“Sakey Kan Pinabpabli”

1-2. Antoy makatulong pian panisiaan tayo ya mabmabli tayod si Jehova?

INAR-ARO nen Jehova iray lingkor to. Pero iisipen na arum ya lingkor to ya agda kanepegan so naaro, tan abebbeba ingen so pakanengneng dad sarili da. Seguro ontan so nalilikna ra ta impalikna na arum ya too ya anggapoy kuenta ra. Kasin ontan met so naliliknam? Antoy makatulong pian panisiaan mo ya mabmabli ka ed si Jehova?

² Dakel so salaysay ed Biblia ya pakanengnengan ya labay nen Jehova ya nalikna tayoy panangaro tan respeto. Maabig no basam iratan ya salaysay. Nen wadiad dalin si Jesus, maomaong tan marespeto so impantrato tod saray totoo, anggan diad saramay abebbebay pakanengneng dad sarili da. Impalikna tod sikara ya importante ran maong ed sikato tan ed Ama to. (Juan 5:19; Heb. 1:3) Pantongtongan tayod sayan artikulo no antoy ginawa nen Jesus pian nalikna na totoo ya mabmabli ira ed si Jehova. Pantongtongan tayo met no panon tayon nakombinse so sarili tayo ya talagan mabmabli tayod Dios.—Ag. 2:7.

ANTOY GINAWA NEN JESUS PIAN NALIKNA NA TOTOO YA MABMABLI IRAD SI JEHOVA?

3. Panoy impantrato nen Jesus ed saray tagad Galilea?

³ Diad samay komatlon inyakar nen Jesus ed Galilea pian manpulong, dakel ya totoo so linmad sikato ta labay day ondengel ed bangat to tan labay da met so onabig ed sakit da. Nen anengneng ira nen Jesus, akasian to ra ta “singa ra kinatatan tan pinaulyanan a karnero ya andiay managpastol.” (Mat. 9:36; nengnengen iray study note diad nwtsty-TG.) Anggapoy pibabali na saray lider na relihyon ed sarayan totoo ta ignorante ra kunon maong, tan tinawag da ni ra ingen ya “nisamban totoo.” (Juan 7:47-49; nengnengen so study note diad nwtsty-TG.) Duma balet si Jesus ta inikdan to ray panaon tan atension. Imbangat tan pinaabig to ra. (Mat. 9:35) Impasal to met ya manpulong iray apostol to tan inikdan to ray pakayari ya manpaabig pian mas dakel nin totoo so natulongan.—Mat. 10:5-8.

4. Antoy naaralan tayod impantrato nen Jesus ed saray totoon memelmelagen na arum?

⁴ Antoy naaralan tayo ed maomaong tan marespeton impantrato nen Jesus ed saray totoon memelmelagen na arum? Naaralan tayod satan ya mabmabli ed si Jesus tan ed si Jehova so sakey ya too anggano abebbebay pakanengneng na arum ed sikato. No manlilingkor kad si Jehova pero say pakaliknam nin siansia et anggapoy kanam, isip mo may impanengneng nen Jesus ya atension ed saray ordinaryon totoo ya dinmengel ed bangat to. No dalepdepen mo itan, diman mo natalosan ya mabmabli ka ed si Jehova.

5. Antoy situasyon to may bii ya akabat nen Jesus ed Galilea?

⁵ Aglabat binangatan nen Jesus iray totoo, impanengneng to met so personal ya interes ed kada sakey ed sikara. Singa bilang, nen aminsan ya manpupulong ed Galilea, walay akabat ton bii ya 12 ya taon lan manpaparala. (Mar. 5:25) Base ed Ganggan, agmalinis iyan bii, tan siopaman ya mandiwit ed sikato et magmaliw met ya agmalinis. Kanian imadyin mo pay situasyon to yan bii. Seguradon bukbukor ton lanang ta aarawian na arum. Anggano labalabay to komoy mandayew ed si Jehova kaibay arum, aga balet makaonla ed sinagoga o diad saray Piesta. (Lev. 15:19, 25) Anta nanairapan la lanti lapud sakit to, akaaru-arum nid belat na liknaan to imay singa anggapoy mangaaro ed sikato.—Mar. 5:26.

