Itultuloy Moy Manakar Unong ed Pananisia

1. Akin et asut-sulit nen apostol Pablo so impanbilay to?

NEN amta la nen apostol Pablo ya asingger da lan pateyen, oniay imbaga to: “Sinumpal ko anggad sampot so pilulumbak ed batik, tinumbok koy pananisia.” (2 Tim. 4:​6-8) Nanengneng tayod satan ya imbaga nen Pablo ya asut-sulit toy bilay to. Anggapon balot so pagbabawian to ed samay desisyon to ya usarey bilay to parad si Jehova, tan amta tod sarili to ya makakaliket si Jehova ed sikato. Singa si Pablo, labay tayo met ya duga iray desisyon tayo pian napaliket tayoy Jehova. Anto sirin so gawaen tayo pian duga iray desisyon tayo?

2. Antoy labay ya ibaga na panakar unong ed pananisia?

² Oniay imbaga nen Pablo ya ginawa to tan na arum nin matoor ya Kristiano: “Manaakar itayo unong ed pananisia, aliwan unong ed pakanengneng.” (2 Cor. 5:7) Antoy labay ton ibaga? Diad Biblia, say salitan ‘panakar’ et ontutukoy met no maminsan ed kabibilay na sakey ya too. No say sakey ya too et manaakar unong ed pakanengneng, saray desisyon to et akabase labat ed nanenengneng, narerengel, tan nalilikna to. Diad kabaliktaran balet, no say sakey ya too et manaakar unong ed pananisia, iisipen to ni no antoy panlabayan nen Jehova antis ya mandesisyon. Uunoren to ray bilin ed Biblia ta amta to ya parad pankaabigan to lanlamang iratan, tan baleg so tiwala to ya bendisyonan nen Jehova no ontan so gawaen to.—Sal. 119:66; Heb. 11:6.

3. Anto ray balibalin resulta no manakar tayo unong ed pananisia? (2 Corinto 4:18)

³ No maminsan, kaukolan tayo met ya ibase iray desisyon tayo ed nanenengneng, narerengel, tan nalilikna tayo. Pero no ditan tayo labat ibase iray desisyon tayo, baleg so posibilidad ya manproblema tayo, lalo la no importante tan seryoson bengatla so desisyonan tayo. Akin ey? On ta aliwan lanang ya duga tan napanmatalkan iray nanenengneng, narerengel, tan nalilikna tayo. Tan ompan aratan laingen so rason ya ibaliwala tayo lay panlabayan tan bilin nen Jehova. (Ecl. 11:9; Mat. 24:​37-39) Pero no manakar tayo unong ed pananisia, mas baleg so posibilidad ya saray desisyon tayo et “makapaliket ed Katawan.” (Efe. 5:10) No unoren tayo ray bilin nen Jehova, mareen so nonot tayo tan nalikna tayoy tuan liket. (Sal. 16:​8, 9; Isa. 48:​17, 18) Tan no itultuloy tayoy manakar unong ed pananisia, manbilay tayo na andi-anggaan.—Basaen so 2 Corinto 4:18.

4. Panon tayon nibaga no kasin say sakey et manaakar unong ed pananisia odino unong ed pakanengneng?

⁴ Panon mon nibaga no kasin manaakar ka unong ed pananisia odino unong ed pakanengneng? Simpli met labat. Tepetan moy sarilim: ‘Iner ko ibabase iray desisyon ko? Kasin mandedepende ak labat ed no antoy nanenengneng ko? O manpapaigiya ak ed si Jehova tan uunoren ko ray bilin to?’ Pantongtongan tayo ed sayan artikulo no panon tayon tuloytuloy ya makapanakar unong ed pananisia diad taloran situasyon: no manaanap kay trabaho, no labay mo lay mangasawa o miasawa, tan no makaawat tayoy instruksion manlapud organisasyon. Diad kada situasyon, pantongtongan tayo no anto ray nepeg tayon gawaen pian makapandesisyon tayoy duga.

