Akin ya Manpipikasi Iray Totoo?

Kasin naynay kan manpipikasi? Dakel so manpipikasi, pati ingen arum ya ateista. Balet akin ya manpipikasi iray totoo? Unong ed sakey ya survey ed France, kapalduad saray French et sagpaminsan a manpipikasi odino mandadalepdep “pian labat onlemew so liknaan da.” Singa ed arum nin tagad Europe, manpipikasi ira aliwan pian dayewen so Dios, noagta pian labat “naliknay makapainawan epekto na pikakasi.” Say arum balet ya manisiad Dios et manpipikasi labat no walay kaukolan da, tan iilaloan dan naebatan ya tampol iray kerew da.​—Isaias 26:16.

Sika balet ey? Kasin iisipen mon say pikakasi et paraan labat pian natulongan kan makapannonot na duga? No manisia kad Dios, kasin naliliknam ya makakatulong ed sika so pikakasi? Odino pakaliknam et singa agnaeebatan iray pikakasim? Natulongan ka na Biblia a natalosan ya say pampikasi et aliwa labat lan pian onlemew so liknaan mo, noagta sakey itan ya importantin paraan pian onapit kad Dios.