Sakey a Seguradon Ilalo Parad Inaatey

Sakey a mantaon na 25 a marikit so nansulat: “Nen 1981 say anagibin inak so inatey ed kanser. Say impatey to so sankairapan ed siak tan ed tagibin agik a laki. Siak so 17, tan say agik so mantaon na 11. Kail-iliw ko so inak a tuloy. Diad impakabangatan ko a sikato so wala ed tawen, bueno, labay ko so manbitkel pian makapikasakey ak la ed sikato. Sikato so sankaabigan a kaarok.”

Ompapatnag ya agmakatunongan a say patey so walaan na pakayarin manamsam ed sakey a pinabli yo. Tan sano nagawa itan, say kanonotan ya aglan balot nayarin makapitongtong lamet ed sikato, mielekan, odino pakalakap ed inad-arom so sankairapan a sungdoan. Satan ya ot-ot so agnaekal diad pangibaga ed sikan say pinablim so wala ed tawen.

Anggaman ontan, say Biblia so mangiiter na duman tuloy ya ilalo. Unong a naimano tayo la ed akauna, ipapaamta na Kasulatan a posibli so pakapikasakey lamet ed pinabli yo a naandi’d-bilay ed asingger lan arapen, andi, aliwan diad agkabat a tawen noagta dian mismo ed dalin ed silong na mareen, matunong iran kipapasen. Tan diad satan a panaon et saray katooan so nawalaan na ilalon manggayaga ed nagnap a bunigas, tan sikara so aglan balot ompatey lamet. ‘Balet satan so seguradon aliwan realistikon tuloy!’ nayarin ikuan na arum.

Anto so kaukolan a mangumbensi ed sika a saya so sakey a seguradon ilalo? Pian manisia ed sakey ya ilalo, nakaukolan a sikayo so magmaliw a maseguro a samay mangisisipan so namparan mabulos tan makayarin manumpal ed satan. Siopa, sirin, so mangisisipan a saray inatey so nabilay lamet?

Diad primabera na 31 K.P., sipapakpel ya insipan nen Jesus: “Ta onong a say Ama paulien to ’ray inatey tan itdan tora na bilay, ontan to met nia’y Anak mangiter na bilay ed labay to. Ag kayo mankelaw ed saya: ta onsabi horas, ya amin so saray wala ed saray lobok narengel da so voces to.” (Juan 5:21, 28, 29) On, insipan nen Jesu-Kristo a minilyon ya inaatey natan so nabilay lamet ed sayan dalin tan nawalaan na ilalon mansiansian ando lan ando ed satan diad silong na mareen, paraiso iran kipapasen. (Lucas 23:43; Juan 3:16; 17:3; ipareng so Salmo 37:29 tan Mateo 5:5.) Lapud si Jesus so angisipan, maligen so pangipasen a sikato so mabulos a manumpal ed satan. Balet kasin sikato so makayarin manggawa ed satan?

Kulang a duay taon kayari na impangisipan, impanengneng nen Jesus ed makapanyarin paraan a sikato so mabulos tan makayarin manggawa ed pamaoli.

“Lazaro, Paway Ka!”

Saman so makatenyeg ya eksena. Si Lazaro so graben tuloy ed beblay. Saray duaran agagi ton bibii, si Maria tan si Marta, so angipasabi na salita ed si Jesus, a wala ed nibaliw na Ilog Jordan: “Katawan, nia, saman so inararon agmakayari.” (Juan 11:3) Amta ra ya inad-aro nen Jesus si Lazaro. Agta labay nen Jesus a napinengnengan so mansasakit a kaaro to? Ag-iilaloan, imbes a sikato so onlan tampol ed Betania, si Jesus so nampaleen ni ed kawalaan to na duaran agew.​—Juan 11:5, 6.

Si Lazaro so inatey agnambayag kayari na impangipasabi ed mensahe nipaakar ed pansasakit to. Amta nen Jesus no kapigan so impatey nen Lazaro, tan gagala ton gawaen so bengatlan nipaakar ed satan. Diad panaon na insabi nen Jesus ed Betania, say pinabli ton kaaro so inatey la ed loob na apatiran agew. (Juan 11:17, 39) Kasin nayarian nen Jesus a papawilen ed bilay so sakey ya inatey la ed ontanlan kabayag?

