Pigaran Tasi nen Jehova so kabat mo? Nayarin wala ray kaabay, katrabaho, odino kaklasem ya Tasi. Odino wala lay Tasi ya akitongtong ed sika nipaakar ed Biblia. Siopa kamin talaga, tan akin et ipapaamta mid arum iray papanisiaan mi?

Ordinaryo kamin totoo. Nanduruma so nanlapuan tan kipapasen na bilay mi. Wala ray arum ed sikami ya datin duma so relihyon da, tan say arum et datin agmanisia ed Dios. Balet antis kamin nagmaliw ya Tasi, impanaon mi ya aralen ya maong no antoy ibabangat na Biblia. (Gawa 17:11) Akombinse kami ya tua iray naaralan mi, insan kami nandesisyon ya mandayew ed si Jehova a Dios.

Maabig so epekto ed sikami na panaaral mi Biblia. Wala met iray dadalanen min problema tan lalabanan min kakapuyan. Balet lapud gagawaen mi anggaay nayarian min iyaplika iray prinsipyo na Biblia diad inagew-agew, dakel so marakep ya angumanan na bilay mi. (Salmo 128:​1, 2) Sakey itan a rason no akin ya ipapaamta mi ed arum iray nanaaralan mi ed Biblia.

Manbibilay kami base ed prinsipyo na Dios. Sarayan prinsipyo ya ibabangat na Biblia et makatulong pian magmaliw a maliket so bilay mi tan nipanengneng mi respeto, inkamatua, tan kaabigan ed arum. Baleg so nagawaan na saratan pian magmaliw kamin maong tan responsablin too, tan ontulong met iratan ed pankakasakey tan moralidad na pamilya mi. Lapud kombinsido kami ya “anggapoy lalabien na Dios,” kabiangan kami na espiritual ya pamilya ed interon mundo tan anggapoy papaboran min lahi tan agkami mibibiang ed politika. Anggano bilang indibidual et ordinaryo kami, nikadkaduma so organisasyon ya kawalaan mi.​—Gawa 4:13; 10:​34, 35.

• Antoy piparaan na saray Tasi nen Jehova ed arum a totoo?

• Anto ran prinsipyo so iyaaplika na saray Tasi lapud panaaral day Biblia?

Iisipen na dakel a totoo a say ngaran ya Tasi nen Jehova et tawag ed sakey a balon relihyon. Balet diad tua, saray lingkor na saksakey a tuan Dios et adeskribe bilang ‘saray tasi’ to masulok ya 2,700 taon lay apalabas. (Isaias 43:10-12) Antis na 1931 et kabkabat kami bilang Saray Estudyante na Biblia. Akin et Tasi nen Jehova la natan so tawag ed sikami?

Ipapaamta na satan no siopa so Dios mi. Base ed saray kadaanan ya manuskrito, say ngaran na Dios ya Jehova et pigan libon beses ya nisulat diad Biblia. Diad dakel a patalos na Biblia, sayan ngaran et sinalatan na saray titulo, a singa say Katawan o Dios. Balet, impakabat na tuan Dios ed si Moises a say personal ya ngaran To et Jehova, ya oniay imbaga To: “Saya so ngaran ko ed andi-anggaan.” (Exodo 3:15) Diad saya et impanengneng ton sikatoy duma ed amin a palson dios. Malikeliket kamin natawag ed masanton ngaran na Dios.

Dedeskribien na satan so misyon mi. Nensaman ni manlapu lad panaon na matunong a toon si Abel, impanengneng la na dakel a totoo so pananisia rad si Jehova. Sikaray tinawag ya “baleg a grupo na saray tasi,” tan kaibad satan si Noe, Abraham, Sara, Moises, David, tan arum ni. (Hebreo 11:4–12:⁠1) No panon a diad korte et nayarin mantestigo so sakey a tasi pian pruebaan ya inosente so sakey a too, determinado kami met ya ipaamta so katuaan nipaakar ed Dios mi.

Aaligen mi si Jesus. Sikatoy tinawag na Biblia ya “say matoor tan tuan tasi.” (Apocalipsis 3:14) Imbagan mismo nen Jesus ya ‘impakabat toy ngaran na Dios’ tan ‘tinasian toy katuaan’ nipaakar ed Dios. (Juan 17:26; 18:37) Kaukolan sirin ya usaren tan ipaamta na saray tuan papatumbok nen Kristo so ngaran nen Jehova. Gagawaen na Saray Tasi nen Jehova so anggaay nayarian da ya sumpalen itan.

• Akin ya nandesisyon iray Estudyante na Biblia ya tawagen ira ya Tasi nen Jehova?

• Kapigan ni ya wala ray mantatasi ed si Jehova diad dalin?

• Siopa so sankaabigan ya Tasi nen Jehova?

