Imbangat nen Jesus Iray Disipulo To No Panon so Manpikasi

Kada no walay gawaen na saray Fariseo, labay dan pambiliban ira na totoo. No walay ginawa dan maong, labay dan naamtaan itan na arum. Manpipikasi ira diad lugar ya matoo pian dakel so makanengneng ed sikara. Imi-memorize na saray Fariseo iray andukey ya pikakasi. Uulit-uliten da iratan diad saray sinagoga tan diad saray karsada pian narengel ira na arum. Kanian mankelaw iray totoo nen imbaga nen Jesus: ‘No manpikasi kayo, agyo aaligen iray Fariseo. Ta iisipen da ya dengelen ira na Dios no amayamay so ibaga ra, balet diad tua, ag-ira dedengelen na Dios. Dapat sika tan si Jehova labat so makaamta ed ipipikasim. Agmo uulit-uliten so ibabagam. Labay nen Jehova ya ibagam ed sikato no anton talagay naliliknam.

‘Onia so dugan pampikasi: “Ama mi a walad tawen, napasanto komon so ngaran mo. Onsabi la komon so Panarian mo. Nagawa komon so linawam, a singa ed tawen, ontan met diad dalin.”’ Imbaga met nen Jesus ed sikara ya nepeg dan ipikasi ed Dios ya ikdan to ray kanen da ed kada agew, perdonaen to ray kasalanan da, tan sarag da met ya ibaga iray arum nin walad puso ra.

Imbaga nen Jesus: ‘Agkayo ontutundan manpikasi. Lanang yon kerewen ed Ama yon Jehova iray parad kamaongan yo. Anggan siopan ateng et labay ton iter no antoy maong parad anak to. No onkerew na tinapay so anak yo, ikdan yo kasi na bato? No onkerew na sira, ikdan yo kasi na uleg?’

Insan imbaga nen Jesus no antoy naaralan ed satan: ‘No amta yoy mangiter na balibalin regalo ed ananak yo, di lalo lay Ama yon Jehova ya ikdan to kayoy masanton espiritu. Say gawaen yo labat et onkerew.’ Sika ey, gagawaen mo iyan imbaga nen Jesus? Anto ray ibabagam ed si Jehova no manpipikasi ka?