LEKSION 37
No Antoy Ibabaga na Biblia Tungkol ed Trabaho tan Kuarta
Asalim lay naaburidon maong lapud trabaho odino kuarta? No maminsan, mairap ya napanbansag so pangasikaso ed saray pankaukolan tayo tan say panagdayew tayo ed si Jehova. Wala ray praktikal ya bilin ed Biblia ya makatulong ed sikatayo.
1. Antoy ibabaga na Biblia tungkol ed trabaho?
Labay na Dios ya na-enjoy tayoy mantrabaho. Ibabaga na Biblia ya “anggapo lay mas maabig ed sakey a too nen say . . . manliket ed pansasagpot to.” (Eclesiastes 2:24) Makulikuli si Jehova ya mankikimey. No aligen tayo tan mankuli tayo met ya mantrabaho, sikatoy napaliket tayo tan balibali liknaan tayo.
Importante so trabaho. Pero agtayo itan ipapasen ya mas importante nen say panagdayew tayo ed si Jehova. (Juan 6:27) Impromisa to ya no sikatoy iyuna tayo, itarya to iray nakaukolan tayo.
2. Antoy dugan pangipasen ed kuarta?
Ibabaga na Biblia ya “say kuarta et sakey a proteksion,” pero bibilinen to tayo met ya no puro kuarta labat, ag-itayo magmaliw a maliket. (Eclesiastes 7:12) Kanian agtayo dapat aroen so kuarta, imbes “mankontento [tayo] ed saray bengatlan walad [sikatayo].” (Basaen so Hebreo 13:5.) No mankontento tayo no antoy wala, agtayo abupburido ya anap lan anap na pambilay tan napaliisan tayoy nabaon ed utang. (Proverbio 22:7) Napaliisan tayo met so mansugal tan naingganyo ed biglan-yaman ya iyoopresi na arum.
3. Panon tayon nausar so kuarta tayo pian ontulong?
Si Jehova et maiter ya Dios tan sikatoy naalig tayo no “mabunlok [tayo], akaparaan a mangiter.” (1 Timoteo 6:18) Sarag tayon usaren so kuarta tayo pian suportaan so kongregasyon tan tulongan iray mankaukolan lalo la ray kaagian. Say nenengnengen nen Jehova et aliwan say kabaleg na iiter tayo, noagta say motibo tayo no mangiiter tayo. No manlapud puso so pangiiter tayo, magmaliw tayon maliket tan napaliket tayo si Jehova.—Basaen so Gawa 20:35.
DAKEL NI NAARALAN MO
Amtaen no anto ray gunggona no balanse tayo ed panagtrabaho tan kontento tayo.
4. Pagalangan si Jehova diad panagtrabahom
Nahalata ed panagtrabaho tayo no kasin kaaro tayo si Jehova. I-play so VIDEO, insan ebatan iraya.
Diad video, antoy agustoan mo ed ugali tan kakikiwas nen Jason diad trabaho to?
Antoy ginawa to pian amta ton ilugar so trabaho?
Basaen so Colosas 3:23, 24, insan ebatan iya:
Akin et importante ya dugay pangipasen tayo ed trabaho?
Importante so trabaho. Pero agtayo itan ipapasen ya mas importante nen say panagdayew tayo ed si Jehova
5. No kontento tayo, sikatayo lanlamang so nagunggonaan
Dakel ya totoo so tipon lan tipon na kuarta pian onyaman. Balet aliwan ontan so bilin na Biblia. Basaen so 1 Timoteo 6:6-8, insan ebatan iya:
Antoy ibibilin na Biblia ya gawaen tayo?
Anggano aliwa tayon mayaman, sarag tayo nin siansiay magmaliw ya maliket. I-play so VIDEO, insan ebatan iya.
Anggano aliwan mayaman irayan pamilya, akin et maliket ni ran siansia?
Panon to no anta walaan mo la et agka nin siansia mankontento? Walay ilustrasyon nen Jesus ya mangipapanengneng ya delikado itan. Basaen so Lucas 12:15-21, insan ebatan iya:
Antoy naaralan mo ed ilustrasyon nen Jesus? —Nengnengen so bersikulo 15.
Basaen tan pankomparaen so Proverbio 10:22 tan 1 Timoteo 6:10. Insan ebatan iraya:
Parad sika, dinan so mas importante, say pikakaaro ed si Jehova odino say dakel ya kuarta? Akin ey?
Anto ray magmaliw ya problema no anap ka lan anap na kuarta?
6. Itarya nen Jehova iray nakaukolan tayo
No walay problema tayo ed trabaho tan kuarta, nasubok so pananisia tayo ed si Jehova. I-play so VIDEO pian amta tayoy gawaen tayo no wala ray onian problema, insan ebatan iraya.
Diad video, anto ray problema na samay brother?
Antoy ginawa to pian nalampasan to ray problema to?
Basaen so Mateo 6:25-34, insan ebatan iya:
Antoy impromisa nen Jehova ya gawaen to parad saramay mangiyuuna ed sikato?
IBABAGA NA ARUM: “Kailangan koy mantrabaho pian nalegpet koy pamilyak. Kanian agko sarag ’tay sinimba-simban miaral.”
Anton teksto so akakombinse ed sika ya no iyunam si Jehova, lanang ya atan so dugan desisyon?
SUMARYO
Kailangan tayo so trabaho tan kuarta. Pero agtayo iratan ipapasen ya mas importante nen say panaglingkor tayod si Jehova.
Rebyu
Antoy gawaen mo pian balanse so pangipasen mod trabaho?
Akin et nagunggonaan ka no kontento ka?
Panon mon nipanengneng ya walay tiwalam ed promisa nen Jehova ya taryaan to ray totoo to?
DISKOBRIEN
Amtaen no kasin ibabaga na Biblia ya mauges so kuarta.
“Kasin say Kuarta et Lamot na Amin ya Kaugsan?” (Artikulo ed website)
Aralen no panon mon nausar so kuartam pian napaliket so Dios.
“Antoy Ibabaga na Biblia Nipaakar ed Pangiter?” (Artikulo ed website)
Kasin ayos labat ya pamalabasan na oras so sugal?
Amtaen no panon ya anguman so kabibilay na sakey ya matakew tan bisyo toy mipustaan.
“Agaylay Hilig Kod Karera na Kabayo” (Say Panag-bantayan-E, Nobyembre 1, 2011)