Dakel so agla mimimisa odino oonlad simbaan da ta agnaeebatan iray importantin tepet da ed bilay tan ag-ira naliliketan. Akin balet ya iimbitaan mi kan onatendi ed aral na Saray Tasi nen Jehova? Antoy naeksperiensyam diman?

Naliknam so liket ed piulop ed saray maaro tan walay malasakit ya totoo. Nen inmunan siglo, naorganisa iray Kristiano diad nanduruman kongregasyon, tan wala ray pantitipon da pian dayewen so Dios, manaral na Kasulatan, tan manpapasesegan. (Hebreo 10:​24, 25) Lapud walay aroan ed saratan ya pantitipon, nalilikna ran wala ray tuan kakaaro da​—saray Kristianon agagi ra. (2 Tesalonica 1:3; 3 Juan 14) Aaligen mi alimbawa na saray Kristiano nensaman kanian nalilikna mi met so liket.

Naaralan mo no panon mon niyaplika iray prinsipyo na Biblia. Singa nen panaon na Biblia, mantitipon kamin amin​—lalaki, bibii, tan ugugaw. Wala ray kualipikadon managbangat ya uusaren day Biblia pian natalosan mi no panon min niyaplika iray prinsipyo na satan diad inagew-agew a panagbilay mi. (Deuteronomio 31:12; Nehemias 8:8) Nayarin mibiang so amin ed pankomento tan pangansion, pian nibalikas mi ilalo mi bilang Kristiano.​—Hebreo 10:⁠23.

Napabiskeg so pananisiam ed Dios. Oniay imbaga nen apostol Pablo ed sakey ed saray kongregasyon diad panaon to: “Pipirawaten kon nanengneng kayo, . . . pian makapanpapasesegan itayo, a napaseseg yo ak ed pananisia yo tan napaseseg ta kayo ed pananisiak.” (Roma 1:​11, 12) Lapud regular iray pantitipon mi, napapabiskeg so pananisia mi tan say determinasyon min iyaplika ed bilay mi so ibabaga na Biblia.

Labay mi kan imbitaan ya onatendi ed aral na kongregasyon mi ed sayan simba pian naeksperiensyam a mismo. Welcome ka diman. Libre tan anggapoy panagkolekta ed amin ya aral mi.

• Antoy angaligan ed aral na saray Tasi?

• Panon itayon nagunggonaan no miaral itayo?

Anggano kaukolan mi manakar na arawi odino subaen so aliwliwan panaon, regular kamin oonlad saray Kristianon pantitipon mi. Wala ray problema mi tan nakekesawan kami met ed trabaho, balet akin et pansasagpotan mi ran Tasi nen Jehova so milimog ed saray kaagian mi?

Parad pankaabigan mi itan. “Nonoten tayoy sakey tan sakey,” so kuan nen Pablo, tan say tutukoyen tod saya et saray nakakalimog min membro na kongregasyon. (Hebreo 10:24) Say labay ton ibaga et nepeg min kabaten so sakey tan sakey. Idadanet na sayan imbaga nen apostol Pablo ya nepeg min nonoten so pankaabigan na arum. Legan min nakakabat so arum a Kristianon pamilya, naaamtaan mi ya asali da met manaya iray probleman dadalanen mi, tan natulongan da kamin nasarag iray problema mi.

Oneelet so pankakaaro mi. Diad saray aral mi, mantitipon kami bilang maapit ya sankakaaro. Maniiba kami met diad arum nin panaon, singa diad panagrelaks. Antoy maabig ya epekto na satan? Mas napapabli mi so sakey tan sakey, tan mas oneelet so aroan mi. Kanian no walay problema na kaagian mi, tutulongan min tampol lapud malet kamin sankakaaro. (Proverbio 17:17) Diad pipiulop mid amin a membro na kongregasyon mi, ipapanengneng mi ‘pareparehon panangiyansakit ed sakey tan sakey.’​—1 Corinto 12:​25, 26.

