Tuloytuloy ya Kerewen so Panangabobon na Dios Diad Pikakasi

Inikdan na Dios iray totoo na nikadkaduman regalo​—say abilidad ya mitongtong tan ibalikas ed sikato iray nalilikna da panamegley na pikakasi. Oniay impikasi nen propetan si David: “O Dumerengel na pikakasi, onasingger ed sika so amin a klase na totoo.” (Salmo 65:2) Balet, panon so pampikasi tayo pian dengelen tan bendisyonan itayo na Dios?

MAPAABEBAN ONKEREW, IMPAPUSON MANPIKASI

Diad saray pikakasi tayo, sarag tayon ibalikas ed Dios so amin a walad puso tayo​—pian ibaga so tuan nalilikna tayo. (Salmo 62:8) Papablien na Makapanyarin-Amin a Dios iray pikakasi tayo ya nanlapud puso.

MANPIKASI ED DIOS YA USAREY NGARAN TO

Anggano dakel so titulo na Dios, wala labat so saksakey ya ngaran to. “Siak si Jehova. Saya so ngaran ko.” (Isaias 42:8) Say ngaran ya Jehova et manga 7,000 a beses ya nabasa ed Masanton Kasulatan. Inusar na dakel ya propeta so ngaran na Dios diad saray pikakasi da. Imbaga nen Abraham: “Jehova, ipangasim, . . . abuloyan mo ak pa nin mansalita.” (Genesis 18:30) Kaukolan tayo met ya usaren so ngaran na Dios, ya Jehova, no manpipikasi tayo.

SARAG MOY MANPIKASI ED SARILIM YA LENGUAHE

Natatalosan na Dios iray nononoten tan nalilikna tayo, antokaman so lenguahe tayo. Oniay ipapaseguro na Salita to: “Anggapoy lalabien na Dios, noagta diad balang nasyon et makapaliket ed sikato so toon ontatakot ed sikato tan manggagaway duga.”​—Gawa 10:34, 35.

Balet, pian bendisyonan itayo na Dios, aliwan manpikasi labat so nepeg tayon gawaen. Diad onsublay iran artikulo, amtaen tayo no anto ni ray nepeg tayon gawaen.