Imbaga nen Moises tan Aaron so mensahe na Dios ed Faraon: ‘No agmo ibulos iray totook, iyakar kod dalin iray apangat.’ Linmoob so dakdakel ya apangat ed abung na saray Ehipsio, mayaman man o mairap. Anggan iner walay apangat. Balet diad Gosen ya panaayaman na saray Israelita, anggapoy apangat. Manlapu lad sayan komapat ya salot, saray Ehipsio labat so apektado. Imbaga na Faraon: ‘Mikasi kayod si Jehova ya ekalen to la ray apangat. Ibulos ta ki la.’ Balet nen inekal nen Jehova iray apangat, agto la ra ibulos. Kapigan kasi naderya so Faraon?

Imbaga nen Jehova: ‘No ag-ibulos na Faraon iray totook, mansakit tan ompatey iray ayayep na saray Ehipsio.’ Diad sinmublay ya agew, inatey iray ayayep da. Balet ag-inatey iray ayayep na saray Israelita. Pero siansia nin ag-ira ibulos na Faraon.

Insan imbaga nen Jehova ed si Moises ya ompawil ed Faraon tan mangisibwag na dapol ed dagem. Nagmaliw itan ya dabok ya akilad dagem tan pinmepeket ed saray Ehipsio, tan apelpelsaan ira pati saray ayayep da. Balet, siansia nin ag-ibulos na Faraon iray Israelita.

Pinapawil nen Jehova si Moises ed Faraon pian ibaga iyan mensahe To: ‘No agmo nin siansia ibulos iray totook, nabuas et onuran na yelo diad dalin.’ Diad sinmublay ya agew, pinakarol nen Jehova tan pinauran to na yelo ya walay kaiba ton apoy. Aman lay sankagrabian ya bagyo ya agawad Ehipto! Aderal so amin ya tanaman tan kiew, balet anggapoy aderal diad Gosen. Imbaga na Faraon: ‘Mikasi kayod Jehova ya patundaen to la ’ya! Tan sarag yo lay onalis.’ Balet nen tinmunday uran a yelo, agla ra paalisen na Faraon.

Imbaga nen Moises: ‘Upoten na duron so amin ya tanaman ed dalin ya agdineral na uran a yelo.’ Inakan na milyon-milyon ya duron so amin ya akera ed alog tan ed kakiewan. Akikasi so Faraon: ‘Mikasi kayod Jehova ya ekalen to la irayan duron.’ Balet anggano inekal la nen Jehova iray duron, agnin siansia ibulos na Faraon iray Israelita.

Imbaga nen Jehova ed si Moises: ‘Iyunat moy limam ed tawen.’ Biglan binmilunget ya maong so tawen. Taloy agew ya anggapoy nanengneng na saray Ehipsio. Diad abung labat na saray Israelita so walay liwawa.

Imbaga na Faraon ed si Moises: ‘Sarag yo lay onalis. Balet itilak yo ray ayayep yo.’ Imbaga nen Moises: ‘Andi, awiten mi ray ayayep mi pian iyapay mid Dios mi.’ Nampasnok ya maong so Faraon. Inyeyag to: ‘Ekal kad arapan ko! No nanengneng ta ka lamet, pateyen ta ka.’

Imbaga nen Moises ed Faraon ya aglan balot onarap ed sikato. Balet antis ya inmalis, imbaga tod Faraon: ‘Diad pegley-labi, ompatey so amin ya anak a panguloan ed Ehipto, manlapud panguloan na Faraon ya anggad panguloan na saray aripen.’

Imbaga nen Jehova ed saray Israelita ya mangiparaan iray espisyal ya panangan. Imbaga to: ‘Mamakger kayoy lakin karnero odino kanding ya sakey so taon to, tan ipuranis yoy dala to ed lusek na puerta yo. Ikalot yoy karne, tan ipangan yo itan ed tinapay ya anggapoy lebadura to. Dapat akapales ki la tan akasulong la ray sandalyas yo pian makaalis kayon tampol, ta ibulos ta kayo ed sayan labi.’ Imadyin mo pa, seguro eksayted ya maong iray Israelita, awa?

Nen pegley-labi la, linma so anghel nen Jehova ed kada abung ed Ehipto. Diad saray kaabungan ya anggapoy dala ya impuranis ed puerta, inatey so anak ya panguloan. Balet nilabsanan na anghel iray abung ya walay dala ed puerta. Kada pamilya na saray Ehipsio, mayaman o mairap, et inateyan na anak. Balet anggapoy inatey ya anak na saray Israelita.

Anggan say anak na Faraon et inatey. Agla nitepel na Faraon iyan salot. Imbaga ton tampol ed si Moises tan Aaron: ‘Taynan ki la dia! Mandayew ki lad Dios yo. Awit yo ray ayayep yo. La ki la!’

Maliwliwawa so bulan ed saman nen tinmaynan ed Ehipto iray Israelita. Saniiba so kada pamilya tan tribu. Say bilang na lalaki et 600,000 tan dakdakel so bibii tan ugugaw. Tan wala ray aliwan Israelita ya akila ed sikara pian makapandayew met ira ed si Jehova. Nibulos ya siansia iray Israelita!

Pian lanang dan nanonotan no panon iran inligtas nen Jehova, tinaon iran mangiparaan na onman ya espisyal ya panangan. Say tawag ed satan et Paskua, ya say labay ton ibaga et “labsanan.”