Maabig no say pilien mon pikaaroan et saramay manggagaway linawa na Dios. Naromog mo iray ontan a kaaro diad Saray Tasi nen Jehova. Komon ta anggapoy makaamper ed sikan milimog ed sikami.

• Antoy maabig ya epekto na pililimog mid saray kapara min Kristiano diad saray aral?

• Kapigan mo labay so onatendi ed kongregasyon mi?

Diad pantitipon na saray Kristiano nensaman, mangakansion ira, manpipikasi ira, tan babasaen tan pantotongtongan day Kasulatan​—ya anggapoy antokaman a ritual. (1 Corinto 14:26) Ontan met so gagawaen ed saray aral mi.

Saray ibabangat et base ed Biblia tan praktikal ed inagew-agew a bilay. No weekend, diad amin a kongregasyon et walay 30 minuto a paliwawa ya nibase ed Biblia nipaakar ed no panon min nausar ed bilay mi iray prinsipyo na Biblia tan no anto lan panaon so pambibilayan tayo. Ipapaseseg ed sikami ya subaybayan mid Biblia iray teksto. Kayari na paliwawa, onsublay so sakey oras ya Panagaral na “Panag-bantayan.” Ditan et pantotongtongan so sakey ya artikulod panaralan ya edisyon na Say Panag-bantayan, tan nayarin mankomento iray membro na kongregasyon. Natutulongan kami na satan a panagaral ya iyaplika iray ibabaga na Biblia. Pareho so aaralen na amin a masulok ya 120,000 a kongregasyon diad interon mundo.

Tutulongan kamin onaligwas ed panagbangat. Wala met so tatawagen min aral ed midweek ya Ministeryo tan Bilay na Kristiano ya naapag ed taloran programa, ya nibase ed binulan a Workbook ed Aral Parad Ministeryo tan Bilay na Kristiano. Say unonan parte na sayan aral ya Kayamanan ed Salita na Dios et ontutulong pian magmaliw kamin pamilyar ed sakey a parte na Biblia ya akauna lan binasa na saray membro na kongregasyon. Say onsublay et say Magmaliw ya Epektibo ed Ministeryo ya ditan et wala ray demonstrasyon no panon ya itongtong so Biblia ed arum. Walay niyasain ya mangobserba tan mangiter na suhestion pian natulongan kamin paaligwasen so panagbasa tan panagbangat mi. (1 Timoteo 4:13) Tan say sampot ya parte a Bilay na Kristiano et nipaakar ed no panon min niyaplika iray prinsipyo na Biblia diad inagew-agew a bilay mi. Ditan et walay tepet tan ebat ya pantotongtong ya ontulong pian mas natalosan mi so Biblia.

Diad iyatendim ed aral mi, seguradon nagustoan mo so kalidad na panagbangat na Biblia ya naawat mo.​—Isaias 54:13.

• Antoy nailaloan mon narengel ed saray aral na Saray Tasi nen Jehova?

• Dinan ed saray sinimban aral mi so labay mon atendian?

Kasin naimanom ed saray litratod sayan brosyur ya pormal so panangawes na saray Tasi nen Jehova no mimiaral ira? Akin et pipilien min maong so kawes tan panag-ayos mi?

Pian ipanengneng so respeto ed Dios. Tua ya aliwan say itsura so nenengnengen na Dios. (1 Samuel 16:⁠7) Balet, no mantitipon kami pian mandayew ed Dios, labay min ipanengneng so impapuson respeto ed sikato tan ed saray kaagian mi. No onarap tayod huis diad korte, seseguroen tayon marakep so itsura tayo bilang panangigalang ed autoridad to. Ontan met, no mimiaral kami, seseguroen min say itsura mi et mangiter na galang ed “Ukom na interon dalin,” si Jehova a Dios, tan ed pasen ya pandadayewan mi.​—⁠Genesis 18:⁠25.

