Anggapoy suesueldoan min klero diad organisasyon mi. Imbes, singa nen ginmapoy Kristianon kongregasyon, wala ray tuturoen ya kualipikadon manangasikaso ya ‘manpastol ed kongregasyon na Dios.’ (Gawa 20:28) Sarayan elder et maespiritual a lalaki ya mangidadaulo tan manpapastol ed kongregasyon, ‘ya agnapapasootan, noagta mabulos dan gagawaen itan diad arapan na Dios; aliwan lapud panangaro ed agmanepeg a nabang, noagta lapud labalabay dan gawaen itan.’ (1 Pedro 5:​1-3) Anto ray gagawaen da parad sikami?

Aasikasoen tan proprotektaan da kami. Saray elder so mangigigiya tan ontutulong pian naprotektaan ed espiritual so kongregasyon. Amta da ya inmatalek na Dios ed sikara iyan importantin responsabilidad, kanian ag-ira pakakatawan, noagta mansasagpot ira pian nagunggonaan tan manliket kami. (2 Corinto 1:24) Singa sakey ya pastol a maseet ya mangaasikaso ed kada karnero to, gagawaen na saray elder so anggaay nayarian da ya kabaten so kada membro na kongregasyon.​—⁠Proverbio 27:⁠23.

Ibabangat da kami no panon min nagawaan so linawa na Dios. Idadaulo na saray elder iray sinimban aral ed kongregasyon pian ombiskeg so pananisia mi. (Gawa 15:32) Idadaulo met na sarayan matoor a lalaki so panagpulong, ya mikikimey irad sikami tan ipapasal da kamid amin a klase na ministeryo.

Personal da kamin papasesegen. Pian natulongan na saray elder so balang sakey ed sikami ya onapit ed si Jehova, bibisitaen da kamid abung mi tan mitotongtong irad sikami diad Kingdom Hall pian natulongan tan naligliwa kami panamegley na Kasulatan.​—⁠Santiago 5:​14, 15.

Nilikud ed saray kimey dad kongregasyon, maslak ed saray elder et walay anapan da tan responsabilidad ed pamilya ya kaukolan da met ya ipanaon tan ikday imano. Sarayan makukulin agagi et kanepegan day respeto mi.​—⁠1 Tesalonica 5:​12, 13.

• Antoy responsabilidad na saray elder ed kongregasyon?

• Panon ya ipapanengneng na saray elder so panangiyansakit ed balang sakey ed sikami?

Unong ed Biblia, walay duaran grupo na Kristianon lalaki ya manggagawad saray responsabilidad ed kongregasyon​—⁠“saray manangasikaso tan saray ministeryal a lingkor.” (Filipos 1:⁠1) Kaslakan et walay pigaran elder tan ministeryal a lingkor ed kada kongregasyon. Anto ray gagawaen na saray ministeryal a lingkor parad pankaabigan mi?

Ontutulong irad saray elder. Saray ministeryal a lingkor et maespiritual, nailaloan, tan makukulin lalaki. Wala ray kalangweran ni, tan say arum et maedad la. Mitutulongan irad saray kimey ed kongregasyon tan ed Kingdom Hall. Lapud satan et makakapanpokus iray elder ed responsabilidad dan manbangat tan manpastol.

Ontutulong irad kongregasyon. Say arum ya ministeryal a lingkor et iyaasain ya attendant a man-welcome ed saray miaral. Say arum et niyasain ed pangasikaso na sound, account na kongregasyon, pangiter na saray literatura, tan pangiyasain na teritoryan pampulongan. Ontutulong met irad panmintina na Kingdom Hall. Nayarin kerewen met ed sikara na saray elder ya ontulong ed saray maedad la. Antokaman so niiter ya responsabilidad ed saray ministeryal a lingkor et mabulos dan gagawaen kanian rerespetoen mi ra.​—⁠1 Timoteo 3:⁠13.

