Si Jose so komaduad bolirek ya anak nen Jacob. Nanenengneng na saray kuya nen Jose ya sikato so paborito nen ama da. Anto kasi alikna da ed satan? Panseselosan day Jose tan kabusol da. Nen wala ray nikaduman akugip nen Jose, inistorya to iratan ed saray kuya to. Inisip da ya say labay ya ibaga na kugip to et onsabi so agew ya ontalimukor irad sikato. Kanian mas lalo dan binusol!

Aminsan, nen manpapastol na karnero iray kuya nen Jose diad asingger ed syudad na Siquem, imbaki nen Jacob si Jose pian kumustaen ira. Nen arawi ni Jose, anengneng la na saray kuya to kanian nantotongtongan da: ‘Nitan la may managkugip. Pateyen tayo!’ Kasabi to, sikatoy impelag dad aralem ya bobon. Balet imbaga na kuya ton si Juda: ‘Mas maong nin ilako tayo pian magmaliw ya aripen nen say pateyen tayo.’ Kanian inlako day Jose na 20 piraso ya pilak ed saray negosyanten Midianita ya paonlad Ehipto.

Inala na saray kuya nen Jose so kawes to tan insawsaw dad dala na kanding, insan da inawit ed ama ra tan inkuan da: ‘Nengneng yo pa no aya may kawes nen Jose.’ Kanian inisip nen Jacob ya pinatey na masibeg ya ayep si Jose. Naermenan a maong si Jacob, tan anggapoy makapatunda ed iyaakis to.

Diad Ehipto, si Jose et inlako tan nagmaliw ya aripen na atagey ya opisyal a say ngaran to et Potifar. Balet tinulongan nen Jehova si Jose. Anengneng nen Potifar ya maong ya mantrabaho si Jose tan napantiwalaan. Kanian impaasikaso nen Potifar ed si Jose so amin ya kayarian to.

Anengneng na asawa nen Potifar ya guapo tan mabiskeg si Jose. Inagew-agew ton tutuksoen si Jose ya akdolan to. Anto kasi gawaen nen Jose? Agpinmayag. Imbaga to: ‘Andi! Mauges ’tan. Walay tiwala ed siak na amok. Sakey ni, asawa to ka. No akdolan ta ka, mankasalanan ak ed Dios!’

Sakey ya agew, sinali lamet na asawa nen Potifar ya piliten si Jose ya akdolan to. Siningkat tod kawes si Jose, balet binmatik. Kasabi nen Potifar ed abung, nantila so asawa nen Potifar, ya imbaga ton sikatoy labay ya akdolan nen Jose. Nampasnok ya maong si Potifar, kanian impaipriso toy Jose. Balet agnilingwanan nen Jehova si Jose.

Nen walad prisoan si Jose, say Faraon ya ari na Ehipto et nankugip tan anggapoy makapangipaliwawa ed saray kugip to. Imbaga na sakey ya lingkor na Faraon ya sarag iratan ya ipaliwawa nen Jose. Kanian tampol ya impatawag na Faraon si Jose.

Imbaga na Faraon: ‘Ibagam pa no antoy labay ya ibaga na saray kugip ko.’ Imbaga nen Jose ed Faraon: ‘Pitoran taon ya dakel so naakan ed Ehipto. Kayari to balet, pitoran taon met ya walay eras. Manpili kayo na marunong ya laki ya mantipon na naakan pian agnaerasan iray totoo yo.’ Inmebat so Faraon: ‘Sika so pilien ko! Magmaliw kan komadua ya sankatageyan ed Ehipto!’ Akin et amta nen Jose so labay ya ibaga na saray kugip na Faraon? On, ta tinulongan nen Jehova.

Pitoy taon ya nantipon si Jose na naakan. Insan agawa imay imbaga nen Jose ya eras ed interon mundo. Saray totoo ed nanduruman lugar et oonlad si Jose pian mangaliw na naakan. Nen abalitaan na ama ton si Jacob ya walay naakan ed Ehipto, imbaki tod man so samploran ananak to pian mangaliw na naakan.

Linmad si Jose iray ananak nen Jacob, tan abirbir to ran tampol. Balet ag-amta na saray kuya to ya sikato si Jose. Tinmalimukor ira ed sikato, singa ed samay akugip to nen ugaw ni. Labay ya naamtaan nen Jose no kasin anguman lay ugali na saray kuya to. Kanian imbaga tod sikara: ‘Espiya kayo. Linma kayo dia pian nengnengen no iner so mainomay ya lusoben ed bansa mi.’ Imbaga da: ‘Andi! Taga kamid Canaan, 12 kami ya sanaagi. Balet inatey lay sakey ya agi mi, tan say bolirek et kaiba na ama mi.’ Imbaga nen Jose: ‘Awit yo dia so bolirek ya agi yo pian manisia ak ed sikayo.’ Kanian sinmempet ira pian ibaga rad ama ra.

Nen naupot lamet so naakan na pamilya da, pinapawil nen Jacob ed Ehipto iray ananak to. Natan et kaiba da lay Benjamin, say bolirek ya agi da. Labay ya suboken nen Jose iray kuya to, kanian impaikarga to so pilak ya kopa to ed sako na ilik nen Benjamin, tan pinalsaan to ra ya tinakew da. Abiglan maong iray kuya to nen nalmo na saray lingkor nen Jose so kopa diad sako nen Benjamin. Akikasi rad si Jose ya sikara lay dusaen to imbes ya si Benjamin.

Ditan naamtaan nen Jose ya anguman lay ugali na saray kuya to. Agto la napigilan so liknaan to, kanian manakis ya maong tan imbaga to: ‘Siak si Jose ya agi yo. Mabilay ni amak?’ Abigla iray kuya to. Imbaga tod sikara: ‘Agkayo oneermen ed ginawa yod siak. Ta imbaki ak dia na Dios pian iligtas kayo. Apura yo sirin, awit yo diay amak.’

Sinmempet ira pian ibagad ama ra so maong ya balita, insan da impila ed Ehipto. Akapannengneng ya siansia si Jose tan say ama to kayari na dakdakel ya taon.