Pian ipanengneng ya iyaaplika mi iray prinsipyo na Biblia. Ibabaga na Biblia a saray Kristiano et nepeg a mangawes “a mangipatnag na kasimpitan tan limpion kanonotan.” (1 Timoteo 2:​9, 10) Say ‘masimpit’ a panangawes et kabaliksan toy agpansulong na mangalay atension, mapitpitat, antiktikey, odino mankaninag. Ontan met, ontulong so “limpion kanonotan” ed pampili na marakep a kawes ya ag-akulastay odino desente. Dakel nin siansiay napampilian ya estilo na panangawes base ed sarayan prinsipyo. Say matukoy tan marakep ya itsura mi et ‘mamaparakep ed bangat na Manangiliktar tayo’ tan ‘mangigloria ed Dios.’ (Tito 2:10; 1 Pedro 2:12) Lapud pormal so panangawes mi diad saray aral mi, balibali so epekto na satan ed pakanengneng na arum ed panagdayew ed si Jehova.

Agka nababaingan ya onatendi ed Kingdom Hall anggano anggapo ni pormal ya kawes mo. Agkaukolan ya mabli odino espisyal so kawes tayo. Say importante et matukoy, malinis, tan presentable itan.

• Panon kaimportante so panangawes no mandadayew itayod Dios?

• Anto ran prinsipyo so makatulong ed panangawes tan panag-ayos tayo?

No iyaaralan ka na sakey a Tasi nen Jehova, nayarin ipaparaan mo lay aralen yo antis kayon manaral na Biblia. Maabig no ontan met so gawaen mo antis kan miaral ed Kingdom Hall. Mas nagunggonaan itayo no ipasal tayoy nawalaan na maong ya eskedyul ed pamparaan.

Isipen no kapigan tan iner ka manaral. Kapigan ka mas makapampokus? No palbangon antis kan mankimey, odino diad labi sano naugip la ray anak mo? Anggano agka makapanaral na mabayag, isipen no panon karukey so usaren mon oras ed panaral mo, tan agmo aabuloyan ya walay makadisturbo ed sika. La kad mareen ya pasen tan erep moy amin ya posiblin makadisturbo, singa say radyo, TV, tan cell phone. Say pampikasi antis ya manaral et ontulong pian agka masyadon manpaga, tan makapampokus kad panaral mod Salita na Dios.​—⁠Filipos 4:​6, 7.

Markaan iray manunan punto, tan mangiparaan kay komentom. Amtaen mo nin unona so manunan tema na aralen mo. Pannonotan so title na artikulo odino kapitulo, nengneng moy koneksion na kada subheading ed tema, tan aralen no panon ya idadanet na saray litrato tan repason tepet iray manunan punto. Insan mo basaen so kada parapo, tan anapen so ebat ed tepet. Basam ed Bibliam iray nisitan teksto, tan nonot mo no antoy koneksion na saratan ed aaralen mo. (Gawa 17:11) No antam lay ebat ed tepet, gulisan odino markaan iray importantin salita ed parapo ya mangipanonot no antoy ebat mo. Insan no aral la, sarag mon itagey so limam no labay mo, tan mankomento na antikey diad sarilin salitam.

No aralen moy nanduruman tema ya pantotongtongan ed saray sinimban aral, naaruman lan naaruman so ‘pananginan moy kayamanan’ na kakabatan ed Biblia.​—⁠Mateo 13:​51, 52.

• Antoy kaukolan mon gawaen no manparaan kad saray aral?

• Panon kan makapanparaan ya mankomento ed aral?

Manlapu la nensaman, labay nen Jehova ya kada pamilya et walay panaon dan sankakaiba pian pabiskegen so espiritualidad da tan paeleten so relasyon da. (Deuteronomio 6:6, 7) Kanian saray Tasi nen Jehova et ipapanaon da so sinimban panagdayew a saniiba bilang pamilya​—⁠maliket dan pantotongtongan iray espiritual a bengatla ya espisipikon parad pankaukolan da. Anggano anggapoy pamilyam, sarag mon usaren itan a panaon parad Dios diad panaral moy Biblia, depende ed apilim ya tema.