Mangipapanengneng ira na maabig ya alimbawa. Pipilien iray ministeryal a lingkor base ed saray maabig ya espiritual a kualidad da. Sano walay parte dad aral, napapabiskeg day pananisia mi. Sano idadaulo day panagpulong, napapaseseg da kami. Lapud mikokoopera irad saray elder, ontutulong itan pian maliket tan nankakasakey so kongregasyon. (Efeso 4:16) Diad ilabas na panaon, nayarin kualipikado met la ran manlingkor bilang elder.

• Anto ray kualidad na saray ministeryal a lingkor?

• Anto ray gagawaen da pian organisado so kongregasyon?

Aminpiga ya abitla ed Kristianon Griegon Kasulatan si Bernabe tan apostol Pablo. Nanlingkor ira bilang ombiabiahen manangasikaso tan binmisita irad saray kongregasyon nensaman. Akin? Lapud sankanonot day pankaabigan na saray kaagian da. Imbaga nen Pablo ya labay toy ‘ompawil tan bisitaen iray agagi’ pian nanengneng to no antoy kipapasen da. Nambiahe na nilasus ya kilometro pian labat nabisita tan napabiskeg to ra. (Gawa 15:36) Ontan met so gagala na saray ombiabiahen manangasikaso mi natan.

Ombibisita ira pian pasesegen kami. Kada manangasikaso na sirkito et ombibisita ed manga 20 ya kongregasyon, sakey simba ed kada kongregasyon, mamidua ed sakey taon. Dakel so nanaaralan mi ed eksperiensya na sarayan brother tan ontan met ed asawa ra, no wala. Labalabay dan nakabat iray kabataan tan maedad, tan malikeliket da kamin iibaan ed panagpulong tan diad saray iyaaralan mi. Iibaan na manangasikaso na sirkito iray elder diad pan-shepherding da, tan mangiiter iray makapaseseg a paliwawa diad saray aral tan asemblea pian ombiskeg kami ed espiritual.​—⁠Gawa 15:⁠35.

Iyaansakit da kamin amin. Interesadon maong iray manangasikaso na sirkito ed espiritualidad na saray kongregasyon. Mimimiting irad saray elder tan ministeryal a lingkor pian amtaen so inaligwasan na kongregasyon tan mangiiter iray praktikal ya suhestion no panon dan nagawaan iray responsabilidad da. Tutulongan da ray payunir ya magmaliw a mas epektibo ed ministeryo, tan labalabay dan kabaten iray balo ed kongregasyon tan amtaen so iyaaligwas dad espiritual. Mabulbulos ya uusaren na sarayan manangasikaso so panaon tan biskeg da bilang ‘kakimeyan parad pankaabigan mi.’ (2 Corinto 8:23) Aligen tayo so pananisia tan debosyon dad Dios.​—⁠Hebreo 13:⁠7.

• Akin ya ombibisitad kongregasyon iray manangasikaso na sirkito?

• Panon kan nagunggonaan ed ibisita ra?

No walay kalamidad tan trahedya, onaaksion ya tampol iray Tasi nen Jehova pian tulongan iray apektadon kaagian da. Paneknek itan ya talagan inaro mi sakey tan sakey. (Juan 13:​34, 35; 1 Juan 3:​17, 18) Panon kamin ontutulong?

Mandodonasyon kami na kuarta. Nen walay graben eras ed Judea nensaman, angipawit na pinansyal a tulong iray Kristiano ed Antioquia pian tulongan iray kaagian da. (Gawa 11:​27-30) Ontan met natan, no nakabatan min maniirap iray agagi mid arum ya lugar, mangipapawit na donasyon so kada kongregasyon pian makatulong ed pankaukolan da.​—⁠2 Corinto 8:​13-15.

Mangiiter kami na praktikal a tulong. Onkikiwas a tampol iray elder ed lugar ya akagawaan na kalamidad pian amtaen so kipapasen na kada membro na kongregasyon tan seguroen ya ligtas ira. Nayarin walay relief committee a mangidaulo pian nitaryay naakan, danum ya inumen, kawes, panayaman, tan medikal a tulong. Dakel ya Tasi so boluntaryon oonla diad sarili dan gastos pian ontulong ed saray apektado odino mangapiger ed saray aderal ya kaabungan tan Kingdom Hall. Lapud walay pankakasakey na organisasyon mi tan naynay kamin mantutulongan ed anggan anton kimey, sarag mi onaksion a tampol. Tutulongan mi ray kapananisiaan mi, balet ta no posible et tutulongan mi met so arum, anggan antoy relihyon da.​—Galacia 6:⁠10.

