Aligen so Inkaseseg nen Jesus ed Panagpulong

1. Antoy sakey ya pidumaan tayo ran lingkor nen Jehova ed saray mankuankuanan ya Kristiano?

SAY sakey ya pidumaan tayo ran lingkor nen Jehova ed saray mankuankuanan ya Kristiano et say sesega tayon manpulong. (Tito 2:14) Pero nasasalim met may no maminsan et natatabangan kan manpulong? Seguro pareho kayoy nalilikna na sakey ya makulikulin elder ya oniay inamin to: “No maminsan, anggapoy ganak ya manpulong.”

2. Akin ya no maminsan et nababawasay seseg tayon manpulong?

² Ompan mas nai-enjoy tayoy arum ya klase na panaglingkor nen say manpulong. Akin kasi? On ta no manboboluntaryo tayod panagpaalagey o panagmintinay Kingdom Hall, no ontutulong tayod saray agagin apektadoy kalamidad, odino no papasesegen tayo ray agagi, nanengneng tayon tampol so balibalin epekto na impansagpot tayo kanian naliliketan tayo. Diad ontan iran situasyon, sankalikna tayoy panangaro na agagi, balibali ulopan tayo, tan amta tayo ya aapresyaen da iray gagawaen tayo parad sikara. Diad panagpulong balet, anggano pigay taon ti lan pawilpawil ed teritorya tayo, ompan ngalngali anggapoy nanenengneng tayon maabig ya resulta na pansasagpot tayo. Wala ni ingen iray arum ya pabaingan da tayo. Tan amta tayo ya legan tayon manasingger ed anggaan, mas dakel ni onkontra ed pampupulong tayo. (Mat. 10:22) Anto sirin so makatulong pian napansiansia tayoy seseg tayo tan lalo tayon onkuli ed panagpulong?

3. Antoy naaralan tayo ed si Jesus diad samay ilustrasyon ed Lucas 13:​6-9?

³ Makaaral tayod alimbawa nen Jesus. Nen wadia nid dalin, masetseseg tan makulikulin nampulong. Diad tua, legan ya ombabayag so ministeryo to, diman met mas amaspasya ed panagpulong. (Basaen so Lucas 13:​6-9.) Diad sakey ya ilustrasyon, inkompara nen Jesus so sarili to ed sakey ya managkimey ed kaubasan ya taloy taon ya nansagpot pian napabaleg toy sakey a kiew ya igos. Pero anggan panoy impansagpot to, agan balot nambunga may kiew ya igos. Singa ontan met so agawad si Jesus. Taloy taon ton pinulongan iray Judio, balet pigpigara labat so nagmaliw ya disipulo to. Pero singa samay managkimey ed kaubasan ya agto sinukoan imay kiew ya igos ta inisip to ya onsabi lanlamang so panaon ya manbunga itan, agmet sinukoan nen Jesus iray Judio. Pinulongan to ni ran siansia. Diad katuaan to, nansagpot ya maong pian nasabi toy puso ra.

4. Antoy apatiran aralen tayo nipaakar ed si Jesus?

⁴ Aralen tayo ed sayan artikulo so inkaseseg nen Jesus ed panagpulong, lalo lad samay sampot ya anem bulan na ministeryo to diad dalin. (Nengnengen so study note na Lucas 10:1 ya “Pagkatapos nito” diad nwtsty-TG.) No aralen tayo ray imbangat to tan aligen tayoy ginawa to, ag-onkapuy so seseg tayo diad ministeryo. Pantongtongan tayo sirin so apatiran naaralan tayo ed si Jesus: (1) Inyuna tod bilay to so panlabayan nen Jehova, (2) tinalosan tan impapuso to iray propesiya ed Biblia, (3) nantiwala ya tulongan nen Jehova, tan (4) nansiansian positibo ya walan-walay ondengel ed sikato.

INYUNA TOD BILAY TO SO PANLABAYAN NEN JEHOVA

5. Panon ya impanengneng nen Jesus ya inyuna tod bilay to so panlabayan nen Jehova?

⁵ Makulikulin impulong nen Jesus so “maong a balita na Panarian” ta amta to ya atan so labay nen Jehova ya gawaen to. (Luc. 4:43) Say panagpulong so sankaimportantian ed bilay nen Jesus, kanian anggano asingger lan manampot so ministeryo to diad dalin, linma nin siansia ed “kada syudad tan kada baryo” pian bangatan iray totoo. (Luc. 13:22) Tan impasal to met ya manpulong so arum nin disipulo to.—Luc. 10:1.

