Si Moises et nanayam ed Midian diad 40 ya taon. Wala lay asawa to tan ananak to. Aminsan, nen manpapastol na karnero diad asingger ed Palandey Sinai, walay anengneng ton makapakelaw. Walay melag a kiew ya mandarlang, balet agnapopoolan! Nen inasinggeran itan nen Moises pian nengnengen no akin ya agnapopoolan, walay arengel ton boses ya manlalapud kiew, ya kuan to: ‘Moises! Agka la onaasingger ya maong. Ekal mo ray sandalyas mo ta masanton dalin so akaalageyan mo.’ Si Jehova imay nansalita panamegley na anghel.

Natatakot si Moises kanian sinaniban toy lupa to. Imbaga to may boses: ‘Anengneng koy paniirap na saray Israelita. Iligtas ko rad saray Ehipsio tan iyakar ko rad marakep ya dalin. Sika so mangipaway ed saray totook diad Ehipto.’ Seguro abigbiglay Moises, awa?

Tinepet nen Moises: ‘Antoy ibagak no tepeten na totoo no siopay angibaki ed siak?’ Inmebat so Dios: ‘Ibagam ya say angibaki ed sika et si Jehova, say Dios nen Abraham, Dios nen Isaac, tan Dios nen Jacob.’ Insan imbaga nen Moises: ‘Panon to no agda ak dengelen ey?’ Walay impanengneng nen Jehova ed si Moises ya tanda ya tulongan To. Imbaga tod si Moises ya ibuntok tod dalin so baston to. Nagmaliw itan ya uleg! Balet nen siningkat nen Moises so ikol na uleg, nagmaliw lamet ya baston. Imbaga nen Jehova: ‘No gawaen mo ’ya, manisia ra ya imbaki ta ka.’

Imbaga nen Moises: ‘Agak marunong ya mansalita.’ Im-promise nen Jehova ed sikato: ‘Ibangat ta ka no antoy ibagam, tan paibaan ta ka ed si kuyam Aaron.’ Natan et segurado lay Moises ya tulongan nen Jehova, kanian pinmawil ed Ehipto kaiba toy asawa tan ananak to.

Pinairap ya maong na saray Ehipsio iray Israelita. Imbaki nen Jehova si Moises tan Aaron ya ibaga ed Faraon iyan mensahe: ‘Ibulos mo ray totook pian makapandayew irad siak diad kalawakan.’ Malaslastog ya inmebat so Faraon: ‘Anggapoy pibabalik ed satay imbaga nen Jehova. Agko ibulos iray Israelita.’ Insan lalo to ran pinairap. Kanian ipaamta nen Jehova ed Faraon no siopay kakalabanen to. Antam no antoy ginawa nen Jehova? Angidapo na Samploran Salot ed Ehipto. Imbaga nen Jehova ed si Moises: ‘Agak dedengelen na Faraon. Nabuas na kabuasan, sikatoy onlad Ilog Nilo. La ka tan ibagam ed sikato ya lapud agto ibulos iray totook, magmaliw ya dala so danum na Ilog Nilo.’ Inmunor si Moises tan linmad Faraon. Sankanengneng na Faraon ya impaspas nen Aaron so baston to ed ilog tan nagmaliw ya dala so danum. Binmanget so ilog, inatey iray sira, tan agla nainum so danum na ilog. Balet agnin siansia ibulos na Faraon iray Israelita.

Kayari pitoran agew, pinapawil nen Jehova si Moises ed Faraon pian ibagad sikato: ‘No agmo ibulos iray totook, napano na patang so Ehipto.’ Intagey nen Aaron so baston to, tan dinmakel so patang. Walad loob na abung da, diad dukolan da, pati diad saray yaong da. Anggan iner walay patang! Imbaga na Faraon ed si Moises ya mikasi ed si Jehova pian ontunda lay salot. Im-promise na Faraon ya ibulos to la ray Israelita. Kanian pinatunda nen Jehova so salot. Nen tinipon na saray Ehipsio iray inaatey ya patang, abunbunton! Ambanget ed interon Ehipto. Balet, aglamet ibulos na Faraon iray totoo.

Insan imbaga nen Jehova ed si Moises: ‘Ipaspas nen Aaron so baston to diad dalin, tan say dabok et magmaliw ya ageyet odino angkekelag ya insekto ya mangetket.’ Biglan dinmakel so ageyet. Anggan saray lingkor na Faraon et imbaga dad sikato: ‘Nanlapud Dios iyan salot.’ Balet agnin siansia ibulos na Faraon iray Israelita.