Nen 40 lay taon nen Isaac, sikatoy angasawa. Say ngaran na asawa to et Rebeca. Inar-aro nen Isaac si Rebeca. Awalaan iray duaran anak ya laki​—kambal.

Say ngaran na panguloan et Esau, tan say komadua et Jacob. Lanang ya anggapod abung si Esau, tan marundunong ya manpana na ayep. Balet si Jacob et labalabay tod abung.

Nensaman, say panguloan ya anak so iikdan na mas baleg ya dalin tan kuarta no ompatey so ama. Say tawag ed satan et tawir. Diad pamilya nen Isaac, tawiren met na anak to iramay im-promise nen Jehova ed si Abraham. Anggapoy pibabali nen Esau ed saratan, balet si Jacob et amta to ya importantin maong iratan.

Aminsan, naknaksawan ya sinmempet si Esau ta sanagew ya nampana na ayep. Naangob toy ambalbalingit ya iluluto nen Jacob tan imbaga to: ‘Narnarasan ak la! Ikdan mo ak pa tay ambalangan ilalambong mo!’ Say kuan nen Jacob: ‘Ikdan ta ka, balet i-promise mo nid siak ya gawak lay tawir mo.’ Imbaga nen Esau: ‘Anggapoy pibabalik ed satay tawir ko! Gawam la, basta napesel ak.’ Duga kasi itan ya ginawa nen Esau? Andi. Insalat nen Esau so mabmablin tawir to ed sakey yaong labat ya sabaw.

Nen masiken lan maong si Isaac, kaukolan to lan iter so bendisyon ed panguloan ya anak to. Balet tinulongan nen Rebeca so yugtan ya si Jacob pian sikato so makaawat na bendisyon. Nen naamtaan nen Esau, nampasnok ya maong tan implano ton pateyen so kakambal to. Labay nen Isaac tan Rebeca ya protektaan si Jacob, kanian imbaga da ed sikato: ‘Miayam ka ni ed pangamaen mon si Laban, ya agi nen inam, anggad anggapo lay pasnok nen Esau ed sika.’ Dinengel nen Jacob so imbaga na ateng to, kanian inmalis la pian agnapatey nen Esau.

Im-promise nen Jehova ed si Jacob ya protektaan to, singa ginawa tod si Abraham tan Isaac. Nanayam si Jacob diad lugar a tatawagey Haran. Ditan angasawa, awalaan na dakel ya ananak, tan nagmaliw a mayamyaman.

Sinmabi panaon, imbaga nen Jehova ed si Jacob: ‘Pawil ka lad dalin ya binalegan mo.’ Kanian nambiahe na arawrawi si Jacob tan say pamilya to. Legan iran walad dalan, wala ray angibaga ed si Jacob: ‘Nitan lay kuyam Esau tan walay kaiba ton 400 ya lalaki!’ Natatakot si Jacob ompan sikatoy sakitan nen Esau pati say pamilya to. Kanian impikasi nen Jacob ed si Jehova: ‘Iligtas mo ak komon ed si kuyak.’ Diad tinmumbok ya agew, wala ray imbaki nen Jacob ed si Esau ya wala ray awit dan regalo—dakel ya karnero, kanding, baka, kamelyo, tan asno.

Diad saman ya labi, nen bukbukor nen Jacob, akanengneng na anghel! Akibalsakan ed sikato so anghel ya anggad palbangon. Anggano asakitan lay Jacob, agtinmunda ya akibalsakan. Imbaga na anghel: ‘Ikbanan mo ak.’ Balet imbaga nen Jacob: ‘Agta ka ikbanan anggad agmo ak bendisyonan.’

Kanian benendisyonan na anghel si Jacob. Natan et amta la nen Jacob ya sikatoy protektaan nen Jehova ed si Esau.

Kaimbuasan to, anengneng nen Jacob ya nitan lay Esau tan say 400 ya lalakin kaiba to. Inmunay Jacob tan ontutumbok so pamilya to. Aminpiton tinmalimukor ed si kuya to. Batik si Esau pian onabet ed si Jacob tan nilakap to. Manakis iran dua tan anggapo lay pasnok nen Esau. Anto kasi alikna nen Jehova ed ginawa nen Jacob pian mikareenan?

Kayari na satan, sinmempet lay Esau, balet intuloy di Jacob so pambiabiahe ra. Ami-amin et 12 so anak a lalaki nen Jacob. Say ngaran da et Ruben, Simeon, Levi, Juda, Dan, Neftali, Gad, Aser, Isacar, Zebulon, Jose, tan Benjamin. Diad sikaran sanaagi, si Jose so inusar nen Jehova pian iligtas so totoo To. Antam no panon? Nengnengen ta.