Mangiiter kami na espiritual tan emosyonal a tulong. Kakkaukolan na saray biktima na kalamidad so naligliwa. Diad ontan iran situasyon, si Jehova, “say Dios na amin a ligliwa,” so pangaalaan mi na biskeg mi. (2 Corinto 1:​3, 4) Ipapaamta mid saray naapektoan iray sipan na Biblia, tan say panamaseguro ya asingger lan panganggaen na Panarian na Dios so amin ya kalamidad tan trahedya ya panlalapuay ermen tan irap.​—⁠Apocalipsis 21:⁠4.

• Akin et sarag na saray Tasi so onaksion a tampol no walay kalamidad tan trahedya?

• Anton espiritual ya ligliwa so ipapaamta mid saray naapektoan na kalamidad?

Antis ya inatey si Jesus, kinatongtong toy apatira ed saray disipulo to ya siksikara labat​—⁠di Pedro, Santiago, Juan, tan Andres. Legan ya ibabaga nen Jesus so tanda na kiwawala to diad kaunoran iran agew, walay importantin intepet to: “Siopan talaga so matoor tan makabat ya aripen a tinuro na katawan to a mangasikaso ed saray lingkor na sankaabungan to, pian mangitarya ed sikara na naakan da diad dugan panaon?” (Mateo 24:​3, 45; Marcos 13:​3, 4) Pinaseguroan nen Jesus iray disipulo to ya bilang “katawan” da, sikato so manuro ed saramay mangitarya na tuloytuloy a suplay na espiritual ya naakan parad saray patumbok to diad panaon na anggaan. Siopa iyan aripen?

Melag iyan grupo na alanaan a papatumbok nen Jesus. Sayan “aripen” et say Mananguley ya Ulop na Saray Tasi nen Jehova. Itatarya na sayan “aripen” so nipanpanaon ya espiritual a naakan parad saray kapara dan mandadayew ed si Jehova. Akadepende kami ed sayan matoor ya aripen a mantultuloy ya mangitarya ed sikami na “saray naakan diad dugan panaon.”​—⁠Lucas 12:⁠42.

Saya so manangasikaso ed sankaabungan na Dios. (1 Timoteo 3:15) Inter nen Jesus ed aripen so ambelat a responsabilidad ya mangasikaso ed kimey na organisasyon nen Jehova diad dalin​—⁠say pangasikaso ed saray materyal a kayarian na organisasyon to, pangorganisa ed panagpulong a kimey, tan pambangat ed sikami panamegley na saray kongregasyon. Kanian, pian nitarya iray pankaukolan mi diad dugan panaon, mangipaparaan so “matoor tan makabat ya aripen” na espiritual a naakan panamegley na saray publikasyon ya uusaren mid ministeryo mi, ontan met ed saray aaralen mid Kingdom Hall tan asemblea mi.

Say aripen et matoor ed katuaan ya walad Biblia tan ed responsabilidad ton ipulong so maong a balita, tan sikatoy makabat ed pangaasikaso tod saray kayarian nen Kristo diad dalin. (Gawa 10:42) Talagan bebendisyonan nen Jehova so kimey na sayan aripen lapud ondarakel so totoo tod dalin tan dakel so itatarya ton espiritual a probisyon.​—⁠Isaias 60:22; 65:⁠13.

• Siopa so tinuro nen Jesus ya mangitaryay espiritual a naakan na saray disipulo to?

• Akin et nibagan matoor tan makabat iyan aripen?

Nen inmunan siglo, walay melag a grupo na “saray apostol tan mamatatken ed Jerusalem” a nanlingkor bilang mananguley ya ulop pian manggawa na saray importantin desisyon parad pankaabigan na saray nilanaan ya Kristianon kongregasyon. (Gawa 15:⁠2) Saray desisyon da et nankakasakeyan da base ed ibabaga na Kasulatan tan panangigiya na espiritu na Dios. (Gawa 15:25) Ontan met so gagawaen na Mananguley ya Ulop natan.