6. Antoy koneksion na kimey ya panagpulong ed arum ya responsabilidad tayod organisasyon? (Nengnengen met so litrato.)

⁶ Diad panaon tayo, siansia ni ya say pangipulong na maong a balita so manunan kimey ya ipapagawa nen Jehova tan Jesus ed sikatayo. (Mat. 24:14; 28:​19, 20) Antokaman so kaaruman ya responsabilidad tayod organisasyon nen Jehova, walan-walay koneksion to ’tan ed panagpulong. Singa bilang, manpapaalagey tayoy Kingdom Hall pian walay lugar ya pandayewan na saray napupulongan tayo. Saray kimey ed Bethel tan arum nin pasilidad tayo et susuportaan toy kimey ya panagpulong. No walay agawan kalamidad, seseguroen tayo ya niiter so pankaukolan na saray apektadon agagi pian nagawaan da lamet so espiritual ya rotina da, singa say pipiaral tan panagpulong. No lanang tayon tandaan ya say panagpulong so manunan kimey ya ipapagawa nen Jehova ed sikatayo, mas napakiwas tayon manpulong ya lanang. Oniay imbaga nen János, sakey ya elder ed Hungary: “Naynay kon papanonotan so sarilik ya anggan anto tay responsabilidad kod organisasyon, aliwa itan ya kasalat na panagpulong. Say manunan asainmin tayo et manpulong.”

7. Akin et labay nen Jehova ya ituloy tayo labat so pampupulong tayo? (1 Timoteo 2:​3, 4)

⁷ Mas onseseg tayod ministeryo no say pakanengneng tayod totoo et pareho ed pakanengneng nen Jehova ed sikara. Labay to ya anggad posible et dakel nin totoo so makaamta tan mangawat ed maong a balita. (Basaen so 1 Timoteo 2:​3, 4.) Atan ya mensahe so makapangiliktar ed bilay da. Kanian ipapasal to tayo pian mas magmaliw tayon epektibo ed panagpulong. Singa bilang, intarya na organisasyon to so brosyur ya Aro Yoy Totoo—Manggawa na Disipulo. Nabasa ed satan ya brosyur iray suhestion no panon tayon mitongtong ed saray totoo ya anggad naiyaralan tayo la ray Biblia tan magmaliw met iran disipulo nen Jesus. Panon to balet no pulong tayo lan pulong pero agda lanlamang aawatey mensahe tayo? Tandaan tayo ya wala nin siansiay tsansa dan onkiwas anggad agni sinmabi so Armagedon. Kanian ituloy tayo labat so pampupulong tayo ed saray totoo. Agla pigan amay imbaga tayod sikara natan so mamakiwas ed sikaran manguman tan manlingkor met ed si Jehova diad arapen.

TINALOSAN TAN IMPAPUSO TO IRAY PROPESIYA ED BIBLIA

8. Lapud kabisado tan impapuso nen Jesus iray propesiya ed Biblia, antoy epekto to ’tan ed sikato?

⁸ Inaral nen Jesus iray propesiya ed Biblia tan tinalosan to no panon iratan ya nasumpal. Kanian amta to ya talora tan kapalduan taon labat so pampulong to diad dalin. (Dan. 9:​26, 27) Kabisado to met iray propesiya no kapigan tan no panon so ipatey to. (Luc. 18:​31-34) Impapuso nen Jesus iratan ya propesiya, kanian anggapoy sinayang ton panaon. Amaspasya ed ministeryo to ta labay ton nasumpal itan ya ipapagawa nen Jehova ed sikato.

9. Akin et mas onseseg tayon manpulong no talosan tan ipapuso tayo iray propesiya ed Biblia?

⁹ No talosan tan ipapuso tayo iray propesiya ed Biblia, lalo tayon onseseg ed ministeryo. Amta tayo ya asingsingger lan naderal iyan sistema. Akin et ontay nibaga tayo? On ta nanenengneng tayod ugali na saray totoo tan ed saray nagagawa ed mundo natan ya aya la may kaunoran iran agew ya impropesiyay Biblia. Lapud impanaral tayod propesiya, atalosan tayo met ya say ari na abalaten et say alyansa na Britanya tan Amerika. Tan say ari na amianen et say gobierno na Russia tan saray kaalyado to. Impropesiya na Biblia ya manlaban ira “diad panaon na anggaan,” tan nagagawa la itan natan. (Dan. 11:40) Atalosan tayo met ya amay sali na imahen ya nabasad Daniel 2:​43-45 et ontutukoy ed alyansa na Britanya tan Amerika. Kanian atan la so sampot ya world power. Asingsingger la sirin ya deralen na Panarian na Dios so amin ya gobierno na too. Amin irayan propesiya et patunay ya antiktikey lay nakekeran panaon tan asingsingger lay anggaan. Samboten tayo sirin so manpulong!

