Manmatalek ed si Jehova—Say Dios na ‘Saray Panaon tan Tiempo’
“Uumanen to iray panaon tan saray tiempo, eekalen to iray arari tan tuturoen to iray arari.”—DAN. 2:21, NW.
PANON MON EBATAN?
Panon ya ipapanengneng na saray pinalsa tan asumpal iran propesiya a si Jehova so Agnaparaan a Manangigeter na Panaon?
No talagan manisia tayo a si Jehova so Dios na ‘saray panaon tan tiempo,’ antoy gawaen tayo?
Akin a say inggeter a panaon nen Jehova et agnaapektoan na saray nagagawad mundo tan plaplanoen na totoo?
1, 2. Akin a naseguro tayon sigpot ya amta nen Jehova so panaon?
ABAYAG la antis nin palsaen nen Jehova a Dios so too, inter to lay basiyan no panon a bilangen so panaon. Diad komapat ya agew na impamalsa, inkuan na Dios: ‘Onlesa komon so saray silesilew dia ed katawenan a mangibiig na agew ed labi; tan sikara so pinagkatanda nipaakar ed saray [tiempo] tan nipaakar ed saray agew tan taon.’ (Gen. 1:14, 19, 26) Agawa iratan unong ed linawa nen Jehova.
2 Balet, anggad natan et agnipaliwawa na saray sientista no anton talaga ’tay panaon. Inkuan na sakey ya encyclopedia: “Say panaon et sakey ed saray makapawetwet ya misteryo ed mundo. Anggapoy makapangibaga no anto itan.” Balet sigpot ya amta itan nen Jehova. Sikato so “Manamalsa na katawenan, . . . say Nanggawa ed dalin tan say Amorma ed satan.” Sikato met so “mangibabaga ed pansumpalan manlapud gapo, tan saray bengatlan agni agawa manlapu la nensaman.” (Isa. 45:18; 46:10, NW) Pian ombiskeg so pananisia tayod sikato tan ed Salita to, say Biblia, pantongtongan tayo no panon a saray pinalsa, tan asumpal a propesiya so mamaneknek a si Jehova so Agnaparaan a Manangigeter na Panaon.
MAMABISKEG NA PANANISIA IRAY PINALSA
3. Panon a napatnagan ed saray pinalsa so suston timing?
3 Napatnagan ed saray pinalsa nen Jehova, melag man o baleg, so suston timing. Singa bilang, agmanguuman so kapeles na pan-vibrate na atoms. Saray espisyal a relo ya mibabansag ed vibration na atoms et agnaaatrasado anggan sakey a segundo labat diad loob na 80 milyon a taon. Ontan met, eksakto so itetelek na saray planeta tan igagalaw na bitewen. Saraya so pangibabasian no antoy tiempo, tan uusaren met iraya parad direksion. Talagan “mabiskeg ed pakayari” si Jehova—say Nanggawa ed sarayan napanmatalkan a “relo”—kanian sikatoy makanepegan ya idayew tayo.—Basaen so Isaias 40:26.
4. Panon a napatnagan so karunongan na Dios ed suston timing na saray mabilay a pinalsa?
4 Naimano tayo met so suston timing ed saray mabilay a pinalsa. Alimbawa, walay singa nisipor a “relo” ya tutumboken na dakel a tanaman tan ayayep. Saray manok et sipor lan amta da no kapigay iyalis dad arum a lugar. (Jer. 8:7) Anggan saray totoo et walaan met na nisipor a “relo,” amtay laman tayo no agew odino labi la. No manbiahe tayo panamegley na eroplano paonlad lugar a sananey so oras, nayarin pigay agew nin man-adjust so laman tayod balon oras. Talagan dakel a pinalsa so mamaneknek ed pakayari tan karunongan na Dios na ‘saray panaon tan tiempo.’ (Basaen so Salmo 104:24.) On, say Agnaparaan a Manangigeter na Panaon et sankarunongan tan sankamakapanyarian, kanian makapanmatalek tayon nayarian ton sumpalen so linawa to!
MAMABISKEG NA PANANISIA IRAY PROPESIYAN ASUMPAL ED EKSAKTON PANAON
5. (a) Panon tayon naamtaay nagawad totoo diad arapen? (b) Akin a nayarian nen Jehova ya ipasakbay so nagawad arapen tan say panaon ya pakagawa na satan?
