Kasin say Kiew ya Binatang et Onsimit Lamet?

NO IKOMPARAD ataragey ya sedro na Lebanon, say kiew ya olibo et agnaimano ta abebbeba tan pikewet so sengeg to. Balet say makapadinayew ed kiew ya olibo et ag-ompatey anggano aliwliway panaon. Wala ray olibo ya asabi da lay 1,000 taon. Araldalem so nasabi na lamot na kiew ya olibo, tan nabilay lamet anggano binatang lay sengeg to. Basta mabilay ni lamot to, onsimit lamet itan.

Si Job et kombinsido ya anggano ompatey, nabilay lamet. (Job 14:13-15) Inusar ton ilustrasyon so kiew pian ipanengneng so talek tod pakayari na Dios ya mamaolid sikato. Nayarin say kiew ya olibo so tutukoyen to nen imbaga to: “Anggan say kiew et walay ilalo to. No batangen itan, onsimit lamet.” Anggano namagaan so sengeg na kiew ya olibo lapud abayag ya anggapoy uran, siansia nin onsimit so lamot to no onuran lamet, tan “mansanga a singa balon tubo a tanaman.”​—Job 14:7-9, NW.

No panon ya labalabay na manag-asikaso ya nanengneng ya onsimit lamet so lamot na binatang ya kiew ya olibo, labalabay met nen Jehova ya bilayen lamet iray inatey ya lingkor to ontan met ed arum. (Mat. 22:31, 32; Juan 5:28, 29; Gawa 24:15) Talagan makapalikliket ya abeten iray napaolin inaatey tan nanengneng ya panliliketan da lamet so bilay!