6. Panon ya inmabig imay biin manpaparala?

⁶ Labay na sayan bii ya paabigen nen Jesus pero agto labay so direktan mitongtong ed sikato. Akin kasi? Seguro nababaingan ta marutak so pakanengneng tod sarili to. Odino ompan inisip to ya pampasnokan nen Jesus no nanengneng ton akiletletan ed saray totoo anta agmalinis. Pero lapud mabisbiskeg so pananisia to ya talagan napaabig nen Jesus, oniay imbaga tod sarili to: “No nadiwit ko labat so kawes [nen Jesus], onabig ak la.” (Mar. 5:27, 28) Tan ag-alingolingo, inmabig nen adiwit toy kawes nen Jesus! Nen tinepetan nen Jesus iray totoon wadman no siopay aniwit ed sikato, inamin na sayan bii no antoy ginawa to. Antoy reaksion nen Jesus?

7. Panoy impantrato nen Jesus ed samay bii? (Marcos 5:34)

⁷ Nen kaarap la nen Jesus imay bii, naimano to ya “natatakot tan manggiwgiw.” (Mar. 5:33) Kanian maomaong tan maar-aroy impitongtong nen Jesus ed sikato. Tinawag to ni ingen ya “ana’ko.” (Basaen so Marcos 5:34.) Diad Biblia, diad sayan salaysay labat nabasa ya tinawag nen Jesus so sakey ya bii ya “ana’ko.” Seguro atan so salitan inusar to ta alikas to ya mannerbiyos tan abupburido imay bii. Imadyin mo pay reaksion to may bii nen arengel ton tinawag nen Jesus ya “ana’ko.” Seguradon nainawaan ta aliklikna toy malasakit nen Jesus! Panon to no aliwan onmay impitongtong nen Jesus ed sikato? Inmabig ya tua pero nakokonsiensia balet. Aglabay nen Jesus ya ontan so nalikna to. Impaseguro nen Jesus ed sayan bii ya inad-aron anak so turing ed sikato nen Jehova.

8. Antoy kipapasen na sakey ya sister ya tagad Brazil?

⁸ Diad panaon tayo, wala met iray lingkor na Dios ya nadi-depress lapud sakit o kapansanan da. Say sakey et si Sister Mariaa ya regular payunir ed Brazil. Nen inyanak si Maria, sipor la ya anggapoy sali to tan kawigin lima to. Kuan to: “Lanang ak ya nabu-bully diad eskuelaan. Nasasakitan ak ta nambabangil so pangaran ed siak na saray kaklasek. No maminsan ingen, anggan saray mismon kapamilyak, ipapalikna dan anggapoy kanak.”

9. Antoy akatulong ed si Maria pian nalikna to ya sikatoy mabmabli ed si Jehova?

⁹ Antoy akatulong ed si Maria pian naligliwa? Nen nagmaliw ya Tasi nen Jehova, impaliknad sikato na saray agagi ya inar-aro da, tan lanang dan ipapanonot ed sikato ya mabmabli ed si Jehova. Kuan to: “Kulang so notebook ko ya pangisulatan koy amin ya tinmulong tan amaseseg ed siak. Misatsalamat ak ya maong ed si Aman Jehova ta inikdan to ak na maar-aron pamilya diad kongregasyon.” On, lapud panangaro na saray agagi, alikna nen Maria ya sikatoy inar-aro nen Jehova.

10. Antoy kipapasen nen Maria Magdalena, tan antoy epekto to ’tan ed sikato? (Nengnengen met so litrato.)

¹⁰ Imanoen no panon ya tinulongan nen Jesus so sakey nin bii—si Maria Magdalena. Aselepan na pitoran demonyo si Maria Magdalena! (Luc. 8:2) Ompan aliwan normal tan makapataktakot so panagsalita tan kakikiwas to ta kokontrolen na saray demonyo. Seguro diad pakanengneng na arum, walay deral na ulo to kanian iiwasan da. Pakaskasi si Maria Magdalena. Miserable so bilay to, tan seguro inisip to ya anggapoy mangiyaansakit ed sikato tan anggapo met lay ilalo ton ompawil ed normal. Maong labat ta pinapaway nen Jesus iramay demonyo ya sinmelep ed sikato, tan nagmaliw ya disipulo to. Anto ni ginawa nen Jesus pian nipalikna tod si Maria ya sikatoy mabmabli ed Dios?