NO MANAANAP KAY TRABAHO

5. Antoy sakey ed saray ikokonsidera tayo antis tayon awaten so sakey ya trabaho?

⁵ Normal met labat ya labay tayoy nawalaan na trabaho pian walay pansuporta tayod sarili tayo tan ed pamilya tayo. (Ecl. 7:12; 1 Tim. 5:8) Wala ray trabaho ya mas baleg so sueldo no ikomparad arum. Lapud satan, say sakey ya empleyado et nasusuportaan toy inagew-agew ya pankaukolan na pamilya to, tan ompan wala ni ingey sulok kanian makakatipon. Pero wala met iray trabaho ya melag labat so sueldo, kanian dugaruga labat ed inagew-agew ya gastos na pamilya. No mandedesisyon ka no kasin awaten mo so sakey ya trabaho, siempre natural met labat ya ikonsideram no pigaray sueldoen mo. Pero no ditan mo labat ibase so desisyon mo, manaakar ka unong ed pakanengneng, aliwan unong ed pananisia.

6. Panon tayon nipanengneng ya manaakar tayo unong ed pananisia no manaanap tayoy trabaho? (Hebreo 13:5)

⁶ No manaakar tayo unong ed pananisia, isipen tayo met no antoy epekto to may aaplayan tayon trabaho ed relasyon tayod si Jehova. Tepetan moy sarilim: ‘Kasin lapud sayan trabaho et makagawa ak laingen na saray bengatlan kabusol nen Jehova?’ (Pro. 6:​16-19) ‘Kasin apektoen toy pipiaral ko, pati say eskedyul ko ed panagpulong tan panag-personal study, tan mabayag ak ya makaarawi ed pamilyak?’ (Fil. 1:10) No say ebat ed saratan ya tepet et on, mas maabig no agmo la aawaten itan ya trabaho, anggano mair-irap so mananap na trabaho ed lugar yo. On, no manakar ka unong ed pananisia, nanengneng ed desisyon mo ya baleg so tiwalam ya manggawan-manggaway paraan si Jehova pian nitarya iray pankaukolan mo.—Mat. 6:33; basaen so Hebreo 13:5.

7-8. Panon ya nanakar unong ed pananisia si Brother Javier ya taga South America? (Nengnengen met so litrato.)

⁷ Imanoen so eksperiensya nen Brother Javiera ya taga South America tan no panon ton apruebaan ya talagan importante so manakar unong ed pananisia. Kuan to: “Diad kompanyan pantratrabahoan ko, nanaplay ak parad mas atagey ya posisyon ya doble so sueldo no ikomparad samay datin trabahok. Tan atan may trabaho ya talagan labalabay kon gawaen.” Pero diad saman ya panaon et talagan plano met la nen Javier so manpayunir. Onia ni imbaga to: “Akaeskedyul ak lan interbyuen na national manager. Pero antis na interbyu, nampikasi ak ya tulongan ak komon nen Jehova ya makapandesisyon na duga, ta kombinsido ak ya sikato so makaamta no antoy sankaabigan parad siak. Tua, labay koy na-promote ed mas marakep ya trabaho, pero no makaamper itan ed pampayunir ko, agko ’tan awaten.”

⁸ Oniay intuloy nen Javier: “Legan na interbyu, imbaga to may manager ya kaukolan koy man-overtime ya lanang. Pero marespetok ya imbagad sikato ya agak nayarin man-overtime ta naapektoay panagdayew ko.” Kanian agla inawat nen Javier imay trabaho. Kayari duay simba, nampayunir la. Diad saman met lanlamang ya taon, akalmoy part-time ya trabaho si Javier. Oniay imbaga to: “Dinengel nen Jehova so pikakasik, tan tinulongan to ak ya makalmoy trabaho ya dugaruga ed eskedyul kod panagpulong tan nasuportaan koy pampapayunir ko. Malikeliket ak ta mas dakel la natay panaon ko parad si Jehova tan parad saray agagi.”

