Saray Reperensya Parad Workbook ed Aral
© 2025 Watch Tower Bible and Tract Society of Pennsylvania
MAYO 5-11
KAYAMANAN ED SALITA NA DIOS | PROVERBIO 12
Makapaliket so Makulin Pankimey
Sakey ya Ugalin Mas Mabli nen say Diamante
Wala ray lingkor nen Jehova ya nayarin nanairapan ya maong ed panag-anap na pambilay. Imbes ya mananap iray mainomay balet aliwan matuan paraan, maseet tan makulikuli ran mankikimey. Kanian ipapanengneng dan mas importante ed sikara iray balibalin kualidad na Dios, singa say inkamatua, nen say antokaman ya materyal a bengatla.—Pro. 12:24; Efe. 4:28.
Makuli ya Mantrabaho
“Sikatoy mansagpot, a manggawa na maabig a kimey diad panamegley na saray lima to, pian walay inabang to ed siopaman a mankaukolan.”—EFESO 4:28.
Labay na Amalsa ya pablien tayoy trabaho tayo. Akin? On ta no say sakey et makuli, sikatoy maliket ta nitatarya toy pankaukolan to tan na pamilya to. Ompan natulongan to ni ingen iray mankaukolan. Sikatoy labalabay met na amo to. Kanian no say sakey et makuli, mas baleg so posibilidad ya agnaekal ed trabaho to. Saray maabig ya resulta na inkakuli na sakey et adeskribe ed Biblia ya “regalo na Dios.”—Eclesiastes 3:13.
Saray Espiritual a Kayamanan
ijwyp artikulo 95 ¶10-11
Kasin Matibay Ak?
● Isipen no panon kaseryoso so problemam. Aral mon ibiig so angkabaleg ed saray angkelag labat ya problema. Ibabaga na Biblia: “Say makulangkulang et ipapatnag to a tampol so pansyodot to, balet say makabat a too et papalabasen toy panag-insulto.” (Proverbio 12:16) Aliwan amin ya problema et nepeg ya panaburidoan.
“Diad eskuelaan, manrereklamo iray classmate ko anggan diad melag iran bengatla ya singano masyadon importante iratan. Insan no ibagad sikara na saray friends da ed social media ya duga labat ya manreklamo ira, mas lalon onsyodot ira, kanian nairapan iran balansien so problema ra.”—Joanne.
MAYO 12-18
KAYAMANAN ED SALITA NA DIOS | PROVERBIO 13
Agka Papaibalang ed “Lamparaan na Mauges”
mwbr25.05—it-2 196 ¶2-3
Lamparaan
Saray Arum nin Piguratibon Usar to. Isisimbolo na lamparaan so antokaman ya pandedependian na sakey ya too ya mangiter na liwawa ed dalan to. Base ed satan imbaga na proverbio so pandumaan na matunong tan say mauges: “Say silew na matunong et maliwliwawa, balet say lamparaan na mauges et naerep.” (Pro 13:9) Say silew na matunong et tuloytuloy ya mas onliwawa, balet say lamparaan na mauges, anggano singa maliwliwawa itan tan anggano singa maaligwas so dalan to lapu ed satan, seguroen na Dios ya say pansumpalan na mauges et kabilungetan, tan ditan napatir so sali to. Ontan so nagawa ed toon mangayew ed ama tan ina to.—Pro 20:20.
Say labay met ya ibaga na naerep so lamparaan na sakey ya too et anggapoy ilalo to ed arapen. Oniay ibabaga na sakey nin proverbio: “Seguradon anggapoy arapen na siopaman a marelmeng; say lamparaan na mauges et naerep.”—Pro 24:20.
Panlingkoran so Dios na Kawayangan
3 No apalikdo nen Satanas so duaran perpekton too, ontan met na dakel ya anghel ya ipulisay so inkasoberano na Dios, sarag to met itan a gawaen ed sikatayo. Ontan nin siansiay taktika to. Ipapalikna tod sikatayon makapabelat iray ganggan na Dios, tan agmakapaliket so pangunor ed saratan. (1 Juan 5:3) No say lanang ya kaulop tayo et ontan so panagnonot da, naimpluensyaan itayo. Oniay imbaga na 24 años a sister ya akapanggaway imoral: “Baleg so impluensyad siak na saray mauges a kaulop, lalo la ta antakot koy magmaliw a dumad sikara.” Nayarin ontan met so desdes a naeksperiensyam ed saray kaulop mo.
“Balang Masimpit a Too Mankimey a Sikakabat”
Say makalakal tan maptek a too ya onkikiwas tekep na tuan pikakabat et nabendisyonan. Oniay impaseguro ed sikatayo nen Solomon: “Say maptek mangan angga ed kapesel na kamarerwa to; balet say eges na marelmeng naukolan.” (Uliran 13:25) Amta nen Jehova no anto so maabig parad sikatayo diad anggan dinan ya aspekto na bilay—diad pidedeneng ed pamilya tayo, pisisiglaotan tayo ed arum, ministeryo tayo, odino sano nadidisiplina tayo. Tan dia ed makabat a pangiyaplika ed simbawa a naromog ed Salita to, seguradon panggayagaan tayo so sankaabigan a panagbilay.
