malinlinew ya akapalumbas ed kakabatan nen Solomon. Satan et si Jesu-Kristo, ya indeskribe toy inkasikaton “sakey a babaleg [odino mas matalonggaring] nen si Solomon.” (Mat. 12:42) Sinalita nen Jesus iray “salita na maando a bilay.” (Juan 6:68) Alimbawa, pinalaknab na Sermon ed Palandey so pigara ed saray uliran nen Solomon. Walaray indeskribe nen Solomon a makapangitarok na liket ed sakey a managdayew nen Jehova. (Uli. 3:13; 8:32, 33; 14:21; 16:20) Si Jesus balet et indanet to a say lapuan na tuan liket et saray bengatlan misiglaotan ed panagdayew ed si Jehova tan say kasumpal na sipasipan na Dios. Inkuan to: “Maliket iramay manonot ed espiritual a pankaukolan da, ta parad sikara so panarian na katawenan.” (Mat. 5:3, NW) Saramay iyaaplika day prinsipyo na bangabangat nen Jesus et napapaapit ed kinen Jehova, say “subol na bilay.” (Sal. 36:9; Uli. 22:11; Mat. 5:8) Si Kristo so personipikasyon na “karunongan na Dios.” (1 Cor. 1:24, 30) Bilang Mesianikon Ari, walad si Jesu-Kristo so “espiritu na kakabatan.”—Isa. 11:2.
Saray Espiritual a Kayamanan
mwbr25.03—g 5/14 16
Kasin Narerengel Mon “Ontatawag a Maksil” so Karunongan?
▪ Ibabaga na The World Book Encyclopedia ya “manlapu la nensaman say sankarakelan ya libron nibunog” et say Biblia. “No ikompara ed arum ya libro, atan so sankarakelan ya beses ya nipatalos tan nipatalos itan ed sankarakelan ya lenguahe.” Balanglan kompleto odino kabiangan labat, wala lay Biblia ed ngalngali 2,600 ya lenguahe kanian masulok ya 90 porsiento ed populasyon na mundo so nayarin makabasa ed satan.
▪ Ontan met, “ontatawag a maksil so karunongan” diad mas literal a paraan. Oniay nabasa tayo ed Mateo 24:14: “Tan sayan maong a balita na Panarian et nipulong ed interon dalin bilang pantasi ed amin a nasyon, insan onsabi so anggaan.”
ABRIL 14-20
KAYAMANAN ED SALITA NA DIOS | PROVERBIO 9
Magmaliw Kan Toon Marunong, Aliwan Mabalaw
“Dengel Mo ray Salita na Marunong”
4 Anggano tanggap tayo met ed sarili tayo ya aliwa tayon perpekto, no maminsan et aliwan mainomay ya awaten so direktan simbawa. Diad tua, ompan nasakitan tayo no walay mangipaimano na lingo tayo. (Basaen so Eclesiastes 7:9.) Ompan say sakey et manrason tan mankatunongan ni ingen pian palemewen so ginawa ton lingo. Ompan kuestionen toy motibo na nansimbawa ed sikato, o mansinti lapud paraan na impansimbawa ed sikato. Ompan anapan to ni ingen na lingo imay nansimbawa tan ibaga ton: ‘Masita-sita! Singa aga nalilingo!’ Sakey ni, no agto agustoan imay insimbawa ed sikato, ibaliwala to itan odino ompan say kerewan toy advice et saramay kakaaro to ya say ibaga ra et no anto may labay to labat ya narengel.