Impasakbay na Biblia a kayari ipatey nen Kristo, wala ray onlesan palson managbangat ed limog na saray inmuunan Kristiano tan pikeweten da so katuaan a walad Biblia. (Gawa 20:​29, 30) Tan talagan agawa itan. Saray bangat nen Jesus et nilaokan day pagano iran bangat, kanian ginmapo so palson Inkakristiano. (2 Timoteo 4:​3, 4) Panon tayon naseguro ya duga so pakatalos tayo ed no anto so peteg ya ibabangat na Biblia?

Sinmabi so panaon ya impaamta nen Jehova so katuaan. Impasakbay to ya diad ‘panaon na anggaan, ondakel so tuan kakabatan.’ (Daniel 12:⁠4) Nen 1870, walay melag a grupo ya manaanap na katuaan tan adiskobre dan aliwan base ed Biblia so dakel ya doktrina na simbaan. Kanian ginapoan day nan-research pian natalosan da no anton talaga so ibabangat na Biblia, tan tinulongan ira nen Jehova ya natalosan itan.

Maalwar ya inaral na pigaran lalaki so Biblia. Tutumboken mi ni anggad natan so paraan na impanaral na saraman a makukuli ya Estudyante na Biblia (datin tawag ed Saray Tasi nen Jehova). Sansakey dan inaral so tema na Biblia. No wala ray bersikulo na Biblia a mairap ya talosan, mananap iray arum a bersikulo pian nalinewan itan. No atalosan da la, tan anengneng da lay koneksion na sarayan bersikulo ed interon Biblia, isulat da itan. Inabuloyan da ya say mismon Biblia so mangipaliwawa ed sarili to kanian adiskobre da lamet so katuaan nipaakar ed ngaran na Dios tan say Panarian to, say gagala to parad totoo tan sayan dalin, say kipapasen na inaatey, tan say ilalon kioli. Lapud impan-research da, nibulos irad amayamay ya palson bangat tan kustombre.​—Juan 8:​31, 32.

Kasabi 1879, atalosan na Saray Estudyante na Biblia ya asabi lay panaon pian ipakabat ed amin so katuaan. Kanian diad satan a taon, ginapoan dan im-publish so magasin ya Say Panag-bantayan Mangipapalapag na Panarian nen Jehova, ya anggad natan et tuloytuloy mi nin ipa-publish. Diad sayan panaon, ipapaamta mi so katuaan na Biblia diad 240 ya bansa tan ed masulok ya 950 a lenguahe. Natan labat nagagawa so onian kalaknab ya panangipulong ed katuaan!

• Kayari impatey nen Kristo, antoy agawa ed katuaan a walad Biblia?

• Panon min adiskobre lamet so katuaan a walad Salita na Dios?

Diad pigaran dekada, angusar, angimprinta, tan angibunog iray Tasi nen Jehova na nanduruman bersion na Biblia. Balet, naisip min kaukolan so balon patalos a mas epektibon ontulong ed saray totoo ya naaralan so “suston kakabatan ed katuaan,” ta satan so linawa na Dios parad amin. (1 Timoteo 2:​3, 4) Kanian nen 1950, inggapo min in-release so parte na Biblia ya inusaran na modernon lenguahe, say English ya Balon Mundo a Patalos. Sayan Biblia et maalwar tan susto ya impatalos diad masulok ya 160 a lenguahe.

Kaukolan so Biblia ya mainomay a talosan. Diad ilalabas na panaon, manguuman iray lenguahe, tan dakel a patalos ed Biblia so angusar na aliwan malinew odino daan iran salita kanian mairap a talosan. Ontan met, wala ray nadidiskobrin kadaanan iran manuskrito ya mas susto tan mas asingger ed saramay orihinal, kanian mas natatalosan la so Hebreo, Aramaiko, tan Griegon lenguahe ya inusar ed impangisulat na Biblia.

Kaukolan so patalos ya matoor ed salita na Dios. Imbes ya umanen, aruman, odino salatan na saray managpatalos na Biblia iray pinuyanan na Dios ya sulsulat, kaukolan ya matoor ira ed orihinal. Balet diad dakel a bersion, ag-inusar ed Masanton Kasulatan so ngaran na Dios ya Jehova.

Kaukolan so Biblia ya mangiter na dayew ed Autor to. (2 Samuel 23:⁠2) Diad Balon Mundo a Patalos, impawil so ngaran ya Jehova diad manga 7,000 ya beses ya kawalaan to base ed sankadaanan iran manuskrito na Biblia, a singa nanengneng ed litrato dia. (Salmo 83:18) Sayan Biblia et resulta na pigay taon a maalwar ya impan-research, kanian balibali iyan basaen lapud malinew ton nipasabi so kanonotan na Dios. Maabig no iyugalim ya basaen so Salita nen Jehova kada agew, diad Balon Mundo a Patalos odino arum nin patalos na Biblia.​—Josue 1:8; Salmo 1:​2, 3.

• Akin ya nandesisyon kami ya kaukolan so balon patalos na Biblia?

• Antoy maabig ya iyugali tayo diad inagew-agew no labay tayon amtaen so linawa na Dios?