Impriso Lapud Pananisia Ra—Russia
Say history na saray Tasi nen Jehova diad modernon Russia et sakey ya istorya na panamairap tan panamasegsegang. Legay koma-20 a siglo, pinairap tan minaltrato na saray autoridad na Russia iray Tasi anggano kabkabat ya mareen iran totoo tan matulok irad ley. Labay iran piliten na gobierno na Soviet Union ya awaten iray papanisiaan na Soviet. Bawal iran nawalaan na Biblia odino antokaman ya literatura da. Lanang iran maman-manan kanian pasekreto iray pantitipon da. No naerel ira, bugbogen da ra tan nasentensiaan ira na mabayag ya pakapriso. Nilibo ed sikara so inyakar na gobierno ed Siberia.
Balet anguman itan nen 1991 ta ginawan legal na gobierno na Russia iray Tasi nen Jehova tan bulos la ran mandayew ya agla ra pibabalian na saray autoridad. Balet agangganon abalang itan ya kareenan.
Nen 2009, ginmapo so isusumpa tan panagbawal ed saray Tasi nen inaprobaan na Russian Supreme Court so desisyon na sakey ya mas abeban korte ya akusaan so sakey ya kongregasyon na Saray Tasi nen Jehova bilang “extremist,” odino bayolentin panatiko. Kayari pigaran taon ya impilaban ed korte, nandesisyon so Korte Suprema na Russia nen Abril 2017 ya ipasara iray legal ya korporasyon na saray Tasi lapud naakusaan iran manggagaway “extremist activity.” Kinompiskan tampol na saray autoridad na Russia iray kaykayarian na saray Tasi, impasara da ray pasen na panagdayewan da, tan indeklara dan “extremist material” iray literatura da.
Agni nankontento iray autoridad na Russia ed impangataki dad saray legal ya korporasyon na saray Tasi, nandesisyon met iran sansakey ya puntiryaen iray Tasi nen Jehova. Asobraan day ginawa ra ta anggano pribado lan panagdayew so gagawaen na saray indibidual ya Tasi, ikokonekta ni itan na saray autoridad ed samay imbawal ya organisasyon na Saray Tasi. Kada no man-raid iray pulis ed kaabungan na saray Tasi, mamaltratoen tan maruksa da ran tetepetan. Aarestoen da ray lalaki tan bibiin Tasi antokaman so edad da. I-house arrest da ni ira odino awiten irad pasilidad ya parad saray akusado ya agni alitis. Insan kayari to et kasoan da ra tan sentensiaan ya napriso.
Manlapu lad samay impangibawal nen Abril 2017, nilasus ya Tasi so asentensiaan na pakapriso antis nin nalitis odino pakapriso lapud akusasyon ya extremist ira kuno. Anggad nen Mayo 19, 2025 ami-amin et 158 ni ya Tasi so akapriso.
Saray Protesta ed Maruksan Panagtrato na Russia ed Saray Tasi nen Jehova
Ipipriso na saray autoridad na Russia iray Tasi ta manggagawa ra kunoy extremist activity. Tuloytuloy nin gagawaen itan na saray autoridad anggano amayamay lay manproprotesta ed nanduruman bansa. Babalawen na saray totoon makakaobserba tan saray korte ed arum ya bansa so pamapairap na gobierno na Russia ed saray Tasi nen Jehova.
European Court of Human Rights: Nen Hunyo 7, 2022 in-release na European Court of Human Rights so importantin desisyon kontrad Russia, ya mangokondena ed pamapairap da ed saray Tasi nen Jehova (Taganrog LRO and Others v. Russia, nos. 32401/10 and 19 others). Imbaga na Korte ya ilegal so ginawa na Russia ya isebel so kimey na saray Tasi nen Jehova nen 2017. Ingganggan day Russia ya “nepeg ton gawaen so amin ya nakaukolan pian agla ituloy so amin ya aka-pending ya kriminal ya kaso kontrad saray Tasi nen Jehova . . . tan ibulos la . . . iray [akaprison] Tasi nen Jehova.” Ingganggan met so Russia ya kaukolan ya ipawil so amin ya kinompiskan kaykayarian ed saray Tasi odino bayaran ira na masulok ya 60 milyon a dolyar bilang kasalat na saratan, tan bayaran ira na masulok ya 3 milyon a dolyar bilang danyos.
Say Sulat na Secretary General na Council of Europe: Oniay imbaga nen Marija Pejčinović Burić ed sulat to ya apetsaan na Disyembre 9, 2022 parad Russian Minister of Foreign Affairs: “Parad saray kaso ya Jehovah’s Witnesses of Moscow and Others and Krupko and Others, nipaakar ed impankansela ed rehistro na saray Tasi bilang relihyon kanian insebel iray kimey da, apatunda iray mareen ya seremonya ed panagdayew da tan naandi so bulos ya pibibiang da ed saratan, mapekder ya igaganggan na Komite iray autoridad ya itunda la so panesebel ed saray kimey na amin ya organisasyon na Saray Tasi nen Jehova tan itunda lay amin ya kriminal ya kason iyaakusa ed sikara.”