9. Antoy naaralan mod eksperiensya nen Trésor?

⁹ Panon to no nalilikas mo ya lapud trabahom et nanairapan kan manakar unong ed pananisia? Antoy gawaen mo? Makaaral kad eksperiensya nen Brother Trésor ya taga Congo. Kuan to: “Akaloob ak ed trabaho ya abayag ko lan papangarapen. Triple so sueldok no ikomparad samay datin trabahok, tan atagey so pakanengneng na totoo ed siak.” Pero say problema, halos agla makakapiaral si Trésor ta lanang ya mano-overtime. Tan no maminsan ingen, susugsogan na saray katrabaho to ya mantila. Labay la nen Trésor so man-resign, pero aburido ya ompan agla makaanap na arum ya trabaho. Antoy akatulong ed sikato pian makapandesisyon na duga? Kuan to: “Akatulong ed siak imay nabasad Habacuc 3:​17-19. Atalosan ko ya no bilang ta onekal ak ed saman ya trabaho tan mas melag lay almoen ko, agak paulyanan nen Jehova. Kanian nan-resign ak.” Oniay intuloy to: “Iisipen na dakel ya kompanya ya no baleg so isuesueldo dad sika, iter mo lan amin parad sikara, anggano napaulyanan mo lad tay pamilyam tan espiritualidad mo. Kanian misatsalamat ak ta aprotektaan koy relasyon ko ed si Jehova tan ed pamilyak. Kalabas na sakey taon, tinulongan ak nen Jehova ya makalmoy trabaho ya dugaruga met labat so sueldo tan mas dakel so panaon kod panaglingkor. No iyuna tayoy Jehova ed bilay tayo, ompan kaukolan tayoy mansakripisyo ta wala ray panaon ya onkulang tayod pinansyal. Pero say segurado, asikasoen to tayo tan agto tayon balot paulyanan.” On, no manmatalek tayod saray bilin tan sipan nen Jehova, tuloytuloy tayon makapanakar unong ed pananisia, tan bendisyonan to tayo.

NO LABAY MO LAY MANGASAWA O MIASAWA

10. No pampili na kapareha ed bilay so pantongtongan, panon tayon nibaga ya say sakey et manaakar unong labat ed pakanengneng?

¹⁰ Say pakawalaan na kapareha ed bilay et regalo ya nanlapud si Jehova. Kanian normal labat ya labay tayoy mangasawa o miasawa. Isipen pa so sakey ya sister ya labay to lay miasawa.b Nayarin say nengnengen tod sakey ya brother et say itsura, ugali, o reputasyon to. Nayarin ikonsidera to met so panagbilay to tan no kasin walay obligasyon tod pamilya. Tan natural met labat ya say labay ton brother et amay espisyal so panagtrato tod sikato. Importante met iratan ya amin. Pero no aratan labat so pangibasiyan toy desisyon to, sikatoy manaakar unong ed pakanengneng, aliwan unong ed pananisia.

11. Panon tayon nipanengneng ya manaakar tayo unong ed pananisia no mamipili tayoy kapareha ed bilay? (1 Corinto 7:39)

¹¹ Seguradon pap-proud si Jehova ed saray lingkor to ya uunoren da ray bilin to no mamipili ray kapareha ed bilay. Singa bilang, naliliketan si Jehova no say sakey ya Kristiano et ‘palampasen to ni ray taon na kalangweran’ antis ya miinaroan. (1 Cor. 7:36) Lapud sankanonot toy panlabayan nen Jehova, seseguroen to ya say napili ton asawa et amay walad sikato ray kualidad ya abitlad Biblia. Atan iramay kualidad ya imbaga nen Jehova ya nepeg ya ipanengneng na maong ya asawan laki tan maong ya asawan bii. (Pro. 31:​10-13, 26-28; Efe. 5:33; 1 Tim. 5:8) Seseryosoen to met imay bilin ya mangasawa o miasawa “dia labat ed Katawan,” kanian aga onkakaraw odino manpapakaraw ed sakey ya aliwan bautismadon lingkor nen Jehova. (Basaen so 1 Corinto 7:39.) No say sakey ya Kristiano et desididon manakar unong ed pananisia, nailaloan to ya manggawan-manggaway paraan si Jehova pian niiter so emosyonal ya pankaukolan to, ya mas ni nen say sarag ya iter na anggan siopan too.—Sal. 55:22.

