LEKSION 56
Pansiansiaen so Pankakasakey na Kongregasyon
No kaiba tayo ray agagi, nalilikna tayo may imbaga nen Arin David: “Agaylay abig tan makapaliket a saray sanaagi et saniiban manaayam a walay pankakasakey!” (Salmo 133:1) Walay kailangan ya gawaen na kada sakey pian mansiansia so pankakasakey ta aliwa itan ya automatiko.
1. Antoy sankaimano ed totoo na Dios?
No miaral kad arum ya lugar o bansa, ompan agmo natalosan so lenguahe da. Pero siansia nin komportable tan welcome ka. Akin ey? On ta anggan iner so kulaan tayo, aaralen tayo so Biblia tan uusaren tayo ray parehon publikasyon. Pansasagpotan tayo met ya aroen so sakey tan sakey. Anggan iner so panaayaman tayo, “ontawag [tayon] amin ed ngaran nen Jehova, tan mankakasakey [tayon] manlingkor ed sikato.”—Sofonias 3:9.
2. Panon kan makatulong pian napansiansia so pankakasakey?
“Manaaroan kayon maong manlapud puso.” (1 Pedro 1:22) Panon mon natumbok iyan bilin? Imbes ya manpokus ed lingo na arum, nengneng mo ray balibalin kualidad da. Tan imbes ya miulop ed saramay labalabay mo labat ya kaiba, salim ya kabaten iray agagi ya duma ed sika. Tan no bilang ta aliwan patas so panagtrato tayod arum, pansagpotan tayo met itan ya ekalen ed puso tayo.—Basaen so 1 Pedro 2:17.a
3. Antoy gawaen mo no walay agi ya agkayo akapantalosan?
Walay pankakasakey tayo, pero aliwa tayon perpekto. No maminsan, nadismaya o nasakitan tayoy sakey tan sakey. Kanian, bibilinen itayo na Salitay Dios ya “itultuloy [tayon] perdonaen so sakey tan sakey.” Insan imbaga to ni: “No panon a si Jehova et mabulos to kayon pinerdona, ontan met so gawaen yo.” (Basaen so Colosas 3:13.) Agtayo nabilang no aminpiga tayo lan asakitan si Jehova, pero peperdonaen to tayo nin siansia. Kanian iilaloan to ya perdonaen tayo met iray agagi tayo. No alikas mon walay asakitan mo, sika lay onasingger pian naayos yo.—Basaen so Mateo 5:23, 24.b
DAKEL NI NAARALAN MO
Amtaen iray paraan no panon kan makatulong pian mansiansia so pankakasakey tan deen na kongregasyon.
Antoy gawaen mo pian makapikareenan ka?
4. Tratoen ya patas so amin
Labay tayon aroen so amin ya agagi. Pero ompan nairapan tayon pibagayan so agi ya singa duma ed sikatayo. Antoy gawaen tayo? Basaen so Gawa 10:34, 35, insan ebatan iraya:
Aawaten nen Jehova so amin ya klase na totoo pian magmaliw ya Tasi to. Pian naalig moy Jehova, antoy pangipasen mo ed saramay duma ed sika?
Diad lugar yo, antoy nanenengneng mon aliwan patas ya panagtrato ya agmo labay ya aligen?
Basaen so 2 Corinto 6:11-13, insan ebatan iya:
Antoy gawaen mo pian mas naka-close mo iray agagi ya duma ed sika?
5. Mamerdona tan mikareenan
Akaparaan si Jehova ya mamerdona ed sikatayo anggano agtayon balot kailangan ya perdonaen ta agmet mankakasalanan. Basaen so Salmo 86:5, insan ebatan iraya:
Akin et makapabilib so panamerdona nen Jehova?
Akin et misalsalamat ka ed panamerdona to?
Anto ray situasyon ya nairapan tayon mibagay ed arum?
Panon tayon naalig si Jehova tan napansiansiay pankakasakey tayo ran sanaagi? Basaen so Proverbio 19:11, insan ebatan iya:
No asakitan odino asyodotan kad sakey, antoy gawaen mo pian agla ’tan napabaleg?
No maminsan, nasakitan tayoy arum. No ontan, antoy gawaen tayo? I-play so VIDEO, insan ebatan iya.
Diad video, antoy ginawa na sister pian makapikareenan?
6. Say nengneng mo et say kamaongan na agagi
No naka-close tayo ray agagi, nanengneng tayoy kamaongan tan kakapuyan da. Antoy gawaen tayo pian say pampokusan tayo et say kamaongan da? I-play so VIDEO, insan ebatan iya.
Antoy makatulong pian say nengnengen tayo et saray balibalin ugali na agagi tayo?
Say nenengnengen nen Jehova et saray maong ya kualidad tayo. Basaen so 2 Awaran 16:9a, insan ebatan iya:
Antoy naliliknam ta naamtaan mon say nenengnengen manaya nen Jehova et saray balibalin kualidad mo?
Anggan say balibalin diamante et wala ray gasgas tan lamat to, pero siansia nin mabmabli. Ontan met, amin ya agagi et aliwan perpekto, pero siansia nin mabmabli ira ed si Jehova
IBABAGA NA ARUM: “Agko ni perdonaen pian agnalamlaman!”
Akin et dapat tayon perdonaen so arum?
SUMARYO
Makatulong ka pian napansiansia so pankakasakey na kongregasyon no perdonaen tan aroen mo so amin ya agagi.
Rebyu
Antoy gawaen mo pian patas so pantratom ed amin?
Antoy gawaen mo no walay agi ya agkayo akapantalosan?
Akin et labay mon aligen si Jehova ya peperdonaen toy arum?
DISKOBRIEN
Aralen so sakey ed saray ilustrasyon nen Jesus ya makatulong pian agtayo husgaan so arum.
Man-sorry tayo kasi no pakalikna tayo et anggapo met so ginawa tayon aliwa?
“Ikerew na Dispensa—Tombok ed Pakapikareenan” (Say Panag-bantayan, Nobyembre 1, 2002)
Amtaen no panon ya naaralan na arum ya aghusgaan so kapara dan too.
Amtaen no antoy gawaen no walay agpantatalosan pian agnaderal so deen na kongregasyon.
“Resolbien Iray Agpantatalosan Panamegley na Aro” (Say Panag-bantayan, Mayo 2016)
a Pantongtongan ed Kaaruman ya Impormasyon 6 no panon ya lapud panangaro et iwasan na saray Kristiano ya naalisan so arum na makaalis ya sakit.
b Pantongtongan ed Kaaruman ya Impormasyon 7 no panon ya naareglo iray problema ed negosyo tan legal iran isyu.