Wala Kasi Ondedengel ed Pikakasi?

“Nensaman, singa panisiaan kon andi ya walay Dios. Balet siansia nin manpipikasi ak no arum. Agak segurado no walay ondedengel ed siak, pero ibabagak ed sarilik ya wala komon. Maer-ermen ak tan anggapoy kana na bilay ko. Agko aminen ya manisia ak ed Dios ta say amtak et saray makapuy a klase na totoo labat so manisiad Dios.”​—PATRICIA,a IRELAND.

ONTAN met so pakaliknam? Kasin manpipikasi ka anggano agka seguradon walay Dios? Agka mapaga ta agmo bukbukor. Isip mo pa ya.

◼ Diad saray 2,200 a British ya sinurvey, 22 percent labat so manisian walay Dios ya nanggawad mundo tan ondedengel ed pikakasi. Balet, 55 percent ed sikara so sagpaminsan a manpipikasi.

◼ Diad saray 10,000 a totoo ya sinurvey ed nanduruman bansa, 30 percent ed saramay mangibabagan ateista [odino agmanisian walay Dios] so manpipikasi lanlamang.

Akin et Manisia Ran Andi?

Imbaga nen Allan a taga-England: “Lanang kon ibabaga nensaman ya agak manisiad Dios ta say amtak et inimbento so relihyon pian nakontrol tan nakatkatan so totoo. Sakey ni, inisip kon no walay Dios, di anggapo komoy kaugsan. Balet no bukbukor ko, agko naam-amtaan ya kakatongtongen koy sakey a ‘bengatla.’ Itetepet ko met ed sarilik, ‘Panon kasin linmesay too?’”

Walay kanya-kanyan rason na totoo no akin ya manisia ran agnaeebatan iray pikakasi ra. Kaslakan a mamapaloor ed satan et saray agnaebatan a tepet, a singa saraya:

◼ Wala kasi Dios a nanggawad sikatayo?

◼ Akin et mabetbet ya aliway impluensya na relihyon?

◼ Akin et aabuloyan na Dios so paniirap?

No naamtaan moy ebat ed saraya, kasin mas matalek ka lan manpikasi?

[Paimano ed leksab]