Panon To No Walay Agmo Nagugustoan ya Ugali na Asawam?

• Labalabay moy biglaan; say asawam balet et labay ton planadon amin.

• Agka masalita; say asawam balet et maistorya tan labalabay toy dakel ya totoo.

Kasin walay ugali na asawam ya agmo labay? No atan so pampokusan mo, ompan naderal so relasyon yo. Diad tua, ibabaga na Biblia ya “samay uulit-uliten ton itongtong so sakey a bengatla et pansisianen to ray maapit a sankakaaro.”—Proverbio 17:9.

Imbes ya abuloyan mon pansengegan itan na pankolkol yo nen asawam, ompan mas maabig no umanen moy panmoriam ed satan ya ugali.

Diad sayan artikulo

• Uman moy panmoriam ed saray agmo labay ya ugali na asawam

• No antoy ibabaga na arum ya sanasawa

• Giya parad pantongtong

Uman moy panmoriam ed saray agmo labay ya ugali na asawam

Samay agmo labay ya ugali na asawam et nayarin walay koneksion to ed samay ugali to ya labalabay mo. Imanoen irayan taloran alimbawa:

“Matantan so asawak no walay gagawaen to odino no manpaparaan ta walay laen mi. Balet lapud satan ya ugali to, maanos—anggan diad siak. Nasyosyodotan ak la no maminsan, balet kaiba itan ed ugali to ya agustoan ko.”—Chelsea.

“Labay nen asawak ya akaplanon amin, tan say labay to et kontrolado ton amin, kanian makapasyodot no maminsan. Balet lapud iimanoen ton maong iray detalye, mauksoy ya amin.”—Christopher.

“Nasyosyodotan ak no maminsan ed asawak ta singa anggapoy pibabali to. Pero diad tua, amay relaks labat ya disposisyon to so sakey ed saray agustoan kod sikato. Sarag toy mansiansian kalmado anggano mairap so situasyon, tan labalabay ko itan ya ugali to.”—Danielle.

Base ed eksperiensya nen Chelsea, Christopher, tan Danielle, saray balibalin kualidad tan kakapuyan na asawa ra et kaslakan ya duman anggulo labat na maong ya ugali ra. Kanian agmo nayarin ekalen imay agmo nagugustoan ya ugali to ta naekal met imay maong ya ugali to, no panon ya agmo nayarin ibantak so sakey labat ya pagpag na barya.

Pero siempre, aliwan amin ya ugali et walay positibon anggulo to. Singa bilang, ibabaga na Biblia ya wala ray totoo ya “mipepetang so ulo” ra. (Proverbio 29:22) No ontan, nepeg ya pansagpotan na sakey ya ekalen so “amin a klase na paneem-em na sakit na linawa, pasnok, sanok, paneyag, tan makapasakit a salita.”a—Efeso 4:31.

Balet no say rason et basta agmo labat nagugustoan so sakey ya ugali nen asawam, unor mo iyan bilin na Biblia: “Itultuloy yon itepel so sakey tan sakey . . . anggano walay rason na sakey ya ireklamo imay sakey.”—Colosas 3:13.

Sakey ni, nengneng moy kabaliktaran na saman ya ugali—ta ompan aman so talagan agustoan mod si asawam. Oniay imbaga na asawan laki ya si Joseph, “No say pampokusan mo et samay agmo labay ya ugali na asawam, singa ka onnenengneng ed diamante balet say naiimanom labat et saray makdem ya gilig na to, aliwan say karakep na satan.”

Giya parad pantongtong

Unona, pannonotan yo nin bukor irayan tepet. Insan yo pantongtongan ya dua iray ebat yo.

• Kasin walay ugali na asawam ya pansesengegan na pankolkol yon sanasawa? No wala, anto itan ya ugali?

• Kasin talagan makapuy itan ya ugali o agmo labat nagugustoan?

• Kasin walay positibon anggulo na satan ya ugali to? Anto tan ey, tan akin et labalabay mo itan ya kabiangan na personalidad na asawam?