Manlapud Palandey Sinai et nambiahe iray Israelita ed kalawakan na Paran tan akasabi rad lugar ya tatawagen a Kades. Diman et imbaga nen Jehova ed si Moises: ‘Mangibaki kay 12 ya lalaki, sakey ed kada tribu, a man-espiya ed Canaan, say dalin ya iter kod saray Israelita.’ Kanian nampili si Moises na 12 ya lalaki tan imbaga tod sikara: ‘La kayod Canaan, tan nengneng yo no mabuna so dalin diman. Nengneng yo met no mabiskeg odino makapuy iray totoo diman tan no manaayam irad saray tolda odino diad saray syudad.’ Kanian linmad Canaan so 12 ya espiya, kaibay Josue tan si Caleb.

Kayari 40 ya agew, pinmawil iramay espiya tan wala ray awit dan prutas ya granada, igos, tan ubas. Imbaga na saray espiya: ‘Mabuna so dalin diman, balet mabiskeg iray totoo tan ataragey so padir na saray syudad da.’ Balet imbaga nen Caleb: ‘Sarag tayo ran taloen. Onla ti lan tampol!’ Antam no akin ya imbaga itan nen Caleb? Lapud sikato tan si Josue et mantitiwala ed si Jehova. Balet imbaga na samploran espiya: ‘Andi! Angkakabaleg iray totoo diman, singa ra higante! Singa tayo labat duron no ikomparad sikara.’

Kinmapuy so liknaan na saray Israelita. Nanreklamo ira tan imbaga da: ‘Manpili tayoy arum ya lider tan ompawil tayo lad Ehipto. Akin et onla tayo nid saman ya lugar anta pateyen da tayo?’ Imbaga nen Josue tan Caleb: ‘Agkayo manrerebelde ed si Jehova. Agkayo natatakot ed saray taga Canaan. Protektaan itayo nen Jehova.’ Balet ag-ondengel iray Israelita. Labay da ni ingen ya pateyen si Josue tan Caleb!

Antoy ginawa nen Jehova ey? Imbaga tod si Moises: ‘Agak nin siansia uunoren na saray Israelita anggano amayamay lay ginawak parad sikara. Kanian 40 ya taon iran manliberliber diad sayan kalawakan tan dia la ra ompatey. Saray ananak da labat tan si Josue tan si Caleb so manayam ed dalin ya im-promise kod sikara.’

Ag-abayag, nen saray Israelita et wala nid kalawakan, si Kora, Datan, Abiram, tan say 250 ya kakaiba da et nanrebelde ed si Moises. Imbaga rad sikato: ‘Nalalabas ka la! Akin et sika so lider mi tan si Aaron so atagey a saserdote? Amin tayo et tutulongan nen Jehova, aliwan sika labat tan si Aaron.’ Aglabay nen Jehova so ginawa ra. Parad si Jehova, sikaton mismo so panrerebeldian da!

Imbaga nen Moises ed si Kora tan saray kakaiba to: ‘La kayod tabernakulo nabuas tan mangawit kayoy kargaan na ngalab tan pano yo na insenso. Ipaamta nen Jehova no siopay pinili to.’

Diad sinmublay ya agew, linmad tabernakulo si Kora tan say 250 ya lalaki. Ditan et nampool iray insenso ya singa gagawaen na saray saserdote. Imbaga nen Jehova ed si Moises tan Aaron: ‘Biig kayo ed si Kora tan saray kaiba to.’

Anggano linmay Kora ed si Moises diad tabernakulo, aglinma si Datan, Abiram, tan saray pamilya da. Imbaga nen Jehova ed saray Israelita ya arawian day tolda nen Kora, Datan, tan Abiram. Kanian inmarawin tampol iray Israelita. Walad paway na tolda si Datan, Abiram, tan saray pamilya da. Insan biglan sinmangi so dalin tan inakmon to ra! Dimad tabernakulo, walay apoy ya nanlapud tawen tan pinoolan toy Kora tan say 250 ya lalakin kaiba to.

Insan imbaga nen Jehova ed si Moises: ‘Alam so baston na lider na kada tribu tan isulat moy ngaran da ed satan. Balet diad baston na tribu nen Levi et isulat moy ngaran nen Aaron. Iyan mo iratan diad tabernakulo, tan say baston na laki ya pilien ko et manrosas.’

Diad sinmublay ya agew, impaway nen Moises so amin ya baston tan impanengneng tod saray lider. Say baston nen Aaron so nanrosas tan nambunga na aluton almendro. Dia et impanengneng nen Jehova ya si Aaron so pinili ton atagey a saserdote.