No Panon ya Kontrolen so Panaburido

No masyado kan aburido, makapuy so epekto na satan ed laman tan emosyon mo. Ompan atan laingen so mangiter na mas baleg ya problema nen samay akaunan panaaburidoan mo.

Saray tip pian nakontrol so panaburido

• 

  Bawasan moy pambabantay, pambabasam, tan idedengel mo ed saray aliwliwan balita. Agmo kaukolan ya amtaen so amin ya detalye ed sakey ya mauges ya nagagawa. No akatutok kan lanang ed saray bad news, ompan onkapuy laingen so liknaan mo.

  Prinsipyo na Biblia: “Say nagogonigon ya espiritu et mangupot na biskeg.”—Proverbio 17:22.

  “Nayarin na-adik so sakey ya amtaen no anto ray balo tan makapabiglan balita diad Internet, balet walay makapuy ya epekto na satan. Nen binawasan koy panaon kod saratan, abawasan met so panaaburidok.”—John.

  Isipen pa: Talaga kasin kaukolan ya lanang kan updated ed saray balita?

• 

  Tumbok moy eskedyul mo. Salim so ombangon, mangan, mankimey ed abung, tan onugip diad oras ya inyeskedyul mo. No walay eskedyul mo, napansiansiam ya normal so bilay mo tan ontulong itan pian nabawasan so panaburidom.

  Prinsipyo na Biblia: “Saray plano na makuli et seguradon ontalona.”—Proverbio 21:5.

  “Nen ginmapo so COVID-19 pandemic, talagan apaulyanan koy rotinak tan nauupot labat so panaon ko ed saray panagligliwaan. Agko labay ya nasayang so oras ko kanian nanggawa ak na eskedyul pian nasumpal ko ray inagew-agew ya kimey ko.”—Joseph.

  Isipen pa: Kasin walay eskedyul mo ya makatulong ed sika pian naliknam ya walay marakep ya agawaan mo diad kada agew?

• 

  Manpokus ed saray positibo ya nagagawa ed bilay mo. No say iisipen mon naynay et saray ginawam komon odino saray aliwliwa ya posiblin nagawa ni labat, lalo kan naaburido. Mas maabig no mannonot kay duara odino taloran agawa ed sika ya pisalamatan mo.

  Prinsipyo na Biblia: “Ipanengneng yon misalsalamat kayo.”—Colosas 3:15.

  “Makakatulong so pambabasak na Biblia pian aliwan saray aliwliwan balita so isipen ko, kanian mas akapokus ak ed saray positibon bengatla. Ompan lanang ti lan narerengel itan, pero talagan epektibo!”—Lisa.

  Isipen pa: Kasin mabetbet lan negatibo so iisipen mo kanian naibabaliwalam la ray positibon nagagawa ed bilay mo?

• 

  Isipen so arum. Imbes ya ibiig moy sarilim ta atan so mainomay ya gawaen no aburido kan maong, mas maabig no mannonot ka na paraan no panon mon natulongan iray mankaukolan.

  Prinsipyo na Biblia: ‘Anapen so pankaabigan na arum, aliwan say pankaabigan yo labat.’—Filipos 2:4.

  “Naliliketan ak no makakatulong ak ed arum ya totoo. Agko labat ira napapaliket ed satan ya gagawaen ko, nababawasan met so panaaburidok. Diad tua, anggapo lay panaon kon manaburido.”—Maria.

  Isipen pa: Siopa ray kabat mon mankaukolan na tulong, tan panon mo ran natulongan?

• 

  Pansiansiam ya healthy so laman mo. Man-exercise tan manpainawa na susto. Mangan na masustansia iran naakan. No aasikasoen moy laman mo, ombalibali so liknaan mo tan ontulong itan pian agka masyadon manaburido.

  Prinsipyo na Biblia: “Say panag-ehersisyo et makagunggona.”—1 Timoteo 4:8, paimanod leksab.

  “Agkami masyadon makakapaway nen ana’ko pian man-exercise, kanian nanggawa kami eskedyul mi pian makapan-exercise kami diad loob na abung. Mas balibali liknaan mi lapud satan tan nagmaliw kami ni ingen ya mas mapasensya ed sakey tan sakey.”—Catherine.

  Isipen pa: Kasin masustansia iray kakanen mo tan walay eskedyul mon man-exercise pian magmaliw kan mas healthy?

Likud ed sarayan tip ya gagawaen na dakel ya totoo pian nakontrol so panaaburido da, dakel met so atulongan nen naamtaan da ed Biblia iray balibalin promisa na Dios ya nagawad arapen. Nengnengen so artikulon “Antoy Gawaen na Panarian na Dios?”