Conseho Practico pa Mamanan

Ya cu yiunan ta representa generacionnan di futuro, nan mamanan cu ta forma nan, sigur sigur merece respet, honor y coperacion. Maske e mundo moderno ta describi e rol di mama di un manera inconsistente, Bijbel ta afirma cu yiunan ta un bendicion for di Dios y por ta un fuente di felicidad pa mayornan. (Salmo 127:3-5) Sinembargo, e Scritura no ta ignora loke mamanan ta pasa aden. Bijbel ta relata hopi desafio cu nan ta haya nan cu ne.

E decisionnan cu mayornan ta tuma encuanto criamento di yiu y di bira mama tin un influencia profundo y permanente riba bida y personalidad di nan yiunan. E decisionnan aki por pone cu mayornan mester haci cambionan grandi den nan estilo di biba, pues nan tin cu tuma e decisionnan aki cuidadosamente. Pa haci esei nan mester considera preguntanan manera: E mama mester traha pafo di cas? Si ta asina, cuanto ora? Ken ta cuida e muchanan ora e mama ta na trabou? Finalmente, mayornan mester haci loke nan ta kere ta miho pa nan yiunan y tambe loke ta corecto den Dios su bista.

Pero mamanan no tin nodi sinti cu nan ta so den nan esfuersonan pa tuma decisionnan sabi. Nan por haya hopi consuelo di e palabranan na Isaias 40:11, cu ta indica cu Dios tin un interes special den e necesidadnan di mamanan cu tin baby chikito, kende e ‘lo guia cu ternura.’ Dios ta demostra e interes profundo ei mediante un cantidad di principionan biblico cu por duna un mama goso y exito.

❖ Sea Rasonabel: Cristiannan mester ta conoci como hende rasonabel. (Filipencenan 4:5, NW) Janet Penley cu ta escritor y mama a la bes, a siña e balor di e principio aki. E ta bisa: “Ora mi a bira mama mi tawatin expectativanan masha halto mes. Mi a purba di bira e miho mama cu a yega di existi. Mi a lesa tur buki y scucha tur experto cu ta trata topiconan asina. Pero en bes di sinti cu mi tawata un mama exitoso y competente, finalmente mi a sinti mi inadecua y yen di stress.” E ta splica cu “si bo presta atencion na loke otro hende ta spera y cumpli cu nan, y purba di adapta bo mes na un norma ‘perfecto’, esei ta kita bo entusiasmo y energia y ta pone bo worry y sinti bo culpabel.”

❖ Simplifica: E revista Newsweek a bisa: “Loke famianan ta core riesgo di perde den e estilo di bida sumamente druk aki ta, e esencia y e experencianan special di infancia y e goso di bida di famia.” Esei ta e motibo pakico hopi mama ta desea un bida mas simpel. Con bo por logra esaki? Na prome luga, pone prioridad, dunando atencion na “e cosnan mas importante”, cu ta inclui e tempo y cuido personal cu bo yiunan tin mester. (Filipencenan 1:10, 11, NW) Di dos, analisa e manera cu bo ta biba. Kisas bo tin cu leumai algun actividad y cos material cu no ta realmente necesario.

Kico ta mas importante den bo bida? Bo ta haciendo tur cos pareu, of bo por pospone algun meta mientras bo ta sigui tras di otronan? Carolyn, un mama cu tin recursonan limita, ta conta con e ta trata cu su situacion: “Mi ta mantene mi bida simpel y ta baha gasto.” Gloria, un mama di tres yiu, ta corda: “Nos no tawatin placa pa cumpra paña di marca, pero mi tawata cose paña pa e muchanan, y mi tawata bisa nan cu esakinan tawata special pasobra ningun otro mucha tawatin nan.”

E Palabra di Dios ta bisa cu un hende cu “warda comprendemento [discernimento, NW] lo haya bondad.” (Proverbionan 19:8) Discernimento ta necesario pa evalua e cantidad di actividad di recreo, aparatonan sofistica, y desaroyonan cu ta bira abrumador tanto pa mamanan como pa yiunan. Judith, un mama di Sur Africa, ta sclama: “Constantemente nan ta bombardia nos cu productonan nobo, miho tecnologia, y mas servicio!” Esaki ta e manera cu Angela, mama di cuater yiu na Alemania, ta trata cu e reto ei: “Bo tin cu determina kico ta esencial y util pa bo, y yuda bo yiunan pa haci mescos.”

❖ Haci cambionan caminda ta posibel: Bijbel ta duna e spiertamento pa uza “sano huicio y discrecion.” (Proverbionan 3:21, Beibel na papiamentu koriente) Si actualmente bo ta traha pafo di cas, bo famia por biba di e salario di bo esposo so? Pa yuda bo contesta e pregunta aki, determina cuanto placa bo ta bai cas cu ne despues cu bo caba di kita belasting, placa pa paga crèche, transport, paña, placa pa cumpra cuminda di restaurant y otro cosnan adicional. Y tambe tene na mente cu si bo pone bo salario hunto cu esun di bo casa, nan lo cobra bo casa mas belasting pasobra e ta cai den un schaal mas halto. Lo bo keda sorprendi con tiki a sobra.

Tin mama ta traha menos ora of mas cerca di cas, locual ta nifica menos placa pero mas tempo pa e muchanan. Si bo dicidi di stop di traha y si bo trabou tawata importante pa bo mantene bo balor propio y pa bo por sinti bo satisfecho, pensa kico lo bo por haci na cas mes pa mantene e cosnan importante aki.

