Siopa Iray Nefilim?
Say ebat na Biblia
Saray Nefilim et higante ya bayolenti tan mas mabiskeg nen saray ordinaryon totoo, tan ilalak ira na saray mauges ya anghel tan saray bibii ed dalin ya inasawa ra diad panaon nen Noe.a
Ibabaga na Biblia ya “naimano na saray anak na tuan Dios a maganggana iray bibiin ananak na totoo.” (Genesis 6:2) Saraman ya ‘ananak na Dios’ et espiritun pinalsa ya nanrebelde ed Dios nen “tinaynan da so manepeg ya ayaman da” diad tawen, tan nansulong iray laman na too, tan “inala ran asawa so amin ya apili ra.”—Judas 6; Genesis 6:2.
Aliwan ordinaryon ananak so apawala lapud sayan sebel ya panangasawa. (Genesis 6:4) Saray Nefilim et higanten managpairap tan pinano day dalin na inkaruksa. (Genesis 6:13) Deneskribe ira na Biblia ya “mabibiskeg ed saman a panaon, bantog a lalaki.” (Genesis 6:4) Akabkabat ira lapud inkaruksa da tan makapataktakot ira.—Genesis 6:5; Numeros 13:33.b
Lingon pakatalos nipaakar ed saray Nefilim
Lingon pakatalos: Saray Nefilim et mabilay ni anggad natan diad dalin.
Katuaan: Dinelap nen Jehova so interon dalin pian deralen so maruksan mundo nensaman. Inatey so amin ya Nefilim tan mauges ya totoo. Balet si Noe tan say pamilya to et pinaboran nen Jehova tan sikara labat so nansiansian mabilay ed saman ya panaon.—Genesis 6:9; 7:12, 13, 23; 2 Pedro 2:5.
Lingon pakatalos: Say ama na saray Nefilim et totoo.
Katuaan: Saray ama ra et atawag ya “saray anak na tuan Dios.” (Genesis 6:2) Inusar na Biblia itan ya salita pian tukoyen iray anghel. (Job 1:6; 2:1; 38:7) Walay pakayari na saray anghel ya mansulong na laman na too. (Genesis 19:1-5; Josue 5:13-15) Binitla nen apostol Pedro so nipaakar ed saramay “niprison espiritu ya agtinmulok sanen maan-anos a manaalagar so Dios diad panaon nen Noe.” (1 Pedro 3:19, 20) Mipara itan ed imbaga na nansulat na Biblia a si Judas ya wala ray anghel ya “agnansiansia ed orihinal a pasen da, a tinaynan da so manepeg ya ayaman da.”—Judas 6.
Lingon pakatalos: Saray Nefilim et anghel ya imbantak diad dalin.
Katuaan: Ipapanengneng na konteksto na Genesis 6:4 ya saray Nefilim et aliwa ran anghel, noagta ananak ira na saray anghel ya nansulong na laman na too tan saray bibii diad dalin. Nen saray anghel et “inala ran asawa so amin ya apili ra,” imbaga nen Jehova ya kayari na 120 taon et deralen to iray mauges a totoo ed saman ya panaon. (Genesis 6:1-3) Nabasa nid satan ya “diad saraman ya agew,” saray anghel ya nansulong na laman na too et ‘inakdolan da ray bibiin ananak na totoo’ kanian nanilalak ira na “mabibiskeg ed saman a panaon,” saray Nefilim.—Genesis 6:4.
a Say Hebreon salita a literal ya impatalos a “Nefilim” et nayarin mankabaliksan na “Saray Manangitumba.” Ibabaga na Wilson’s Old Testament Word Studies ya satan a salita et ontutukoy ed saramay “mangitutumba ed totoo diad maruksan paraan tan panamegley na panagtakew, odino saramay sengegan ya natutumba so arum.”
b Mapatnag ya saray Israelitan espiya ya angibagad samay walad Numeros 13:33 ya wala ray anengneng dan angkakabaleg ya totoo et anonotan da ray Nefilim, ya pigan lasus taon lan inatey ed saman.—Genesis 7:21-23.