Tepet na Saray Manbabasa . . .

Akin ya Ingganggan na Dios Iray lingkor To ya Miasawa Labat ed Saray Kapananisiaan Da?

▪ Diad samay Ganggan ya inter na Dios ed bansan Israel, kaiba iyan ganggan ya tutukoyen to iray bansan akapaliber ed sikara: “Agka miaasawa ed sikara naani; agmo iiter naani bii ya anak mo ed laki ya anak to, odino agka naani mangaala na bii ya anak to ya iyasawa ed laki ya anak mo.” (Deuteronomio 7:3, 4) Akin ya imbawal itan na Dios?

Amta nen Jehova ya lapud labay nen Satanas ya ibalang iray totoo To, uusaren toy panagdayew ed palson dirios. Kanian impasakbay na Dios ya saray agmananisia et “paarapen to ed sananey so anak mo a laki pian ag-ontumbok ed siak, pian manlingkor ira ed sananey a dirios.” Baleg so nayarin epekto na satan. No mandayew so Israel ed arum a dirios, naandi so panangabobon tan proteksion na Dios ed sikara, tan mainomay la ran natalo na saray kalaban da. No ontan, panon ya napawala na bansa so insipan ya Mesias? Malinlinew sirin so rason no akin et labay nen Satanas ya patitan iray Israelita ya miasawad saray agmananisia.

Tandaan ya papablien na Dios so balang sakey ed saray totoo to. Amta ton magmaliw labat a maliket so sakey no maapit so relasyon tod Dios. Duga labat kasi ya manpaga si Jehova ed makapuy ya impluensya na agmananisian asawa? Isipen pay agawad si Arin Solomon. Amta to so pasakbay nen Jehova nipaakar ed saray agmananisian asawa: “Papawilen da so puso yo ya ontumbok ed saray dirios da.” Lapud masyadon makabat, nayarin inisip ton agto kaukolan itan a simbawa na Dios. Kanian imbaliwala to. Antoy resulta ey? “Saray asawa to pinapawil da so puso to ya ontumbok ed saray dirios da.” Agaylan trahedya! Naandi so panangabobon nen Jehova ed si Solomon, tan apaldua iray uuleyan to lapud agto impanmatoor.​—1 Arari 11:2-4, 9-13.

Nayarin ikatunongan balet na arum ya depende ’tan ed kaso. Alimbawa, inasawa na Israelitan si Mahalon so Moabitan si Rut, a nagmaliw ya managdayew ed si Jehova. Balet mapeligro so piasawad Moabitan bibii. Ag-indayew si Mahalon lapud impangasawa to na Moabitan bii. Sikatoy asakbay ya inatey, nayarin antis nin nagmaliw ya managdayew nen Jehova si Rut. Say agi nen Mahalon ya si Kelion et inasawa toy Moabitan si Orpa, ya agtinmaynan ed saray “dios to.” Balet si Boaz et inasawa toy Rut nen pigay taon lan mandadayew ed si Jehova. Diad tua, tinukoy si Rut na saray Judio ya “sankaabigan ya proselita.” Say impangasawa nen Rut tan Boaz et nagmaliw a bendisyon ed sikaran dua.​—Rut 1:4, 5, 15-17; 4:13-17.

Kanian duga kasin ikatunongan ya saray alimbawan singa si Mahalon tan Rut et mangipapatnag ya aliwan makatunongan so ganggan nen Jehova ya miasawa labat ed kapananisiaan? Isipen pa, agta say ontan ya panagkatunongan et singa pangibagan lapud analoy jackpot so sakey a sugarol et maabig lan pananap na pambilay so panagsugal?

Sisimbawaen na Biblia iray Kristiano natan ya miasawa “dia labat ed Katawan.” Papasakbayan to itayon ‘agmikakasakey ed saray agmananisia.’ Satan ya simbawa et parad saray tuan Kristiano ya manaanap na kapareha. Diad saramay akiasawa lad agmananisia, mangiiter so Biblia na makatulong iran simbawa pian nagawaan day anggaay nayarian dan magmaliw a maliket anggano mairap so situasyon. (1 Corinto 7:12-16, 39; 2 Corinto 6:14) Amin iratan a simbawa so mangipapanengneng a labay nen Jehova a Dios, say Manangigapo na panangasawa, a magmaliw itayon maliket bilang managdayew to​—balanglan walay asawa o anggapo.