Uusaren na Dios pian gawaey linawa to. Saray alanaan ya brother a manlilingkor bilang membro na Mananguley ya Ulop et aaralen dan maong so Salita na Dios tan dakel lay eksperiensya dad panangasikaso ed praktikal tan espiritual iran bengatla. Sinimba iran manmimiting pian pantongtongan so pankaukolan na saray agagi da ed interon mundo. Singa nen inmunan siglo, mangiiter ira na saray instruksion ya nibase ed Biblia, nayarin panamegley na sulat odino saray ombiabiahen manangasikaso tan arum ni. Lapud satan et walay pankakasakey na saray totoo na Dios diad panagnonot tan gagawaen da. (Gawa 16:​4, 5) Aasikasoen na Mananguley ya Ulop so pangitarya na espiritual a naakan, ipapaseseg day kimey a panagpulong, tan aasikasoen day panuro na saray brother parad saray responsabilidad ed kongregasyon.

Manpapaigiya ed espiritu na Dios. Say Mananguley ya Ulop et akadepende ed panangigiya na Soberano na Uniberso, si Jehova, tan ed Ulo na kongregasyon, si Jesus. (1 Corinto 11:3; Efeso 5:23) Ag-iisipen na saray membro na Mananguley ya Ulop ya sikara so lider na saray totoo na Dios. Sikara tan say amin ya alanaan a Kristiano et ‘tuloytuloy ya ontutumbok ed Kordero [si Jesus] anggan iner so laen to.’ (Apocalipsis 14:⁠4) Aapresyaen a maong na Mananguley ya Ulop no ipipikasi tayo ra.

• Siopa so mananguley ya ulop nen inmunan siglo?

• Panon ya manpapaigiya ed Dios so Mananguley ya Ulop natan?

Say Bethel et Hebreon termino a say labay ton ibaga et “Abung na Dios.” (Genesis 28:​17, 19, paimanod leksab) Dugaruga itan ya tawag ed saray pasilidad na Saray Tasi nen Jehova ed interon mundo ya uusaren pian naasikaso tan naorganisa so kimey a panagpulong. Say Mananguley ya Ulop et walad world headquarters diad New York, U.⁠S.⁠A., tan aasikasoen day kimey na saray branch office ed nanduruman bansa. Bilang grupo, say tawag ed saramay manlilingkor ed sarayan pasilidad et pamilyan Bethel. Singa ra pamilya a manaayam, mankikimey, mamangan, tan manaaral na Biblia ya sankakaiba tan walay pankakasakey da.​—⁠Salmo 133:⁠1.

Nikaduma iyan pasen a saray membro na pamilya et mabulos ya mankikimey. Diad amin a Bethel et wadtan iray Kristianon lalaki tan bibii ya impapuson manggagawa na linawa na Dios tan sigpot a manlilingkor parad Panarian. (Mateo 6:33) Anggapoy sueldo ra, balet walay imparaan a kuarto tan panangan da tan allowance parad personal iran gastos da. Walay niyasain a kimey na amin a walad Bethel, nayarin diad opisina, kusina, odino diad pananganan. Say arum et walad panag-imprintaan, manlilinis, manpepesak, manaapiger, odino arum nin kimey.

Saray kimey ditan et onsusuporta ed panangipulong na Panarian. Say manunan rason no akin ya walay Bethel et pian nipaamta so katuaan ed Biblia diad dakel a totoo anggad posible. Say sakey ya alimbawa na satan et sayan brosyur. Insulat iya diad panangasikaso na Mananguley ya Ulop, impawit so elektronikon kopya diad nilasus ya grupo na saray managpatalos ed interon mundo, inimprinta ed maples iran makina ya walad pigaran Bethel, tan impawit ed masulok ya 120,000 a kongregasyon. Amin ya gagawaen na pamilyan Bethel et onsusuporta ed sankaimportantian ya kimey​—⁠say pangipulong ed maong a balita.​—⁠Marcos 13:⁠10.