Saray Espiritual a Kayamanan
Disiplina—Ebidensya na Panangaro na Dios
ANTOY nanonotan mo no narengel moy salitan “disiplina”? Nayarin say naisip mon tampol et dusa, balet mas ni so nalalanor ed satan. No bibitlaen na Biblia so disiplina, lanang itan ya positibo, tan no maminsan et kaiba na kakabatan, karunongan, aro, tan bilay. (Pro. 1:2-7; 4:11-13) On ta say disiplina na Dios et pakapatnagan na panangaro tod sikatayo tan labay ton manbilay itayo ya andi-anggaan. (Heb. 12:6) Anggano no maminsan et walay kaiba ton dusa, agbalot itan sobsobra odino maruksa. Kanian say kabaliksan na “disiplina” et manunan ontutukoy ed panangibangat, singa ed pamabaleg na inad-aron anak.
5 Lapud panangaro nen Jehova, ipepetek, ibabangat, tan ipapasal to itayo pian mansiansia tayod panangaro to tan diad dalan a mamaarap ed bilay. (1 Juan 4:16) Agto tayon balot eekalan na dignidad o iinsultoen, ya nalikna tayon anggapoy kana tayo. (Pro. 12:18) Imbes, iikdan to tayoy dignidad, onnenengneng ed maong iran ugali tayo, tan aabuloyan to tayon mandesisyon a bukor. Kasin ontan so pangipapasen mod disiplina na Dios, balanglan nanlapu itan ed Salita to, saray publikasyon ya base ed Biblia, Kristianon atateng, odino saray elder ed kongregasyon? Saray elder ya maulimek tan maaron mangipepetek ed sikatayo no agtayo nalilikas ya ‘aliwa lay aarapen tayo’ et ipapatnag da so panangaro nen Jehova ed sikatayo.—Gal. 6:1.
MAYO 19-25
KAYAMANAN ED SALITA NA DIOS | PROVERBIO 14
Dalepdepen so Amin ya Gawaen Yo no Walay Kalamidad
Alwaran Moy Bilay Mo—Regalo Itan na Dios
10 Wala ray nagagawa ya agtayo kontrolado, singa say isabi na bagyo, yegyeg, epidemya, tan guerra. No nagawa iratan, baleg so posibilidad ya makaligtas tayo tan naiwasan tayoy peligro no unoren tayo ray ganggan na gobierno tungkol ed curfew, pan-evacuate, tan arum nin safety protocol. (Roma 13:1, 5-7) No maminsan, lapud iilaloan la na gobierno so isabi na kalamidad, wala ray iter dan instruksion pian makapanparaan tayo la. Unoren tayoy ibaga ra. Singa bilang, maabig no mantipon tayo lay abasto tan suplay na danum, tan mangiparaan tayo lay first-aid kit.
11 Panon to no walay onkakalat ya sakit ed lugar tayo? Antoy gawaen tayo? Unoren tayo ray safety protocol ya ibaga na gobierno, singa say social distancing, panuras na lima, pansulong na mask, tan pan-quarantine. No gawaen tayo iratan, ipapanengneng tayo ya papablien tayoy bilay ya inregalo na Dios.
12 Legan na kalamidad, ompan wala ray fake news ya ipasa ed sikatayo na kakaaro, kakaabay, tan ompan ibalita ni ingen na media. Imbes ya bastabasta tayo labat manisia, say dengelen tayo et saray napantiwalaan ya impormasyon ya nanlapud saray ahensia na gobierno tan saray eksperto. (Basaen so Proverbio 14:15.) Aaralen ya maong na Mananguley ya Ulop tan saray branch office iray napantiwalaan ya impormasyon antis iran mangiter na instruksion tungkol ed iyatendi ed aral tan panagpulong. (Heb. 13:17) No unoren tayo iratan, naalwaran tayoy bilay tayo tan say bilay na arum, kanian maabig so impresyon na totoo ed sikatayo ran Tasi.—1 Ped. 2:12.
Manpakpel Ka ya Singa si Zadok!
11 No bilang ta sikatayo so inyasain ya ontulong ed saray agagi diad mapeligro ran panaon, panon tayon makapanpakpel ya singa si Zadok? (1) Tumbok moy instruksion. Importante itan pian agnaderal so pankakasakey tayo. Unoren tayo ray instruksion ya nanlapud branch office. (Heb. 13:17) Nepeg ya kabisadoen na saray elder iray instruksion no anto ray gawaen antis tan legan na kalamidad. (1 Cor. 14:33, 40) (2) Magmaliw ya makpel pero maalwar. (Pro. 22:3) Nonoten tayon maong iray desisyon tayo. Agtayo ipapalaran so bilay tayo. (3) Mantiwala kad si Jehova. Tandaan mo ya importante ed si Jehova so safety na kada lingkor to. Kanian no sika so niyasain ya man-monitor ed safety na agagi, seguradon tulongan ka nen Jehova ed satan ya asainmin mo.
