Con Bijbel Por Yuda Hende Diabetico

DOMINIO PROPIO y un punto di bista positivo ta masha importante pa e salu y bienestar di hende cu diabetis. Pero pa e diabeticonan por cultiva e cualidadnan ei, nan tin mester di apoyo continuo. Pesei, miembronan di famia y amigonan no mester hinca un persona diabetico den tentacion pa come cuminda insaludabel, kisas door di bisa: ‘Un biaha so no ta haci nada.’ “Mi casa ta apoya mi hopi bon”, segun Harry, kende tin malesa di curason y diabetis Tipo 2. “Na mi cas no tin cos cu mi no tin mag di come. Pero tin hende cu no ta compronde esei, y nan no sa con dificil ta tin biaha ora bo tin e cosnan ei den cas.”

Si bo ta asocia regularmente cu un persona diabetico, corda e dos bunita principionan biblico aki: “No laga ningun hende busca su mes interes, sino esun di su prohimo”, y “Amor . . . no ta busca su propio interes.”—1 Corintionan 10:24; 13:4, 5.

Tur hende cu ta interesa den nan salu—sea cu nan tin diabetis of no—mester come na un manera modera. Bijbel ta yuda nos den esaki pasobra e ta mustra cu nos tur mester cultiva dominio propio. Bo a determina pa cultiva e cualidad aki den bo bida? (Galationan 5:22, 23) Bo por haya mas yudansa for di ehempelnan biblico, manera por ehempel esun di apostel cristian Pablo. Un persona cu diabetis a bisa: “E tawatin un sumpiña permanente den su carni, pero toch el a sirbi Dios fielmente y plenamente. Pues, ami tambe por!”

Si, Pablo a acepta loke e no por a cambia y e tawatin hopi exito como misionero. (2 Corintionan 12:7-9) Dustin di 18 aña di edad a nace ciego, y el a haya diabetis ora e tawatin 12 aña. El a skirbi: “Mi sa cu den e mundo aki no tin ningun hende cu tin tur cos perfecto. Mi ta spera ansiosamente riba e tempo den Dios su mundo nobo ora cu lo mi no tin diabetis mas. Pa mi e ta djis algo temporal. Podise e ta dura mas tanto cu un verkoud of grip si, pero un dia lo e kita.”

Ora Dustin a bisa e palabranan ei, e tawatin na mente e speransa cu Bijbel ta duna di haya salu perfecto den un paradijs riba tera bou dje Reino di Dios. (Revelacion 21:3, 4) E Palabra di Dios ta priminti cu bou di e gobierno dibino ei, “ningun habitante lo no bisa: ‘Mi ta malo.’” (Isaias 33:24; Mateo 6:9, 10) Lo bo kier siña mas tocante e promesa biblico aki? Tuma contacto cu Testigonan di Yehova den bo area, of skirbi publicadonan di e revista aki na e adres apropia menciona na pagina 5.

[Plachi na pagina 12]

Dominio propio y un punto di bista positivo ta masha importante