Walay sakey a lakin manaayam ed dalin na Uz ya mandadayew ed si Jehova. Say ngaran to et Job. Mayamyaman ya too tan dakel so ananak to. Maomaong tan tutulongan to ray totoon mairap so bilay da, saray bibiin inatey lay asawa ra, tan saray ugugaw ya anggapo lay nanay tan tatay da. Balet, anggapo la kasi onsabin problema nen Job lapud duga iray gagawaen to?

Say ag-amta nen Job, oobserbaan manaya nen Satanas a Diablo. Imbaga nen Jehova ed si Satanas: ‘Anengneng moy lingkor kon si Job? Anggapoy mipara ed sikato diad dalin. Uunoren to ak tan duga iray gagawaen to.’ Inmebat si Satanas: ‘Uunoren ka nen Job ta proprotektaan mo tan papayamanen mo. Iikdan moy dalin tan ayayep. Bawim pan amin, segurado ak ya agto ka la dayewen.’ Imbaga nen Jehova: ‘Sarag mon suboken si Job, balet agmo papateyen.’ Akin ya pinayagan nen Jehova si Satanas ya suboken si Job? Ta amta nen Jehova ya sikatoy unoren nin siansia nen Job anggano nasubok.

Kanian amayamay ya subok so ginawa nen Satanas ed si Job. Unona, angibaki si Satanas na totoon tatawagen ya Sabeo pian takewen iray baka tan asno nen Job. Insan apoolan so amin ya karnero nen Job. Tan sinmabi iray totoon tatawagen ya Caldeo tan tinakew da ray kamelyo to. Pinatey da ray lingkor to ya mangaasikaso ed saratan ya ayayep. Insan walay agawan makapaermen ya maong. Inatey so amin ya ananak nen Job nen ageba tan pinmata ed sikara imay abung ya kawalaan da nen mamangan ira. Maer-ermen si Job, balet agtinmundan nandayew ed si Jehova.

Labay nen Satanas ya manirap nin maong si Job, kanian pinapaway to ray pelsa ed interon laman nen Job. Ansakisakit iratan! Ag-amta nen Job no akin ya nagagawa irayan amin ed sikato. Balet, nandayew nin siansia ed si Jehova. Anengneng na Dios irayan amin, tan aliketan a maong ed si Job.

Insan angibaki si Satanas na taloran lalaki pian suboken si Job. Imbaga dad sikato: ‘Seguro walay kasalanan mo ya iyaamot mo. Kanian dudusaen ka na Dios.’ Imbaga nen Job: ‘Anggapoy ginawak ya aliwa.’ Balet inisip to ya si Jehova so nanlapuan na sarayan problema tan imbaga to ya aliwan patas so panagtrato na Dios ed sikato.

Walay lakin mas ugaw nen say sikara ya say ngaran to et Elihu. Sikatoy marereen labat ya ondedengel ed tongtongan da. Kayari dan nansalita, imbaga to: ‘Aliwa tay amin ya imbaga yo. Dakdakel ni so agtayo amta ed si Jehova. Agsarag na Dios so manggaway mauges. Nanenengneng toy amin ya nagagawa tan tutulongan to ray totoo ed problema da.’

Insan kinatongtong nen Jehova si Job. Imbaga to: ‘Iner so kawalaan mo nen ginawak so tawen tan dalin? Akin et ibabagam ya aliwa ak ya patas? Mansasalita ka, balet agmo natatalosan iray nagagawa.’ Inamin nen Job ya sikatoy alingo tan imbaga to: ‘Aliwa ak. Narerengelan ta ka labat nensaman, balet natan kabkabat ta ka la. Anggapoy imposible ed sika. Perdona mo ak ed imbagak.’

Nen asumpal lay amin ya subok nen Satanas ed si Job, pinaabig nen Jehova so sakit nen Job tan mas dakel ni inter tod sikato nen say dati. Nambilay ni na andukey si Job tan malikeliket. Benendisyonan nen Jehova si Job ta inmunor ed sikato anggano mairap. Sika ey, labay mon aligen si Job, ya agka ontundan mandayew ed si Jehova anggan antoy nagawa?

Diad Ehipto, say pamilya nen Jacob et akabkabat ed tawag ya Israelita. Nen inatey lay Jacob tan Jose, sananey lan Faraon so manaari. Sikatoy natatakot ta mas dakel la ray Israelita nen saray Ehipsio. Kanian ginawa ton aripen iray Israelita. Pinilit to ran manggawa na saray laryo tan pinairap toy trabaho da diad alog. Balet no kapigan mas pinairap na saray Ehipsio so trabaho na saray Israelita, mas dinmakel ira. Ag-itan labay na Faraon, kanian ingganggan to ya pateyen so amin ya Israelitan ugaw a laki ya kapangiyanak. Imadyin mo pa, seguro natatakot ya maong iray Israelita, awa?

Walay biin Israelita ya say ngaran to et Jocabed tan angiyanak na balibalin ugaw a laki. Pian agnapatey iyan ugaw, inkarga nen Jocabed ed baskit insan to inyamot ed kawalaan na ataragey ya dika diad Ilog Nilo. Si Miriam ya atsi na ugaw et inmamot ed asingger pian nanengneng to no antoy nagawa.

Nen linmad ilog so anak a bii na Faraon pian manames, anengneng to may baskit. Nen nilukasan to, walay ugaw ya manakis, kanian akasian to. Dinmago si Miriam tan tinepet to: ‘Labay yon mananap ak na mankomis ed ugaw?’ Pinmayag so anak na Faraon, kanian tinawag nen Miriam si Jocabed ya nanay to. Imbaga na anak na Faraon ed si Jocabed: ‘Komisan mo yay ugaw ta upaan ta ka.’

Nen binmaleg lay ugaw, sikatoy inawit nen Jocabed ed anak na Faraon. Say inngaran na anak na Faraon ed samay ugaw et Moises tan inturing ton anak. Nagmaliw ya prinsipe si Moises tan naala to so amin ya labay to. Balet agnilingwanan nen Moises si Jehova. Amta to ya sikatoy sakey ya Israelita, aliwan Ehipsio. Tan pinili toy manlingkor ed si Jehova.

Nen 40 lay taon nen Moises, labay ton tulongan iray kapara ton Israelita. Nen walay anengneng ton Ehipsio ya sisiplatan toy sakey ya Israelitan aripen, pinekpek ya makmaksil nen Moises imay Ehipsio kanian inatey. Insan to inyamot ed kabueran. Nen naamtaan itan na Faraon, labay ton pateyen si Moises balet tinmakas ed Midian. Sikatoy inasikaso nen Jehova diman.