Saray Espiritual a Kayamanan
mwbr25.05—it-2 1094
Abilidad ya Mannonot
Pero say toon talagan uusaren toy abilidad ton manonot et nayarin busolen met na arum. Nayarin atan so labay ya ibaga na walad paimanod leksab na Proverbio 14:17: “Say toon uusaren toy abilidad ton mannonot et bubusolen.” Kaslakan et bubusolen na saramay totoon agda labay so mannonot iramay totoon pannononotan da ray bengabengatla. Ontan met, saramay totoon uusaren day nonot da ed panggaway linawa na Dios et bubusolen met. Singa samay imbaga nen Jesu-Kristo: “Natan ta agkayo kabiangay mundo, noagta pinili ta kayo ed mundo, busolen kayo na mundo.” (Jn 15:19) Pero siempre diad orihinal ya lenguahe, samay termino parad ‘abilidad ya mannonot’ diad Proverbio 14:17 et sakopen toy mauges ya panagnonot. Kanian nayarin say labay met ya ibaga na samay teksto et say toon mannononot na mauges et bubusolen, tan ontan so nabasa ed arum ya patalos: “Tan say toon mannononot na mauges et bubusolen.”—JP, Ro.
MAYO 26–HUNYO 1
KAYAMANAN ED SALITA NA DIOS | PROVERBIO 15
Tulongan so Arum ya Onligsa so Puso ra
Manbilay ya Andiay Pakabalawan!
16 Si Job et maparawes. (Job 31:31, 32) Anggano aliwa tayon mayaman, sarag tayon ‘iyugali pamarawes.’ (Roma 12:13) Sarag tayoy mangitarya na simplin panangan, a tandaan tayon “magmaong so pangugtoan ya agagayep [odino pising], a kawalaan na aro, nen say pinataba a baka tan kawalaan na gula.” (Uli. 15:17) Say pangan kaiba ray agagin manaaroan et makapaliket tan makagunggona ed espiritual anggano simpli so intarya.
Pasesegen so Sakey tan Sakey “Nagkalalo La” Natan
16 Nayarin nalilingo itayo no iisipen tayon agtayo sarag so mamaseseg lapud agtayo apasal ya mitongtong. Balet diad tua et aliwan mairap so mamaseseg—anggan say iyimis mo et nayarin makapaseseg la. No agto ka inimisan, ompan walay problema to, tan say idengel mo et nayarin mamaseseg ed sikato.—Sant. 1:19.
17 Maer-ermen si Henri, sakey ya kabataan a brother, nen saray kanayon to, kaiba lay tatay to ya datin elder, et tinaynan day katuaan. Sikatoy pinaseseg na manangasikaso na sirkito. Intagar tod coffee shop tan inabuloyan toy Henri ya ibalikas toy amin ya nalilikna to. Atalosan nen Henri ya say paraan labat pian natulongan toy pamilya ton makapawil et diad pansiansia ton matoor. Sikatoy apabiskeg a maong nen binasa toy Salmo 46; Sofonias 3:17; tan Marcos 10:29, 30.
18 Ipapanengneng na saray alimbawa nen Marthe tan Henri ya sarag tayoy magmaliw ya makapaseseg ed saray agagin maermen. Oniay insulat nen Arin Solomon: “Say salitan imbalikas ed dugan panaon et alay abig! Say maligsan mata et paliketen toy puso; say maong a balita et pakasilen toy pukepukel.” (Pro. 15:23, 30, paimanod leksab.) Ontan met, napaseseg so sakey ya maneermen no manbasa na artikulo diad Panag-bantayan odino website tayo. Impanengneng nen Pablo ya makapaseseg met so saniiban pangansion na Kingdom song. Oniay insulat to: “Itultuloy yon ibangat tan pasesegen so sakey tan sakey diad panamegley na saray salmo, panangirayew ed Dios, tan espiritual a kansion a kakansionen a walaay pisasalamat, ya impapuso yon kansionen iratan parad si Jehova.”—Col. 3:16; Gawa 16:25.
Saray Espiritual a Kayamanan
ijwbq artikulo 186 ¶8
Panon Ak ya Makapandesisyon na Duga?
“Agnasumpal iray plano no anggapoy pantotongtong,” so kuan na Biblia. (Proverbio 15:22) Kanian antis kan mandesisyon, mantepet ka nid saray totoon napantiwalaan. Singa bilang, no kaukolan moy manpatambal, mas marakep no onkonsulta ka ed sakey ya doktor. (Mateo 9:12) Odino diad arum ya situasyon, sarag moy mantepet ed arum ya dinmalan met lad ontan. Tandaan mo balet ya agda ka nepeg ya idesisyonan. Sikan mismo so mandesisyon parad sarilim tan kaukolan mon awaten so antokaman ya resulta na satan.—Galacia 6:4, 5.
HUNYO 2-8
KAYAMANAN ED SALITA NA DIOS
Taloran Tepet ya Makatulong Pian Makapandesisyon Ak na Duga
Panggaway Makabat Iran Desisyon Legan ya Kalangweran Ni
11 Say panlilingkor tayod si Jehova so talagan panlalapuan na liket tayo. (Uli. 16:20) Mapatnag ya alingwanan itan nen Baruc, say sekretaryo nen Jeremias. Walay panaon ya agla maliket ed panlilingkor tod si Jehova. Imbaga nen Jehova ed sikato: “Aanapen mo iray angkakabaleg a bengatla parad inkasika. Agmo la iratan aanapen. Ta idapok so desyang ed amin a totoo, . . . tan iter ko ed sika so bilay mo bilang samsam diad amin a pasen a laen mo.” (Jer. 45:3, 5, NW) Parad sika, anto kasi mamaliket ed si Baruc? Kasin say pananap na saray angkakabaleg a bengatla odino say pakaliktar ed kaderal na Jerusalem bilang matoor a lingkor na Dios?—Sant. 1:12.
