TULONG PARAD PAMILYA | PAMABALEG NA ANANAK
Ananak tan Social Media—Part 2: Ibangat so Tinedyer ya Anak Mo No Panon so Dugan Pangusar na Social Media
Lapud dakel so peligro ed pangusar na social media, babawalan na dakel ya atateng iray ananak da ya mangusar ed satan. Balet no pinayagan moy tinedyer ya anak mo ya mangusar na social media, panon mon natulongan pian naiwasan to iray aliwliwan epekto na satan tan no panon so dugan pangusar tod satan?
Diad sayan artikulo
No anto ray mas importante ed tinedyer ya anak mo
No antoy nepeg mon naamtaan: Lapud makaadik so social media, kaukolan na anak mon tinedyer so tulong no panon dan kontrolen so oras na pangusar dad satan.
Prinsipyo na Biblia: “Seguroen yo komon no anto ray mas importantin bengatla.”—Filipos 1:10.
Isipen pa: Kasin lapud panguusar na anak mo na social media et agla makakaugip, agto la nagagawaan iray asainmin tod eskuelaan, tan apektado lay relasyon tod pamilya yo? Ibabaga na saray researcher ya manga 9 oras so kailangan ya ugip na saray tinedyer, balet saramay pigaran oras ya manguusar na social media kada agew et kulang lan pitoran oras so ugip da.
No antoy nagawaan mo: Itongtong mod anak mo no anto ray mas importante, tan ibagam no akin ya mas maabig no bawasan toy panaon tod social media. Mangiter na limitasyon, singa bilang agla nayari mangusar na gadyet no kakaugip la. Say goal mo et natulongan so tinedyer ya anak mo ya nawalaan na kontrol ed sarili to ta makatulong itan ya anggad itatken to.—1 Corinto 9:25.
No antoy epekto ed emosyon to
No antoy nepeg mon naamtaan: No say naynay lan nanenengneng na anak mo et saray litrato na kakaaro da ya manse-selfie tan saray maliket ya gagawaen da, seguradon makaibeg tan ompan na-depress ni ingen.
Prinsipyo na Biblia: “Ekal yo so . . . ibeg.”—1 Pedro 2:1.
Isipen pa: Kasin ikokompara na tinedyer ya anak mo so itsura to tan laman to ed saramay nanenengneng tod social media? Kasin say pakalikna to et mas maliket so bilay na arum, tan boring balet so bilay to?
No antoy nagawaan mo: Ibagam ed tinedyer ya anak mo ya makapuy no ikompara toy sarili to ed arum. Tandaan ya mainomay ya naapektoan iray bibii nen saray lalaki, ta mas importante ed sikara so relasyon dad arum tan say itsura da. Sarag mon ibaga ed anak mo ya itunda to sagpaminsan so pangusar na social media. Oniay imbaga sakey a kabataan ya laki ya si Jacob: “Aminsan, in-delete koy social media app ko. Akatulong iman ed siak pian naayos ko ray prayuridad ko ontan met ed pakanengneng kod sarilik tan ed arum.”
No anto ray gawaen to diad online
No antoy nepeg mon naamtaan: No manguusar kay social media, singa ka walad arapan na dakdakel ya totoo. Walan walay onlesan agpantatalosan tan kolkolan.
Prinsipyo na Biblia: “Ekal yod inkasikayo so amin a klase na paneem-em na sakit na linawa, pasnok, sanok, paneyag, tan makapasakit a salita . . . Balet ipanengneng yoy kaabigan ed sakey tan sakey.”—Efeso 4:31, 32.
Isipen pa: Kasin nagmaliw lan matsismis, makolkol, odino aliwliwa lay panagsalita na anak mo nen manguusar lay social media?
No antoy nagawaan mo: Ibangat ed tinedyer ya anak mo iray dugan ugali ed pangusar na Internet. Oniay ibabaga na libron Digital Kids: “Kaibad responsabilidad mi bilang atateng ya bangatan iray ananak mi ya ag-ira manggagaway mauges ed arum—balanglan personal odino diad online.”
Tandaan ya aliwan manunan pankaukolan so social media tan aliwan amin ya atateng et ompapayag ya usaren itan na saray ananak da. No pinayagan moy tinedyer ya anak mo ya mangusar na social media, kaukolan mon seguroen ya amta to lan kontrolen so sarili to diad pangusar toy panaon to, magmaliw ya maong ya kaaro, tan naiwasan to iray makapuy tan malaswa ya nanengneng ditan.