12. Antoy naaralan mo ed alimbawa nen Rosa?

¹² Imanoen so eksperiensya nen Rosa ya payunir ed Colombia. Manbabangat si Rosa online, tan ditan to akabat so sakey ya laki ya aliwan Tasi, ya ginmusto ed sikato. Tan diad tua et labay met nen Rosa. Oniay kuan nen Rosa: “Maomaong met iyan laki, kabkabat ingen ya matulong diad lugar da, tan anggapoy bisyo to. Espisyal so panagtrato tod siak. Wala lad sikato so amin ya aanapen ko ed sakey ya asawa. Atan labat ta aliwan Tasi.” Oniay intuloy to: “Nen imbalikas to ya walay panggusto tod siak, nairapan ak ya ontanggi ta balibali may liknaan ya walay mangiiter ed siak na atension, lalo la ta diad saman et maer-ermen ak tan labay ko lay miasawa. Pero anggapoy naromog ko met ya brother.” Maong labat ta agnampokus si Rosa ed nanenengneng tan nalilikna to. Inisip to no antoy magmaliw ya epekto na desisyon to ed relasyon tod si Jehova. Kanian pinultot to so amin ya komunikasyon to ed saman ya laki tan nampokus la ed panaglingkor to. Ag-abayag, sikatoy naimbitaan ya manaral ed School for Kingdom Evangelizers, tan natan et manlilingkor la bilang espisyal payunir. Oniay imbaga nen Rosa: “Manleppua so liket diad pusok lapud karakel na bendisyon ya iiter nen Jehova.” On, aliwan lanang ya mainomay so manakar unong ed pananisia, lalo la no say kalaban mo et say mismon pusom. Pero no iyunam so panlabayan nen Jehova, anggapon balot so pagbabawian mo.

NO MAKAAWAT TAYOY INSTRUKSION MANLAPUD ORGANISASYON

13. Antoy sakey ya rason akin et nanairapan tayon onunor no maminsan ed instruksion manlapud organisasyon?

¹³ Mabetbet tayon makakaawat na saray instruksion ya manlalapud saray elder, manangasikaso na sirkito, branch office, tan Mananguley ya Ulop. Makakatulong iratan ya instruksion pian organisado so panaglingkor tayod si Jehova. Pero panon to no akaawat tayo na instruksion tan agtayo natatalosan no akin ya ontay ipapagawa rad sikatayo? No ontan, ompan panduaruwaan tayo la no kasin duga imay naawat tayon instruksion. Tan ompan kuestionen tayo met la iray brother ya angiter ed satan, lalo la no say nanenengneng tayo et saray kakapuyan da.

14. Panon tayon nipanengneng ya manaakar tayo unong ed pananisia no akaawat tayoy instruksion manlapud organisasyon? (Hebreo 13:17)

¹⁴ No akaawat tayoy instruksion manlapud organisasyon, panon tayon nipanengneng ya manaakar tayo unong ed pananisia? Mantiwala tayo ya si Jehova so mangigigiya ed organisasyon to, tan amta toy amin ya nagagawa. No atan so sankanonot tayo, mabulos tan maliket tayon onunor. (Basaen so Hebreo 13:17.) No maunor tayo, makakatulong tayo pian mansiansiay pankakasakey ed kongregasyon. (Efe. 4:​2, 3) Anggano aliwan perpekto iray brother ya mangidadaulo, ontulok tayod sikara ta amta tayon importantin maong ed si Jehova so katutulok tayo, tan bendisyonan to itan. (1 Sam. 15:22) No talagan wala bilang so kaukolan ya ipetek, manmatalek tayo ya ipetek lanlamang itan nen Jehova diad dugan panaon.—Miq. 7:7.