11. Panon ya impalikna nen Jesus ed si Maria Magdalena ya sikatoy mabmabli ed Dios? (Nengnengen met so litrato.)

¹¹ Intagar nen Jesus si Maria Magdalena ya milad sikato tan ed arum nin disipulo diad pampupulong dad nanduruman lugar.b Kanian pribilehyo ton narengel ya mismo so pambabangat nen Jesus ed saray totoo. Sakey met si Maria Magdalena ed saray sankaunaan ya nampanengnengan tan kinatongtong nen Jesus diad samay agew na inkioli to. Sikato ingen so ingganggan nen Jesus ya mangibalitad saray apostol to ya apaoli la. Prueba iratan ya talagan mabmabli si Maria Magdalena ed si Jehova!—Juan 20:11-18.

12. Akin ya say pakalikna nen Lidia et anggapoy mangiyaansakit ed sikato tan agto kanepegay naaro?

¹² Wala ray agagi natan ya nalilikna da met imay alikna nen Maria Magdalena, ya singa anggapoy mangiyaansakit ed sikara. Imanoen so eksperiensya nen Sister Lidia ya tagad Spain. Naamtaan nen Lidia ya nen lukon ni labat nen nanay to, labay to lan ipaekal. Nen ugaw ni kuno, agto aliknay panangaro nen nanay to. Say tinmatak ed isip to et iramay ansasakit ya imbagbagad sikato nen nanay to. Oniay imbaga nen Lidia: “Nen baleg ak la, say lanang ya walad isip ko, wala komoy mangaro ed siak. Pero diad loob-loob ko, agko kanepegay naaro ta mauge-uges ak ya too. Atan so impalupa ed siak nen nanay ko manlapu la nen ugaw ak.”

13. Antoy akatulong ed si Lidia pian natalosan ton sikatoy mabmabli ed si Jehova?

¹³ Nen naamtaan nen Lidia so katuaan, balbaleg kunoy nitulong ed sikato na pikakasi, personal study, tan say kamaongan tan panamaseseg na agagi pian natalosan to ya sikatoy mabmabli ed si Jehova. Oniay imbaga nen Lidia: “Lanang ya ibabagad siak nen asawak ya inar-aro to ak. Ipapanonot ton lanang ed siak iray balibalin ugalik. Ontan met so gagawaen na saray kakaarok.” Ompan wala ray kakongregasyon yo ya singa si Lidia. Anto kasi nitulong mod sikara pian nalikna ran mabmabli ira ed si Jehova?

PANON TAYON NAKOMBINSE SO SARILI TAYO YA MABMABLI TAYOD SI JEHOVA?

14. Base ed 1 Samuel 16:7, antoy nenengnengen nen Jehova ed sikatayo? (Nengnengen met so kahon ya “Akin et Mabmabli ed si Jehova Iray Lingkor To?”)

¹⁴ Tandaan mo ya say pakanengneng nen Jehova ed sika et duma ed pakanengneng na mundo. (Basaen so 1 Samuel 16:7.) Diad sayan mundo, ipapasen dan importante so sakey ya too no mayaman, atagey so inaral to, odino walay itsura to. Pero aliwan ontan si Jehova. (Isa. 55:8, 9) Kanian agka manpapaimpluensya ed estandarte na sayan mundo. Agmo ibabase so pakanengneng mod sarilim ed pakanengneng na arum. Say nonot mo et no antoy pakanengneng nen Jehova ed sika. Basam iray salaysay ed Biblia nipaakar ed saray lingkor to nensaman ya alikna dan anggapoy kana ra, singa si Elias, Noemi, tan Hana. Legan mon babasaen iratan, imanom no panon ya impalikna nen Jehova ed sikara ya mabmabli rad sikato. Marakep met no isulat mo ray agmo nalinglingwanan ya agawad bilay mo ya alikliknam so panangaro nen Jehova. Wala met iray publikasyon tayo ya say topic to et nipaakar ed malasakit tan panamabli nen Jehova ed saray lingkor to. Maabig no basam iratan.c

15. Akin et “sakey [ya] pinabpabli” so pakanengneng nen Jehova ed si Daniel? (Daniel 9:23)

¹⁵ Tandaan mo ya papablien nen Jehova so panmamatoor mod sikato. Nen ngalngali la 100 so taon nen propetan Daniel, wala may panaon ya kinmakkapuy so liknaan to tan “naknaksawan.” (Dan. 9:20, 21) Pian ombiskeg so liknaan nen Daniel, imbaki nen Jehova si anghel Gabriel pian ipanonot ya sikatoy “sakey [ya] pinabpabli” tan ipasegurod sikato ya dinengel na Dios iray pikakasi to. (Basaen so Daniel 9:23.) Akin et mabmabli ed Dios si Daniel? On ta inaro toy inkatunong tan matottoor. (Eze. 14:14) Impaisulat nen Jehova diad Biblia iyan salaysay pian ombiskeg met so liknaan tayo. (Roma 15:4) Singa si Daniel, no inarom met so inkatunong tan matoor kad si Jehova, makaseguro ka ya mabmabli ka ed sikato tan dengelen to met iray pikakasim.—Miq. 6:8, paimanod leksab; Heb. 6:10.

