Nen wala lad Jerico imay duaran Israelita ya espiya, say tinuloyan da et diad abung na biin say ngaran to et Rahab. Naamtaan itan na ari na Jerico kanian angibaki na saray sundalo ed abung nen Rahab. Imbaga nen Rahab ed saray sundalo ya akaalis la may duaran espiya, balet diad tua et inyamot to rad atep. Imbaga tod saray espiya: ‘Tulongan ta kayo ta amtak ya tutulongan kayo nen Jehova tan segurado ya nasakop yoy syudad mi. Balet i-promise yo komon ya iligtas yoy pamilyak.’

Imbaga na saray espiya ed si Rahab: ‘Ilaloan mo ya anggapoy ompatey ya walad loob na abung mo.’ Imbaga da ni: ‘Mangisinger kay ambalangan lubir diad bintanam pian agnadamay so pamilyam.’

Pinaepas nen Rahab iray espiya diad bintana panamegley na lubir. Linma rad kapalandeyan tan taloy agew iran inmamot diman antis iran pinmawil ed si Josue. Kayari to man, binmaliw iray Israelita ed Ilog Jordan tan namparaan iran sakopen so dalin. Say syudad na Jerico so unonan sinakop da. Imbaga nen Jehova ed sikara ya liberen day syudad ya maminsan ed sanagew diad loob na anemiran agew. Diad komapiton agew, aminpito dan niliber so syudad. Insan pinaknol na saray saserdote iray trumpeta da, tan inmeyag na makmaksil iray sundalo. Ageba iray padir na syudad! Balet ag-ageba so abung nen Rahab ya walad padir. Aligtas si Rahab tan say pamilya to ta nantiwala ed si Jehova.

Abalitaan na arum ya bansa ed Canaan so agawa ed Jerico. Implano na saray arari da ya labanan iray Israelita. Balet dumay ginawa na saray Gibeonita. Nansulong iray daan ya kawes, insan ira linmad si Josue tan imbaga da: ‘Arawrawi so nanlapuan mi. Abalitaan mi so tungkol ed si Jehova tan amin ya ginawa to parad sikayo diad Ehipto tan Moab. I-promise yo ya agyo kami lulusoben, ta panserbian mi kayo.’

Anisia si Josue ed sikara tan im-promise to ya agda lusoben iray Gibeonita. Balet kalabas na taloy agew, naamtaan to ya asingger labat manaya so nanlapuan da. Taga ra labat ed Canaan. Tinepetan nen Josue iray Gibeonita: “Akin et tinilaan yo kami?” Inmebat ira: ‘Kasi natatakot kami! Amta mi ya say Dios yon si Jehova so milalaban parad sikayo. Agyo kami komon papateyen.’ Ginawa nen Josue imay im-promise to tan agto ra pinatey.

Ag-abayag, saray Gibeonita et nilusob na limaran arari na Canaan tan saray sundalo da. Sanlabin nanakar si Josue tan saray sundalo to pian iligtas ira. Kasabi dad kabkabuasan, ginmapon tampol so panlalaban. Tinmakas iray Canaanita ya nandurumay inarap da. Balet anggan iner so laen da, pinauran nen Jehova na angkakabaleg ya yelo. Insan impikasi nen Josue ed si Jehova ya agkomon onselek so agew. Akin et ontan so impikasi to anta anggapo nin balot so agawa ya agsinmelek so agew? Lapud baleg so tiwala nen Josue ed si Jehova. Agsinmelek so agew anggad atalo na saray Israelita iray arari na Canaan tan saray sundalo da.