10. Anto ni ran propesiya ed Biblia so mamapakiwas ed sikatayon mamasyan manpulong?

¹⁰ Onkuli tayon manpulong no isipen tayo ni ray arum ya propesiya ed Biblia. Oniay imbaga nen Sister Carrie ya manlilingkor ed Dominican Republic: “No iisipen ko ray balibalin gawaen nen Jehova diad arapen, napapakiwas ak ya ibaga met itan ed arum. No nanenengneng koy paniirap na totoo lapud karakel na problema da, naiisip ko ya kaukolan dan naamtaan no anto ray gawaen nen Jehova parad sikara.” Ipapanonot met na saray propesiya ed Biblia ya agtayo dapat manaalangan no manpupulong tayo ta kimey itan nen Jehova. Oniay imbaga nen Leila ya tagad Hungary: “Kada no iisipen ko may walad Isaias 11:​6-9, ombibiskeg so liknaan ko ya ipulong so maong a balita anggan diad saramay totoon singa aga mangawat. Amtak ya anggan anto ni tay itsura o kipapasen na sakey ya too, sarasarag toy manguman diad tulong nen Jehova.” Onia met so imbaga nen Christopher ya tagad Zambia: “Nasusumpal la may propesiya ed Marcos 13:10 ya nipulong so maong a balita ed interon mundo. Ituturing kon baleg a pribilehyo ya walay naitutulong ko pian nasumpal iyan propesiya.” Sika ey? Anto ran propesiya ed Biblia so mamapakiwas ed sikan mamasyan manpulong?

NANTIWALA YA TULONGAN NEN JEHOVA

11. Pian ag-ontakot ya manpulong si Jesus tan mansiansiay seseg to, akin et kaukolan toy mantiwala ed si Jehova? (Lucas 12:​49, 53)

¹¹ Kaukolan nen Jesus so mantiwala ed si Jehova pian ag-ontakot ya manpulong tan mansiansiay seseg to. Amta to ya dakel so onsyodot tan onkontra ed pangipupulong toy maong a balita, anggano maomaong tan marespetoy pitotongtong tod sikara. (Basaen so Lucas 12:​49, 53.) Diad tua, aminpigan sinali na saray lider na relihyon ya pateyen si Jesus lapud pampupulong to. (Juan 8:59; 10:​31, 39) Pero aga ataktakot si Jesus. Intuloy to labat so nampulong ta amta ton kaiba toy Jehova. Kuan to: “Agko bukbukor, noagta kaibak so Ama ya angibaki ed siak. . . . Agto ak pinaulyanan a bukor, ta naynay kon gagawaen iray makapaliket ed sikato.”—Juan 8:​16, 29.

12. Anto ray imbaga nen Jesus ed saray disipulo to pian ag-onkapuy so seseg da anggano wala ray onkontra tan manpairap ed sikara?

¹² Binilin nen Jesus iray disipulo to ya lanang iran mantiwala ed si Jehova. Aminpiga to ran pinaseguroan ya tulongan ira nen Jehova no wala ray onkontra tan manpairap ed sikara lapud pampupulong da. (Mat. 10:​18-20; Luc. 12:​11, 12) Pero binilin to met ira ya kaukolan day manalwar. (Mat. 10:16; Luc. 10:3) Binagaan to ra ya agda ipipilit so mensahe na Panarian ed saramay agda labay so ondengel. (Luc. 10:​10, 11) Tan no walay panamasegsegang, imbaga to ya ombatik irad arum ya lugar. (Mat. 10:23) Ontan ya mismoy ginawa nen Jesus. Tua ya walay tiwala tod si Jehova tan masetseseg ed ministeryo, pero agto impalaran so bilay to.—Juan 11:​53, 54.

13. Akin et makapantiwala ka ya talagan tulongan ka nen Jehova?

¹³ Dakdakel met so onkokontra ed sikatayo natan. Kanian kaukolan tayoy tulong nen Jehova pian mansiansiay seseg tayo ed panagpulong. (Apo. 12:17) Akin et makapantiwala ka ya talagan tulongan ka nen Jehova? On ta impikasi ka la nen Jesus. Nabasa itan ya pikakasi to diad Juan kapitulo 17. Kinerew tod si Jehova ya bantayan To ray apostol to. Kasin inebatan nen Jehova itan ya kerew nen Jesus? On! Nabasa ed libro na Gawa ya tinulongan To ray apostol ya mamasyan manpulong anggano dakel so onkokontra ed sikara. Pero diad bersikulo 20, kasin naimanom ya impikasi met nen Jesus ya bantayan met komon nen Jehova iramay manisia ed maong a balita? On, impikasi la nen Jesus iray magmaliw ya disipulo to diad arapen! Lapud inawat mo so maong a balita, kaiba kad satan! Anggad natan et eebatan nin siansia nen Jehova iman ya pikakasi nen Jesus. Kanian mantiwala ka ya tulongan To ka no panon ya tinulongan To iray apostol nensaman.—Juan 17:​11, 15, 20.