16. Antoy makatulong pian ituring moy Jehova bilang maar-aron Ama?

¹⁶ Tandaan mo ya maar-aron Ama si Jehova. Walad sikay atension to lapud labay to kan tulongan, aliwan lapud aanapan to ka na lingo. (Sal. 130:3; Mat. 7:11; Luc. 12:6, 7) No dalepdepen mo itan, nalabanan mo may liknaan ya anggapoy kanam. Ontan so ginawa na dakel ya agagi. Singa bilang, imanoen so eksperiensya nen Sister Michelle ya tagad Spain. Dakel ya taon ton inanosan so ansakit ya panagsalita nen asawa to. Lapud satan, pakalikna to et anggapoy kana to. Oniay imbaga to: “Kada no onsagi ed isip ko ya anggapoy kuentak, iimadyinen ko ya singa ak eebaen nen Aman Jehova. Kada no iimadyinen ko ya singa ak melag ya ugaw ya walad taklay to, sankaliknak ya inar-aro to ak tan anggapoy nepeg kon pampagaan.” (Sal. 28:9) Onia met kunoy iisipen nen Sister Lauren ya tagad South Africa: “Ibabaga na Biblia ya inyasingger ak nen Jehova panamegley na bedber na aro. Tan diad inlabas na saray taon, agto ak balot tinaynan. Uusaren to ak ingen pian ibangat so katuaan ed arum. Labay ton ibaga sirin, walay kanak tan mausa-usar ak ed sikato.”—Os. 11:4.

17. Antoy uusaren nen Jehova pian nipaseguro tod sika ya aabobonan to ka? (Salmo 5:12) (Nengnengen met so litrato.)

¹⁷ Tandaan mo ya aabobonan ka nen Jehova. (Basaen so Salmo 5:12.) Labay ton ibaga, naliliketan ed sika. Imbaga nen David ya say panangabobon nen Jehova et singa “baleg a panagsamper” ya manproprotekta ed saray matunong ya totoo. No kombinsido ka ya aabobonan ka nen Jehova, atan so manprotekta ed isip mo pian nalabanan mo may liknaan ya anggapoy kanam. Panon ya ipapaseguro nen Jehova ed saray lingkor to ya aabobonan to ra? Singa abitla nen niman, uusaren to so Biblia. Uusaren to met iray elder, saray kakaarom, tan arum nin agagi pian ipanonot ed sika ya mabmabli ka ed pakanengneng to. Kanian no walay mamaseseg ed sika, anto dapat so reaksion mo?

18. Akin et labay nen Jehova ya awaten tayoy komendasyon na arum?

¹⁸ No komendaan ka na arum, awat moy komendasyon da, lalo la no nanlapu itan ed saray agagi ya talagan makapikabat tan mangaaro ed sika. Ompan sikara so uusaren nen Jehova pian naliknam ya aabobonan to ka. Oniay imbaga nen Michelle ya abitla nen niman: “Agak apasal ya walay mangaapresya ed siak. Pero kalkalnak lanlamang ya naaralan ya awaten so komendasyon na arum. Nairapan ak nen unaan. Pero amtak ya labay nen Jehova ya awaten koy apresasyon na agagi.” Balbaleg kunoy nitulong ed si Michelle na saray maar-aron elder ed kongregasyon da. Natan et manlilingkor la bilang payunir tan Bethel remote volunteer.

19. Akin et makapantiwala ka ya mabmabli ka ed si Jehova?

¹⁹ Impuppurek nen Jesus ya mabmabli tayo ed si Aman Jehova. (Luc. 12:24) Si Jesus lan mismoy angibaga kanian makapantiwala tayo ya importante tayon maong ed Ama tayo. Agmon balot itan lilingwanan! Tan komon et gawam met so anggaay nayarian mo ya tulongan so arum pian natalosan tan nalikna ra ya mabmabli ira ed si Jehova!