Waloran Totoo so Akaligtas ed Delap

Nen wala lad loob na biong si Noe, say pamilya to, tan saray ayayep, inkapot nen Jehova so puerta, insan la inmuran. Makmaksil tan tuloytuloy so uran kanian linmetaw so biong. Adelap so interon mundo. Diad paway na biong, amin a mauges ya totoo et inatey. Balet akaligtas si Noe tan say pamilya to ta wala rad loob na biong. Imadyin mo pa, seguradon malikeliket ira ta inunor day Jehova, awa?

Inmuran na 40 ya agew tan 40 ya labi, insan tinmunday uran. Nen medyo inmatapew lay danum, sinmadsar ed palandey so biong. Balet delap nin siansia ed kaliberliber na biong, kanian agni makapaway si Noe tan say pamilya to.

Kalkalna met lanlamang ya inmekat so danum. Masulok ya sakey taon ya walad loob na biong si Noe tan say pamilya to. Insan, imbaga nen Jehova ya sarag da lay ompaway ed biong. Misalsalamat irad si Jehova ta inligtas to ra, kanian angiter ira na apay ed si Jehova.

Maliket si Jehova ed apay da. Im-promise to ya agto lan balot deralen so amin ya wadiad dalin panamegley na delap. Pian nanonotan tayo itan ya promise to, pinapaway toy sankaunaan ya rainbow diad tawen. Akanengneng ka lay rainbow?

Diad saman et imbaga nen Jehova ed si Noe tan ed pamilya to ya mananak ira tan panoen day dalin.