“Itultuloy Yon Gawaen Iya” Say Memoryal a Selebraan no Abril 5
1. Akin ya importante so panselebra ed Memoryal?
1 “Itultuloy yon gawaen iya bilang pakanodnonotan ed siak.” (Luc. 22:19) Diad saman ya imbaga nen Jesus, ingganggan to ray papatumbok to ya selebraan so impatey to. Lapud amin ya agawaan na dondon, anggapo lay mas importantin agew parad saray Kristiano noagta say tinaon ya panselebrad Memoryal. Legan a manasingger so panselebra no Abril 5, panon tayon ipanengneng so pisasalamat tayod si Jehova?—Col. 3:15.
2. Panon tayon nipanengneng ya papablien tayoy Memoryal diad panagaral tan panagdalepdep?
2 Manparaan: Pamparaanan tayo ray bengatlan ipapasen tayon importante. Niparaan tayoy puso tayo parad Memoryal diad panaral tayo bilang pamilya ed saray agawad sampot iran agew na bilay nen Jesus diad dalin, tan diad pandalepdep ed saratan. (Esd. 7:10) Nanengneng diad kalendaryo tan ed Usisaen so Kasulatan ya Inagew-agew iray arum a teksto ya pakabasaan, balet ta say mas kompleton listaan tan no anton kapitulo ed libron Greatest Man so pakabasaan et nanengneng diad pahina 23-24 na Pebrero 1, 2011, ya isyu na The Watchtower.
3. Panon tayon nipanengneng so apresasyon tayod Memoryal diad pangarum na pibibiang tayod ministeryo?
3 Manpulong: Nipanengneng tayo met so apresasyon tayo diad sigpot a pibiang ed ministeryo. (Luc. 6:45) Onggapo so sankamundoan ya kampanya tayon imbitaan so arum ed Memoryal no Sabado, Marso 17. Sarag mo kasin i-adjust so eskedyul mo pian mas dakel so panaon mod ministeryo, nayarin bilang auxiliary payunir? Anto kasi no pantongtongan yo itan diad onsublay ya Panagdayew na Pamilya yo?
4. Anto ray gunggona tayo diad panselebray Memoryal?
4 Talagan nagugunggonaan itayo ed iyaatendi tayod Memoryal kada taon! Mas naarumay liket tan panangaro tayod si Jehova legan tayon dadalepdepen so mabulos ya impangiter tod bogbogtong ya Anak to bilang dondon. (Juan 3:16; 1 Juan 4:9, 10) Napakiwas itayon manbilay ya aliwa lan parad sarili tayo. (2 Cor. 5:14, 15) Nawalaan itayo met na pilalek ya idayew si Jehova ed publiko. (Sal. 102:19-21) Talagan tatalaranan la na saray misalsalamat ya lingkor nen Jehova so pankanawnawan ‘iyabawag so impatey na Katawan’ diad panselebra na Memoryal no Abril 5.—1 Cor. 11:26.