5 Dakel so naaralan tayod saray pinalsa nen Jehova nipaakar ed “agnanengneng a kualidad” to, balet agda naebatan iray importantin tepet a singa say, Antoy nagawad totoo diad arapen? (Roma 1:20) Pian naebatan tayo itan, kaukolan ya aralen tayoy Salita na Dios, say Biblia. Nabasa tayo ditan iray dakel a propesiyan asumpal ed eksakton panaon. Sarasarag nen Jehova ya ipasakbay iratan ta walay pakayari ton amtaen no antoy nagawad arapen. Ontan met, eksaktoy pakakagawa na saratan a propesiya lapud nayarian nen Jehova ya imaneobra iray bengatla pian nasumpal so gagala to diad mismon panaon ya inggeter to.
6. Panon tayon naseguro ya labay nen Jehova ya natalosan tayo ray propesiyan walad Biblia?
6 Labay nen Jehova ya natalosan na saray managdayew to iray propesiyan walad Biblia tan minabang ed saratan. Anggaman dumay panmoria na Dios ed panaon, no ipapasakbay toy nagawa diad espisipikon panaon, sikatoy manguusar na saray terminon natalosan tayo. (Basaen so Salmo 90:4.) Singa bilang, abitlad libro na Apocalipsis so “apatiran anghel, ya akaparaan la parad satan ya oras tan agew tan bulan tan taon,”—panagbilang na panaon a natalosan tayo. (Apo. 9:14, 15) No naamtaan tayo no panon ya asumpal ed eksakton panaon iray propesiya, ombiskeg so pananisia tayod say Dios na ‘saray panaon tan tiempo’ tan ed Salita to. Pantongtongan tayo so pigaran alimbawa.
7. Panon a say impakasumpal na propesiya nen Jeremias nipaakar ed Jerusalem tan Juda et mangipanengneng ya si Jehova so Agnaparaan a Manangigeter na Panaon?
7 Unona, pawilen tayoy agawa nen komapiton siglo B.C.E. “Dia ed komapat a taon nen Joacim ya anak a laki nen Josias, ari ed Juda,” say salita na Agnaparaan a Manangigeter na Panaon, “sinmabi ed Jeremias nipaakar ed amin a baley na Juda.” (Jer. 25:1) Impasakbay nen Jehova so kaderal na Jerusalem tan say pangawit ed saray Judio diad Babilonia. Diman et ‘manlingkor irad ari na Babilonia ed pitomplo a taon.’ Nen 607 B.C.E., dineral na saray sundalo na Babilonia so Jerusalem tan saray Judio et inawit ed Babilonia. Balet antoy nagawa kayari na 70 taon? Impasakbay nen Jeremias: ‘Onia so kuan nen Jehova, kasumpal na pitomplo a taon a nipaakar ed Babilonia, dalawen ta kayo naani et gawaen ko naani so maong a salitak ed sikayo, dia ed pangipawil ko ed sikayo ed saya a pasen.’ (Jer. 25:11, 12; 29:10) Asumpal iyan propesiya diad eksakton panaon—nen 537 B.C.E., sanen imbulos na Medo-Persia iray Judio manlapud Babilonia.
8, 9. Panon a saray propesiya nen Daniel nipaakar ed isabi na Mesias tan kiletneg na Panarian ed tawen et mangipanengneng a si Jehova so Dios na ‘saray panaon tan tiempo’?
8 Nengnengen tayoy sakey nin propesiya nipaakar ed totoo na Dios nensaman. Manga duay taon antis ya tinmaynan iray Judio ed Babilonia, impasakbay na Dios panamegley nen propeta Daniel a say Mesias et onsabi 483 a taon kayarin impakseb so ganggan ya ipaalagey lamet so Jerusalem. Impakseb na ari na Medo-Persia itan a ganggan nen 455 B.C.E. Kayari na eksakton 483 a taon, nen 29 C.E., si Jesus a taga Nazaret et alanaan na masanton espiritu sanen abautismoan tan nagmaliw ya Mesias.a—Neh. 2:1, 5-8; Dan. 9:24, 25; Luc. 3:1, 2, 21, 22.
9 Imanoen tayoy impasakbay na Biblia nipaakar ed Panarian. Ipapatnag na propesiya ya iletneg ed tawen so Mesianikon Panarian diad taon 1914. Alimbawa, inter na Biblia so “tanda” na kiwawala nen Jesus, tan lapud ibantak si Satanas diad dalin, onlesa so dakel a problema. (Mat. 24:3-14; Apo. 12:9, 12) Ontulong met iray arum a propesiya pian naamtaan tayoy eksakton panaon no kapigan asumpal iray “aturon panaon na saray nasyon” tan nagmaliw ya Ari si Kristo ed tawen. Agawa itan nen 1914.—Luc. 21:24; Dan. 4:10-17.b
10. Anto ran ebento so seguradon nagawa ed eksakton panaon?
10 Asingger lan onsabi so “baleg a kairapan” ya impasakbay nen Jesus. Insan onsublay ed satan so Sanlibon Taon ya Uley to. Seguradon nagawa iratan diad eksakton panaon. Sanen wadiad dalin si Jesus, inggeter la nen Jehova so “agew tan oras” no kapigan iratan nagawa.—Mat. 24:21, 36; Apo. 20:6.
