LEKSION 10
Antoy Nitulong ed Sika na Aral na Saray Tasi nen Jehova?
Asalim lay linma ed pantitipon o aral na Saray Tasi nen Jehova? No andi ni, ompan nababaingan ka tan mannerbiyos ka no first time moy onla. Seguro iisipen mo: ‘Antoy gagawaen ditan? Akin et kailangan koy onla?’ Diad sayan leksion, naaralan mo ya no onla kad aral da, mas nakaarom so Dios tan makatulong itan ed sika.
1. Akin et importante so onlad aral?
Imbaga na sakey ya nansulat na Biblia no akin ya importante so miaral: “Idayew koy Jehova diad saray pantitipon.” (Salmo 26:12, paimanod leksab) Saray Tasi nen Jehova et malikeliket met ya mantitipon. Diad interon mundo, sinimba iran manaaral pian dayewen so Dios, mangakansion ira tan manpipikasi. Tan kada taon, maminpiga ya wala ray angkakabaleg ya pantitipon da pian mandayew.
2. Anto ray naaralan mo ditan?
Aaralen mi ditan so Salita na Dios, tan “malinew [ya] ipapaliwawa tan ibabaga [iray] kabaliksan na satan.” (Basaen so Nehemias 8:8.) No miaral ka, mas nakabat moy Jehova tan saray balibalin kualidad tan ugali to. No naamtaan mo ya inar-aro ka na Dios, mas labay mo ya nakaaro. Naaralan mo met no panon to kan tulongan pian magmaliw kan maliket.—Isaias 48:17, 18.
3. Akin et makatulong ed sika so pilimog diad saray aral?
Bibilinen itayo nen Jehova ya “nonoten tayoy sakey tan sakey pian napakiwas tayoy balang sakey a mangaro tan manggaway maabig iran kimey, ya agtayo papaulyanan so pantitipon tayo.” (Hebreo 10:24, 25, paimanod leksab) Diad saray aral mi, nakabat mo ray totoon walay malasakit da ed sakey tan sakey. Tan singa sika, labay da met ya mas nakabat so Dios. Narengel mo ditan iray makapabiskeg ya paliwawa tan komento ya nanlapud Biblia. (Basaen so Roma 1:11, 12.) Nakabat mo ditan iray nanduruman totoo ya nasasarag da ray problema da. Pigara labat iraya ed dakel ya rason no akin ya labay nen Jehova ya regular tayon mantitipon!
DAKEL NI NAARALAN MO
Amtaen no antoy gagawaen ed aral na Saray Tasi nen Jehova tan no akin ya sulit so iyakar ditan.
4. Aral na Saray Tasi nen Jehova
Saray Kristiano nensaman et regular ya mantitipon pian dayewen si Jehova. (Roma 16:3-5) Basaen so Colosas 3:16, insan ebatan iya:
Panon ya indayew na saray Kristiano nensaman si Jehova?
Natan, regular met ya mantitipon iray Tasi nen Jehova diad saray lugar ya pandadayewan da. Pian nabantayan no antoy gagawaen ed saray aral da, i-play so VIDEO. Tan nengnengen so litrato na sakey ya aral, insan ebatan iraya.
Antoy apansin mon parehon gagawaen ed Kingdom Hall tan ed samay abasam diad Colosas 3:16?
Diad samay video odino diad satay litrato, wala ni apansin mo ya agustoan mo diad saray aral mi?
Basaen so 2 Corinto 9:7, insan ebatan iya:
Akin et libre tan anggapoy koleksion ed aral na Saray Tasi nen Jehova?
Ipanengneng na mangiyaaral ed sika no antoy onsublay ya aralen diad Kingdom Hall.
Dinan ya parte ed aral so iisipen mon nagustoan mo odino makatulong ed sika?
Kasin antam?
Diad jw.org/pag, nanengneng mo no iner tan no kapigan nagagawa iray aral diad interon mundo.
Kaibad aral mi iray paliwawa, demonstration, tan pambantay na video. Diad gapo tan sampot na aral mi, mangakansion tan manpipikasi kami
Wala ray parte na aral ya nayarin mankomento iray wadman
Welcome so amin—lalaki, bibii, maedad, tan ugugaw
Libre so miaral. Saray Tasi nen Jehova et agmansisingil na entrance fee tan agmankokolekta
5. Wala ray kailangan mon gawaen pian makapiaral ka
Nengnengen ta’y alimbawa na pamilya nen Jesus. Manaayam irad Nazaret tan kailangan day onla ed templo diad Jerusalem. Kada taon, manga taloy agew iran manaakar diad saray mapalandey ya lugar pian makasabi ditan. Basaen so Lucas 2:39-42, insan ebatan iraya:
Parad sika, mairap kasi manakar paonlad Jerusalem?
Anggano aliwan mainomay no maminsan, akin et miaral ka?
Sulit kasi so miaral? Akin ey?
Ibabaga na Biblia ya importante so pantitipon. Basaen so Hebreo 10:24, 25, insan ebatan iya:
Akin et kailangan tayoy regular ya miaral?
IBABAGA NA ARUM: “Agmo la kailangan so miaral ta manaaral ka lay Biblia diad abung.”
Anton teksto odino alimbawa ed Biblia so mangipapanengneng no antoy labay nen Jehova?
SUMARYO
Diad saray aral, mas nakabat moy Jehova, onelet so pikakaarom ed sikato, tan sikatoy nidayew mo kaibay arum.
Rebyu
Akin et labay nen Jehova ya mantitipon tayo?
Antoy naaralan mo ed aral na Saray Tasi nen Jehova?
Anto ni ray arum ya iisipen mo ya nitulong ed sika na piaral mo?
DISKOBRIEN
Panon to no nababaingan tan nanenerbiyos kan miaral? Ontan so alikna na sakey ya laki. Pero amtaen no akin ya agustoan to lanlamang so miaral.
Amtaen no akin ya nai-enjoy na sakey ya kabataan so miaral tan no antoy ginawa to pian tuloytuloy ya makapiaral.
Basaen no antoy impresyon na arum nen akiaral ira.
“Akin ya Maong no Onla Kad Kingdom Hall?” (Artikulo ed website)
Nengnengen no panon ya anguman so bilay na sakey ya datin membro na gang nen akiaral ed Saray Tasi nen Jehova.
“Agak Onaalis ya Agko Awit so Paltog Ko” (Say Panag-bantayan-E, Hulyo 1, 2014)