Panaon itan pian lalon onapit ed si Jehova. “Onapit kayo ed Dios, tan sikatoy onapit ed sikayo.” (Santiago 4:⁠8) Mas nakabat tayoy Jehova no aralen tayoy personalidad to tan saray ginawa to panamegley na nisulat ya Salita to. Say sakey a simplin paraan na pangigapoy panagdayew na pamilya et say saniiban pambasa na Biblia, nayarin samay akaeskedyul ya babasaen ed Aral Parad Ministeryo tan Bilay na Kristiano. Nayarin iyasain ed kada membro na pamilya iray parte ya basaen da, insan da pantongtongan no antoy naaralan dad Kasulatan.

Panaon itan pian mas onapit ed sakey tan sakey iray sankakapamilya. Oneelet so relasyon na saray sanasawa, pati saray atateng tan ananak no saniiba dan aralen so Biblia bilang pamilya. Satan ya panaon et nepeg ya maliket tan relaks pian pitalaran na interon pamilya. Depende ed edad na saray ananak, makapampili iray atateng na praktikal iran napantongtongan da, a singa saray artikulo ed Say Panag-bantayan tan Onliing! odino diad website min jw.org. Sarag yo met ya pantongtongan iray problema na ananak yo diad eskuelaan tan no panon dan nasarag iratan. Maabig no manbantay kayoy JW Broadcasting (tv.jw.org) insan yo pantongtongan so binantayan yo. Marakep met no ipraktis yo iray kansionen ed aral tan nayarin manmerienda kayo kayari panagdayew na pamilya yo.

Sayan espisyal ya oras kada simba ya saniiba yon dayewen si Jehova et ontulong pian na-enjoy na interon pamilya yo so panaral ed Salita na Dios, tan bendisyonan ton maong so amin ya sagpot yo.​—⁠Salmo 1:​1-3.

• Akin ya ipapanaon mi so panagdayew na pamilya?

• Antoy nayarin gawaen na atateng pian na-enjoy iya na interon pamilya?

Akin et malikeliket irayan totoo? Lapud inmatendi rad sakey ed saray asemblea mi. Singa saray lingkor na Dios nensaman ya niganggan a mantitipon ya mamitlo ed sakey taon, pitalaran mi met iray angkabaleg ya pantitipon mi. (Deuteronomio 16:16) Kada taon et walay talora: duaran sirkiton asemblea ya sansakey agew tan sakey a regional a kombension ya taloran agew. Panon kamin nagugunggonaan ed sarayan pantitipon?

Papabiskegen na saratan so ulopan min sanaagi. Singa saray Israelita ya malikeliket ya nandayew ed si Jehova “diad saray pantitipon,” malikeliket kami met ya mandadayew ed sikato diad sarayan espisyal ya okasyon mi. (Salmo 26:​12, paimanod leksab; 111:1) Maabig irayan pankanawnawa pian nakabat tan napilimogan mi iray kaagian mid arum ya kongregasyon odino anggan saray nanlapud arum ya bansa. No panangugto, saniiba kamin mamangan diad lugar na asemblea mi, kanian lalo min naliliknay pankakaaro ed saratan ya espiritual ya okasyon. (Gawa 2:42) Ditan et naeeksperiensya min mismo so aro ya pankakasakeyen to kamin ‘amin ya sanaagi’ diad interon mundo.​—⁠1 Pedro 2:⁠17.

Ontutulong iratan pian onaligwas kamid espiritual. Agunggonaan iray Israelita lapud ‘atalosan da ray salita’ ed Kasulatan ya impaliwawa ed sikara. (Nehemias 8:​8, 12) Ontan mi met, papablien mi so panagbangat ed Biblia diad saray asemblea mi. Kada programa et walaan na tema ya base ed Biblia. Panamegley na saray paliwawa, simposium, tan demonstrasyon, nanaaralan mi no panon min gawaen so linawa na Dios. Napapaseseg kami no narerengel mi ray eksperiensya na saray Kristianon nasasarag da ray subok diad sarayan mair-irap a panaon. Diad saray drama no regional a kombension, mabilabilay iray salaysay ed Biblia tan makakaaral kami na praktikal iran leksion. Kada asemblea, walay bautismo parad saramay malabay ya mangisimbolo na dedikasyon dad Dios.