“Dengel Mo ray Salita na Marunong”
12 Antoy makatulong pian mas mainomay tayon awaten so simbawa? Dapat mapaabeba tayo. Tandaan tayo ya ag-itayo perpekto tan no maminsan et talagan makakagawa tayoy aliwa. Singa abitla nen niman, wala ray aliwan inisip tan imbaga nen Job. Pero binirbir to lanlamang so lingo to kanian benendisyonan nen Aman Jehova. Lapud mapaabebay Job, inawat toy simbawa nen Elihu, anggano mas ugaw si Elihu nen say sikato. (Job 32:6, 7) No mapaabeba tayo ya singa si Job, ondengel tayod simbawa anggano mas ugaw so nansimbawa ed sikatayo tan singa anggapo met so makapuy ya ginawa tayo. Oniay imbaga na sakey ya elder ed Canada: “Wala ray nanenengneng na arum ya agtayo nanenengneng ed sarili tayo. Kanian no maminsan, agtayo amta no antoy kaukolan tayon umanen no anggapoy mangibaga ed sikatayo.” Diad tua, kaukolan tayoy tulong na arum pian mas naalig tayo ray ugali nen Jesus tan magmaliw tayon mas epektibo ed ministeryo.—Basaen so Salmo 141:5.
13 Isip mo ya say simbawa et panangaro nen Jehova ed sika. Labay nen Aman Jehova ya maong so pansumpalan tayo. (Pro. 4:20-22) Inar-aro to tayo kanian lanang to tayon bibilinen. Uusaren to so Biblia, saray publikasyon tayo, tan saray maespiritual ya agagi. “Gagawaen itan na Dios parad pakagunggonaan tayo,” so kuan na Hebreo 12:9, 10.
14 Manpokus ed mensahe, aliwan diad paraan na impansimbawa. No walay nansimbawa ed sikatayo, ompan isipen tayo ya agto labat inapipiger so panagsalita to. Siempre, no say sakey et mangiter na simbawa, dapat mauyamo so pangibaga to pian mas mainomay ya awaten na sisimbawaen to. (Gal. 6:1) Pero, antokaman so paraan na impansimbawa ed sikatayo, say pampokusan tayo et samay mensahe. Maabig no tepetan tayoy sarili tayo: ‘Anggano agko agustoan so impansimbawa tod siak, wala kasi punto to? Tua, asakitan ak ed paraan na panagsalita to, pero antoy naaralan ko ed imbaga tod siak?’ Say nonoten tayo la et parad pankaabigan tayo lanlamang imay mismon simbawa.—Pro. 15:31.
‘Lapu ed Kakabatan et Saray Agew Tayo so Naparakel’
Say reaksion na makabat a too ed panamaat so miduma ed samay managludlurey. Kuan nen Solomon: “Baaten mo so makabat, et sikato aroen to ka. Ikdan mo na panangibangat so makabat, et sikato naani makabkabat ni.” (Uliran 9:8b, 9a) Amta na makabat a too ya “anggapo so pananusa natan a singa sengeg na liket, noag ingen kaermenan: balet kayari to mangiter na bunga a mareen na katunongan ed saray nailuam la lapud ed sikato.” (Hebreos 12:11) Anggaman ompatnag ya ansakit so simbawa, akin ya ombawi itayo odino magmaliw a depensibo anta say pangawat ed satan et pagmaliwen to itayon mas makabat?
“Ibangat mo so matunong, et sikato onlalo ed bangat,” so intuloy na makabat ya ari. (Uliran 9:9b) Anggapo so makabkabat odino maedad lan tuloy pian mantultuloy a makaaral. Agaylan liket so pakanengneng ed saramay maedad la ya aawaten day katuaan tan idedika ray inkasikara ed si Jehova! Komon ta panbanikelan tayo met a pansiansiaey determinasyon tayon makaaral tan pansiansiaen ya aktibo so kanonotan.
‘Lapu ed Kakabatan et Saray Agew Tayo so Naparakel’
Say pangisekar a gamoray kakabatan so personal a responsabilidad tayo. Pian nidanet iya et inkuan nen Solomon: “No makabat ka nipaakar ed inkasika; et no manludlurey ka, sika a bukor so mangawit ed sikato.” (Uliran 9:12) Say makabat a sakey so makabat diad pakagunggonaan ton mismo, tan say managludlurey lambengat so natetel ed dilin paniirap to. On, anien tayo so intanem tayo. Komon ta ‘ikiling tayo [sirin] so layag tayo ed kakabatan.’—Uliran 2:2.