“ANAMOT YO SO KADA PANKANAWNAWA”
11. No talagan manisia tayon manbibilay tayo lad panaon na anggaan, antoy nepeg tayon gawaen?
11 Lapud amta tayon Ari la si Kristo tan manbibilay tayo lad “panaon na anggaan,” antoy nepeg tayon gawaen? (Dan. 12:4, NW) Naiimano na dakel ya onuuges lan onuuges so kipapasen na mundo, balet agda natatalosan ya sarayan nagagawa et kasumpalan na propesiya ed Biblia nipaakar ed kaunoran iran agew. Nayarin iisipen na arum ya anggapo lay solusyon ed sarayan problema. Maniilalo balet so arum ya sarag ni na toon pawalaen so “kareenan tan kaligenan.” (1 Tes. 5:3) Sikatayo balet ey? No talagan manisia tayon asingsingger lan manampot so mundo nen Satanas, agta nepeg ya usaren tayoy panaon tayo pian manlingkor ed Dios na ‘saray panaon tan tiempo’ tan tulongan so arum ya sikatoy nakabat da? (2 Tim. 3:1) Kaukolan sirin a makabat tayon usaren so panaon tayo.—Basaen so Efeso 5:15-17.
12. Antoy naaralan tayod imbaga nen Jesus nipaakar ed panaon nen Noe?
12 Aliwan mainomay ya ‘anamoten so kada pankanawnawa’ diad mundon napno na pakaabalaan. Impasakbay nen Jesus ya “singa ed saray agew nen Noe, ontan met naani ed kiwawala na Anak na too.” Anto ta so kipapasen ed panaon nen Noe? Imbaga na Dios ed si Noe ya say mundo ed panaon to et mangangga. Saray mauges ya totoo et nalener ed delap ya nagawad interon dalin. Bilang “managpulong na inkatunong,” matoor ya impulong nen Noe so mensahe na Dios ed saray totoo diad panaon to. (Mat. 24:37; 2 Ped. 2:5) Balet “saray totoo et nan-aakan tan naniinum, angasawa ra tan akiasawa ra, . . . tan ag-ira nanimano ya anggad sinmabi so delap tan niyanor iran amin.” Kanian pinasakbayan nen Jesus iray papatumbok to: ‘Paneknekan yo ya akaparaan kayo, lapud diad oras ya agyo iisipen et onsabi so Anak na too.’ (Mat. 24:38, 39, 44) Kaukolan sirin ya aligen tayoy Noe, aliwan saramay totoo ed panaon to. Antoy makatulong ed sikatayo pian makapansiansian akaparaan?
13, 14. Antoy nepeg tayon tandaan nipaakar ed si Jehova a makatulong pian matoor tayon makapanlingkor ed sikato legan tayon aalagaren so isabi na Anak na too?
13 Anggaman say Anak na too et onsabi ed oras ya agtayo iisipen, tandaan ya si Jehova so Agnaparaan a Manangigeter na Panaon. Anggan antoy nagawad mundo odino plaplanoen na too, sarag nen Jehova ya kontrolen no kapigan nagawa iray bengatla tan no anto ray resulta na saratan pian nasumpal so linawa to. (Basaen so Daniel 2:21.) Diad tua, ibabagad sikatayo na Uliran 21:1: “Say puso na ari wala ed lima nen Jehova a singa saray agus, sikato so ikiling to ed anggan iner a labay to.”
14 Nayarian nen Jehova ya kontrolen iray bengatla pian nasumpal so gagala to diad eksakton panaon. Maslak ed saray baleg a pananguman ed mundo et kasumpalan na saray propesiya, lalo lad saray propesiya nipaakar ed panagpulong ed maong a balita na Panarian na Dios diad interon mundo. Isipen pay inkaapag na Soviet Union tan say resulta na satan. Ag-inilaloan na dakel ya nayarin biglan nagawa iray ontan kabaleg a pananguman ed saray gobierno. Balet lapud saratan ya pananguman, nipupulong la natan so maong a balita ed dakel a bansa ya datin sebel so kimey tayo. Kanian anamoten tayo so kada pankanawnawa pian matoor a makapanlingkor ed Dios na ‘saray panaon tan tiempo.’