12 Say sakey ya brother ya akaliknay liket ed panaglingkor ed arum et si Ramiro. Inkuan to: “Nanlapu ak ed mairap bilay ya pamilya diad sakey a baryo ed Andes Mountains. Kanian nen imbaga nen kuyak ya panaralen to ak ed unibersidad, talagan balbaleg iman ya pankanawnawa. Balet agano ak nin abautismoan ya Tasi nen Jehova, tan walay sananey a pankanawnawan niiter ed siak—inimbitaan ak na sakey a payunir ya milad sikato ed sakey ya melag a baley pian manpulong. Linma ak diman, inaral koy mankatli, tan angilukas ak na barbershop pian nasuportaan koy sarilik. Nen inyopresi mi panangiyaral na Biblia ed totoo, dakel so angawat. Ag-abayag, akiulop ak ed balon kongregasyon ya manguusar ed sakey a lokal a lenguahe. Natan et samploy taon ak lan full-time ya ministro. Anggapo lay arum ya propesyon a makapangiter ed liket ya naliliknak legan kon tutulongan iray totoo ya naaralan so maong a balita diad sarili dan lenguahe.”
Kasin Nampasimbalo Ka La?
BALEG so epekto na impamabaleg ed sikatayo tan say kaliberliber tayo. Nanduruma so panangawes tayo, saray labay tayon kanen, tan pati ugali tayo. Akin? Say sakey ya rason et lapud impluensya na saray totoo tan say kipapasen tid bilay.
2 Balet, wala ni ray mas importante nen say pampili naakan o kawes. Singa bilang, diad ibabaleg tayo et wala ray angibangat ed sikatayo no antoy duga tan aliwa. Balet kaslakan et nandurumay opinyon na totoo. No maminsan met et uunoren tayoy ididikta na konsiensia tayo. Ibabaga na Biblia ya anggan “saray totoo na nasyones ya andian na ganggan et sipor a manggagawa na saray bengatlan walad ganggan.” (Roma 2:14) Balet, kasin labay ya ibaga na saya ya no anggapoy espisipikon ganggan na Dios et sarag ti lan gawaen no antoy apasalan tayo o aligen ti lay gagawaen na dakel?
3 Niay duaran importantin rason no akin ya aliwan ontan so gagawaen na saray Kristiano. Unona, ibabaga na Biblia: “Wala so dalan a singa maptek ed too, balet say sampot to sikara so saray dalan na patey.” (Uli. 16:25) Ag-itayo perpekto kanian agtayo sarag ya igiya so sarili tayo. (Uli. 28:26; Jer. 10:23) Komadua, ibabaga na Biblia ya kokontrolen nen Satanas so estandarte na mundo ta sikato so “dios na sayan sistema.” (2 Cor. 4:4; 1 Juan 5:19) Kanian no labay tayon bendisyonan tan abobonan itayo nen Jehova, kaukolan tayon unoren so simbawad Roma 12:2.—Basaen.
Saray Espiritual a Kayamanan
mwbr25.05—it-1 629
Disiplina
Saray Resulta no Unoren tan no Ibaliwala Itan. Ipapanengneng na saray mauges, saray makulangkulang, odino saramay abebay moralidad da ya kabusol day disiplina nen Jehova no ibabaliwala da itan. (Sal 50:16, 17; Pro 1:7) Saray mauges ya resulta na ontan ya inkamakulangkulang et singa kaaruman ya disiplina ed sikara tan kaslakan et graben dusa itan. Singa ibabaga na proverbio: “Saray makulangkulang et didisiplinaen na mismon inkamakulangkulang da.” (Pro 16:22) Lapud satan et nayarin onirap so bilay da, naekal so kagalangan da, mansakit ira, tan ompan masakbay ni ingen iran ompatey. Nanengneng tayo ed saray agawad saray Israelita no panon kaseryoso itan. Binano tan impetek ira na saray propeta pian disiplinaen ira pero agda ra inimano, tan bilang disiplina et ag-ira prinotektaan tan benendisyonan nen Jehova, pero siansia nin ag-ira kinmiwas. Diad kaunoran, naawat da so graben disiplina ya nipasakbay la—asakop ira, insan ira inawit ed Babilonia.—Jer 2:30; 5:3; 7:28; 17:23; 32:33; Os 7:12-16; 10:10; Sof 3:2.
HUNYO 9-15
KAYAMANAN ED SALITA NA DIOS | PROVERBIO 17
Pansiansia Yoy Kareenan ed Relasyon Yon Sanasawa
No Panon ya Naekal so Sakit na Linawa
Agmo titilaay sarilim. Ibabaga na Biblia ya wala ray totoon “mapasnok” tan ‘mapetang.’ (Uliran 29:22) Ontan ka kasi? Tepetay sarilim: ‘Mainomay ak kasin onsyodot? Mipepetang kasi ulok? Papabalegen ko kasi iray melag ya isyu?’ Ibabaga na Biblia ya “samay uulit-uliten ton itongtong so sakey a bengatla et pansisianen to ray maapit a sankakaaro.” (Uliran 17:9, NW; Eclesiastes 7:9) Nayarin nagawa met itan ed saray sanasawa. Kanian no mabarong ka, tepetay sarilim, ‘Sarag ko kasin mas napasensyaay asawak?’—Prinsipyod Biblia: 1 Pedro 4:8.