Diad impakadngel a si Jesus so onsasabi, si Marta, sakey a bii na kiwas, so binmatik a mangabet ed sikato. (Ipareng so Lucas 10:38-42.) Atenyeg ed kaermenan to, impaseguro nen Jesus ed sikato: “Si agim onoli ed bilay.” Sanen impatnag to so pananisia to ed arapen a kikioli, mabitar ya imbaga nen Jesus ed sikato: “Siak so kiolian, tan say bilay: say manisia ed siak, angan inatey la nabilay ni.”​—Juan 11:20-25.

Sanen akasabi ed lubok, ingganggan nen Jesus ya ekalen so baton insara ed wangalan. Insan, kayari na impanpikasi ton maksil, ingganggan to: “Lazaro, paway ka!”​—Juan 11:38-43.

Niyapasakey so imano na amin a presenti ed lubok. Insan, nanlapud kabilungetan, sakey ya uhas so pinmatnag. Saray sali tan lima to so abalkot, tan say lupa to so abalkot na kawes. “Okbaran yo, tan paulyan yo,” so inggangan nen Jesus. Naukbar so unor a bariber. On, sikato si Lazaro, say toon inatey ed loob na apatiran agew!​—Juan 11:44.

Kasin Saman So Peteg ya Agawa?

Say salaysay na impamaoli ed si Lazaro so niprepresenta ed Ebanghelyo nen Juan bilang maawaran a katuaan. Saray detalye so mabitar a tuloy ed pangipasen a satan so kunkunwari lambengat. Say panuppiat ed inkamaawaran to so panuppiat ed amin na saray milagro ed Biblia, a pati say inkioli nen Jesus a mismo. Tan say pangiburi ed inkioli nen Jesus so pangiburi ed Kristianon pananisia bilang interamenti.​—1 Corinto 15:13-15.

Diad tua, no awaten yo so kiwawala na Dios, anggapo komon so problema yo diad pangagamil na pananisia ed kikioli. Diad pangiyilustra: Nayarian na sakey a toon i-videotape so panamatanir tan testamento to, tan kayari na ipatey to et sikato so nayarian a nanengneng tan narengel na saray kakanayon tan kakaaro to, ed epekto, legan ya ibinsabinsa to no panon so panguksoy ed saray kayarian to. Diad apalabas a sanlasus a taon, say ontan a bengatla so agnaisip. Tan diad arum a totoo natan a manaayam ed sankasulinekan a pasen na mundo, say “milagro” na panag-rekord ed video so agnarandan na nonot. No saray sientipikon prinsipyon inletneg na Manamalsa so nayarian ya usaren na totoo diad panggawa ed ontan a nanengneng tan narengel ya eksena, agta nayarian na Manamalsa so manggawa na mas nagkalalo ni? Agta makatunongan, sirin, a say Sakey ya amalsa ed bilay so makayarin mamalsa lamet ed satan?

Say milagro na inkipawil nen Lazaro ed bilay so manserbin mamabiskeg na pananisia ed si Jesus tan diad kioli. (Juan 11:41, 42; 12:9-11, 17-19) Diad makatenyeg a paraan, imparungtal to met so inkamabulos tan pilalek nen Jehova tan say Anak to a manggawa ed panamaoli.

‘Say Dios so Walaan na Pankaliktan’

Say kiwas nen Jesus ed impatey nen Lazaro so mangiparungtal na sankamatamoyan iran liknaan na Anak na Dios. Saray aralem a liknaan to ed sayan inkagawa so malinlinew a mangipapatnag na mabiskeg a pilalek to a mamaoli ed saray inaatey. Nabasa tayo: “Si Maria ed satan, sanen akasabi ed kawalaan nen Jesus, tan sikato’y anengneng to, dinmakmomo ed saray sali to, a kuan to ed sikato, Katawan, no wadia ka komon, say agik ag inatey. Kanian nen anengneng nen Jesus a sikato so mannangis, tan saray Judios met ya akila ed sikato a mannangis, nan-ingel si Jesus ed espiritu tan agonigon, Tan inkuan to, Ined so anginan yo ed sikato? Sikara kuan da ed sikato, Katawan, gala tan nengneng mo, Si Jesus nanangis. Kanian saray Judios inkuan da, Nengneng yo, agay la so inpangararo to ed sikato!”​—Juan 11:32-36.

