Imbaga nen Jehova ed si Moises: ‘Tatdang kad dia ed palandey a kawalaan ko. Isulat ko ray ganggan ko ed saray tapyas na bato insan ko iter ed sika.’ Tinmatdang ed palandey si Moises tan 40 ya agew tan labi to diman. Legan ton wadman, insulat nen Jehova so Samploran Ganggan ed duaran tapyas na bato insan to inter ed si Moises.

Nen abaybayag lay Moises diman, inisip na saray Israelita ya ompan agto la ra pawilen. Imbaga dad si Aaron: ‘Labay min walay lider mi. Igawaan mo kami na dios!’ Imbaga nen Aaron ed sikara: ‘Iter yod siak iray balitok ya alahas yo.’ Insan to tinunaw iratan tan ginawa ton estatua na kilaw a baka. Imbaga na totoo: ‘Sayan kilaw a baka so Dios tayo ya angipaway ed sikatayo diad Ehipto!’ Insan ira nandayew ed balitok ya kilaw a baka, ya onsasayaw tan mangakansion ira. Mauges so ginawa ra, awa? Di ba im-promise da ya si Jehova labat so dayewen da? Balet natan, agda ginawa so im-promise da.

Anengneng nen Jehova so nagagawa, kanian imbaga tod si Moises: ‘Epas ka, nengneng mo ray totoo. Agda ak inunor tan mandadayew irad dios ya aliwan tua.’ Inmepas si Moises ya awit to may duaran tapyas na bato.

Nen asingger lay Moises ed kawalaan na totoo, arengel toy pangakansion da. Anengneng to ra ya onsasayaw tan ontatalimukor ed samay kilaw a baka. Nampasnok ya maong si Moises. Imbantak tod dalin may duaran tapyas na bato, kanian amisimisi. Dineral ton tampol imay ginawa ran estatua. Insan to tinepetan si Aaron: ‘Panon kan akombinse na sarayan totoo ya gawaen iyan baleg ya kasalanan?’ Inmebat si Aaron: ‘Agka manpapasnok. Antam met lay ugali na sarayan totoo. Labay dan igawaan ko ra na dios, kanian tinunaw kod apoy iray balitok ya alahas da insan nagmaliw ya kilaw a baka!’ Ag-itan dapat ginawa nen Aaron. Pinmawil si Moises ed palandey tan akikasi ed si Jehova ya perdonaen to ray totoo.

Pinerdona nen Jehova iramay malabay ya onunor ed sikato. Tan importante met ya unoren na saray Israelita si Moises ta sikatoy pinili nen Jehova ya lider da.

Nen walad Palandey Sinai si Moises, ingganggan nen Jehova ya manggaway espisyal ya tolda ya say tawag et tabernakulo. Ditan mandayew ed si Jehova iray Israelita. Sarag dan iyalis-alis so tabernakulo diad pambiabiahe ra.

Imbaga nen Jehova: ‘Ibagam ed saray totoo ya mangiter ira na usaren ed panggawa na tabernakulo, depende ed sarag dan iter.’ Saray Israelita et angiter na balitok, pilak, gansa, mabli iran bato, tan alahas. Angiter met ira na abel ya gawad bagoy karnero, linen, katat na saray ayep, tan arum ni. Dakdakel so inter da, kanian imbaga nen Moises ed sikara: ‘Duga la yay inter yo! Agki la mangaawit.’

Dakel ya marunong ya lalaki tan bibii so tinmulong ya manggaway tabernakulo. Inikdan ira nen Jehova na karunongan pian nagawaan day trabaho da. Wala ray nanggaway tinebey, nanlagay abel, tan binurdaan da itan. Say arum et nampeket na saray mablin bato, nandesinyo na balitok, tan nan-ukit na kiew.

Inunor da so amin ya ingganggan nen Jehova ya panggawa ed tabernakulo. Nanggawa ray balibalin kurtina ya mangibiig ed duaran kuarto na tabernakulo, say Masanto tan say Sankasantosan. Wadman ed Sankasantosan so kaban na sipanan, ya gawad kiew na acacia tan balitok. Diman ed Masanto et walay kandelero ya puron balitok, wala met so lamisaan, tan altar ya pampoolan na insenso. Diad loob na sular et walay baleg ya palanggana ya gawad gansa tan baleg ya altar. Ipanonot na kaban na sipanan ed saray Israelita so promise da ya unoren day Jehova. Antam tay sipanan? Espisyal itan ya promise.

Pinili nen Jehova si Aaron tan saray anak to ya magmaliw a saserdote ed tabernakulo. Sikara so mangasikaso ed tabernakulo tan mangiyapay na saray bagat ed si Jehova. Say nayari labat ya onloob ed Sankasantosan et si Aaron, say atagey a saserdote. Onloob ditan ya maminsan ed sakey taon pian mangiyapay na bagat parad saray kasalanan to, kasalanan na pamilya to, tan kasalanan na interon Israel.

Asumpal na saray Israelita so tabernakulo sakey taon manlapud samay impaway dad Ehipto. Natan et wala lay pasen ya pandayewan dad si Jehova.

Malikeliket si Jehova ed ginawa dan tabernakulo kanian angiyan na lurem ed tagey na satan. No ag-onatagey so lurem, ag-onalis iray Israelita. Balet no onatagey so lurem, amta da ya kaukolan da lay onalis. Bagbagen da so tabernakulo tan tumboken da so lurem.