Pambiahe Kaiba Iray Pilgrim

“AGKON talaga sarag so mankabkaabungan!” Satan so imbaga na sakey ya eksperiensyadon managpaliwawa tan managbangat na Biblia, a tatawagey pilgrim. Ontan met so alikna na saray balon estudyante na Biblia nipaakar ed panagkabkaabungan.

Dakel ed saray manbabasa na Zion’s Watch Tower ya anaynan ed relihyon da et malabay a miulop ed saramay totoon manaanap met na katuaan. Pinaseseg na sayan magasin iray managbasa ya anapen iramay manaanap met na katuaan tan miulop ed sikara diad panaral na Biblia. Nanlapu nen manga 1894, angibaki so Watch Tower Society na saray ombiabiahen ministro ya ag-abayag et atawag ya pilgrim pian bisitaen iray grupon mankaukolan na tulong. Sarayan lalaki et eksperiensyado, makukuli, mauyamo, walaan na dakel a kakabatan ed Biblia, maong a manpaliwawa tan manbangat, tan matoor ed dondon. Maslak et sakey odino duaran agew so ibibisita ra. Dakel ed Saray Estudyante na Biblia et akasali na sankaunaan ya impanpulong sanen imbunog da ray imbitasyon parad publikon paliwawa na sakey a pilgrim. Sakey a labi, kayari na paliwawa tod sakey ya eskuelaan, si Hugo Riemer a nagmaliw ya membro na Mananguley ya Ulop et angebat ed saray tepet nipaakar ed Biblia anggad palbangon. Sikatoy naksawan balet maliket ton imbagan “marakdakep” iman ya miting.

Imbaga na The Watch Tower a say “manunan gagala” na ibisita na saray pilgrim et pian pasesegen iray “kapananisiaan” panamegley na saray miting diad abung na saray mananisia. Saray Estudyante na Biblia a walad asingger iran lugar et inmatendi ed saray paliwawa tan tepet tan ebat iran sesyon. Diad satan et nagmaliw met a maparawes iray agagi. Say ugaw a biin si Maude Abbott et inmatendid paliwawa ed kabuasan, kayari na satan et nandurungo so amin ed sakey ya andukey a lamisaan. “Dakel iray masarap a naakan​—walay ham, fried chicken, nanduruman tinapay, pie, tan cake! Naksel iran amin, tan sanen manga alas-dos lad ngarem, nantitipon kami lamet parad sananey a paliwawa.” Balet inamin ton, “Diad saman et mantemeg kami lan amin.” Oniay imbaga na abayag lan pilgrim a si Benjamin Barton: ‘No kinan kon amin so ipaparungo dad siak, anganko abayag ak lan inatey.’ Ag-abayag walay sulat manlapud headquarters ed Brooklyn ya mangibabagan mas maabig no mangitarya labat iray agagi na “simplin naakan ed sanagew” tan “maabig a pampainawaan.”

Marundunong iray pilgrim a manbangat tan mangusar na saray tsart, model, odino antokaman ya nausar da pian mabilabilay so pampaliwawa ra. Saray paliwawa nen R. H. Barber et “talagan makapainteres.” Si W. J. Thorn et “manpapaliwawa a singa saray patriarka nensaman.” Sakey ya agew, legan ya akalugan si Shield Toutjian ed Model A Ford, imbaga ton, “itundam!” Inmepas ed kotse, amungsil na pigaran rosas, tan tampol ton impaliwawad saray kakaiba to so nipaakar ed saray palsa nen Jehova.

Dakel so subok ed kimey na saray pilgrim, lalo lad saramay maedad la. Balet parad arum, say sankairapan et say pananguman ed kimey da. Kaukolan da lan idaulo so pampulong ed kabkaabungan. Imbaga na Marso 15, 1924 ya isyu na Watch Tower a “say manunan kimey” na saray tuan Kristiano et “say pangipulong ed panarian. Nibaki iray pilgrim parad sayan gagala.”

Balet wala ray pilgrim ya agmalabay ed pananguman, tan tinaynan day panagbiahen kimey. Wala ni ra ingey nanggaway dilin grupo ra. Nanonotan ni nen Robie D. Adkins imay imbaga na sakey a pilgrim ya maong a manpaliwawa: “Say amtak labat et say pampulong ed entablado. Agkon talaga labay so mankabkaabungan!” Onia ni inyarum nen Brother Adkins: “Say tinmumbok lan impakanengneng kod sikato et diad kombension ed Columbus, Ohio, nen 1924. Pakaskasi itsura to ya akasirum ed melag a kiew tan sikatoy sankaermenan ed limog na nilibon malikeliket ya agagi. Manlapud saman et agko la anengneng. Tan ag-abayag et tinaynan toy organisasyon.” Balet, “dakel iray agagin mangaawit na saray libro diad luluganan da,” a mapatpatnag a maliket iran mankabkaabungan.​—Gawa 20:20, 21.

Anggaman namparan saray pilgrim a mangipasal tan saramay ipapasal da et mannerbiyos ed panagkabkaabungan, dakel ed sikara so angipapuso ed kimey da. Oniay insulat nen Maxwell G. Friend, sakey a pilgrim a mansasalitay German nipaakar ed panagkabkaabungan: “Sayan kabiangan na kimey na pilgrim so mangaarum na liket ed biahe.” Inreport nen John A. Bohnet a dakel ya agagi so malikeliket ya inmabobon ya say pangipulong na Panarian et importante. Imbaga to nin dakel ed saray agagi et “mandarlang so seseg da diad pagmaliw dan walad unaan na sayan guerra.”

Diad dakel a taon, sarayan matoor ya ombiabiahen brother et nagmaliw a maabig ya alimbawa ed saray agagi. Oniay imbaga na abayag lan Tasi a si Norman Larson: “Anggan sanen ugaw ak ni, amtak a talagan makapaseseg irayan pilgrim. Atulongan da ak ya tumboken so dugan dalan.” Anggad panaon tayo, sarayan matoor tan masakripisyon ombiabiahen manangasikaso et ontutulong ed saray agagi ya mangibagan, “Sarag mi mankabkaabungan!”

[Blurb ed pahina 32]

Talagan makapaliket no wadia ray pilgrim!

[Litrato ed pahina 31]

Si Benjamin Barton et binmisita ed 170 ya lugar nen 1905

[Litrato ed pahina 32]

Si Walter J. Thorn et sakey a pilgrim a kabkabat bilang Pappy lapud makaama tan singa Kristo ya ugali to

[Litrato ed pahina 32]

Si J. A. Browne et nibakid Jamaica nen 1902 bilang pilgrim pian pabiskegen tan pasesegen so 14 ya angkelag a grupo

[Litrato ed pahina 32]

Say kimey na saray pilgrim et amabiskeg ed pananisia, amaelet ed Kristianon pankakasakey, tan amaapit ed saray agagi diad organisasyon