Akin et Anggapo Lay Respeto na Totoo ed Arum?

NO AKIN YA IMPORTANTIN RESPETOEN SO ARUM

No walay agpantatalosan, makatulong so respeto ed arum pian napakepa so tensyon tan agla onloor so situasyon.

Ibabaga na Biblia: “Say maulimek ya ebat et pakepaen toy pasnok, balet say ansakit a panagsalita et palooren toy sanok.” (Proverbio 15:1) No agtayo italtalek so arum, aliling to et singa tayo padadalangen so apoy. Tan mabetbet ya aliwliway pansumpalan na ontan.
Imbaga nen Jesus: “No anto so walad puso, satan so ibabalikas na sangi.” (Mateo 12:34) Kanian no aliwan magalang so pitotongtong tayo ed saray dumay estado dad bilay, binalegan, lahi, odino bansa ra, ompan say problema et say pakanengneng tayod sikara.

Diad sakey ya impan-survey ed masulok ya 32,000 ya totoo diad 28 ya bansa, 65 porsiento so angibaga ya anggapo lan talagay galang na maslak ya totoo natan.

NO ANTOY SARAG MON GAWAEN

Balanglan diad eskuelaan odino trabaho, respetom so amin—anggan saramay naiirapan kan pibagayan. Anto ray labay da ya labay mo met? Aratan so nengneng mo. Makatulong itan pian agmo ra balawen odino husgaan.

“Agkayo la manguukom [odino manhuhusga] ta pian agkayo naukom.”—Mateo 7:1.

No antoy labay mon pantrato dad sika, ontan met so pantratom ed sikara. No maomaong tan patas ka, ontan met so ipanengneng dad sika.

“Say labay yon gawaen na totoo ed sikayo, gawa yo met ed sikara.”—Lucas 6:31.

Mamerdona. Mantiwala ka ya aggagagalaen na arum ya pasyodoten ka, kanian palampas mo lay aliwliwan imbaga o ginawa da.

“Say aralem a pakatalos na too so mamakepa ed pasnok to, tan karakpan ed sikato so pamalabas na kasalanan.”—Proverbio 19:11.

Diad loob na Kingdom Hall na Saray Tasi nen Jehova antis na pantitipon. Manbabanoan tan mantotongtong iray totoo ya nandurumay edad tan lahi da.

NO ANTOY GAGAWAEN MI

Rerespetoen na Saray Tasi nen Jehova so amin, balanglan diad lugar da odino diad pantratrabahoan da.

Tutulongan mi ray totoo ya libre dan naaral so Biblia. Pero agmi ipipilit so papanisiaan o opinyon mi. Imbes, uunoren mi so bilin na Biblia ya ipanengneng so “inkaulimek tan aralem a respeto” no itotongtong mi so mensahe na Salita na Dios.—1 Pedro 3:15; 2 Timoteo 2:24.

Anggapoy pipilien mi tan welcome so amin diad saray pantitipon mi. Iimbitaan mi so amin ya malabay ya makaaral ed Biblia. Mansasagpot kamin ‘igalang so amin a klase na totoo,’ anggano mandumaan iray labay mi.—1 Pedro 2:17.

Rerespetoen mi so gobierno. Uunoren mi so batas tan manbabayar kami na buis. (Roma 13:1) Tan anggano neutral kami no nipaakar ed politika, rerespetoen mi so desisyon na arum.