• Siopa ray manlilingkor ed Bethel, tan panon ya aasikasoen so pankaukolan da?

• Anton importantin kimey so susuportaan na amin a gagawaen ed Bethel?

Saray membro na pamilyan Bethel et mankikimey irad nanduruman departamento pian suportaan so panagpulong ed sakey o pigaran bansa. Nayarin mankikimey irad translation, panag-imprintaan na magasin, bindery na libro, bodega na literatura, produksion na audio/​video, odino mangaasikaso ed arum nin kimey diad teritorya ya walad sakop da.

Walay Branch Committee a mangaasikaso ed saray kimey. Diad kada branch office et walay Branch Committee ya tugyopen na taloran kualipikadon elder odino onsulok ni, tan inmatalek ed sikara na Mananguley ya Ulop iray kimey ditan. Ipapaamta na sayan committee ed Mananguley ya Ulop iray iyaaligwas na kimey ed bansa ya sakop da ontan met ed saray problema ya nayarin onlesa. Makatulong iratan ya report ed Mananguley ya Ulop diad pandesisyon da no anto ran topic so nepeg ya pantongtongan ed saray publikasyon, aral, tan asemblea. Saray representative na Mananguley ya Ulop et regular ya ombibisita ed saray branch tan mangiiter iray instruksion ed saray Branch Committee diad pangaasikaso dad responsabilidad da. (Proverbio 11:14) Walay espisyal ya programa tan manpaliwawa so representative na headquarters pian napaseseg iray walad teritoryan sakop na branch ya bibisitaen to.

Susuportaan iray kimey ed kongregasyon. Aaprobaan ed branch office so pakaporma na saray balon kongregasyon. Aasikasoen met ditan so kimey na saray payunir, misionero, tan manangasikaso na sirkito a manlilingkor ed teritorya na branch. Ditan oorganisaen iray asemblea tan kombension, pati say panagpaalagey na saray balon Kingdom Hall, tan pangipawit ed saray kongregasyon na literaturan kaukolan da. Amin ya gagawaen diad branch office et ontutulong pian mauksoy ya nasumpal so panagpulong a kimey.​—⁠1 Corinto 14:​33, 40.

• Panon ya ontutulong iray Branch Committee ed Mananguley ya Ulop?

• Anto ran kimey so gagawaen ed branch office?

Pian nipulong mi so “maong a balita” ed “kada nasyon tan tribu tan lenguahe tan rasa,” mangipa-publish kami literatura ed masulok ya 950 a lenguahe. (Apocalipsis 14:⁠6) Panon min nagagawaan iyan mairap a kimey? Nagagawaan mi iya diad tulong na saray managsulat na artikulo ed interon mundo tan saray grupo na makukulin managpatalos​—⁠amin et Tasi nen Jehova.

Isusulat so artikulo diad English. Say Mananguley ya Ulop so mangaasikaso ed kimey na Writing Department diad world headquarters mi. Sayan departamento so mangiyuuksoy ed kimey na saray managsulat na artikulo diad headquarters tan diad pigaran branch office. Lapud nanduruman bansa so kawalaan na saray managsulat, saray publikasyon mi et ombagay ed nanduruman totoo anggan antoy lahi o kultura da.

Ipapawit so file ed saray managpatalos. No na-edit tan naaprobaan lay artikulo, ipawit so file ed saray grupo na managpatalos diad interon mundo, ya mangipatalos, manrebyu, tan mannengneng no walay lingo ed patalos da. Pansasagpotan day mangusar na ‘saray suston salita na katuaan’ pian say eksakton kabaliksan na samay akasulat ed English et nipasabi dad lenguahe ra.​—⁠Eclesiastes 12:​10.

Manguusar kami na computer pian maples so kimey. Anggano walay computer, kaukolan nin siansia iray totoon managsulat tan managpatalos. Balet, ompepeles so kimey da diad tulong na saray walad computer ya diksionaryo, program ya uusaren na saray managpatalos, tan saray uusaren ed panag-research. Nandesinyo iray Tasi nen Jehova na Multilanguage Electronic Publishing System (MEPS) tan ditan iloloob iray artikulo ya nipatalos ed nilasus a lenguahe, ikakarga iray litrato, tan ipaparaan parad pangimprinta.