15-16. Antoy akatulong ed sakey ya brother pian makapanakar unong ed pananisia anggano panduaruwaan to may instruksion ya naawat da? (Nengnengen met so litrato.)

¹⁵ Imanoen so sakey ya eksperiensya ya mangipapanengneng ya talagan maabig so resulta no manakar tayo unong ed pananisia. Diad Peru, say maslak ya lenguahe na totoo et Español, pero dakel met so mansasalita na katutubon lenguahe. Sakey ed saratan ya lenguahe et say Quechua. Nensaman, say gagawaen na saray agagi et aanapen da ed teritorya da iray totoon mansasalitay Quechua. Pero, pian naunor na agagi so balon batas na gobierno, akaawat iray pananguman no panon dan anapen iray ontan ya totoo. (Roma 13:1) Nen naawat da itan ya instruksion, inisip na arum ya agagi no talaga kasin praktikal tan epektibo itan. Pero inmunor ni ran siansia ed satan ya pananguman, tan anengneng da ya benendisyonan nen Jehova so sagpot dan mananap na saray totoon mansasalitay Quechua.

¹⁶ Say sakey ed saray nanduaruwa ed samay balon instruksion et si Kevin, ya elder ed sakey ya Quechua congregation. Kuan to: “Naisip ko, ‘No oniay gawaen mi, wala ni kasi naromog mi ya mansasalitay Quechua?’” Antoy ginawa nen Kevin pian makapanakar unong ed pananisia? Kuan to: “Dinalepdep ko may walad Proverbio 3:5. Tan inisip ko met so alimbawa nen Moises. Nen papaway la ray Israelita ed Ehipto, ingganggan nen Jehova si Moises ya idaulo to ra paarap ed Ambalangan Dayat. Pero no ditan so arapen da, matmainomay iran nausilan na saray Ehipsio. Anggano agnatatalosan nen Moises no akin ya onmay ipapagawa nen Jehova, inmunor nin siansia tan benendisyonan nen Jehova so intulok to. Inliktar To ray Israelita diad makapakelkelaw ya paraan.” (Exo. 14:​1, 2, 9-11, 21, 22) Nen dinalepdep itan nen Kevin, mabulos ya tinmulok ed balon instruksion. Antoy resulta ey? Kuan to: “Pandinayewan koy impamendisyon nen Jehova ed ministeryo mi. Dati, puros akar so gagawaen mi, tan sakey o duara labat ya mansasalitay Quechua so naromog mi. Pero natan, lapud manpopokus kami lad saray lugar ya dakel so mansasalitay Quechua, mas dakel so nakakatongtong mi. Dinmakel met so RV tan iyaaralan mi na Biblia. Tan naaruman met so onaatendi ed saray aral mi.” On, no manakar tayo unong ed pananisia, seguradon bendisyonan to tayo nen Jehova.

17. Antoy naaralan mod sayan artikulo?

¹⁷ Talora labat ya situasyon so nantongtongan tayo ed sayan artikulo. Pero anggan anto ni tay situasyon, importante ya itultuloy tayoy manakar unong ed pananisia diad amin ya desisyon tayo—singa bilang, no manpipili tayoy libangan, no anton klase na edukasyon so laen tayo, tan no panon so pamabaleg tayod saray ananak tayo. Komon ta agtayo labat ikokonsidera iray nanenengneng tayo, noagta isipen tayo met no antoy epekto na desisyon tayo ed relasyon tayod si Jehova. Manpaigiya tayod saray bilin to, tan lanang tayon isipen imay sipan to ya agto tayon balot paulyanan. No ontan so gawaen tayo, ‘makapanakar tayo ed ngaran nen Jehova a Dios tayo ed anggad angga’!—Miq. 4:5.