LEKSION 47
Akaparaan Ka Lan Manpabautismo?
Dakel lay naaralan mo tungkol ed si Jehova diad panaaral mo na Biblia. Seguradon dakel lay inuman mo pian natumbok so aaralen mo. Pero ompan manaalangan ka ya idedika so sarilim ed si Jehova tan manpabautismo. Pantongtongan ed sayan leksion iray pigaran makakasebel ed pampabautismo tan no panon mon nalampasan iratan.
1. Panon karakel so dapat mon naamtaan antis kan manpabautismo?
Pian nabautismoan ka, kailangan ya walay “suston kakabatan [mo] ed katuaan.” (1 Timoteo 2:4) Aglabay ya ibaga na saya ya naebatan mo so amin ya tepet ed Biblia antis kan manpabautismo. Anggan saray Kristiano ya abayag lan abautismoan et tuloytuloy nin manaaral. (Colosas 1:9, 10) Pero, kailangan antam iray manunan bangat na Biblia. Tulongan ka na saray elder ed kongregasyon pian nanengneng no kasin antam tan natatalosan mo la iratan.
2. Anto ray gawaen mo antis kan manpabautismo?
Antis kan manpabautismo, kailangan “magbabawi . . . tan manguman” ka. (Basaen so Gawa 3:19.) Labay ton ibaga, manlapud puso ya magbabawi ka ed saray agawaan mon kasalanan tan onkerew na perdona ed si Jehova. Sakey ni, intundam lay manggawa na mauges tan mansasagpot kan napaliket so Dios. Insan mimiaral ka met la tan manpupulong bilang agbautismadon manangipalapag.
3. Akin et agka dapat patatalo ed takot?
Natatakot so arum ya ompan agda natoor so impromisa da ed si Jehova. Tua, no maminsan nalilingo tayo, ya singa saray matoor a lalaki tan bibii ya abitla ed Biblia. Pero, ag-iilaloan nen Jehova ya perpekto iray mandadayew ed sikato. (Basaen so Salmo 103:13, 14.) Maliket si Jehova no gawaen moy anggaay nayarian mo! Tulongan to ka. Diad tua, impromisa to ya anggapoy “makapangisian ed sikatayo ed panangaro [to].”—Basaen so Roma 8:38, 39.
DAKEL NI NAARALAN MO
Amtaen no panon mon nalampasan iray makakasebel ed pampabautismom no kabaten mon maong si Jehova tan manpatulong ka ed sikato.
4. Kabaten ya maong si Jehova
Panon karakel so antam ed si Jehova antis kan nabautismoan? Dapat sikatoy nakabkabat mo ya anggad punton naar-arom tan labay mon napaliket. I-play so VIDEO pian naamtaan no antoy ginawa na saray manaaral na Biblia diad nanduruman bansa. Insan ebatan iya.
Diad video, antoy akatulong ed arum pian makapanparaan ira parad bautismo?
Basaen so Roma 12:2, insan ebatan iraya:
Kasin wala ray bangat na Biblia ya agka kombinsido? Parad sika, ibabangat kasi na Saray Tasi nen Jehova so katuaan?
No manaalangan ka, antoy gawaen mo?
5. Nalampasan mo iray makakasebel ed pampabautismo
Walan wala ray subok no mandesisyon tayon idedika so sarili tayo ed si Jehova tan manpabautismo. Pian nanengneng so sakey ya alimbawa, i-play so VIDEO, insan ebatan iraya.
Diad video, anto ray alampasan nen Narangerel ya akasebel ed panlingkor to ed si Jehova?
Panon ya akatulong so panangaro to ed si Jehova pian nalampasan to iratan ya makakasebel?
Basaen so Proverbio 29:25 tan 2 Timoteo 1:7, insan ebatan iya:
Anto ray mangiiter ed sikatayo na kasil na linawa pian nalabanan tayo iray makakasebel?
6. Mantiwala kan tulongan ka nen Jehova
Tulongan ka nen Jehova pian nagawaan moy labay to. I-play so VIDEO, insan ebatan iraya.
Diad video, akin et manaalangan so iyaaralan na Biblia ya manpabautismo?
Antoy naaralan to ya akatulong ed sikaton mas mantiwala ed si Jehova?
Basaen so Isaias 41:10, 13, insan ebatan iya:
Akin et nasarag mon tooren so promisam ya idedikam so sarilim?
7. Pisalamatan so panangaro nen Jehova
No nodnonoten mo so kaaralem na panangaro nen Jehova ed sika, mas labay mon pisalamatan tan tuloytuloy ya panlingkoran. Basaen so Salmo 40:5, insan ebatan iya:
Dinan ed saray bendisyon nen Jehova so pisalsalamatan mo?
Inar-aro nen propeta Jeremias si Jehova tan say salita to. Tan pisalsalamatan to so pribilehyon natawag ed ngaran nen Jehova. Imbaga to: “Nanggayaga tan nanliket so pusok lapud salitam, ta atawag ak ed ngaran mo, O Jehova a Dios.” (Jeremias 15:16) Ebatan iraya:
Akin et espisyal ya pribilehyo so magmaliw ya Tasi nen Jehova?
Labay moy nabautismoan bilang Tasi nen Jehova?
Walay makakasebel ed sika pian agka nabautismoan?
Antoy gawaen mo pian nabautismoan ka?
IBABAGA NA ARUM: “Maong lay agnabautismoan ta ompan agko lanlamang nagawaan iray impromisak.”
Ontan met so iisipen mo?
SUMARYO
Diad tulong nen Jehova, nalampasan mo so anggan anton makakasebel ed pampabautismom.
Rebyu
Panon karakel dapat so antam ed Biblia antis kan nabautismoan?
Anto ray kailangan mon umanen antis kan nabautismoan?
Akin et agka dapat manpatalo ed takot?
DISKOBRIEN
Aralen no antoy dapat ya basiyan na pampabautismo.
“Kasin Akaparaan Ka La ya Manpabautismo?” (Say Panag-bantayan, Marso 2020)
Aralen no panon mon nalampasan iray mairap ya situasyon ya makakasebel ed sika.
“Antoy Makasbel ed Pakabautismoan Ko?” (Say Panag-bantayan, Marso 2019)
Amtaen no panon ya alampasan na sakey a laki iray makakasebel ed sikato ya manpabautismo.
Nen unaan, manaalangan si Ataa ya manpabautismo. Amtaen no antoy akakombinse ed sikato ya gawaen iyan importantin desisyon.