Saray Espiritual a Kayamanan
Parad Pankaabigan Tayo so Itakot ed si Jehova
Importante ya gawaen tayoy anggaay nayarian tayo ya iwasan so imoralidad. Imbaga to may “makulangkulang a bii” ya “saray tinakew a danum et masamsamit.” Anto tay “tinakew a danum”? Diad Biblia, say seksual ya relasyon na sanasawa et inkompara ed makarepreskon danum. (Pro. 5:15-18) Say seksual ya relasyon et para labat ed sakey ya laki tan sakey ya bii ya legal iran kasal. Kanian no imbagan “tinakew a danum,” nayarin ontutukoy itan ed panggaway imoral o pirelasyon ed agmo asawa. Saray manggagaway imoral et singa ra matakew ta iyaamot day gagawaen da pian ag-ira naerel. Parad sarayan totoo, masamsamit so “tinakew a danum,” lalo la no anggapo met so makakanengneng o makaamta ed gagawaen da. Pero lolokoen da labat so sarili da ta nanenengneng nen Jehova ya amin. Aliwa sirin ya “masamsamit” so “tinakew a danum.” Akin ey? On ta no napaermen tayoy Jehova tan nabalang tayoy pabor to, atan la so sankapaitan ya nagawad bilay tayo. (1 Cor. 6:9, 10) Tan diad tua, amayamay ni so makapaermen ya epekto na seksual ya imoralidad.
ABRIL 21-27
KAYAMANAN ED SALITA NA DIOS | PROVERBIO 10
Panon Kan Magmaliw ya Tuan Mayaman?
mwbr25.03—w01 7/15 25 ¶1-3
‘Nabendisyonan so Matunong ya Too’
Walay sakey nin paraan pian nabendisyonan so matunong ya too. “Say liman mangiras et pansengegay kairapan, balet say liman makuli et mangawit na kayamanan. Say anak ya onkikiwas a makabat et mantitipon na ani legan na tiagew, balet say anak ya onkikiwas a makapabaing et maugi-ugip no panag-ani.”—Proverbio 10:4, 5.
Mas onaplika iray imbaga na ari ed saray komikimey legan na panag-ani. Say panaon na panag-ani et aliwan panaon na iyugip. Atan so panon na pankuli tan pankimey na dakel ya oras. On, maganat itan ya panaon.
Diad sayan imbaga nen Jesus ed saray disipulo to, sankanonot toy panag-ani na totoo aliwan na saray trigo o sebada: “Dakel so aanien, balet daiset so mankikimey. Mikasi kayo sirin ed Katawan na panag-ani [si Jehova a Dios] a mangibaki na saray mankimey ed aanien to.” (Mateo 9:35-38) Nen taon 2000, masulok ya 14 milyon so inmatendi ed Memoryal na Impatey nen Jesus—masulok ya doble itan ed bilang na saray Tasi nen Jehova. Agta tua ya ‘saray kaumaan et amputi la parad panag-ani’? (Juan 4:35) Mikakasi iray tuan mandadayew ed Dios ya mangibaki so Katawan na kaaruman iran komikimey legan iran makulikulin manggagaway disipulo pian suportaan iray ipipikasi ra. (Mateo 28:19, 20) Tan talagan benendisyonan nen Jehova iray sagpot da. Legan na 2000 serbisyon taon, masulok ya 280,000 so abautismoan. Mansasagpot met iratan ya balo ni pian ibangat so Salita na Dios. Nalikna tayo met so liket legan na sayan panaon na panag-ani no pansasagpotan tayoy mibiang ed panagbangat a kimey.
mwbr25.03—w01 9/15 24 ¶3-4
Manakar ed “Basbas na Matunong”
Indanet nen Solomon so kaimportantian na inkatunong. Oniay kuan to: “Say kayamanan na sakey a too et singa apadiran a syudad to. Say maneral ed saray pobri et say kairapan da. Say kimey na matunong et mangitonton ed bilay; balet say naaani na mauges et mangitonton ed kasalanan.”—Proverbio 10:15, 16.