Akin et pansasagpotan min gawaen iraya, anggan diad saray lenguahe ya pigan libo labat so mansasalita? Lapud linawa nen Jehova ya “niliktar so amin a klase na totoo tan nawalaan ira na suston kakabatan ed katuaan.”​—⁠1 Timoteo 2:​3, 4.

• Panon ya isusulat iray publikasyon mi?

• Akin et ipapatalos mi ed dakel ya lenguahe iray literatura mi?

Say organisasyon mi et mangipa-publish tan mangibubunog na minilyon ya Biblia tan arum nin publikasyon kada taon ya anggapoy bayar. Mangipapaalagey tan manmimintina kami na saray Kingdom Hall tan branch office. Susuportaan mi met iray nilibon Bethelite tan misionero, tan ontutulong kami no walay kalamidad. Kanian nayarin isipen mo, ‘Iner so panlalapuay pundo yo?’

Agkami mankokolekta na kakaplo, manpapabayar, odino onkekerew na kuarta. Anggano baleg so gastos ed kimey min panagpulong, agkami onkekerew na kuarta. Masulok a sanlasus taon lay apalabas, imbaga na komaduan isyu na magasin ya Watchtower ya matalek kamin si Jehova so onsusuporta ed sikami tan agkamin balot “mipayabol odino mikasi ed totoo parad suporta”​—⁠tan agmin balot ginawa itan!​—⁠Mateo 10:⁠8.

Susuportaan na boluntaryon donasyon iray kimey mi. Aapresyaen na dakel a totoo so kimey min panagbangat na Biblia tan mangiiter iray donasyon parad satan. Saray Tasi ya mismo et maliket dan uusaren so panaon, biskeg, kuarta, tan arum nin kaykayarian da pian gawaey linawa na Dios diad interon mundo. (1 Awaran 29:⁠9) Diad Kingdom Hall, asemblea, tan diad kombension mi, wala ray kahon parad kontribusyon ya pangipelagan na saramay malabay a mandonasyon. Nayari met so mandonasyon panamegley na website mi ya jw.org. Maslak ya donasyon et manlalapud saray aliwan mayaman, singa samay pobrin balo a pandinayewan nen Jesus sanen angipelag na duaran angkelag a sinsilyo diad pananginay donasyon ed templo. (Lucas 21:​1-4) Kanian sarag na anggan siopa so regular ya “mangibiig” na iter to “unong ed denesidi to ed puso to.”​—⁠1 Corinto 16:2; 2 Corinto 9:⁠7.

Kombinsido kami ya itultuloy a pakiwasen nen Jehova iramay malabay ya ‘mangigalang ed sikato diad panamegley na saray mablin kayarian da’ parad kimey na Panarian, pian nagawa so linawa to.​—⁠Proverbio 3:⁠9.

• Akin ya duma so organisasyon mi ed arum ya relihyon?

• Iner so panguusaran ed saray boluntaryon kontribusyon?

Napatnagan ed tawag ya Kingdom Hall a say manunan bangat na Biblia ya aaralen ditan et say Panarian na Dios​—⁠say tema na ministeryo nen Jesus.​—⁠Lucas 8:⁠1.

Sentro iratan na dugan panagdayew ed sakey a lugar. Ditan oorganisaen na Saray Tasi nen Jehova so pangipulong ed maong a balita na Panarian diad sakey ya lugar. (Mateo 24:14) Nanduruma so kabaleg tan desinyo na saray Kingdom Hall, balet simpli labat iratan tan maslak et pigaran kongregasyon so manguusar. Diad apalabas iran taon, angipaalagey kami na nilibon balo ya Kingdom Hall (say average et limara kada agew) ta ondarakel so membro tan bilang na kongregasyon. Panon min nagagawaan itan?​—⁠Mateo 19:⁠26.

Walay pundo parad panagpaalagey ya manlalapud saray donasyon. Ipapawit irayan donasyon ed branch office pian nausar ed pampaalagey odino pangapiger na Kingdom Hall na saray kongregasyon a mankaukolan.

