“Mas Maseseg tan Mas Baleg so Panangaron Nalilikna Mi nen Say Dati”

AMPETAPETANG lay klima ed saman ya Biernes na kabuasan nen Setyembre 1922 legan ya manseseksekan ed auditorium so 8,000 ya totoo. Inyanunsio na chairman ya legan na sayan importantin sesyon, nayarin ompaway ed hall so anggan siopa, balet agla nayarin onloob lamet.

Diad unonan parte na programa ya “Praise Service” et angansion ira, kayari to et inmalagey ed entablado si Joseph F. Rutherford. Dakel ed saray inmatendi et akayurong tan eksayted ya manatalaran. Walay pigaran agmakareen tan akar-akar lapud petang. Kinerew na espiker ya onyurong tan ondengel ira. Nen ginmapo lay paliwawa, wala kasi akaimano ed baleg ya telan akarolyo tan akasabit ed tagey?

Impaliwawa nen Brother Rutherford so teman “Asingger lan onsabi so panarian na tawen.” Diad loob na sakey tan kapalduan oras, say maksil a boses to et sankarengel ed interon hall legan ton ipapaliwawa no panon ya makpel ya inyabawag na saray propeta nensaman so isabi na Panarian. Nen manampot lay paliwawa to, intepet to, “Manisia kayo a say Ari na gloria et ginmapo lan manuley?” Inmebat iray inmatendi ed maksil a boses: “On!”

“No ontan, pawil kayo ed lawak, O sikayon ananak na sankatagyan a Dios!” so imbaga nen Brother Rutherford. “Nia, say Ari et manuuley la! Sikayo ray manangiyabawag to. Kanian iyabawag, iyabawag, iyabawag.”

Diad saman et balibali imbuskag na samay akarolyon tela ed tagey, ya walay akasulat ya: “Advertise the King and Kingdom.”

“Malikeliket iray inmatendi,” so nanonotan nen Ray Bopp. Deneskribe nen Anna Gardner no panon ya “minmayegmeg iray tabla ed atep lapud makmaksil ya tipak.” “Nambabansag ya inmalagey so amin ya inmatendi,” kuan nen Fred Twarosh. Imbaga nen Evangelos Scouffas: “Singa walay mabisbiskeg ya angiguyor ed sikami manlapud yurongan mi, tan inmalagey kami tan managagus iray lua ed mata mi.”

Dakel ed saray inmatendi ed kombension so mangipupulong la na maong a balita na Panarian. Balet natan et mas binmiskeg ira ta walay balon gagala ra. Imbaga nen Ethel Bennecoff ya saray Estudyante na Biblia et inmalis ira ya “mas maseseg tan mas baleg so panangaron nalilikna [ra] nen say dati.” Si Odessa Tuck, ya 18 so taon tod saman, et inmalis ed kombension ya determinadon onebat ed tawag ya “Siopa so onla?” Imbaga to: “Agko amta no iner o no panon o no anto. Say amtak labat et labay kon aligen si Isaias, ya kuan to: ‘Wadia ak! Ibaki mo ak!’” (Isa. 6:8) Imbaga nen Ralph Leffler: “Saman ya agnalinglingwanan ya agew so talagan gapoan na kampanyan pangiyabawag ed Panarian, ya natan et gagawaen lad interon mundo.”

Agla pankelawan ya sayan kombension nen 1922 diad Cedar Point, Ohio, et importantin maong ed history na Saray Tasi! Imbaga nen George Gangas: “Lapud saman ya kombension, agko labay so onabsent ed anggan anton kombension.” Tan anggapoy nanonotan to ya agto naatendian. Insulat nen Julia Wilcox: “Agko nadeskribe so liket ko kada nabasak ed literatura tayo so nipaakar ed Cedar Point 1922. Lanang kon ibabaga, “Salamat, Jehova, ta inyabuloy mon wadman ak.’”

Ontan met, dakel ed sikatayo natan so walaan na ontan iran agnalinglingwanan ya eksperiensya ed kombension ya nanliketan tayon maong tan amaseseg ed sikatayo tan amaaralem na panangaro tayod maomaong a Dios tayo tan say Arin pinili to. No nanonotan tayo iratan, napakiwas itayo met ya ibaga, “Salamat, Jehova, ta inyabuloy mon wadman ak.”