Say impapuson panangabagey nen Jesus so impanengneng dia na taloran balikas: “nanagugol,” “agonigon,” tan “nannangis.” Say original-a-lenguahen salitan inusar diad impangikurit ed sayan makatenyeg ya eksena so mangipanengneng a si Jesus so apakiwas a tuloy diad impatey na pinabli ton kaaro a si Lazaro tan diad impakanengneng ed pannangis na agagin bibii nen Lazaro a saray mata To so akalua.a

Say makatantandan tuloy et si Jesus so akauna lan amaoli ed duaran arum. Tan diad sayan inkagawa et sigpot a ginetma ton gawaen met so ontan ed si Lazaro. (Juan 11:11, 23, 25) Ingen sikato so “nannangis.” Say pangipawil ed totoo diad bilay, sirin, so aliwan basta oksuyan a para ed si Jesus. Saray matamoy ya aralem a liknaan to a singa nipatnag ed sayan inkagawa so mabitabitar ya angipanengneng na mabiskeg a pilalek ton mamaandi ed saray deral na patey.

Lapud si Jesus so ‘nagnap a talintao nen Jehova a Dios,’ manepenepeg a nailaloan tayo met so ontan ed mangatatawen ya Ama tayo. (Hebreos 1:3, NW) Diad dilin inkamabulos nen Jehova a manggawa ed panamaoli, inkuan nen matoor a toon si Job: “No say sakey a too ompatey, ombilay ta lamet? . . . Ontawag ka, et onebatak ed sika: manpilalek ka ed gawa na saray limam.” (Job 14:14, 15) Say orihinal-a-lenguahen salitan impatalos a “manpilalek ka” so mangituturo na magunaet a pampilalek tan pampirawat. (Genesis 31:30; Salmo 84:2) Malinew, si Jehova so peteg a manatalaran ed kikioli.

Kasin peteg a napanisiaan tayo so sipan ed kikioli? Bueno, anggapoy duaruwan si Jehova tan say Anak to so parehon mabulos tan makayarin manumpal ed satan. Anto so kabaliksan na saya ed sika? Sika so walaan na ilalo diad kikasakey lamet ed saray inararon andi-la’d-bilay dian mismo ed dalin balet ed leksab na nikaduman tuloy iran kipapasen!

Si Jehova a Dios, ya angigapo na katooan ed sakey a marakep a tanamanan, so mangisisipan a mangipawil ed Paraiso ed sayan dalin ed silong na uley na mangatatawen a Panarian To ed lima na nigloria lan Jesu-Kristo. (Genesis 2:7-9; Mateo 6:10; Lucas 23:42, 43) Diad satan a nipawil a Paraiso, say atooan a pamilya so nawalaan na ilalon panggayagaan so bilay ya andi-anggaan, bulos manlapud amin a sakit tan patey. (Apocalipsis 21:1-4; ipareng so Job 33:25; Isaias 35:5-7.) Naandi, met la, so amin a gulaan, panangidumaduma ed rasa, panlalaban na tribo, tan kairapan ed ekonomiya. Satan so mansumpal ed sakey ya alinisan a dalin a si Jehova a Dios diad panamegley nen Jesu-Kristo so mamaoli ed inaatey.

Satan so ilalo natan na Kristianon biin asalambit ed gapo na sayan seksion. Pigaran taon kayari na impatey na ina to, saray Tasi nen Jehova so tinmulong ed sikato diad maalwar a panagaral ed Biblia. Nanonotan to: “Kayari na impakaaral ko ed ilalo na kioli, siak so akanangis. Makapakelaw so pakaamta a nanengneng ko lamet si inak.”

No say pusom so miulibay a manpirawat a makanengneng lamet ed inad-arom, saray Tasi nen Jehova so malikeliket ya ontulong ed sika a manaral ed no panon a nakayarian iyan maseguron ilalo.