Ipapaalagey iratan na saray boluntaryo a nandurumay situasyon da ed bilay. Diad dakel a bansa, wala ray inorganisan Kingdom Hall Construction Group. Wala ray grupo na construction servant tan boluntaryo ya ontutulong ed saray lokal a kongregasyon ed pangipaalagey na Kingdom Hall da. No nasumpal day sakey, onla ra lamet ed sananey a lugar, anggan diad saray ararawin pasen ed bansa ra. Diad arum a bansa, wala ray kualipikadon Tasi ya mangaasikaso ed pampaalagey tan pangapiger na saray Kingdom Hall ed saray lugar ya niyasain ed sikara. Anggano dakel iray eksperiensyadon manboboluntaryo diad kada proyekto, karaklan ed saray mankikimey et saray membro na kongregasyon a mangusar ed Kingdom Hall. Nagagawa iyan amin lapud tulong na espiritu nen Jehova tan interon kamarerwan pansasagpot na saray lingkor to.​—⁠Salmo 127:1; Colosas 3:⁠23.

• Akin et Kingdom Hall so tawag ed pasen ya pandadayewan mi?

• Panon min nagagawaan so panagpaalagey na saray Kingdom Hall ed interon mundo?

Say masanton ngaran na Dios et walad kada Kingdom Hall na Saray Tasi nen Jehova. Kanian ipapasen min pribilehyo tan importantin kabiangan na sagradon panagdayew mi so pitulongan pian mansiansia itan ya malinis, presentable, tan maayos. Sarag na amin so mitulongan.

Manboluntaryon manlinis kayari aral. Kasumpal na kada aral, malikeliket ya lilinisan na saray agagi so Kingdom Hall. Maminsan ed sakey simba, walay mas detalyadon panaglinis ya gagawaen. Sakey ya elder o ministeryal a lingkor so mangidaulo ed satan, tan walay listaan na saray nepeg dan gawaen. Nayarin walay manpanis, man-mop, o man-vacuum na flooring, manpunas, man-ayos na yurongan, manlinis na CR, manlinis na bintana tan salming, mangibantak na basura, odino manlinis ed paway tan kaliberliber na Kingdom Hall. Wala met so agew ya iyeeskedyul mi kada taon parad impasyan panaglinis. Ipipila mi met ed panaglinis iray anak mi kanian nanaaralan dan respetoen so pasen a pandadayewan mi.​—⁠Eclesiastes 5:⁠1.

Manboluntaryo ya ontulong ed panag-apiger. Kada taon, walay detalyadon inspeksion ya gagawaen ed loob tan paway na Kingdom Hall. Base ed resulta na inspeksion, kaukolan so regular ya panmintina pian mansiansian maayos so Kingdom Hall tan napaliisay baleg ya gastos. (2 Awaran 24:13; 34:10) Say Kingdom Hall ya malinis tan namimintina ya maong et manepeg a pasen ya pandayewan ed Dios. No mitulongan tayo, ipapanengneng tayon inaro tayoy Jehova tan papablien tayoy pasen a pandadayewan ed sikato. (Salmo 122:⁠1) Mangiter met itan na maabig ya pantasi ed lugar tayo.​—⁠2 Corinto 6:⁠3.

• Akin et agtayo nepeg ya paulyan so pasen ya pandadayewan tayo?

• Anto ray uksoyan pian napansiansian malinis so Kingdom Hall?

Labay moy man-research pian naaruman so kakabatan mod Biblia? Kasin interesado ka ed sakey ya teksto, karakter, lugar, o bengatla ya abasam ed Biblia? Odino ompan walay problemam tan iisipen mo no kasin natulongan ka na Salita na Dios. Sarag mon usaren so library na Kingdom Hall.