Desisyon na Committee of Ministers of the Council of Europe: Diad samay agawan miting nen Setyembre 2023, imbaga na Committee of Ministers [CoM] ya “agtalaga inimano na autoridad na Russia so seryoson ingganggan ed sikara na [European Court of Human Rights] ya ibulos iray niprison Tasi nen Jehova anggano malinlinew ya base itan ed Article 46 of the Convention tan ed samay desisyon ed kaso ya Taganrog LRO and Others.” Lapud agmikokoopera so Russia, nandesisyon so CoM ya “ipaimano iyan pigaran kaso ed United Nations Human Rights Committee, say Working Group on Arbitrary Detention of the UN Human Rights Council, tan arum nin grupo ed arum ya bansa ya mangaasikaso ed problema ya pamapasegsegang na Russia ed saray Tasi nen Jehova pian seguroen ya base ed kakaukolanen na batas so panguukom na Russia.”
Saray Alimbawa na Agano nin Maruksa Iran Sentensia
Nen Marso 27, 2025 kinasoan na Konakovo City Court of the Tver Region so apatiran lalakin Tasi. Sikara di Oleg Katamov, Aleksey Kuznetsov, Aleksandr Shchetinin, tan Aleksandr Starikov. Akasoan ira bilang kriminal lapud pangibabaga da na nipaakar ed Biblia ed saray kakaabay da tan mareen dan gagawaen iray relihyoson pantitipon da. Kada sakey ed sikara et asentensiaan na anemiran taon ya pakapriso. Insan kayari da ran senentensiaan, impriso da la ran tampol.
Nen Abril 3, 2025 kinasoan na Sovetskiy District Court of the City of Chelyabinsk si Maksim Khamatshin tan senentensiaan na anemiran taon ya pakapriso. Sikatoy kinasoan lapud pangikokondukta to na saray relihyoson pantitipon. Kayari dan senentensiaan, impriso dan tampol.
Nen Abril 29, 2025 kinasoan na Lesosibirsk City Court of the Krasnoyarsk Territory si Andrey Shiyan ya mantaon na 55 lapud mangoorganisa kuno na saray kimey na extremist ya organisasyon. Asentensiaan si Andrey na anemiran taon tan sakey bulan ya pakapriso. Dakel so aanosan ton sakit, kaiba lay type 2 diabetes.
Saray Tuloytuloy ya Pansasagpot Pian Napatunda so Agmahustisyan Panangipriso
Aburido lan maong iray Tasi nen Jehova ed interon mundo lapud maruksan panagtrato na Russia ed saray kapananisiaan da. Minilyon ya Tasi ed nanduruman pasen na mundo so angipawit na sulat ed saray opisyal na gobierno na Russia pian onapela parad saray Tasi ya akapriso. Inmapela iray abogado na saray Tasin akapriso ed amin ya klase na korte ed Russia tan dakdakel so impawit dan aplikasyon pian onapela ed European Court of Human Rights. Angi-file met na reklamo iray Tasi nen Jehova ed UN Human Rights Committee tan ed UN Working Group on Arbitrary Detention, tan angiter iray report ed saray internasyonal ya organisasyon ya manbabantay ed saray pangaabuso na karapatan na totoo. Ituloy nin gawaen na saray Tasi nen Jehova so amin ya paraan pian nipaamta so nagagawad saray kapananisiaan da ed Russia pian nasumpal la iyan graben panamasegsegang lapud relihyon.
Time Line
Mayo 19, 2025
Ami-amin et 158 ya Tasi so akapriso.
Marso 6, 2025
Angipaakseb so European Court of Human Rights (ECHR) na desisyon nipaakar ed kaso na Loginov and Others v. Russia. Base ed sayan desisyon, imbaliwala na Russia so karapatan na siameran lalakin Tasi nen ni-raid so kaabungan da ed syudad na Surgut nen Pebrero 15, 2019. Nipriso irayan lalaki anggano anggapoy legal ya basehan tan say pitora ed sikara et pinairap.
Oktubre 24, 2023
Angi-release na duaran View so UN Human Rights Committee (CCPR) nipaakar ed Local Religious Organization ya Elista tan Abinsk. Diad parehon kaso, imbaga na CCPR ya base ed Article 18.1 (“right to freedom of thought, conscience and religion”) tan 22.1 (“right to freedom of association”) na International Covenant on Civil and Political Rights, imbaliwala na Russia so karapatan na saray Tasi. Kinompirma na saratan ya desisyon ya anggapoy nabasa ed saray literatura na saray Tasi ya mangipapaseseg na pambusol odino panggaway inkaruksa.
Hunyo 7, 2022
Angipaakseb so ECHR na importantin desisyon, say Taganrog LRO and Others v. Russia, ya mangibabagan aliwa so gagawaen na Russia ya panagmaltrato ed saray Tasi nen Jehova.
Enero 12, 2022
Inyarum na Ministry of Justice na Russian Federation so JW Library app ed Federal List of Extremist Materials. Saya so sankaunaan tan alenleneg ya app ya insebel ed Russia bilang extremist.
Setyembre 27, 2021
Imbasura na Saint Petersburg City Court so apela ya kontra ed desisyon nen Marso 31, 2021 ya angideklaran extremist so JW Library app tan angibawal ed pangusar ed satan diad interon Russian Federation tan Crimea. Tampol ya impaakseb so dati lan desisyon na korte.
Abril 26, 2019
Nalmoan na UN Working Group on Arbitrary Detention ya asumlang iray kanepegan nen Dmitriy Mikhailov tan kinondena na satan so pamapasegsegang na Russia ed saray Tasi nen Jehova.
Abril 20, 2017
Nandesisyon so Supreme Court of the Russian Federation ya ipasara so branch na saray Tasi nen Jehova tan say 395 ya Local Religious Organization.