Mamarakep na Ulopan so Maabig a Pananalita
19 Manggawa kay paraan. No nalikas mon nasyosyodotan ka la tan ngalngali ka la onsabog, makatulong no ontaynan ka ni, pian onkepay emosyon mo. (Uli. 17:14) No mamapasnok la so katongtong mo, gawam so anggaay nayarian mon mansalita nin siansia na maabig. Tandaan: “Say mabanayar ya ebat ipaliis to so sanok; balet say masagapsap a salita patuloen to so sanok.” (Uli. 15:1) No say iyebat tayo et makapasakit odino makaopendi, singa tayo lalon padadangatey apoy, anggano maul-ulimek ni pangibaga tayo. (Uli. 26:21) Kanian no say sakey a situasyon et makapasyodot, komon ta ‘agka bengatbengat a mansalita, tan agmain-inomay a manpasnok.’ Ipikasim ed si Jehova ya iter to ed sikay espiritu to pian saray maong a bengatla so ibagam, imbes a saray makapasakit.—Sant. 1:19.
Saray Espiritual a Kayamanan
mwbr25.05—it-1 790 ¶2
Mata
Saray mata na makulangkulang et “liberliber anggad saray sampot na dalin,” anggapoy akapokusan to, nandurumay babatikan na isip to imbes ya diad samay dapat ya pampokusan to. (Pro 17:24)
HUNYO 16-22
KAYAMANAN ED SALITA NA DIOS | PROVERBIO 18
Pasesegen Iray Walaan na Sakit
Oneeyag so Tuan Karunongan!
17 Manisip ka ni antis kan mansalita. No agtayo apipigeren so panagsalita tayo, ompan agtayo nalilikas ya nasasakitan tayo la manayay arum. Oniay imbaga na Biblia: “Say salitan agla ninonot et singa saray saksak na espada, balet say dila na marunong et mamaabig.” (Pro. 12:18) Mansiansia so deen tan pankakaaro no agtayo la ilalabir o itsi-tsismis so kakapuyan o lingo na arum. (Pro. 20:19) Antoy gawaen tayo pian aliwan makapasakit so panagsalita tayo? Lanang tayon manbasa na Biblia pian napano so puso tayo na “maong iran bengatla.” (Luc. 6:45) No dalepdepen tayo iray nababasa tayod Biblia, saray ibabaga tayo et singa “subol na karunongan” kanian napaseseg tayo ray katongtong tayo.—Pro. 18:4.
Kahon ed mrt artikulo 19
No Antoy Gawaen Mo no Naamtaan Mon Walay Sakit Mo
Dengel mon maong no walay ibabaga to. Say sakey a sankaabigan ya paraan pian natulongan moy kaarom et no ondengel ka no walay ibabaga to. Agka mapaga ed no antoy iyebat mo ed amin ya ibaga to. Kaslakan et magenap lay idengel mo. Talosan mo tan agmo huhusgaan. Agmo iisipen ya antam lan amin so nalilikna na kaarom, lalo la no aghalatan walay sakit to.—Proverbio 11:2.
No mansalita ka, dapat positibo. Ompan agmo amtay ibagam, balet anggano ibagam labat ya antam ya mairap so dadalanen na kaarom et mas maong ni nen say anggapon balot so ibagam. No agmo amtay ibagam, salim so mangibaga na simpli balet nanlapud puso iran salita singa say, “Agko amta no antoy ibagak, pero labay kon naamtaan mo ya sankanonot ta ka.” Paliisan ya ibaga iray salitan, “Wala ni ray mas grabe ingen” odino “Maong ingen ta ontan labat so sakit mo . . . . ”
Nipanengneng mon iyaansakit moy kaarom no amtaen mo met so nipaakar ed sakit to. Seguradon naapresya to so sagpot mo ya talosan so mairap ya dadalanen to, tan magmaliw ya mas makatulong iray ibagam. (Proverbio 18:13) Balet, agka basta-basta mangiiter na advice no agto met kekerewen.
Tulongan mo. Imbes ya isipen mon antam no panon kan makatulong, mantepet ka no antoy nitulong mo. Tandaan mo balet ya ompan ag-aminen na kaarom ya kaukolan toy tulong ta agto ka labay ya nabelatan. No ontan, salim so mangiyopresi na praktikal ya tulong singa say pansaliw na saray kaukolan to, panlinis, odino arum ni.—Galacia 6:2.
Agka onsusuko. Legan ya mana-adjust so kaarom ed sakit to, ompan wala ray panaon ya basta to labat ikansela iray plano yon gawaen odino biglan agto labay so mitongtong ed sika. Anosan tan talosan mo. Itultuloy mon suportaan ta kaukolan to itan.—Proverbio 18:24.