• Akin et maliket ya okasyon iray asemblea?

• Panon kan nagunggonaan no onatendi kad asemblea?

Antis ya ompatey si Jesus, oniay inkuan to: “Sayan maong a balita na Panarian et nipulong ed interon dalin bilang pantasi ed amin a nasyon, insan onsabi so anggaan.” (Mateo 24:14) Balet panon ya nasumpal so kimey ya panagpulong ed interon mundo? Diad pangalig ed alimbawa ya impanengneng nen Jesus sanen sikatoy wadiad dalin.​—⁠Lucas 8:⁠1.

Pupulongan mi ray totoo ed kaabungan da. Impasal nen Jesus iray disipulo to ya ipulong so maong a balita diad kaabungan. (Mateo 10:​11-13; Gawa 5:42; 20:20) Saraman ya ebanghelisador nen inmunan siglo et inyasain ed espisipikon teritorya a pampulongan da. (Mateo 10:​5, 6; 2 Corinto 10:13) Ontan met natan, organisadon maong so panagpulong mi, tan walay teritoryan inyasain ya pampulongan na kada kongregasyon. Lapud satan et nagagawaan mi imay ganggan nen Jesus ya “manpulong ed totoo tan sigpot a mantasi.”​—⁠Gawa 10:⁠42.

Manggagawa kami na paraan pian napulongan mi ray totoo inerman so kawalaan da. Impanengneng met nen Jesus so alimbawa diad impanpulong tod saray totoon walad publikon lugar, singa diad gilig na dayat odino diad abay na bobon. (Marcos 4:1; Juan 4:​5-15) Anggad posible et kakatongtongen mi ray totoo nipaakar ed Biblia​—⁠diad karsada, lugar na negosyo, parke, odino panamegley na telepono. Pupulongan mi met iray kakaabay, katrabaho, kaklase, tan kakanayon mi diad matukoy iran pankanawnawa. Lapud sarayan sagpot mi et minilyon lan totoo ed interon dalin so akadngel na “maong a balita nipaakar ed panangiliktar.”​—⁠Salmo 96:⁠2.

Walay nayarin pangipaamtaan mo ed maong a balita na Panarian na Dios tan say bendisyon na satan ed sikara diad arapen? Agmo sasarilien iyan mensahe ya mangiiter na ilalo. Ipaamtam itan a tampol ed sikara!

• Anton “maong a balita” so kaukolan ya nipulong?

• Panon ya aaligen na saray Tasi nen Jehova so paraan na impanpulong nen Jesus?

Say salitan “payunir” et ontutukoy ed saramay akadiskobre na saray balon teritorya tan mangipaparaan na dalan ya tumboken na arum. Nibaga tayon si Jesus et payunir ta sikatoy imbaki diad dalin pian igapo so ministeryon mangiter na bilay ed totoo tan iparaan so dalan parad kililiktar. (Mateo 20:28) Diad panaon tayo, sikatoy aaligen na saray papatumbok to diad panguusar day dakel a panaon da ed ‘pambangat ed totoo pian magmaliw a disipulo.’ (Mateo 28:​19, 20) Say arum ed sikara et linmoob ed panaglingkor ya tatawagen min panagpayunir.

Say payunir et dakel so oras ya uusaren tod panagpulong. Amin ya Tasi nen Jehova et manpupulong na maong a balita. Balet wala ray nanggawa na paraan pian makapanlingkor ya regular payunir, tan 70 oras so uusaren da ed panagpulong kada bulan. Pian nagawaan da itan, dakel ed sikara so part-time labat a mantratrabaho. Say arum et niyasain bilang espisyal payunir diad saray lugar ya mas baleg so pankaukolan parad saray manangipulong na Panarian, tan diad kada bulan et 130 odino onsulok ni so uusaren dan oras ed panagpulong. Saray payunir et kontento ed simplin bilay lapud matalek ira ya itarya nen Jehova iray pankaukolan da. (Mateo 6:​31-33; 1 Timoteo 6:​6-8) Saray agmakapan-regular payunir et sarag day manlingkor ya auxiliary payunir no iyabuloy na situasyon da, tan manguusar ira na 30 o 50 oras kada bulan diad panagpulong.