No wala ray ag-iilaloan ya nagawa, nayarin magmaliw ya proteksion so kayamanan ya singa say apadiran ya syudad ya proprotektaan to iray manaayam ditan. Say kairapan na bilay balet et nayarin magmaliw ya problema no wala ray ag-iilaloan ya nagawa. (Eclesiastes 7:12) Pero nayarin ipapaamta met na matalinon ari ya parehon walay peligro na pagmaliw ya mayaman tan mairap-bilay. Nayarin manmatalek so mayaman ya too ed kayamanan to tan isipen ton “singa itan padir a manproprotekta” ed sikato. (Proverbio 18:11) Ompan isipen balet na mairap ya too ya lapud mairap so bilay to et anggapo lay pag-asa to. No ontan, pareho ira ya agmakagawa na maong ya ngaran ed pakanengneng na Dios.
mwbr25.03—it-1 340
Bendisyon
Bebendisyonan nen Jehova Iray Totoo. “Say bendisyon nen Jehova so mamapayaman ed sakey, tan agto itan aaruman na pakasakitan.” (Pro 10:22) Bebendisyonan nen Jehova iray totoon aabobonan to. Proprotektaan, gagawaen to ran maaligwas, igigiya to ra, gagawaen ton maong so pansumpalan na saray kimey da, tan iiter to iray pankaukolan da kanian balibali so epekto ed sikara.
Espiritual a Kayamanan
Say Liket ed Pankurang ed Katooran
18 “Say bendisyon nen Jehova”—satan so lapuan na inkaaligwas ed espiritual na totoo to. Tan apaseguroan itayo a sikato et “agmangarum na ermen.” (Uliran 10:22) Balet, akin a nasusubok tan nasasali so dakel ed saray matoor ed Dios, a pansesengegan na pirmin ot-ot tan paniirap da? Saray kairapan tan gonigon so nagagawa ed sikatayo lapud taloran manunan rason. (1) Say dilin makasalanan a tendensia tayo. (Genesis 6:5; 8:21; Santiago 1:14, 15) (2) Si Satanas tan saray demonyo to. (Efeso 6:11, 12) (3) Say marelmeng a mundo. (Juan 15:19) Anggaman aabuloyan nen Jehova iray mauges a bengatla a nagawa ed sikatayo, aliwan sikato so panlalapuan na saratan. Diad tua, “amin a maong a palangkap tan amin ya ayadyarin palangkap manlapu ed tagey tan onleksab a manlapu ed Ama na saray liwawa.” (Santiago 1:17) Saray bendisyon nen Jehova so agpansengegan na ot-ot.
ABRIL 28–MAYO 4
KAYAMANAN ED SALITA NA DIOS | PROVERBIO 11
Agmo Ibabaga!
Say Katooran so Mangitotonton ed Maptek a Totoo
Say katooran na saray maptek tan say karelmengan na saray managgaway-mauges so walaan met na epekto ed arum a totoo. “Say too ya andian na Dios bagbagen to ed sangi to so kaabay to,” so kuan na ari ed Israel, “balet lapu ed pikakabat say matunong nilaban.” (Uliran 11:9) Siopa ta so mangiburi a say panagpauges, makaderal a talabutob, mabanday a tongtongan, tan andi-kanan labilabir so makadesyang ed arum? Diad biek a dapag, say panagsalita na sakey a matunong so maralus, inisip a maong, tan makonsidera. Diad pikakabat et sikatoy nilaban lapud say katooran to so mangitatarya ed sikato na saray pamaneknekan pian nipatnag a matila iray mangaakusa ed sikato.
Say Katooran so Mangitotonton ed Maptek a Totoo
Saray ombaley a manutumbok ed maptek a kurang so mangiyalibansa na kareenan tan aligwas tan mamapabiskeg ed arum diad komunidad. Kanian say baley napaatagey—satan so onaligwas. Saramay mansalita na kaugsan, makapasakit, tan makapuy iran bengatla so pansengegay pakagirogiro, ermen, agpankakasakey, tan pankokolkol. Nagkalautlan ontan so kipapasen no sarayan indibidual et maimpluensyan totoo. Satan a baley so managmak na inkagulo, inkabulok, tan kageba ed moral tan nayarin pati diad ekonomya.