No Panon ya Tulongan Iray Mankakaproblema ed Isip
‘Ligliwam.’—1 TESALONICA 5:14.
Ompan aburido so kaarom, odino say pakalikna to et anggapoy kana to. Kanian anggano agmo amta no antoy ibagam, ipasegurom ed sikato ya inar-arom. Diad ontan et naligliwa tan onkasil so liknaan to.
“Say tuan kaaro et mangaaro ed amin a panaon.”—PROVERBIO 17:17.
Mangiter na praktikal ya tulong. Imbes ya isipen mon antam lay kailangan to, mas maong no tepetan mo. No naiirapan so kaarom ya ibaga no anto ray kailangan to, man-suggest ka na praktikal iran nagawaan yon dua, singa say panakar, pan-shopping, panlinis, odino arum ni.—Galacia 6:2.
‘Anosan mo.’—1 TESALONICA 5:14.
Ompan no maminsan et aglabay na kaarom so mitongtong. Kanian ibagam ed sikato ya akaparaan kan ondengel no labay to lay mitongtong. Lapud dadalanen to, ompan walay nibaga to odino nagawaan to ya makapasakit ed sika. Ompan bigla ton i-cancel so lakad yo odino ompan misyosyodot. No ontan, pampasensiaan mo tan talosan mo la.—Proverbio 18:24.
Saray Espiritual a Kayamanan
w07 7/15 ¶12, 13
‘Say Kakabatan et Sakey a Sakurong’
Diad Israel nensaman, si Jehova so angikana a sagpaminsan na pampapalaranan pian nipaamta so linawa to. Say uusaren ed saratan et saray singa-bolintik a bato odino angkelag a tabla. Unona et kerewen ni ed si Jehova a sikato so mandesidi ed pamaakaran. Kayari to et ibuntok iray bato ed saray tupi na balabal insan alaen iratan. Say resulta et ipasen a nanlapu ed Dios.
Natan et agla uusaren nen Jehova so pampapalaranan pian ipaamta ed totoo to so walad kanonotan to. Imbes, imparungtal to la so linawa to diad Salita to, say Biblia. Makana so pakawalaan na suston pikakabat ed say nisulat ed Biblia pian niwala ed sikatayo so kakabatan na Dios. Kanian, agtayon balot aabuloyan ya onlabas so sanagew ya agtayo abasa so impuyan a Kasulatan.—Salmo 1:1, 2; Mateo 4:4.
HUNYO 23-29
KAYAMANAN ED SALITA NA DIOS | PROVERBIO 19
Magmaliw Kan Tuan Kaaro ed Saray Agagi
Antoy Gawaen Tayo Pian Mas Ombiskeg so Aroan Tayo?
16 Imbes ya manpokus ka ed saray lingo na agagi, saray maong ya ugali da so pampokusan mo. Imanoen iyan ilustrasyon. Isip mo pa ya wala kad gathering kaiba iray agagi. Malikeliket kayo tan antis kayon mansisian, nampa-picture kayo. Diad cellphone mo et angala ka na taloran shot pian walay pampilian. Pero apansin mo ya walay shot ya akasibangot imay sakey ya brother. Antoy gawaen mo ey? Seguradon i-delete mo la itan, ta wala met ni duara ya marakep so inkaala to tan akaimis kayon amin.
17 Saray nagagawa ed bilay tayo kaiba iray agagi et singa saratan ya litrato. Di ba, masaya tayo no kaiba tayo ray agagi? Panon to balet no asakitan ka ed imbaga o ginawa na sakey ya brother o sister, antoy gawaen mo? Imbes ya atan ya lanang so sankanonot mo, mas marakep no palabasen mo la itan tan lingwanan mo la. Ekal mo la o “i-delete” mo la itan ed memoryam. (Pro. 19:11; Efe. 4:32) Labay ton ibaga, itepel mo lay lingo na agim. Sabagay, seguradon mas dakel so maliket ya pinagsamahan yo—aman la so nonot mo.
Pabiskeg Moy Panangarom ed si Jehova tan ed Kaparam ya Too
10 Singa si Timoteo, ipalikna tayo met ed agagi ya inar-aro tayo ra. (Heb. 13:16) Ontan so ginawa nen Anna tan say asawa to ya abitla diad imbeneg ya artikulo. Nen nila da so sakey ya pamilyan Tasi kayari na maksil ya bagyo, anengneng da ya nakal so atep na abung da kanian abasa ray gamit da, pati amin ya kawes da. Oniay imbaga nen Anna: “Impesak mi iray kawes da, insan mi met la plinantsa tan tinupi. Simpli met labat iman ya ginawa mi, pero lapud saman et nagmaliw kamin malet ya sankakaaro anggad natan.” Apakilos si Anna tan say asawa to ya ontulong ta inar-aro da iray agagi.—1 Juan 3:17, 18.