14. Akin et makapantiwala tayo ya anggapoy makapanpatunda ed sikatayo ya manpulong? (Nengnengen met so litrato.)

¹⁴ Legan ya manasingger so anggaan, seguradon mas nairapan tayon ipulong so maong a balita. Pero impaseguro nen Jesus ya iter toy tulong ya kaukolan tayo. (Luc. 21:​12-15) Singa si Jesus tan saray disipulo nensaman, agtayo papasooten iray totoo ya ondengel ed mensahe tayo, tan iiwasan tayoy midebati ed sikara. Wala ray lugar ya bawal so kimey tayo, pero makakapanpulong nin siansia iray agagi ta manmamatalek irad si Jehova, aliwan diad sarili da. No panon ya pinabiskeg nen Jehova iray Kristiano nen inmunan siglo, papabiskegen to tayo met natan pian ‘sigpot tayon nasumpal so panagpulong’ anggad ibaga to ya duga la. (2 Tim. 4:17) On, basta mantiwala kad si Jehova, anggapoy makapanpatunda ed sika ya manpulong.

NANSIANSIAN POSITIBO

15. Antoy patunay ya nansiansian positibo si Jesus ed ministeryo to?

¹⁵ Matalek si Jesus ya walan-wala ray ondengel ed sikato. Lapud nansiansian positibo, agnaandi so liket tan seseg to ed panagpulong. Antoy patunay ya nansiansian positibo si Jesus? Diad bandad sampot na 30 C.E., nen anengneng nen Jesus ya madengedengel iray totoo ed ipupulong to, inkompara toy teritorya to ed kaumaan ya akaparaan la parad panag-ani. (Juan 4:35) Kalabas na manga sakey taon, oniay imbaga tod saray disipulo to: “Dakel so aanien.” (Mat. 9:​37, 38) Insan nen 32 C.E., onia lamet so imbaga to: “Dakel so aanien . . . Mikasi kayo sirin ed Katawan na panag-ani a mangibaki na saray mankimey ed aanien to.” (Luc. 10:2) On, nansiansian positibo si Jesus, tan agaylay liket to kada no walay mangawat ed maong a balita.—Luc. 10:21.

16. Anto ran ilustrasyon so imbaga nen Jesus ya akatulong ed saray disipulo to pian mansiansia ran positibo ed ministeryo? (Lucas 13:​18-21) (Nengnengen met so litrato.)

¹⁶ Tinulongan nen Jesus iray disipulo to ya mansiansia met ya positibo ed ministeryo da, ta amta to ya no mansiansia ran positibo, aga nabalang so seseg da. Imanoen so duaran ilustrasyon ya imbaga tod sikara. (Basaen so Lucas 13:​18-21.) Inkompara nen Jesus so mensahe na Panarian ed melmelag ya bukel na mustasa ya tinmubo tan nagmaliw ya baleg a kiew. Labay ton ibaga, onsabi panaon ya dakdakel so mangawat ed mensahe na Panarian tan anggapoy makapanpatunda ed satan. Inkompara to met so mensahe na Panarian ed lebadura o pampaalsa. Labay ton ibaga, magangganon onkayat so mensahe na Panarian tan walan-walay epekto to ’tan ya nayarin agtayon tampol naimano. Imbaga nen Jesus irayan ilustrasyon pian ipaseguro ed saray disipulo to ya dakel so natulongan da no ipulong day mensahe na Panarian.

17. Antoy isipen tayo pian mansiansia tayon positibo ed ministeryo?

¹⁷ Lalo tayon onseseg no isipen tayoy karakel na totoo ya natutulongan tayo lapud pampupulong tayo. Kada taon, milyon-milyon ya interesado so onaatendi ed Memoryal tan manpapaiyaral na Biblia ed sikatayo. Libo-libo met so manpapabautismo tan mimila ed sikatayon manpulong. Agtayo amta no pigara ni so mangawat ed mensahe na Panarian. Basta say amta tayo, titiponen la nen Jehova natan so baleg ya ulop ya makaliktar ed baleg a kairapan. (Apo. 7:​9, 14) Si Jehova so Katawan na panag-ani, tan diad pakanengneng to, dakdakel ni so aanien. Kanian ituloy tayo labat so manpulong.

18. Antoy labay tayon naimano na saray totoo ed sikatayo?

¹⁸ Talagan kabkabat iray disipulo nen Jesus lapud seseg da ya manpulong. Nen anengneng na totoo ya makmakpel ya nampulong iray apostol, “abidbir da . . . a kakaiba ira nen Jesus.” (Gawa 4:13) Komon ta nanengneng met na totoo natan so seseg tayod ministeryo tan nabirbir da ya tuan papatumbok itayo nen Jesus lapud aaligen tayoy alimbawa to.