Say prinsipyon nibalikas diad Uliran 11:11 so onaaplika met ed saray totoo nen Jehova legan a sikaray mantitipon ed singa-baley iran kongregasyon da. Say kongregasyon a walaan na impluensya iray maespiritual a totoo, salanti, saray maptek ya itotonton na katooran da et sakey a grupo na maliket, aktibo, tan matulong a totoo, a mangigagalang ed Dios. Bendisyonan nen Jehova so kongregasyon, tan onaligwas itan ed espiritual a paraan. Panapanaon, saramay pigaran agkontento tan agnapepenek, a manaanap na pamalawan tan manusuppiat ed panggagawa ed saray bengatla, et singa ra “lamot na kapaitan” a nayarin onkayat tan manamal ed arum a datin agnaaapektoan. (Hebreos 12:15) Mabetbet a kaliktan na saratan so nagkalalon autoridad odino inkaprominente. Sikaray mamapalesa na labir-labir a wala so ag-inkahustisya, etnikon panaglabi, odino mipadpara, diad loob na kongregasyon odino diad biang na mamatatken. Peteg a say sangi ra so pansengegay inkaapag-apag ed loob na kongregasyon. Agta nepeg tayon paliisan so idengel ed saray labir da tan panggunaetan tayoy magmaliw ya espiritual a too a makatulong ed kiwala na kareenan tan pankakasakey ed loob na kongregasyon?
Say Katooran so Mangitotonton ed Maptek a Totoo
Agaylan pirmin kaugsan so itarok na sakey ya andian na pakatebek, odino “andian na kakabatan”! Agto kokontrolen so panagsalita to anggad mansumpal la itan ed panagpauges odino panagmudmora. Nepeg ya onkiwas a tampol iray aturon mamatatken pian patundaen iyan makapuy ya impluensya. Aliwan singa ‘sakey ya andian na kakabatan,’ amta na toon walaan na pakatebek no kapigan so ag-iyesel. Imbes ya iparungtal to so kompidensyal a bengatla, sikatoy mangiyamot ed pamaakaran. Lapud amta ton say ag-abanlongan a dila et nayarin pansengegay pirmin kaugsan, say toon makatebek et “walaan na matalek ya espiritu.” Sikatoy matoor ed saray kapananisiaan to tan agto iwawalwal iray kompidensyal a pamaakaran a nayarin mameligro ed sikara. Agaylan bendisyon iratan a manamemben-katooran diad kongregasyon!
Saray Espiritual a Kayamanan
g20.1 11, kahon
No Anto ray Gawaen Mo Sano Nai-stress Ka
“NABAWASAN SO STRESS MO NO MANGGAWA KAY KAABIGAN”
“Say lakin mangipapatnag na kaabigan et nagugunggonaan, balet say maruksan too et mangiyaakar na problema ed sarili to.”—PROVERBIO 11:17.
Say libron Overcoming Stress et walaan na kapitulo ya say title to et “Nabawasan so Stress Mo No Manggawa Kay Kaabigan.” Unong ed autor na satan a libro ya si Dr. Tim Cantopher, no maabig so pantrato tayod arum, balibali so epekto na satan ed laman tayo tan magmaliw tayon maliket. Balet, say toon maruksa et agmaliket lapud aglabay na totoo tan paliisan da.
Nasarag tayo met so stress no maabig so panagtrato tayo ed sarili tayo. Singa bilang, nepeg ya agtayo maruksa odino agtayo pipiliten so sarili tayo ya gawaen so agtayo nayarian. Nepeg ya agtayo met memelmelagen so sarili tayo. “Arom so kaparam a too a singa ed sikan dili,” so kuan nen Jesu-Kristo.—Marcos 12:31.