11 No maomaong tayo ed arum tan panengnengan tayo ray panangaro, nalikna ra ya inar-aro ira nen Jehova tan nanengneng da ya aaligen tayoy kaabigan to. Tan diad tua, anggano agda ibabaga, agda nalingwanan so kamaongan ya impanengneng tayod sikara. Ontan so alikna nen Sister Khanh ya abitla nen niman. Agto kuno nalingwanan iramay agagi ya tinmulong ed sikato nen kabataan ni. Kuan to: “Maong labat ta wala ray maar-aron sister ya ipipila da ak ed panagpulong. Samaren da ak, saniba kamin man-merienda o mangugto, insan da ak lamet iyakar pasempet ed abung. Natan ko la a-realize ya baleg iman ya abala ed sikara, pero alikliknak ya ginawa da iman lapud inar-aro da ak.” Siempre, aliwan amin ya pinanengnengan tayoy kaabigan et misalamat ed sikatayo. Oniay intuloy nen Khanh: “Labalabay koy makabawi ed kaabigan na saraman ya sister pero agko amta no iner la ra natan. Andi bale ta kabat ira nen Aman Jehova. Ipipikasik ya sikato lay ombales ed sikara.” Ag-alingolingo si Sister Khanh. Nanenengneng nen Jehova so itutulong tayod arum anggano say pakalikna tayo et melmelag tan simpli met labat so ginawa tayo. Diad tua, ipapasen to itan ya singa bagat tayod sikato. Tan ibabaga ni ingen na Biblia ya singa walay utang nen Jehova ed sikatayo ya bayaran ton bayaran.—Basaen so Proverbio 19:17.
Itultuloy Yon Ipanengneng so Matoor a Panangaro ed Sakey tan Sakey
6 Isipen pa so sakey ya empleyado ya abayag lan mantratrabaho ed sakey ya kompanya. Say ontan ya empleyado et nibagan matoor odino “loyal” ed pantratrabahoan to. Pero agto labay ya ibagan inar-aro to iray akanggawa ed satan ya kompanya. Tan ompan agto ni ran balot personal ya akabat. Diad tua, ompan agni ingen kompormi ed arum ya instruksion ya tutumboken ed loob na kompanya. Pero makulikulin mantratrabaho pian walay pambilay na pamilya to. Ompan agla onekal ditan anggad panretiro to, puera labat seguro no walay man-offer ed sikato na mas baleg ya sueldo o mas atagey ya posisyon.
7 On tua, balibalin kualidad so katooran, pero antoy mas importante nen say pangipanengneng na katooran? Say motibo o rason no akin ya manmamatoor so sakey. Antoy motibo na saray lingkor na Dios nen impanengneng da so katooran? Impanengneng da itan aliwan lapud naoobliga ra, noagta lapud panangaro. Imanoen so alimbawa nen David. Sikatoy matoor ed kaaro ton si Jonatan anggano labay ya ipapatey nen Saul, say mismon ama nen Jonatan. Diad tua, anggano inatey lay Jonatan, nibagan ag-anguman so katooran nen David ta inasikaso toy anak nen Jonatan ya si Mefiboset. Akin et ontan lay katooran nen David ed si Jonatan? On, ta inar-aro to. Atan so matoor ya panangaro!—1 Sam. 20:9, 14, 15; 2 Sam. 4:4; 8:15; 9:1, 6, 7.
Saray Espiritual a Kayamanan
mwbr25.05—it-1 515
Simbawa, Managsimbawa
Si Jehova labat so walaan na perpekton karunongan. Sikato labat so agmankaukolan na simbawa. (Isa 40:13; Rom 11:34) Say Anak to et “Makapakelaw ya Mananimbawa” tan sarag toy mangiter na panangigiya tan instruksion ta uunoren toy simbawa na Ama to, tan wala met ed sikato so espiritu na Dios. (Isa 9:6; 11:2; Jn 5:19, 30) Idadanet na satan ya pian talagan makatulong so simbawa, kaukolan ya ikonsidera si Jehova. Antokaman ya simbawa ya kontra ed Sankatagyan et anggapoy kana to. Singa agka lanlamang nansimbawa.—Pro 19:21; 21:30.
HUNYO 30–HULYO 6
KAYAMANAN ED SALITA NA DIOS | PROVERBIO 20
No Panon Kan Makagaway Dugan Desisyon no Wala Lay Inarom
Piinaroan ya Mamagalang ed si Jehova
3 Tua, enjoy so panaon na piinaroan, pero seryoso met itan ta diad satan naamtaan na saninaro no kasin para ira ed sakey tan sakey. Diad agew na kasal na nobyo tan nobya, isisipan da ed si Jehova ya aroen tan respetoen day sakey tan sakey legay bilay. Siempre antis tayon manggawa na anggan anton sipan, kaukolan tayon pannonotan ya maong itan. (Basaen so Proverbio 20:25.) Ontan met so nepeg ya gawaen na saninaro antis iran mansipanan diad kasal da. Makatulong so panaon na piinaroan ta pian nakabat day sakey tan sakey tan makapanggawa ra na dugan desisyon. Nayarin say desisyon da et mankasal, balet no maminsan say desisyon da et pultoten so relasyon da. Pero agto labay ya ibaga ya no pinultot day relasyon da et aga akatulong imay impagmaliw dan saninaro. Imbes, asumpal so gagala na piinaroan—akatulong itan ed sikara pian makapanggawa ra na dugan desisyon.