Wadtan iray makatulong ed pan-research. Seguradon anggapod sika so amin ya publikasyon na Saray Tasi nen Jehova ed lenguahem. Balet walad library na Kingdom Hall so maslak ed saray balon publikasyon. Nayarin wala met ditan so pigaran patalos na Biblia, diksionaryo, tan arum nin reperensya. Sarag mon usaren so library antis tan kayari na aral. No walay computer ditan, posiblin wala met so Watchtower Library to. Program itan ed computer ya nankargay dakel a publikasyon tayo tan mainomay ya usaren lapud sarag moy mananap na topic, salita, odino teksto.

Makatulong itan ed saray estudyante ed Aral Parad Ministeryo tan Bilay na Kristiano. Sarag mon usaren so library na Kingdom Hall no ipaparaan moy asainmin mo. Say manangasikaso na Aral Parad Ministeryo tan Bilay na Kristiano so akanresponsabilidad ed library. Seseguroen to ya nikarga ditan iray balon publikasyon tan maayos iratan. Sarag moy manpabangat ed sikato odino ed samay mangiyaaral ed sika no panon mon anapen iray kaukolan mon reperensya. Balet, agnayarin ipaway ed Kingdom Hall iray libron walad library. Tan siempre, alwaran tayon maong so pangusar ed saray libro tan agtayo gugulisan o susulatan iratan.

Ibabaga na Biblia ya pian naromog tayo so “kakabatan nipaakar ed Dios,” kaukolan ya seetan tayon anapen itan ya “singa akaamot iran kayamanan.” (Proverbio 2:​1-5) Natulongan ka na library na Kingdom Hall pian nagawaan mo itan.

• Anto ray walad library na Kingdom Hall ya makatulong ed pan-research?

• Siopay makatulong ed sika diad pangusar mod library?

Imbaga nen Jesu-Kristo ed saray patumbok to: “Pasindag yo . . . so liwawa yo ed saray totoo, pian nanengneng da so maabig iran gawa yo tan igloria ra so Ama yon walad tawen.” (Mateo 5:16) Pian nagawaan mi itan, uusaren mi modernon teknolohiya, tan sakey ed satan et say Internet. Say official website mi ya jw.org et nankarga na saray impormasyon nipaakar ed saray papanisiaan tan kimey na Saray Tasi nen Jehova. Anto ray wadtan?

Saray ebat na Biblia ed maslak ya tepet na totoo. Nabasam ditan so ebat ed saray importantin tepet na dakel a totoo. Alimbawa, say tract ya Naandi ni Kasi Paniirap? tan Talaga Kasin Nabilay Lamet Iray Inaatey? et nabasa online diad masulok ya 900 a lenguahe. Nabasa met ed masulok ya 160 a lenguahe so Balon Mundo a Patalos tan pigaran publikasyon ya makatulong ed panaral na Biblia, singa say libron Anto so Peteg ya Ibabangat na Biblia? ontan met ed saray balon isyu na Say Panag-bantayan tan Onliing! Dakel ed sarayan publikasyon so nayarin basaen tan dengelen online, odino ni-download ed popular ya format ya singa say MP3, PDF, odino EPUB. Sarag mo ni ingey mangi-print na pigaran pahina diad mismon lenguahe na nalmom ya interesado! Wala met iray video parad nanduruman sign language. Sarag mo met so man-download na saray dramatikon panagbasa na Biblia, drama ed Biblia, tan mararakep ya musika.

Dugan impormasyon nipaakar ed Saray Tasi nen Jehova. Nabasa met ed website mi iray sankabaloan ya balita tan video nipaakar ed sankamundoan ya kimey mi, saray nagagawa ya apektado iray Tasi nen Jehova, tan say itutulong mid saray mankaukolan. Wadtan met iray petsa na kombension mi, tan say numero na telepono tan address na saray branch office mi.

Panamegley na saraya, isisindag mi liwawa na katuaan anggad sankaarawian a pasen diad dalin. Nagugunggonaan ed saya so totood amin ya bansa, pati saramay walad Antarctica. Ipipikasi min “maples komon ya onkayat tan nigloria so salita nen Jehova” diad interon mundo parad kigloriaan na Dios.​—⁠2 Tesalonica 3:⁠1.

• Panon a makakatulong so jw.org pian dakel nin totoo so makaamta ed katuaan na Biblia?

• Antoy labay mon nengnengen ed website mi?