Kasin Makatulong so Biblia Pian Magmaliw ya Maliket so Pamilyak?

Say ebat na Biblia

On. Nia ray pigaran makabat ya bilin base ed Biblia ya akatulong ed minilyon ya lalaki tan bibii pian magmaliw ya maliket so pamilya da:

1. Gawaen ya legal so kasal yo. No legal so kasal yo, walay sipanan yon man-iba ya legay bilay, tan satan so pundasyon na maliket a pamilya.​—Mateo 19:4-6.

2. Ipanengneng so panangaro tan respeto. Dapat mon tratoen so asawam diad paraan ya labay mon pantrato tod sika.​—Mateo 7:12; Efeso 5:25, 33.

3. Agmansasalitay ansakit. Anggano walay imbaga o ginawa na asawam ya makapasakit, siansian mauyamo kan mansalita. (Efeso 4:31, 32) Duga may ibabaga na Biblia diad Proverbio 15:1: “Say maulimek ya ebat et pakepaen toy pasnok, balet say ansakit a panagsalita et palooren toy sanok.”

4. Manmatoor ed sakey tan sakey. Nepeg ya say romantikon liknaan tan seksual ya interes mo et para labat ed asawam. (Mateo 5:28) Ibabaga na Biblia: “Komon ta say panangasawa et galangen na amin a totoo, tan ag-itan komon narutakan.”​—Hebreo 13:4.

5. Maaron bangatan iray anak yo. Agyo ra palpaulyanan ya gawaen day labay da pero agkayo met masyadon mapegpeget.​—Proverbio 29:15; Colosas 3:21.