LEKSION 44
Labay Kasi na Dios so Amin ya Selebrasyon?
Labay nen Jehova ya na-enjoy tayoy bilay tan manselebra sagpaminsan. Pero amin kasin selebrasyon tan holiday et labay to? No wala ray selebrasyon, panon tayon nipanengneng ya inaro tayoy Jehova?
1. Akin et dakel iray selebrasyon ya aglabay nen Jehova?
Ompan nabigla ka ya dakel iray selebrasyon ya aliwan base ed Biblia tan nanlapud pagano. Ompan saratan ya selebrasyon et nanlapud palson relihyon tan walay koneksion da ed espiritismo odino ed bangat ya imortal so kamarerwa. Say arum et walay laok dan anito o pamahiin tan panisia ed suerte. (Isaias 65:11) Bibilinen nen Jehova iray mandadayew ed sikato: “Isian yoy inkasikayo . . . tan agyo la didiwiten so marutak a bengatla.”—2 Corinto 6:17.a
2. Antoy nalilikna nen Jehova ed saray selebrasyon ya sobray panamagalang ed totoo?
Bibilinen itayo nen Jehova ya agtayo “manmamatalek ed saray totoo.” (Basaen so Jeremias 17:5.) Wala ray holiday ya papagalangan iray manuley odino sundalo. Say arum et selebrasyon na simbolo na bansa odino kalayaan. (1 Juan 5:21) Wala met iray selebrasyon ya ginawa na organisasyon na politika odino grupo na totoo. Anto kasi nalikna nen Jehova no sobray panamagalang tayo ed sakey a too odino organisasyon, lalo la imay onsusuporta ed ideya ya kontra ed panlabayan To?
3. Anto ran ugali tan kagagawa so aglabay nen Jehova diad saray selebrasyon?
Ibabaga na Biblia ya makapuy so “alabas a panag-inum na alak, mabanday a panliliket, [tan] paniinuman.” (1 Pedro 4:3) Wala ray selebrasyon ya alabas tan imoral so kagagawa na totoo. Pian mansiansia tayon kaaro nen Jehova, arawian tayo iratan ya marutak a kagagawa.
DAKEL NI NAARALAN MO
Amtaen no panon mon napaliket si Jehova diad saray desisyon mo ed holiday tan selebrasyon.
4. Paliisan iray selebrasyon ya agmamapagalang ed si Jehova
Basaen so Efeso 5:10, insan ebatan iraya:
Antoy seguradoen tayo no mandedesisyon tayo no kasin manselebra na holiday?
Anto ray maslak ya holiday ed lugar yo?
Parad sika, labay kasi iratan nen Jehova?
Singa bilang, anto kasi pangipapasen na Dios ed panselebra na birthday? Anggapoy nabasa ed Biblia ya lingkor nen Jehova ya nanselebra na birthday. Pero walay nabasa ditan ya duaran nan-birthday ya agmandadayew ed sikato. Basaen so Genesis 40:20-22 tan Mateo 14:6-10. Insan ebatan iraya:
Antoy pamparehoan na sarayan impanselebra na birthday?
Base ed sarayan salaysay na Biblia, antoy pangipapasen nen Jehova ed birthday?
Pero ompan siansia nin itepet mo, ‘Importante ni kasi ed si Jehova no mi-birthday ak odino mila ak ed saray selebrasyon ya kontra ed Biblia?’ Basaen so Exodo 32:1-8. Tan i-play so VIDEO, insan ebatan iraya.
Akin et seguradoen tayo no antoy makapaliket ed si Jehova?
Panon tayon seguradoen itan?
No panon tayon naamtaan ya aglabay na Dios so sakey ya selebrasyon
Kasin kontra itan ed ibabangat na Biblia? Pian naamtaan, imbestigaan so nanlapuan to.
Kasin sobray panamagalang ed too, organisasyon, odino simbolo na bansa? Si Jehova so manunan papagalangan tayo tan sikatoy pantitiwalaan tayo ya mangekal ed problema na mundo.
Kasin saray kustombre tan kagagawa ed satan et kontra ed estandarte na Biblia? Kailangan ya mansiansia tayon malinis ed moral.
5. Tulongan so arum ya respetoen day papanisiaan mo
Ompan mairap mon tanggian so arum no piliten da kan mila ed saray selebrasyon ya aglabay nen Jehova. Maanos tan marespetom ya ipaliwawa so desisyon mo. Pian nanengneng so sakey ya alimbawa no panon mon gawaen iya, i-play so VIDEO.
Basaen so Mateo 7:12, insan ebatan iraya:
Base ed sayan teksto, ibagam kasi ed saray aliwan mananisian kapamilyam ya ag-ira dapat manselebra na holiday?
Antoy gawaen mo pian anggano agka mila ed selebrasyon na kapamilyam et nipaliknam ya inar-arom tan papablien mo ra?
6. Labay nen Jehova ya maliket tayo
Labay nen Jehova ya na-enjoy tayon nakaiba iray kapamilya tan kakaaro tayo. Basaen so Eclesiastes 8:15, insan ebatan iya:
Panon ya ipapanengneng na sayan teksto ya labay nen Jehova ya maliket tayo?
Labay nen Jehova ya maliket iray totoo to tan na-enjoy day manuulop. I-play so VIDEO pian nanengneng ya sankapatnagan iya ed saray internasyonal a kombension mi.
Basaen so Galacia 6:10, insan ebatan iraya:
Kailangan ni kasin selebraan iray holiday pian nibagan manggagawa itayo na “maabig” ed arum?
Anton klase na panangiter so mas makapaliket ed sika—samay obligado ka lapud walay holiday, odino mangiter ka lapud labay mo?
No maminsan, manggagawa iray Tasi na get-together parad ananak da, tan mangiiter ni ra ingen na surpresan regalo ed sikara. No wala ray anak mo, anto ray espisyal ya gawaen mo parad sikara?
IBABAGA NA ARUM: “Agla importante ’tay nanlapuan na holiday, ta pankanawnawan nakaiba iray kapamilya tan kakaaro.”
Antoy ibagam ey?
SUMARYO
Labay nen Jehova ya na-enjoy tayon nakaiba iray kapamilya tan kakaaro tayo. Pero labay to met ya paliisan tayo ray selebrasyon ya agmakapaliket ed sikato.
Rebyu
Anto ray itepet tayo pian naamtaan no kasin labay nen Jehova so sakey a selebrasyon?
Anto ray gawaen tayo pian natalosan na kapamilya tan kakaaro tayo so desisyon tayo nipaakar ed holiday?
Panon mon amta ya labay nen Jehova ya maliket ka tan na-enjoy moy miulop ed arum?
DISKOBRIEN
Amtaen iray holiday ya agseselebraan na saray Kristiano.
“Akin et Agseselebraan na Saray Tasi nen Jehova Iray Arum ya Holiday?” (Artikulo ed website)
Amtaen so apatiran rason no akin ya manisia kami ya aglabay na Dios ya selebraan so birthday.
“Akin et Agmanseselebra na Birthday Iray Tasi nen Jehova?” (Artikulo ed website)
Nengnengen no panon ya napaliket na saray kabataan si Jehova no wala ray holiday.
Minilyon ya Kristiano so nandesisyon ya agselebraan so Krismas. Maliket ira kasi ed satan ya desisyon da?
“Walay Nalmo Da ya Mas Maabig” (Say Panag-bantayan-E, Disyembre 1, 2012)
a Nengnengen so Kaaruman ya Impormasyon 5 pian naamtaan no antoy gawaen mo no wala ray holiday.