E Conflicto Entre Ciencia y Religion

“Acaso e miho manera pa comprende religion ta di compar’e cu un malesa mental contagioso?”—Biologo Richard Dawkins.

HENDE sa mira religion y ciencia como enemigo mortal di otro. Pa algun, e lucha ta mustra asina tenaz cu ta un di nan lo tin cu stop di existi pa e otro triunfa.

Na un banda tin algun cientifico, manera e kimico Peter Atkins, cu ta kere cu religion cu ciencia simplemente no ta bai cu otro. Atkins ta bisa cu e creencia cu ta Dios a crea algo (piyo ainda, tur cos) ta un ofensa contra inteligencia.

Na otro banda tin hende religioso cu ta culpa ciencia di a caba cu fe religioso. Hendenan asina ta di opinion cu e ciencia di awendia ta un falsedad; su echonan kisas ta corecto, pero e malinterpretacion di e echonan ei ta debilita e creencianan di fielnan. Por ehempel, biologo William Provine ta bisa cu darwinismo (e teoria di evolucion biologico) ta nifica cu no tin “ningun fundeshi basico pa etica; ningun nificacion basico pa bida.”

Sinembargo, parti di e conflicto a desaroya debi cu ambos banda a bini cu afirmacionnan falso of cu no por ser comproba. Pa siglonan, lidernan religioso a siña leyendanan y doctrinanan eroneo cu ta na conflicto cu descubrimentonan cientifico moderno y cu no ta basa riba e Scritura inspira. Por ehempel, Iglesia Catolico Romano a condena Galileo pasobra el a conclui—anto corectamente—cu tera ta drei rond di solo. Ningun ora so e punto di bista di Galileo no a contradeci Bijbel, pero si e tawata contrario na loke iglesia a siña hende e tempo ei. Di otro banda, cientificonan tambe ta faya ora nan acepta e teoria sin base cu bida a evoluciona sin yudansa di Dios for di materia sin bida. Nan ta ridiculisa fe como algo cu no ta cientifico.

Pues anto, ta posibel pa kere tanto den ciencia como den religion? Si, por. De echo, ciencia comproba y religion berdadero ta complementa otro en bes di contradeci otro.

[Komentario di e plachi na página 3]

Galileo a siña un berdad cientifico pa cua iglesia a censur’e