MANMATALEK A SUMPALEN NEN JEHOVA SO GAGALA TO DIAD DUGAN PANAON
15. Panon tayon nipanengneng so panagmatalek no nipaakar ed saray pananguman ya gagawaen na organisasyon?
15 Pian nitultuloy tayoy panagpulong a kimey ed sarayan kaunoran ya agew, nepeg tayon manmatalek a sumpalen nen Jehova so gagala to diad dugan panaon. Lapud manguuman so situasyon na mundo, no maminsan et kaukolan tayo met ya umaney paraan na panagpulong tayo. Wala ray pankanawnawan manggagaway pananguman so organisasyon pian epektibo tayon nipulong so maong a balita. Nipanengneng tayoy panagmatalek ed Dios na ‘saray panaon tan tiempo’ diad sigpot ya pikoopera ed saratan a pananguman legan a manpapasakop ed Anak to, say “ulo na kongregasyon.”—Efe. 5:23.
16. Akin a makapanmatalek tayon iter nen Jehova so tulong sano mankaukolan tayo?
16 Labay nen Jehova ya manpikasi tayod sikato ed anggan anton oras tan sigpot a manmatalek ya iter toy tulong “sano mankaukolan itayo.” (Heb. 4:16) Agta ipapatnag na satan so panangiyansakit tod kada sakey ed sikatayo? (Mat. 6:8; 10:29-31) Nipanengneng tayoy panagmatalek ed si Jehova a Dios diad regular a pampikasi parad tulong to tan onkiwas unong ed pikakasi tayo tan ed panangigiya to. Agtayo met lilingwanan ya ilaktip ed pikakasi tayo iray agagi.
17, 18. (a) Antoy magano lan gawaen nen Jehova ed saray kabusol to? (b) Anton patit so kaukolan tayon panalwaran?
17 Aliwa iyan panaon pian ‘onkapuy ed pananisia,’ imbes natan so panaon pian magmaliw a mabisbiskeg ed pananisia. (Roma 4:20) Saray kabusol na Dios—si Satanas tan saray ontutumbok ed sikato—et manasalin patundaen so kimey ya ingganggan nen Jesus a gawaen tayo. (Mat. 28:19, 20) Anggaman aatakien itayo na Diablo, amta tayon si Jehova et “mabilay a Dios, a Manangilaban ed amin a klase na totoo, nagkalalo la ed saray matoor.” Amta to “no panon ton iliktar ed subok iray maridios a totoo.”—1 Tim. 4:10; 2 Ped. 2:9.
18 Magano lan panganggaen nen Jehova iyan mauges a sistema na mundo. Agtayo amtan amin so detalye tan say eksakton oras no kapigan itan nagawa. Balet seguradon diad dugan panaon et deralen nen Kristo iray kabusol na Dios, tan niyalangon so soberanya nen Jehova. Kanian, talagan mapeligro no ibaliwala tayo no antoy ipapatnag na ‘saray panaon tan tiempo’ ya pambibilayan tayo! Agtayo komon napatitan na panag-isip ya “pareho nin siansia so amin a bengatla manlapu la nen apalsa so mundo.”—1 Tes. 5:1; 2 Ped. 3:3, 4.
MAANOS A MANALAGAR
19, 20. Akin a kaukolan tayoy maanos a manalagar ed si Jehova?
19 Kaibad orihinal a gagala na Dios parad totoo so agmanganggan panaon na panaral nipaakar ed sikato tan ed marakdakep iran pinalsa to. Oniay ibabaga na Eclesiastes 3:11: “Ginawa to so balang bengatla a marakep ed panaon to: ontan met, impasen to so kaandoan ed puso ra, anggan ontan say too agto natontonan so gawa a ginawa na Dios a manlapu ed gapo angga ed sampot.”
20 Malikeliket tayo ta ag-inuman nen Jehova so gagala to parad too. (Mal. 3:6) Say Dios et “agmanguuman-uman, ya aliwan singa say anino ya onggagalaw.” (Sant. 1:17) Manguuman so anino lapud itetelek na mundo, balet agnaapektoan si Jehova ed satan. Si Jehova et “Ari ed andi-anggaan.” (1 Tim. 1:17) Kanian maanos tayon ‘manalagar ed Dios na kilalaban tayo.’ (Miq. 7:7) On, ‘manpabiskeg tayo, tan panliketen tayo so puso tayo, sikatayon amin a manilalod si Jehova.’—Sal. 31:24.
[Saray paimano ed leksab]
a Nengnengen so libron Anto so Peteg ya Ibabangat na Biblia? pahina 197-199.
b Nengnengen so libron Anto so Peteg ya Ibabangat na Biblia? pahina 215-218.
[Litrato ed pahina 19]
Nanmatalek si Daniel ya nasumpal iray propesiyan nanlapud Dios
[Litrato ed pahina 21]
Kasin makabat mon uusaren so panaon pian gawaen so linawa nen Jehova?