Say payunir et manlilingkor lapud inaro toy Dios tan saray totoo. Singa si Jesus, nanenengneng mi so pakaskasin espiritual ya kipapasen na dakel a totoo natan. (Marcos 6:34) Balet walay kakabatan ya amta min makatulong ed sikara, tan mangiter ed sikara na ilalo. Inaro na saray payunir iray kapara dan totoo kanian mabulos dan iiter so panaon tan biskeg da pian ipaamta ed arum so maong a balita. (Mateo 22:39; 1 Tesalonica 2:⁠8) Bilang resulta, ombibiskeg so pananisia na saray payunir, lalo iran onaapit ed Dios, tan malikeliket ira.​—⁠Gawa 20:⁠35.

• Antoy gagawaen na sakey a payunir?

• Akin et wala ray manpapayunir?

Kabkabat iray Tasi nen Jehova ed panagbangat na Biblia. Wala ray eskuelaan parad saramay sigpot-panaon ya mangipupulong na Panarian pian ‘sigpot dan nasumpal so ministeryo da.’​—2 Timoteo 4:5.

Pioneer Service School. No sakey taon lan regular payunir so sakey, sikatoy imbitaan ya maneskuela na anem agew diad asingger a Kingdom Hall. Say gagala na saya et pian tulongan so payunir ya mas onapit ed si Jehova, magmaliw a mas epektibo ed amin ya aspekto na ministeryo, tan makapantultuloy ed matoor a panaglingkor to.

School for Kingdom Evangelizers. Sayan duay bulan ya kurso et adesinyo pian ipasal iray eksperiensyadon payunir a mabulos ya onalis pian manlingkor ed lugar a mas baleg so pankaukolan. Singa da ibabagan, “Wadia ak! Ibaki mo ak!” bilang pangalig ed sankamaongan ya Ebanghelisador ya nanlingkor ed dalin, si Jesu-Kristo. (Isaias 6:8; Juan 7:29) No ibaki da rad arum a lugar, ompan kaukolan dan pasalen so mas simplin bilay. Nayarin man-adjust irad kultura, klima, tan naakan. Ompan kaukolan da ni ingen so manaral na balon lenguahe. Ontulong iyan eskuelaan ed saray single ya brother tan sister tan ed saray sanasawa, a mantaon na 23 anggad 65, pian niwalad sikaray espiritual iran kualidad ya kaukolan ed asainmin da pian mas nausar iran maong nen Jehova tan na organisasyon to.

Watchtower Bible School of Gilead. Diad Hebreo, say kabaliksan na “Gilead” et “Bunton a Tasi.” Manlapu lad inggapo na Gilead nen 1943, masulok lan 8,000 ya nan-graduate ed sayan eskuelaan so imbaki bilang misionero pian mantasi “anggad saray sampot na dalin,” tan dakel lay agawaan da. (Gawa 13:47) Nen sinmabi ed Peru iray nan-graduate ed Gilead, anggapo ni kongregasyon diman. Natan et masulok lan 1,000. Nen ginmapon nanlingkor ed Japan iray misionero mi, anggapo ni samploran Tasi diman. Natan et masulok lan 200,000. Kaiba ed limay bulan a kurso ed Gilead so panaral a maong ed Salita na Dios. Say iimbitaan a manaral ed sayan eskuelaan et saray espisyal payunir odino misionero, saray manlilingkor ed branch office, odino manangasikaso na sirkito. Ipapasal iran maong pian makatulong irad iyaligwas na sankamundoan a kimey.

• Anto so gagala na Pioneer Service School?

• Siopa ray nayarin manaral ed School for Kingdom Evangelizers?