“E Tambu di Mil y un Cara”

DI E CORESPONSAL DI SPIERTA! NA SENEGAL

“E TA sclama, haci boroto, yora y grita. E ta fluister y e ta canta. . . . Ta e tambu cu ta saca tur tipo di tono, e tambu di mil y un cara.” Kico a stimula e imaginacion di e escritor aki? E tambu Africano cu nan ta yama djembe.

Djembe ta curason di e tradicion di toca tambu di algun tribu di West Africa. Cada ritmo tipico di djembe ta liga cu un of otro evento cultural di bida di pueblo, manera matrimonio, morto y nacemento, celebracionnan special, cosecha y asta paña nobo.

Tin diferente forma y tamaño di djembe. De echo, e paisnan di Burkina Faso, Guinea, Mali y Senegal cada un tin nan propio estilo unico di djembe. E instrumento ta wordo traha di un troncon solido, cu nan ta coba haci bashi y asina forma casca di e tambu. Algun di nan tin adorno simpel, mientras cu otronan ta ser labra cu dibuhonan elabora.

Unabes e casca ta cla, un trahado di tambu habil ta transforma e frame di palo den un instrument musical unico. Prome, e trahado di tambu ta rafina e casca cu beitel, caba feila y schuur e te ora cu e tin e midinan precis cu lo produci e zonido desea. E artesano aki kisas ta hunta e paden dje bari cu azeta di palma y ta lag’e seca den solo. Esaki ta yuda conserva e palo.

Nan ta traha e tapa di e djembe cu cuero di cabrito y ta peg’e na un renchi di metal y pon’e parti ariba dje bari. Nan ta ten’e na su luga door di cabuyanan gevlecht conecta na dos otro renchi. Con stijf e trahado di tambu ta hala e cabuyanan? Tur cos ta depende di e zonido cu e kier produci. Segun cu e artesano ta stel e tono, e ta control’e door di toca su ritmo preferi de bes en cuando.

Djembe ta encanta tanto Africano como bishitante. De echo, unabes bo presencia un presentacion improvisa di musiconan habil, ta dificil pa bo lubida “e tambu di mil y un cara.”