❖ Busca yudansa: E Palabra di Dios bes tras bes ta mustra cu un “sclamacion pa yudansa” por duna resultado. (Exodo 2:23, 24; Salmo 34:15) Ora un mama sclama pa yudansa, su esposo mester haci caso di esei y yud’e. Hunto kisas boso por parti e trabounan di cas pa boso por tin tempo pa cumpli cu e metanan cu boso a pone hunto, manera dedica mas tempo na boso yiunan. Si ta posibel, un mama por pidi yudansa y animacion di varios hende, manera famianan y amigonan di confiansa, cu tin e mesun meta y interesnan cu ne.

Hopi mama ta haya yudansa practico di compañeronan creyente di e congregacion cristian local. María ta un mama cu tin tres yiu. El a realisa cu “hala cerca di e congregacion” ta un di e maneranan cu “Dios ta demostra amor y compasion na nos y ta demostra cu e ta precupa pa nos.”

❖ Pone tempo pa relaha: Asta Hesus, un homber perfecto cu tawatin masha hopi resistencia, a invita su disipelnan pa bai “na un luga solitario y sosega un rato.” (Marco 6:30-32) E exito cu lo bo tin como mama ta depende di bo habilidad di keda balansa durante temponan dificil. Ta berdad cu bo yiunan tin mester di bo, pero pa nan ta importante tambe pa bo ta felis y contento. Bo mester relax di un forma rasonabel.

Angela, cu nos a menciona caba, tin un manera pa e logra haya tempo pa relax: “Mi ta aparta tempo mainta ora ta keto. Mi ta tuma por lo menos mei ora pa mi mes. Anto ami cu mi esposo ta tuma un of dos anochi pa siman. E ora ei e muchanan sa cu nan tin cu bai un otro caminda den cas y haci algo einan sin haci bochincha. Di e manera ei nos por tin un ora pa nos mes.”

❖ Duna prioridad na bo spiritualidad: Ta notabel cu e desafionan di un mama ta bira mas grandi ora nan lubida kico ta nan proposito y nan no tin prioridad. Famianan cristian ta sinti nan felis ora nan traha hunto pa pone Dios su boluntad prome den nan bida. Apostel Pablo a skirbi: “Santidad [debocion na Dios, NW] ta probechoso pa tur cos, como cu e ta contene promesa pa e bida presente y pa esun cu ta bin.” (1 Timoteo 4:8) Un famia cu ta deboto na Dios y ta sigui Dios su guia biblico ta haya felicidad. Asta si ta un miembro so di e famia ta aplica principionan biblico, cos ta bai mas miho cu si ningun di nan ta aplic’e.

Adele, un mama cristian cu ta traha henter dia, a mira e beneficio di enfoca riba cosnan spiritual. E ta bisa: “Nos tin un cantidad grandi di guia y informacion den publicacionnan basa riba Bijbel cu ta siña nos kico nos yiunan ta pasando aden y con nos por yuda nan. Ora cu bo mira bo yiunan ta reacciona riba loke bo ta duna nan spiritualmente bo ta sinti cu bo esfuerso a bale la pena. Ora bo mira un poco progreso den nan comportacion y den nan manera di rasona, bo ta realisa cu nan a comprende e informacion y a acepta bo guia y cu bo tin exito.”a

Si, ta posibel pa un mama logra exito den e careda yen di obstaculo ei. Dios mes ta duna nan e siguransa y consuelo di cu e esfuerso diligente y sacrificio propio di mamanan cu ta confia den Dje lo no ta pornada. Mamanan cu cultiva un relacion personal cu ne por haya alivio y consuelo for di su promesa cu lo E “duna forsa na esun cansa.”—Isaias 40:29.

[Nota]

[Cuadro na pagina 10]

Influencia di un Mama

Como mama, kisas tin bes bo ta puntra bo mes ta ki impacto lo bo ta haciendo riba e bida di bo yiu. Tin bes e influencia di pareu, maestro, entretenimento, weganan di video y musica por parce di ta mas grandi cu esun di bo.

Considera e ehempel di Yokebed, mama di Moises. E tawata biba den un epoca sumamente dificil y no tawatin masha di bisa riba loke lo sosode cu su yiu. Sinembargo, el a uza e oportunidadnan cu e tawatin pa influencia su formacion. Prome, el a demostra fe yen di curashi door di no permiti nan mata Moises. Dios a recompensa su fe no solamente door di scapa e baby sino tambe door di percura pa cos bai di tal manera cu Yokebed por a sirbi como su yaya, y mama.—Exodo 1:15, 16; 2:1-10.

Ta bisto cu Yokebed tawatin influencia riba e personalidad di su yiu. Apesar cu Moises tawatin conexion real cu Egipto, ora el a bira adulto el a sinti su mes atrai na e Hebreonan y na nan Dios. Esei ta duna prueba cu su mayornan tawatin influencia riba dje durante su añanan di formacion.—Hebreonan 11:24-26.

Como mama probablemente bo tin mas oportunidad cu Yokebed di influencia bo yiu. Bo ta haciendo bon uzo di e tiki añanan di infancia di bo yiu pa dun’e instruccion duradero di Dios? Of bo ta laga e cultura actual eherce un impacto dominante riba e desaroyo di bo yiu?

[Plachinan na pagina 10]

Envolve otronan den e trabounan di cas, aparta tempo pa bo mes y duna prioridad na bo spiritualidad