Videoconferencing Parad Saray Aral na Kongregasyon

Diad interon mundo, ingganggan na dakel ya gobierno so panumbok ed social distancing tan agda ni inabuloyan iray totoo ya mantitipon. Determinado iray Tasi nen Jehova ya ontumbok ed saratan balet siansian itutultuloy day panagdayew da. Pian nagawaan da itan, saray kongregasyon et manguusar na saray app parad videoconferencing, singa say Zoom, parad pantitipon da.

Pian tuloytuloy tan secured so pantitipon mi, inaprobaan na Mananguley ya Ulop so pangusar ed saray donasyon pian mangaliw na Zoom account parad saray kongregasyon. Baleg so nitulong na satan ed saramay kongregasyon ya agmakasarag ya mangaliw na account da parad videoconferencing, ya maslak et manbili na $15-$20 odino mas atagey ni. Mabetbet ya manguusar irayan kongregasyon na saray libren app ya limitado labat so nayarin makakonekta odino aliwan masyadon secured. Amin ya kongregasyon ya manguusar na Zoom account na organisasyon et minanabang ed saya ta mainomay ya usaren tan dakel so nayarin makakonekta kada aral. Natan et masulok lan 65,000 ya kongregasyon diad masulok ya 170 a bansa so manguusar ed sarayan account.

Intunda la na Kairagi Congregation, diad Manado, North Sulawesi, Indonesia, so panguusar da na libren videoconferencing app tan manguusar la ra natan na Zoom account na organisasyon. Oniay imbaga nen Brother Hadi Santoso: “Anggan saramay agagi ya agpamilyar ed pangusar na saray gadyet et mani-enjoy la natan ed saray aral, ta agda la kaukolan so maminpigan man-log in legan na aral.”

Oniay imbaga nen Lester Jijón, Jr., sakey ya elder ed Guayacanes Oeste Congregation diad Guayaquil, Ecuador: “Lapud naiirapan ed pinansyal so dakel ya agagi, agnasarag na arum ya kongregasyon so mangaliw na Zoom license pian makakonekta so interon kongregasyon ed saray aral. Balet natan, lapud wala lay Zoom account na organisasyon, sarag mi lay mangimbita na arum ya onkonekta ed saray aral, tan agkami la nanaaburido ya ompan onlampas kami ed bilang na saray nayarin onkonekta.”

Oniay insulat nen Johnson Mwanza, sakey ya elder ed Ngwerere North Congregation diad Lusaka, Zambia: “Naynay ya ibabaga na saray agagi, ‘lapud sayan ginawan uksoyan na organisasyon, agkami labat inmapit ed saray agagi, noagta aliklikna mi met ya inar-aro tan aasikasoen itayo nen Jehova.’”

Sarayan account na organisasyon et gagastosan panamegley na saray pundo parad disaster relief. Sarayan pundo et manlalapud boluntaryon donasyon parad sankamundoan ya kimey tayo. Dakel so mandodonasyon panamegley na donate.jw.org. Baleg ya salamat ed inkamaiter yo, ta nauusar met iratan ed arum nin relief work diad interon mundo.​—2 Corinto 8:14.