4 Akin et importante ya amta tayo so dugan gagala na piinaroan? No malinew itan ed saray single, ag-ira miinaroan ed sakey ya agda met planon pakasalan. Pero aliwa labat ya saray single so dapat ya makaamta ed no anto so gagala na piinaroan. Dapat amta itan na amin. Singa bilang, iilaloan na arum ya lapud saninaro ira, dapat sikaray mantuloyan tan mankasal ira. Pero antoy epekto na satan ed saray single ya agagi? Oniay imbaga nen Sister Melissa ya taga United States: “Makapa-pressure iray arum ya agagi ed saray saninaro. Kanian anggano labay da komon ya pultoten so relasyon da ta ag-ira makapanbagayan, agda nagawaan. Say arum ingen et agda la labay so miinaroan ta makapa-pressure itan ed sikara.”
No Panon Kan Makalmo na Maong ya Asawa
8 Panon mon obserbaan imay toon nagugustoan mo? Nayarin naobserbaan mo so espiritualidad, ugali, tan gagawaen to ed saray aral odino diad arum nin situasyon ya saniiba iray agagi. Siopa ray kakaaro to, tan anto ray labalabay ton istoryaen? (Luc. 6:45) Kasin pareho kayoy goal? Sarag mon tepetan iray elder ed kongregasyon to odino arum ni ran maespiritual ya agagi ya makapikabat ed sikato. (Pro. 20:18) Itepet mo met no antoy reputasyon to tan saray ugali to. (Ruth 2:11) Balet legan mon oobserbaan, seguroen mo ya nalikna ton rerespetoen mo tan agmo pibabalian so personal a bilay to.
Piinaroan ya Mamagalang ed si Jehova
7 Panon ya nakabat na saninaro so inkatoo na balang sakey? Maabig no mantongtong ira tan ibaga day tuan nalilikna da. Sarag da met so mantepet tan dengelen dan maong so ibaga na sakey tan sakey. (Pro. 20:5; San. 1:19) Nayarin manggawa kayo na paraan pian makapanulop kayo tan makapantongtong kayo. Singa bilang, saniba kayon mangan, manakar diad publikon lugar, tan manpulong. Nakabat yo met so sakey tan sakey no nakaulop yo ray kakaaro tan kapamilya yo. Sarag yo met so manplano na saray activity pian nanengneng yo no anto ray ugali na kada sakey diad nanduruman situasyon tan no kaiba yoy arum ya totoo. Imanoen so ginawa nen Aschwin ya taga Netherlands legan ya saninaro ira nen Alicia: “Manggagawa kami paraan pian nakabat mi sakey tan sakey. Singa bilang, manluto kami odino saniba kamin mankimey. Lapud saratan, anengneng mi ray maong ya ugali tan kakapuyan na balang sakey.”
8 Nakabat yo met so sakey tan sakey no saniba kayon manaral na saray topic ed Biblia. Tan no sanasawa kayo la, kailangan ya walay family worship yo pian say Dios so magmaliw ya sentro na relasyon yo. (Ecl. 4:12) Kanian natan ni labat ya saninaro kayo, maabig no wala lay eskedyul yo ya saniban manaral. Siempre aliwa kayo nin pamilya kanian say brother et aliwa nin ulo na sister. Pero no regular kayon manaral ya saniba, nanengneng yo so espiritualidad na balang sakey. Walay naimano nen Max tan Laysa, saninaro ya taga United States, ya sakey nin gunggona na satan. Imbaga nen Max: “Nen agano kami ni labat ya saninaro, ginapoan mi lan aralen iray topic ed saray publikasyon tayo tungkol ed piinaroan, panangasawa, tan pamilya. Akatulong iraman ya publikasyon pian napantongtongan mi iray importantin topic ya agkami nababaingan.”
Saray Espiritual a Kayamanan
Sikayo Ran Kabataan—Kasin Akaparaan Kayo Lan Manpabautismo?
4 Anggapoy ibabaga na Biblia ya say bautismo et para labat ed saramay wala lad edad odino aliwa lan menor de edad. Oniay nabasa tayod Uliran 20:11: “Anggan say ugaw ipakabat to so inkasikato ed panamegley na saray gawa to, no say kimey to sikato so malinis, tan no sikato so maptek.” On, anggano say sakey et ugaw ni, sarag to lan natalosan no antoy labay ya ibaga na panggaway duga tan pagmaliw ya dedikado ed Dios ya amalsa ed sikato. Kanian, say pampabautismo et importante tan matukoy parad sakey ya kabataan ya ipapanengneng to lay inkatatken tan indedika to lay bilay to ed si Jehova.—Uli. 20:7.
5 Panon a nibagan say sakey et “matatken” la? Say pagmaliw a matatken et aliwa labat lan base ed edad. Ibabaga na Biblia ya saramay matatken la et “manguusar ed pakayari ran mantalos tan lapud saya et nipasal itan a mangibiig ed duga tan aliwa.” (Heb. 5:14) Kanian, say toon matatken la et amta to no antoy duga ed pakanengneng nen Jehova tan determinado ton gawaen itan. Lapud satan, agmainomay ya naimpluensyaan ya manggaway aliwa, tan agmet kaukolan ya dagdagen a lanang pian manggaway duga. On, say sakey a kabataan a manpabautismo et iilaloan ya unoren to ray ganggan na Dios anggano agto kaibay atateng to odino arum nin wala lad edad.—Ikompara so Filipos 2:12.